Nda kichomani nga tsakijnokao

Tibijno je Helen nga séntʼale je carrito. Jao xtiyánchjín xi ya tjíofaʼa.

KʼIANGA ya tjíotsoma jao xtiyánchjín ya naxinandá Baguio (Filipinas), kiskotsenle jñani tíjna je xi nyaya je xo̱n xi Énle Niná yʼangini, tonga alikui kichokinyachrian. Je tichjaa Helen, xi ya sénjnaʼnda carrito, kiskotsenle kʼoa tsakijnokao. Je xtiyánchjín jebi to jaʼandiaa, tonga tokʼoakoanle nga kʼoasʼin tsakijnokao je tichjaa Helen.

Xijekoan, kʼianga tjíoya carro nga jetjíofini ndʼiale, tsabee nga jw.org tso én xi tjítʼa ya Ndʼia jña chotʼayá. Kʼiaa jaʼaitsjenle nga kʼoati tso xi tjítʼa je carrito xi tsabe jña nyaya xo̱n xi Énle Niná yʼangini. Kitjojen carro xi tjíoya kʼoa kikotsenle jochon satío je kjoajtín ya Ndʼia jña chotʼayá.

Je xtiyánchjín jebi tsjoa tjíole nga tjíobichó ya Ndʼia jña chotʼayá.

Nga jao xtiyánchjín jebi ki kʼianga kisʼejna kjoajtín. Kʼoa kʼianga tjíofaʼasʼen tsabee je tichjaa Helen. Kʼoa ndi̱toon tsabexkon nga je tichjaa jebi xi sa tsakijnokao. Je tichjaa Helen itso: “Kʼianga kinroakonna ñaki kitsokjonña. Jméni xi kinʼia kixinña”. Kʼiaa tsakʼéyanajmíle nga jao xtiyánchjín jebi jmeni xi koan.

Je xtiyánchjín jebi kisasenle jmeni xi kisakoya ya kjoajtín, kisasenle josʼín je ndsʼee kʼoa joxi ndʼiale tjío koanle. Nga tsabe je ndsʼee nga tjíosítsje ya Ndʼia jña chotʼayá kʼoati kisitsje tsanda je. Jngo xi tsín tiya tíjnani ya naxinandá jebi, tonga je tsoti xi ijngo jefi kjoajtín xi satío kʼoa jetíkotʼaya Biblia. Kui kjoanda xi kisoko nga kʼoasʼin tsakijnokao je tichjaa nga jao xtiyánchjín jebi.