A tiyondañá nga koakoá kjoanda
kʼianga sʼe̱jna kjoabichile Nainá
1. Jméni xi koa̱n sʼiaan kʼianga sʼe̱jna je kjoabichile Nainá.
1 Kʼianga sʼe̱jna je kjoabichile Nainá nga 14 sá abril jao koya jmeni xi koa̱n sʼiaan, koaan ngisasa chjí jchaa je kjoanda xi tjínle je Jeobá kʼoa koaan kʼoailee kjoanda. Je én xi faʼaitʼa ya Lucas 17:11-18 kui bakóná josʼin síkjaʼaitsjen je Jeobá kao Jesús xi tʼatsʼe jebi. Je xi tokʼoamaná kuinga tojngo koanni xi kitsjoale kjoanda Jesús kʼianga jekoanndaya nga tjíofiʼndojon yaole. Nichxin xi sʼa nroá, tjóxin ngayeje kjoañʼai xi tjín kʼoa sʼeená kjoabijnachon xi tsínkʼia fetʼa xi totʼatsʼe nga kʼoasʼin tsakʼéchjíntjainá je Jeobá. Nga kʼia, nyaon nyaon kʼoailee kjoanda nga kʼoasʼin tsjoáná je kjoanichikontʼain jebi. Tonga jósʼin koakoá kjoanda je xomana xi fisani.
2. Jósʼiaan nga ngisasa chjí jchaa je kjoabʼechjíntjai xi kitsjoa Niná.
2 Ngisasa chjí jchaa je kjoanda xi tjínle je Jeobá. Yaa kjoafaʼaitsjenná nroani kʼianga chjí ʼyatokoán tsa jme kjoandani. Kʼianga ngisasa chjí jchaa je kjoabʼechjíntjai xi kitsjoa Niná, jngo programa tíjna jñani koa̱n kʼoéxkiaa je Biblia nga kui nichxin kʼoa yaa faʼaitʼa jolani tsa ya calendario kao foyeto Examinando las Escrituras diariamente. Ngisa nda nga ñatje̱n kʼoéxkiaa kao familianá jñani koa̱nxkia je Biblia nga kʼia. Tsa kʼoasʼiaan, ngisasa chjí jchaa je kjoabʼechjíntjai kʼoa kʼoati koasenkaoná nga nda koanngínkoaa yaoná (2 Cor. 5:14, 15; 1 Juan 4:11).
3. Jósʼin koa̱n kʼoailee kjoanda je Jeobá kʼianga kjoaʼaítsjenya kjoabiyale Cristo.
3 Kʼoailee kjoanda je Jeobá. Jmeni xi nʼia yaa bakoñá nga bʼé kjoanda (Col. 3:15). Je chjota xi tífiʼndojon yaole xi kitsjoa kjoanda nga koanndaya kikon ijngokʼale Jesús nga kitsjoale kjoanda kʼoa kaojin kjoatsjoa kitsoyale ngatsʼi chjota nga kʼoasʼin kinindaya (Luc. 6:45). Kʼoa ñá kʼoasʼin kʼoee kjoanda tsa ñaki kao kjoatsjoa si̱kʼabísoan je xo̱n xi tsʼe nga kjoaʼaítsjenya kjoabiyale Cristo. Ijngo koya josʼin koa̱n kʼoee kjoanda kʼianí nga precursor auxiliar sʼin si̱xá kʼoa tsa ngisasa tse ora kʼuínyasoán nga kʼia. Kʼoa nichxin nga sʼe̱jna je kjoabichile Nainá kʼoasʼin chjoéyandaa je chjota xi kuicho kʼoa kʼuínyalee tsa jme xi skónanginá.
4. Jméni xi tsín koa̱n si̱kʼatoaa nga sʼe̱jna je kjoabichile Nainá.
4 A tokuisa nó jebi nga sʼe̱jna je kjoabichile Nainá (1 Cor. 11:26). Likui ʼyaa. Tonga tsa tsín koakoá kjoanda kʼianga kjoaʼaítsjenya kjoabiyale Cristo nó jebi, jngojin kjoanda xi nʼio chjíle si̱kʼatoaa. A tiyondañá nga koakoá kjoanda. Kui xi mená nga je én xi kuinókjoaa kʼoa je xi si̱kjaʼaitsjenjiaan ñaki katasasénle je Jeobá je xi kʼoasʼin kitsjoa kjoabʼechjíntjai (Sal. 19:14).