Je xi nʼio nichjén kʼianga ʼmiyalee chjota
1. Jósʼin mangóson jngo chjotale Cristo kao jngo chjineyá.
1 Jngo chjineyá nʼio nkjín koya ki̱cha̱ tjínle xi síchjén nga sínda yá. Tjínkʼa ki̱cha̱ xi tosakʼoa síchjén kʼoa tjínkʼa xi tosíchjénntsjai. Je chjineyá xi jekjoatse kui xá sʼín báyoyantsjai ya kaxa̱le jokjoan je ki̱cha̱ xi nʼio síchjén. Je Biblia kʼoatsoná nga kʼoénelee yaoná nga kʼuínyasoán. Nga jngó jngoá xi jeʼmiyasoán tjínnele kʼoasʼiaan “joni jngo xi síxá xi tsín tsa jme xi koa̱nsoale” (2 Tim. 2:15). Jméni xi nʼio nichjén nga ʼmiyaa. Kuiní je Biblia, nga̱ kui xi nichjén nga chjotale Cristo nikoaa je chjota (Mat. 28:19, 20). Kuinga nʼio machjénsíni nga kʼoénelee yaoná nga nda si̱chjén “je én xi kjoakixi”. Tonga kʼoati tjíosa xi kjaʼaínile xi kʼoati nʼio nichjén kʼianga ʼmiyalee chjota jokjoantjínni Énle Niná, kʼoa ngatsʼiaa tjínnená nga koa̱nná nga ngisa nda si̱chjén jebi kʼianga ʼmiyaa (Prov. 22:29).
2. Jñánile xo̱n kao video xi nʼio nichjén kʼianga ʼmiyaa Énle Niná.
2 Je xi nʼio nichjén kʼianga ʼmiyaa Énle Niná. Jmésani xi nichjén kʼianga ʼmiyalee chjota je Biblia. Kui libro Jmé kjoanni xi bakóya je Biblia. Kʼoa nga jefená nga bakoyalee chjota je libro jebi, tosa kui bakoyangálee je libro “Tosi tonda katasʼeno kjoatsjoachale Niná”, ánni nga kʼoasʼin koaikaosíni yaole jotso je Énle Niná. Kuinga machjénsíni nga kataʼyaa kʼoa nga nʼio nda katamaná josʼin si̱chjén nga jao libro jebi. Kʼoa kjiokʼa foyeto xi kʼoati nʼio nichjén kʼianga bakoyaa. Tobʼelañá, je foyeto Énnda chjotse xi tʼatsʼe Niná tínroani kui nichjén kʼianga bʼetsʼiakoaa estudio. Tsa ya jñani ʼmiyasoán tsaojiaan je chjota xi ñʼai male nga bʼéxkia kʼoa tsakui én chja̱ xi kje tsínjin je xo̱n xi kui én faʼaitʼa kʼoa tsa tosʼa choa tjín, koaan kui si̱chjén je foyeto Tinóʼyalai je Niná kʼoa kao Tinóʼyalai je Niná kʼoa kuijnaní ngantsjai nichxin. Ijngosa foyeto xi nichjén nga ʼmiyaa kui ʼYáni xi kʼoatjíosʼín ndʼaibi josʼin mele Jeobá, nga̱ kui xi kuinyakao je xi tiʼmiyalee nga katabe josʼin tíjna je naxinandále Niná. Je video kʼoati koasenkaoná nga chjotale Cristo si̱koaa je chjota. Kui kʼa jebi: Ánni nga machjénsíni nga chótʼayai Biblia, Jósʼin ʼmiyalaijin Biblia je chjota kao A tjínle jaʼaín je Niná. Kʼoa machjén nga katamaná josʼin si̱chjén.
3. Jméni xi koakoyaná je xo̱n Xá xi nʼia tʼatsʼe Niná xi sʼa kuitjo.
3 Je xo̱n Xá xi nʼia tʼatsʼe Niná xi sʼa kuitjo kui koakoyaná josʼin nga ngisa nda si̱chjén je xo̱n kao video xi nʼio nichjén kʼianga ʼmiyaa Énle Niná. Kʼiatsa kʼoénelee yaoná nga nʼio nda si̱chjén, kui timangíntjenngiaa jotso kjoafaʼaitsjen jebi: “Tikuindai yaoli, kʼoa tikuindai je xi tibakoyai. Ñaki kʼoasʼin nda tʼinkaosai. Kʼia nga kʼoanʼiai ngayije jebi, kʼoasʼin kuitjontjai nga tijini, kʼoati je xi nrʼoéli” (1 Tim. 4:16).