Jósʼin bʼakaotʼaná jmeni xi tso Apocalipsis

1, 2. Jñánile xi jngo koya anni nga chótʼayajinsíñá je libro xi tsʼe Apocalipsis.

A SA jekichotsenlai je foto jñani nʼio nkjín chjota faʼaitʼa. Tsakui nichxin nkjín chjota xi tsín ʼyaxkuin tjíotʼa. Tonga ngisajin tikuenta nʼiangáni jngo foto jñani tijnatʼai tsanda ji. Kʼoa nga chotsenlai foto jebi nikjaʼaitsjenjinjin jñáni kʼoa kʼiáni kichʼasjao. Kʼoa kʼoati nikjaʼaitsjain ʼyáni xi kʼoati ya tjíotʼa kʼoa kuinga ngisa kuenta nʼiani foto jebi.

² Je libro xi tsʼe Apocalipsis yaa mangóson foto jebi. Jaola koya si̱kʼaxkiaa anni. Xi títjon, kuinga ñá kichjiná. Je versículo xi títjon itso: “Niná kisikʼatsenle Jesucristo, jméni nga koakósínile choʼndale je kjoa xi koa̱n ndi̱to̱n” (Apoc. 1:1). Jmeni xi tso libro jebi ali tsa ngatsʼijin chjota kichjile, toñá kichjiná xi choʼndale Niná maa. Kuinga tsín tokʼoamaniná nga kʼoati tibʼainganʼioá nga tíbitjoson jmeni xi tso libro jebi, kʼoa majinná nga kʼoati bʼakaotʼaná jmeni xi tso.

3, 4. Tojo tso libro xi tsʼe Apocalipsis, kʼiáni kuitjoson je én xi faʼaitʼa, kʼoa jméni xi tjínnele sʼiaan nga jngó jngoá.

³ Je xi majaoni koya anni nga meniná jchaa jmeni xi tso libro xi tsʼe Apocalipsis kuiní kʼiáni kuitjoson je én xi faʼaitʼa. Je pastro Juan kʼoakitso kʼiáni kuitjoson én jebi. I kitso: “An kʼoasʼin tijnakoa je Espíritu Santo nga je nichxinle Nainá” (Apoc. 1:10). Nga kiski pastro Juan én jebi kʼiaa chrian nó 96, nga kʼia tsesa chale nga kjoaʼaí “je nichxinle Nainá” (Mat. 25:14, 19; Luc. 19:12). Tojo tso je én xi tongini kinokjoa, “je nichxinle Nainá” kʼiaa kitsʼia nga nó 1914 kʼianga Rey koan Jesús ya ngʼajmi. Kʼiaa tjen nó jebi kitjosonni jmeni xi tso libro xi tsʼe Apocalipsis xi kʼoati bʼakaotʼale naxinandále Niná. Kui xi tsonile jebi nga nichxinle Nainá tiyoaa ndʼaibi.

⁴ Nga nichxinle Nainá tiyoaa ndʼaibi machjén nga si̱tjosoán jmeni xi tso Apocalipsis 1:3, jñani tso: “Jó tondale je xi bʼéxkia, kʼoa je xi nrʼoé énbi xi kʼoasʼin báyakon, kʼoa xi sítjosonle én xi tjíotʼabi, nga je nichxinle kjimachrian”. Tjínnele nga kʼoéxkiaa, nga kuinóʼyá kʼoa nga si̱tjosoán jmeni xi tso libro jebi. Jñánile je én jebi xi tjínnele si̱tjosoán.

JÓSʼIN JCHAÑÁ TSA SASÉNLE NINÁ JOSʼIN TIʼYAXKOÁN

5. Jósʼin basenkaoná jmeni xi tso libro xi tsʼe Apocalipsis nga ʼyaa tsa sasénle Jeobá josʼin tiʼyaxkoán.

⁵ Fitsʼiakjoanni ya capítulo 1 xi tsʼe Apocalipsis kui tsoyaná nga nʼio nda be je Jesús jmeni xi kjima nga jngó jngó jtín (Apoc. 1:12-16, 20; 2:1). Yaa ʼyañá nga kʼoatjín jebi jotso je én xi kisikasénle nga ñato jtín xi kisatio ya Asia Menor. Jmeni xi kitsole kui xi tsakinyakao je chjotale Cristo xi tsakatio nga siglo 1 nga koanjinle tsa tísasénle Jeobá josʼin tjíobexkón. Jmeni xi kitso je Jesús nga kʼia kʼoati bʼakaotʼaná nichxin xi tiyoaa ndʼaibi. Jméni xi bakóyaná. Je Jesús, xi séntítjonná nʼio nda be josʼin tiyoaa ngixko̱n Niná, jé tíbándiaaná kʼoa tísíkuindaná kʼoa be ngayeje jmeni xi tinʼia. Je Jesús be jmeni xi tjínnele sʼiaan nga tosi tonda nda kuiyoaa ngixko̱n Jeobá. Jókitso, jméni xi tjínnele si̱tjosoán ndʼaibi.

6. 1) Tojosʼin faʼaitʼa ya Apocalipsis 2:3, 4, jmé kjoa xi kisʼe ya jtín xi kisʼejna ya Éfeso. 2) Jméni xi bakóyaná jebi.

⁶ (Tʼexkiai Apocalipsis 2:3, 4).b Tosi tonda tsjoacha katamaa Jeobá jokji tsjoacha koan nga títjon. Jmeni xi kitsole Jesús je jtín xi kisʼejna ya Éfeso kui tsakakó nga kiskale kʼoa nga je Jeobá kisixále ninga kjoa jaʼatojin. Ningalani kʼoakisʼin, alikui tikʼoakji tsjoake koanni Jeobá jokji tsjoake koan nga títjon. Nga sa̱sénle Jeobá josʼin tjíobexkón, machjén nga kʼoakji tsjoake koa̱n ijngokʼa jokji tsjoake koan nga títjon. Tikʼoasʼinni nichxin xi tiyoaa ndʼaibi, ali tsa tokuijin xi machjén nga ska̱ná, tjínnele nga koa̱njinná ánni nga tíkaniná, nga̱ je Niná ali tsa tokuijin kuenta sʼín jmeni xi nʼia, kʼoati kuenta sʼín ánni kʼoanʼiañá. Je Jeobá nʼio chjí be jmeni xi nʼia, kʼoa kui xi mele nga kuinga si̱xánilee nga tsjoachaa kʼoa nga bʼailee kjoanda (Prov. 16:2; Mar. 12:29, 30).

7. 1) Tojo tso Apocalipsis 3:1-3, jméni xi tsabe Jesús ya jtín xi kisʼejna ya Sardis. 2) Jméni xi tjínnele sʼiaan.

⁷ (Tʼexkiai Apocalipsis 3:1-3).c Tjínnele tjenyatokon kuiyoaa. Je jtín xi kisʼejna ya Sardis sa kjaʼaí kjoa tsakʼetʼangále. Ningalani nda kisixále Niná nga títjon, nga jeki nichxin alikui tikʼoakisʼinni. Je Jesús kʼoakitsole nga tjenyatokon katabatio. Kʼoa ñá, jméni xi bakóyaná. Je Jeobá alikui chajinle je xá xi nʼia (Heb. 6:10). Ninga kʼoalani, alikui koa̱n nga tokui kjuinñá nga nda kinixálee Niná ngasʼa kʼoa tsa tsín tikʼoasʼianñá ndʼai. Ningalani tsín tikʼoakji bichóni nganʼioná joni ngasʼa, machjén nga tosi tonda si̱xálee je Jeobá, kʼoa nga tjenyatokon kuiyoaa saʼnda nga kuichokjetʼa jme xi chon sonʼnde (1 Cor. 15:58; Mat. 24:13; Mar. 13:33).

8. Jmé xi bakóyaná jokitsole Jesús je chjotale xi tsakatio ya Laodicea (Apocalipsis 3:15-17).

⁸ (Tʼexkiai Apocalipsis 3:15-17).d Tjínnele nga nda si̱xálee je Jeobá kʼoa nga ñaki kao ni̱ma̱ná si̱xálee. Je Jesús kʼoakitso nga sa kjaʼaí kjoa kisʼengále je jtín xi kisʼejna ya Laodicea. Jtín jebi to choaa kisixále Niná. Je Jesús i kitsole: “Likui ʼyao nga ñʼai tiyo, kʼoa nga chʼoao”. Tjínnele nga ngisa nda kisixále Niná kʼoa nga nda tsabexkón (Apoc. 3:19). Jméni xi bakóyaná jebi. Tsa tsín tikʼoakji tinixánilee Jeobá joni ngasʼa, tjínnele si̱kjaʼaitsjenjiaan kʼoa kʼoailee kjoanda tʼatsʼe xi títsjoáná je Jeobá kao naxinandále (Apoc. 3:18). Alikui koa̱n nga tokuila kjoásjee je tsojmi xi tjín sonʼnde, tosa kui ngisa kʼoailee kjoandosin nga je Niná si̱xálee.

9. Tojo kitsole Jesús je jtín xi tsʼe Pérgamo kao Tiatira, jméni xi tsín tjínnele sʼiaan.

⁹ Tsín katamakjainná jmeni xi tso chjota xi yátsʼi̱n binyále Niná. Je Jesús tsakatekjáya kʼale chjotale xi ya tjío ya Pérgamo xi tjíosíjaoya je jtín (Apoc. 2:14-16). Je Jesús kʼoakitsole je chjotale xi ya tsʼe Tiatira nga nda kisʼin nga tsínkui tsakʼanachale je kjoandisole Na̱i, kʼoa kʼoakitsole nga tosa kui katasítjoson xi kixi tíjna (Apoc. 2:24-26). Je chjotale Cristo xi koankjainle je kjoandiso xi tsakʼinyale, tjínnele nga kʼoakoannile jmeni xi kisʼin. Nichxin xi tiyoaa ndʼaibi, kʼoati tsín koa̱n kui koa̱nkjainná jmeni xi kontra tíjnale jotso Jeobá. Tsakui nichxin kʼoasʼin matsen chjota jebi nga bexkón Niná, tonga jmeni xi sʼín yaa bakóni nga tsín sítjoson jotso je Biblia (2 Tim. 3:5). Tsa nda chótʼayá jmeni xi tso Énle Niná, tsínkui koa̱nkjainná je énndiso xi kaníbason chjota xi yátsʼi̱n binyále Niná (2 Tim. 3:14-17; Jud. 3, 4).

10. Jmésani xi bakóyaná jokitsole Jesús je jtín xi tsʼe Pérgamo kao Tiatira.

¹⁰ Alikui si̱chajngiaa kʼoa chʼaocha katamaa je kjoachajngi. Ijngosa kjoa tsakʼetʼale je jtín xi tsʼe Pérgamo kao Tiatira. Je Jesús kʼoakitso kʼale chjotale xi ya tsakatio jtín jebi nga tsín nda tjíosʼín nga totjíotsjoáʼndele je xi tjíosíchajngi (Apoc. 2:14, 20). Jebi kui bakóyaná nga tsín tsjoáʼnde je Jeobá tsa kjoachajngi sʼiaan ninga jenʼio nkjín nó nga tinixálee kʼoa ninga tse xá kjinená jinnaxinandále (1 Sam. 15:22; 1 Ped. 2:16). Je Jeobá kui xi mele nga si̱tjosoán jotso kjoatéxomale ninga sa chʼao sa chʼao sʼin je chjota (Efes. 6:11-13).

11. Jméni xi bakóyaná xi jekachotʼayajiaan (kʼoati chótsenlai je recuadro “Xi bakóyaná”).

¹¹ Jméni xi bakóyaná xi jekachotʼayajiaan. Machjén nga jchaa tsa sasénle je Jeobá josʼin tiʼyaxkoán. Tsakui kʼoatinʼia xi chʼaotjín, machjén nga kjitʼanangi si̱ndayaa yaoná ánni nga nda kuiyoñá ngixko̱n Niná (Apoc. 2:5, 16; 3:3, 16). Tonga tjínsa jme xi kitsole Jesús je jtín. Kataʼyala jméni.

KATAKANÁ NGA ʼYA XI KOAITJENNGIKENÁ

12. Jméni xi bakóyaná jokitsole Jesús je chjotale xi ya Esmirna kao Filadelfia tsʼe (Apocalipsis 2:10).

¹² Chótʼayajinla jmeni xi kitsole Jesús je jtín xi tsʼe Esmirna kao Filadelfia. Kʼoakitsole je chjotale nga tsín katatsokjón kʼianga chjota koaitjenngike kʼoa nga tse kjoanda tsjoále Jeobá tsa kixi koaitʼale (tʼexkiai Apocalipsis 2:10;e 3:10). Jméni xi bakóyaná jebi. ʼYañá nga chjota koaitjenngikená kʼoa machjén nga tongini kuiyondaa nga chókjoajinná (Mat. 24:9, 13; 2 Cor. 12:10). Ánni machjénsíni nga si̱kjaʼaitsjenjiaan jebi.

13, 14. Jósʼin tíbʼakaotʼale choʼndale Niná jotso ya Apocalipsis capítulo 12.

¹³ Je libro xi tsʼe Apocalipsis kʼoatso nga je naxinandále Niná chjota koaitjenngike kʼianga “nichxinle Nainá”, xi tsonile, nichxin xi tiyoaa ndʼaibi. Ya Apocalipsis capítulo 12 kʼoatso nga “jngo kjoajchán” kisʼejna ya ngʼajmi kʼianga Rey kinikao je Jesús. Je Miguel, xi tsonile, je Jesucristo kʼianga jekichoni ya ngʼajmi, je kao ánkjele kiskan kao je Na̱i kʼoa kao sénnichxin xi chʼaokjoan (Apoc. 12:7, 8). Jósʼin kichomani nga kʼoakoan. Je Na̱i kao sénnichxin xi chʼaokjoan kisichaa kʼoa i tʼanangi kinikʼatsaojenngi kʼoa tsee kjoañʼai tjíosíkjaʼá je chjota (Apoc. 12:9, 12). Jósʼin tíbʼetʼale jebi naxinandále Niná.

¹⁴ Je libro xi tsʼe Apocalipsis kʼoatso jotísʼín je Na̱i. Nga tsín tima faʼasʼenni ya ngʼajmi jé tíbʼetʼale choʼndale Niná xi ya ngʼajmi koai xi tjíosa i̱ Sonʼnde. Chjotale Cristo jebi jé tjíongajaole Chjotaxále Niná i̱ tʼanangi “kʼoa tsjoá én tʼatsʼe Jesucristo” (Apoc. 12:17; 2 Cor. 5:20; Efes. 6:19, 20). Jósʼin tíbitjoson én jebi.

15. ʼYáni xi tsoyanile nga “jao testigo” xi bʼaxki̱ ya Apocalipsis capítulo 11, kʼoa jméni xi koantʼain.

¹⁵ Jé Na̱i xokisʼin nga chjota kitjenngike je ndsʼee xi ya koai ngʼajmi xi tsakándiaale xále Niná. Chjotale Cristo jebi jé tsoyanile xi “jao testigo”f xi kinikʼien xi nchja̱ni libro xi tsʼe Apocalipsis (Apoc. 11:3, 7-11). Kʼianga nó 1918, jin ndsʼee xi tsakándiaale xále Niná xi jée kisʼene kʼoa tsee nga ndoyá kinikatíoʼya. Nga kui nichxin, nkjín xi kʼoasʼin kisikjaʼaitsjen nga to jejchangi xá xi kisʼin je ndsʼee jebi.

16. Jméni xi koan kʼianga nó 1919, kʼoa jméni xi tosi tonda kʼoatísʼín je Na̱i.

¹⁶ Ya Apocalipsis capítulo 11 kʼoatso nga je xi “jao testigo” nikatíokon ijngokʼani kʼianga jefaʼato choatse. Én jebi kʼiaa kitjoson nga kje ñanó tjíoʼyajin ndoyá ndsʼee jebi. Kʼianga sá marzo nó 1919, je ndsʼee kinikatíondáini kʼoa tsín tijme jée kisʼeneni. Je ndsʼee jebi kjitʼanangi tsakakóyason ijngokʼa. Ninga kʼoalani, alikui jyó tíbʼejna je Na̱i. Saʼnda nga kʼia, tosi tonda tífitjenngike naxinandále Niná (Apoc. 12:15). Kuinga machjénsíni nga sʼe̱ná kjoamakjain kʼoa nga chókjoajinná kjoa xi kuitjátojiaan (Apoc. 13:10).

KʼOATʼIAIN JE XÁ XI TÍBÁNENÁ JEOBÁ JOKJI TJEN KʼOAKOA̱NLI

17. Jósʼin tíbʼainganʼiole naxinandále Niná ningalani nʼio tíbʼetʼale je Na̱i.

¹⁷ Ya Apocalipsis capítulo 12 kʼoatso nga tjín xi koasenkao je naxinandále Niná. Itso: “Je nangi kitjoʼai, ya kisʼen ndáje”. Xi tsonile, tjín xi basenkao naxinandále Niná nga chjota fitjenngike (Apoc. 12:16). Kʼoa kʼoakjima kjoaixi. Tobʼelañá, je chjotaxá sakʼoa nda bʼéndajin je kjoa, kʼoa kʼoasʼin basenkaoni je naxinandále Niná. Je choʼndale Niná jenkjín kʼa njele nga bʼéndajin kjoa ngixko̱n kjoatéxoma kʼoa ndái batio. Jósʼin tjíosíchjén kjoandái xi tjínle. Nʼio nda tjíosíchjén je nichxinle kʼoa kui kʼoatjíosʼín je xá xi tsakánele Jeobá (1 Cor. 16:9). Jmé xá xi tjíosʼín.

18. Jmé xáni xi nʼio bʼailee kjoandosin nichxin fetʼa xi tiyoaa ndʼaibi.

¹⁸ Je Jesús kʼoakitso nga je naxinandále Niná kuitsoyason je énnda jngo tjíjtsa Sonʼnde nga kjesa fetʼajin jme xi chon sonʼnde (Mat. 24:14). Jé ánkje binyakao naxinandále Niná nga tsoyasonle énnda ngatsʼi “xi tjío sonʼnde, kao ngayije nangi, kao ngayije ntje̱, kao ngayije én, kao ngayije naxinandá” (Apoc. 14:6).

19. Jmésa én xi tjínnele kuitsoyason je chjota xi tsjoake Jeobá.

¹⁹ Ali tsa tokuijin je énnda xi tʼatsʼe Chjotaxále Niná xi tjínnele kuitsoyason je choʼndale Niná. Kʼoati machjén nga tsjoánganʼiole je xá xi tjíosʼín je ánkjele Niná, tojosʼin bʼaxki̱ ya Apocalipsis capítulo 8 saʼnda 10. Ánkje jebi kui kʼoatjíotso je kjoañʼai xi kjoaʼaíne chjota xi tsín bʼaʼénle je Chjotaxále Niná. Je testigole Jeobá kʼoati kui tjíotsoyason je én xi kjoañʼai tjenkao xi ya mangóson je “jtsílao̱ kao lʼí”. Kʼoatjíotso jme kjoañʼai xi kjoaʼaíkaone Niná je chjota xi je Na̱i tsjoánganʼiole (Apoc. 8:7, 13). Machjén nga skoe̱ je chjota nga jeme kjoaʼaí kjoafetʼa ánni nga koa̱n sikʼantjaiyani yaole kʼoa kuinje̱nginile yaole nichxin nga kjoaʼaí kjoajtile Jeobá (Sof. 2:2, 3). Kjoanʼiojin machjénná nga kjoájinkoaan chjota én jebi. Kʼoa kʼianga jetíjna kjoañʼai xi nʼio tse ngisaa tijti koa̱nngánile je chjota kʼianga kʼoakʼuínkixilee jmeni xi koa̱ntʼain (Apoc. 16:21).

SI̱TJOSOÁN “ÉNBI”

20. Jmé xi chótʼayajiaan ya kjoaʼmiya xi ngi jao.

²⁰ Tjínnele si̱tjosoán jmeni xi tso libro xi tsʼe Apocalipsis nga̱ kʼoati bʼakaotʼaná jmeni xi faʼaitʼa (Apoc. 1:3). Tonga jméni xi sʼiaan nga chókjoajinná kʼianga chjota koaitjenngikená kʼoa nga tosi tonda nʼiojin koaan nga kjoájinkoaan chjota je én xi tjínnele sʼe̱jinle. Jao koya tjínni xi koasenkaoná. Xi títjon, tojo tso je libro xi tsʼe Apocalipsis ʼyañá jmeni xi koa̱ntʼain je kontrale Niná. Xi majaoni, tsee kjoanichikontʼain so̱koná tsa kixi kjuintʼalee Niná. Kui jebi xi chótʼayajiaan ya kjoaʼmiya xi ngi jao.