Chjénngilee je profetale Niná: Miqueas
1. Jméni xi tsakui nichxin kiskonangile yaole je Miqueas, kʼoa ánni nga tsín toxitsjoasíni nga tsakájinkon je naxinandá Israel kao Judá.
1 Tsakui nichxin sakʼoa chjonangilee yaoná kʼiáni kjoetʼa jmeni xi chon sonʼnde. Tochale tsa kʼoati kui kiskonangile yaole je profeta Miqueas jokjitse nga tsakájinkon je naxinandá Israel kao Judá nga sikjeson Jeobá nga jao naxinandá jebi. Tonga alikui toxitsjoa nga kʼoakisʼin. Kʼianga nó 740 nga kjesa chʼajin nó 1 tsabesa je Miqueas nga kʼoasʼin kinikjeson je naxinandá Samaria (Miq. 1:6, 7). Kʼoa xi koanskanni, kʼiaa kichonikje Jerusalén nga nó 607 nga kjesa chʼajin nó 1 (Miq. 3:12). Jósʼin chjénngilee ndʼaibi je Miqueas kʼianga tichoyalee jme xi sʼin Jeobá.
2. Ánni nga tsejta katamasíñá nga tichoyalee je nichxinle Jeobá, kʼoa jméni xi sʼiaan.
2 Tsejta katamaa. Je Miqueas itso xi kiski: “Tonga xi an, tje̱nyatokon koatejna xi kao Jeobá. Kao kjoatsejta skoyale je Niná xi kʼoasjentjaina” (Miq. 7:7). Nga kʼoakitso én jebi ali tsakuijin xi tsonile tsa tojyó tsakʼejna, tosa ñaki tsakʼénele yaole nga nda kisitjoson xále nga profeta koan. Kʼoatisʼinni tsanda ñá ndʼaibi, kʼianga tichoyalee je nichxinle Jeobá machjén nga ñaki kui kʼoasʼiaan je “kjoa xi tsje” tjín kʼoa nga jchaxkoán Niná (2 Ped. 3:11, 12). Kʼianga kʼoasʼin tsejta kjima Niná títjoʼndesale chjota nga koa̱n sikʼantjaiya yaole (2 Ped. 3:9). Kʼoa tojo tso je Biblia machjénní nga kʼoati tsejta katamaa jokisʼin Miqueas kʼoa kao profeta xi ngikʼa (Sant. 5:10).
3. Ánni nga tosi tonda si̱jénilee Niná je nganʼiotsjele.
3 Si̱nʼiotʼaa nga je Jeobá tsjoánganʼioná. Je xá xi kisʼenele Miqueas ali tsa choajin ñʼai tíjna, kuinga je Jeobá kisijésínile nganʼio nga katabasenkao (Miq. 3:8). Je Jeobá be nga kʼoati machjénná nganʼiole ndʼaibi kʼoa je Biblia kʼoatsoná nga koa̱n si̱jélee. Kʼiatsa kuijtajinná, je Jeobá tsjoáná jokji nganʼio machjénná kʼianga kuitjosonná je xá xi kjinená xi choʼndale maa (Sal. 84:5, 7; Is. 40:28-31). Ngatsʼiñá nga tiʼyaa josʼin títsjoánganʼioná je Jeobá jojekji tse nga tinixálee. Tonga machjénní nga tosi tonda si̱jélee Niná je nganʼiotsjele (Luc. 11:13).
4. Jméni choa̱ xi nʼio nda tsakʼéjnaná je Miqueas jokjitse tsakʼejna.
4 Je xi ngisa koanndosinle je Miqueas jokjitse tsakʼejna kuinga kisitjoson josʼin mele Jeobá. Kixi kitʼale ninga nʼio chʼao tjíomasʼín chjota nga kʼia. Kʼoati nyaon nyaon chotʼayakaoná ndʼaibi tsa kixi timangíntʼalee Niná. Kuinga ñaki kʼoakʼoésíñá tokoán nga tosi tonda ya “kuitsomakoaa je jaʼaínle Jeobá je Nináná tokʼia saʼndani” (Miq. 4:5).