Xi sakʼoa chjonangiaa

◼ Jmé kjoafaʼaitsjen xi faʼaitʼa Biblia xi koa̱n koanngíntjenngiaa josʼin si̱chjén je celular kʼiatsa kjoajtín tiyoaa kʼoa tsa tiʼmiyasoán

“Tsen tjínle nichxin tojmeni xi ma.” (Ecl. 3:1.) Je celular nʼio machjén, nga̱ ma nikasén mensaje kʼoa ma nokjoaa tokʼiani mená. Tonga tjín nichxin nga tsín koa̱n si̱chjén, jolani kʼianga ya tiyoaa kjoajtínná nga ʼyaxkoán Jeobá. Ánni. Kuinga énle Niná sakóyaná kʼianga ya tiyoaa kʼoa bʼainganʼiongañálee xíngiaa (Deut. 31:12; Sal. 22:22; Rom. 1:11, 12). A koaan tsa si̱kitsʼoaa je celularná kʼoa kʼia chótsenlee tsa jme mensaje kafaʼainá nga jekuitjoaa ya Ndʼia jña chotʼayá. Kʼoa tsa jeʼyaa nga tjín xi kuinchja̱ná, tsa nʼio tjín xá, koaan kʼoasʼin si̱kʼéjnalee nga tsín ya katafane jinle xíngiaa.

Tojmeni xi sʼiaan kʼoasʼiaan “xi tʼatsʼe énnda [xi] tʼatsʼe Cristo” (1 Cor. 9:23). Sakʼoa koa̱n si̱chjén je celularná nga ʼmiyasoán. Tobʼelañá, je ndsʼee xi bʼasje grupo koaan sichjén celularle kʼiatsa je kuinchja̱le je xíngiaa xi tʼaxin kabʼakaole tjíotsoyason. Kʼoa kʼoati koa̱n kuinchja̱le celular jngo xíngiaa je chjota xi estudio tífitsjoále kʼoa tsa je xi sʼa tífikon ijngokʼale, kʼoa ngisa tsa kjin tjío chjota jebi. Tonga kʼoasʼin si̱kʼéjnalee je celularná nga tsín kʼia katafane nga énle Niná tichjakaoñá chjota (2 Cor. 6:3). Kʼoa tsa je tichoyalee xíngiaa xi kje bichójin, alikui ndatjín tsa celularla kuinókjoalee miyoná kʼoa tsa mensajela si̱kasénlee. Tosa je kuenta sʼiaan ndsʼee kao tichjaa xi ngikʼa xi jetjíotsoyason. Alikui koa̱n nga kjaʼaíla xá sʼiaan nga tiʼmiyasoán.

Kuenta sʼiaan je xi ngikʼa (1 Cor. 10:24; Filip. 2:4). Likui kʼoasʼin si̱kjaʼaitsjeen nga tsín jme xi tjínle ninga tsín tikuichoñá ya jñani tjíojtín je xíngiaa nga tjíofitsoyason kʼoa nga koa̱n to celular kuinókjoañá kʼoa tsa mensaje si̱kasénlee tsa ʼyani nga kʼoakatatsoná jñáni tjíotsoyason. Kʼianga jetojochon bichoaa, ijngokʼa tikʼia sʼendajinngáni ʼya xi kuitjokao xíngiaa. Kjoaixi nga sakʼoa toʼi̱ma tjín xi síkʼachxinná kʼoa tsín xátí bichoaa. Tonga tsa kʼoénelee yaoná nga xátí kuichoaa ngantsjai kui xi tsonile nga kuenta tinʼia josʼin tjínndajinle Jeobá, je ndsʼee xi bʼasje grupo kʼoa kao je ndsʼee kao tichjaa xi ngikʼa.