Kuiyondaa nga si̱kjaʼaitsjenyá je Kjoabichile Nainá

Kʼianga tejan sá nisán nga nó 33. Je Jesús be kʼianga tokuisa nitje̱n nga ya tíjnakao je chjotatjenngile xi nʼio miyole mani nga kjesa nikʼienjin. Tokʼoatjín tsakjenkaosa sʼuí paxko je chjotatjenngile nga̱ kui kisʼejnangajaole je Kjoabichile Nainá. Kʼoa nga nʼio tjínle kjoandosin nga kui nichxin, tongini tsakatíonda jmeni xi koanchjén kʼoa jé Pedro kao Juan kʼoakitsole nga kikatíonda (Luc. 22:7-13). Saʼnda nga kʼia, ñá xi chjotale Cristo maa, machjén nga tongini biyondaa nga nikjaʼaitsjenyá je Kjoabichile Nainá (Luc. 22:19). Kataʼyala jméni xi tjínnele sʼiaan nga tongini kuiyondaa nga kjoaʼaítsjenya je Kjoabichile Nainá nga 3 sá abril.

Jósʼin kʼoendajin je xi chjotajchínga sʼin tjío:

Kʼoendajin tsa ya koa̱nchjén Ndʼia jña chotʼayá kʼoa tsa xin ʼnde koa̱nchjén jñani nda chon kʼoa koa̱n nkjín yáxile xinyá. Nga tongini nʼio nda koa̱ntsje je ʼnde jñani si̱kjaʼaitsjenyá je Kjoabichile Nainá.
Tongini skoéjin jngo ndsʼee xi tsjoá kjoanokjoaya, je ndsʼee xi kʼoetsʼiakao kjoajtín kao xi koatio kjoabʼetsʼoa nga kjesa faʼatoyajin je bino kao nioxtila.
Tsa tikui ʼnde sichjénni je xi kjaʼaí jtín, machjén nga nda sʼe̱ndajin jmé orani sʼe̱jna je Kjoabichile Nainá, kʼoa nga sʼe̱ndajin jñani kjoaʼasʼenni kʼoa kuitjoni xi kuicho.
Tongini skoéjin je ndsʼee xi sikatíondaná kʼoa kao xi sikʼatoya je bino kao nioxtila.
Machjén nga sikatíonda je bino kao nioxtila, je chxoa̱ kao cho̱tsín xi koa̱nchjén, yámixa̱ kao najño xi sʼe̱ndason xi tsín tokji tomani.

Jméni xi koa̱n sʼiaan ngatsʼiaa:

Kʼoénelee yaoná nga kjoájinkoaan chjota xi tʼatsʼe Kjoabichile Nainá.
Kʼoétʼaxoaan ʼyani xi mená nga koai nga kjoaʼaítsjenya je kjoabiyale Cristo, jolani je chjota xi bʼailee estudio, xi xíngiaa mani, xi ñatjen nixá, xi ñatjen mangián skuela kʼoa tsa je chjota xi ʼyaxkoaan.
Kʼoéxkiaa je Biblia jñani koa̱nxkia nga kui nichxin kʼoa si̱kjaʼaitsjenjiaan jmeni xi kʼoéxkiaa.
Chjoéyaa je xi kuicho nga kjoaʼaítsjenya je kjoabiyale Cristo.