Tosi tonda “tijetakon xíngio”

1. Tojo tso 1 Tesalonicenses 5:11, jméni xi koa̱n sʼiaan ngatsʼiaa.

A SA jekitsʼainganʼiui nga kisʼenda kʼoa tsa kisʼendaya Ndʼia jña chotʼayá. Kʼiatsa jaon, faʼaitsjenjinli jokisʼe tokuin nga tosʼa kisʼejna títjon kjoajtín ya Ndʼia jña chotʼayá kʼoa tsakʼaijinlai kjoanda Jeobá. Tsakui nichxin toʼya koan kijndai nga nʼio tsjoa tjín tokuin. Je Ndʼia jña chotʼayá bʼasjengʼaa Jeobá tonga ngisaa bitjongʼa Niná kʼianga bʼainganʼiolee je chjota xi bichó ya Ndʼia jña chotʼayá. Kui kinchja̱ni jebi je pastro Pablo nga kʼoakitso jotso ya 1 Tesalonicenses 5:11b (tʼexkiai), je texto xi yʼangini kjoaʼmiya jebi.

2. Jmé xi chótʼayajiaan i̱ kjoaʼmiya jebi.

² Kʼianga koa̱n kʼoainganʼiolee je ndsʼee machjén nga kuenta sʼiaan jokisʼin je pastro Pablo. Kisijinle yaole jotjío kon xi ngikʼa. I̱ kjoaʼmiya jebi kui chótʼayajiaan josʼin tsakasenkao pastro Pablo je chjotale Cristo nga kichokjoajinle je kjoa xi jaʼatojin, nga nda kikao xínkjín kʼoa nga tsakasenkao nga nʼio kisatio kjoamakjainle. Kataʼyala jósʼin chjénngilee (1 Cor. 11:1).

JE PABLO TSAKASENKAO NDSʼE̱ NGA KICHOKJOAJINLE JE KJOA XI JAʼATOJIN

3. Jósʼin kisikjaʼaitsjen Pablo tʼatsʼe nga Niná nixálee kʼoa nga bijnyiʼá yaoná.

³ Je Pablo nʼio tsjoake koan je ndsʼe̱. Nga kʼoati nʼio tse kjoa jaʼatojin je Pablo tsakakóle kjoamatokon je xi kjoañʼai tjíofaʼá kʼoa kisijinle yaole jotjío kon. Ñandia nga koantsínle tao̱n kisixá kʼianga kisokole je tsojmi xi koanchjénle je kao xi ya tjenkao (Hech. 20:34). Kui xá kisʼin nga ndʼianajño tsakʼénda. Kʼianga kicho ya Corinto yaa kisixákao je Áquila kao Priscila xi kʼoati kui xá sʼín. Tonga ntsjaintsjai kitsoyale nga xoto Énle Niná je chjota judío kao chjota griego. Kʼoa kʼianga kicho je Silas kao Timoteo je Pablo ñaki tokui xá kisʼin nga Énle Niná kitsoyason (Hech. 18:2-5). Je Pablo kui ngisa kitsjoale kjoandosin nga je Jeobá kisixále. Nʼio nda choa̱ tsakʼéjna nga kitsoyason kʼoa kʼoati kisixá nga tsakajngiʼa yaole. Kuinga koan kʼoakitsonile je chjotale Cristo nga kui ngisa katatsjoále kjoandosin nga je Niná katasíxále tikʼoajinni nga kui ngisa tsjoále kjoandosin jmeni xi kisikjáojin nga nyaon nyaon kʼoa tsa ñaki tokui xá sʼin nga familiale koa̱njngíʼa (Filip. 1:10).

4. Jósʼin tsakinyakao Pablo kao Timoteo je chjotale Cristo nga kichokjoajinle nga chjota kitjenngike.

⁴ Kʼianga to chriankʼia kisʼejna jtín ya Tesalónica chjota kitjenngike je chjotale Cristo. Jngojtín chjota tjíobásjai tsakai je Pablo kao Silas, tonga nga tsín koansjaile jé tsakáʼndojbe kʼa chjotale Cristo xi ngikʼa nga kikao ngixko̱n chjotaxá, i kitso: “Ngatsʼi kontra kile kjoatéxomale César” (Hech. 17:6, 7). Nʼiojin kitsokjon je chjotale Cristo jebi nga tijeni chjota xi ya tsʼe kitjenngike. Nga kʼoakoantʼain tsakui nichxin tsín titsjoa kisationi kon nga je Jeobá sixále. Tonga Pablo tsín mele nga kʼoakatama. Ninga tsín tiya tsakationi je Pablo kao Silas kjaʼaí xi kisikasén xi tsakinyakao je chjotale Cristo jebi. Nga koanskanni, i kitsole Pablo je chjotale Cristo xi Tesalónica tsʼe: “Kichanijin Timoteo [...], nga kʼoasʼin sinʼiotakonno kʼoeneno josʼin koa̱nkjainno, jméni nga tsín tsa ʼya xi sikʼantjaiya yaole nga faʼá je kjoañʼaibi” (1 Tes. 3:2, 3). Tsakui nichxin kʼoati chjota kitjenngike je Timoteo kʼianga tsakʼejna ya Listra. Tsabejin josʼin tsakasenkao Pablo je chjotale Cristo xi ya tsʼe kʼoa josʼin tsakasenkao Jeobá. Kuinga koan kisinʼiojinni Timoteo je chjotale Cristo xi Tesalónica tsʼe (Hech. 14:8, 19-22; Heb. 12:2).

5. Jósʼin tsakasenkao Bryant nga kitsjoanganʼiole jngo ndsʼee xi chjotajchínga sʼin tíjna.

⁵ Jméni xi kisʼin Pablo nga kitsjoanganʼiole je ndsʼe̱. Kʼianga kicho ijngokʼani Pablo kao Bernabé ya Listra, Iconio kao Antioquía tsakinyándaa xi chjotajchínga sʼin tsakatio nga jngó jngó jtín (Hech. 14:21-23). Je xi chjotajchínga sʼin tsakatio nʼiojin kitsjoanganʼiole je jtín, tojo sʼín je xi chjotajchínga sʼin tjío ndʼaibi. Jngo ndsʼee xi Bryant ʼmi, itso: “Kʼianga kichona 15 nó kitsjionkonnajin je pana kʼoa tsakichonsjejin naxinandále Niná je mana. Alikui nda kisʼe tokoan kʼoa kʼoasʼin kisikjaʼaitsjen nga toʼan tijna”. Jmé xi tsakasenkao nga kui kjoa jaʼatojin. Itso: “Jngo xi chjotajchínga sʼin tíjna xi Tony ʼmi tsakjákaonajmína nga satío kjoajtín kʼoa tsa kjaʼaísa nichxin. Kui bʼéyanajmína tʼatsʼe ndsʼee xi kjoa faʼatojin kʼoa xi tsjoa tjío kon nga tjíosíxále Niná. Kui tsakʼéxkiana Salmo 27:10, kʼoa nkjín kʼa nga kui tsakjákaonina xi tʼatsʼe Ezequías nga kixi kitʼale Jeobá ningalani tsín nda kisʼin je nʼaile”. Jósʼin tsakasenkao Bryant nga kʼoasʼin kitsʼainganʼiole. Itso: “Nga kʼoasʼin tsakasenkaona Tony, nga jeki nichxin ñaki to xále Niná kisʼian kʼoa kui xi nʼio tsjoa tíbʼé tokoan”. Xi chjotajchínga sʼin tiyo kuenta tʼiaon je ndsʼee xi nganʼio machjénle joni Bryant (Prov. 12:25).

6. Jósʼin tsakinyakao chjotale Cristo nga kui tsakʼéyanajmíle Pablo tʼatsʼe choa̱le choʼndale Niná xi tsakatio nichxin kjoatse.

⁶ Je Pablo kʼoakitsole je chjotale Cristo nga nʼio nkjín choʼndale Niná xi kichokjoajinle ninga nʼio ñʼai tjín kjoa jaʼatojin nga je Jeobá tsakinyakao (Heb. 12:1). Koanjinle Pablo nga kui xi kuinyakao je chjotale Cristo je choa̱ xi tsakatío choʼndale Niná nichxin kjoatse, nga nʼiojin koa̱n kʼoa nga kui sikjaʼaitsjen “je naxinandále Niná xi tíjnakon” (Heb. 12:22). Kʼoati koasenkaoná tsanda ñá je choa̱ xi tsakatío choʼndale Niná nichxin kjoatse. Basenkaoná ngatsʼiaa nga bʼexkiaa josʼin tsakasenkao Jeobá je Gedeón, Barac, David, Samuel kao xi kjaʼaísa choʼndale Niná (Heb. 11:32-35). Kʼoati binyakaoná je choa̱ xi batío choʼndale Niná ndʼaibi. Nʼio nkjín carta bichóle je ndsʼee xi tjío jña tjen tísʼendiaanile je xále Niná xi síkasén je ndsʼee kao tichjaa xi kʼoatso nga nʼio tjíobinyakao kʼianga kui bʼéxkia jñani faʼaitʼa je choa̱le ndsʼee xi kixi tjíofitʼale Niná nichxin xi tiyoaa ndʼaibi.

JE PABLO KITSOYALE JE NDSʼE̱ JOSʼIN NGA NDA KOAIKAO XÍNKJÍN

7. Jméni xi bakóyaná je kjoafaʼaitsjen xi kitsjoa Pablo tojosʼin faʼaitʼa ya Romanos 14:19-21.

⁷ Kʼoati kʼoainganʼiolee je ndsʼee nga nda kjuinkoaa ngatsʼi. Alikui tokui xkoa̱ya biyoñá tsa tsín koa̱nngóson josʼin nikjaʼaitsjeen, kʼoa tsín tokui mangínñá josʼin nikjaʼaitsjeen ñá tsa tsín jme kjoatéxomale Biblia tibitjatoné. Kataʼyala jokoan je jtín xi kisʼejna ya Roma. Jtín jebi tsakatio je chjotale Cristo xi chjota judío kʼoa xi xin naxinandále. Nga tsín tikui koanchjénni je kjoatéxomale Moisés, alikui tikisʼechjoanile je chjotale Cristo jokjoan tsojmi xi ski̱ne (Mar. 7:19). Tjínkʼa chjotale Cristo xi chjota judío xi kʼoasʼin kisikjaʼaitsjen nga tsín chʼaotjín nga ski̱ne tojmeni, tonga tjínkʼa xi tsín kʼoasʼin kisikjaʼaitsjen kʼoa kui xi xkoa̱ya kisikatío. Je Pablo kʼoakitsole nga kui xi ngisa chjíle nga nda koaikao xínkjín. I kitsole: “Nda tjín nga tsín tsa yao chinai, ni ʼyojin xán, kʼoa nijmejin xi nʼiai xi sa̱téngi ndsʼai” (tʼexkiai Romanos 14:19-21).c Je Pablo kʼoakitsole je chjotale Cristo nga tije sikiʼaonni yaole kʼoa nga sikiʼaon je jtín kʼianga xkoa̱ya tjíobatio. Je Pablo alikui kui kʼoakisʼin jmeni xi sikaténgi je ndsʼe̱ (1 Cor. 9:19-22). Tojo kisʼin Pablo, kʼoainganʼiolee je ndsʼee kʼoa nda kjuinkoaa xíngiaa tsa tsín tokui kuixkanyañá jmeni xi sasénná kʼoa jmeni xi mai.

8. Jméni xi kisʼin Pablo kʼianga jngo kjoa xi nʼio tjínle kjoandosin koankjáojinle je jtín.

⁸ Jósʼiaan tsa kjaʼaí kjaʼaísʼin nikjaʼaitsjeen tʼatsʼe jngo kjoa xi nʼio tjínle kjoandosin. Nga nda kjuinkoaa xíngiaa koaan chjénngiaa choa̱le Pablo. Je jtín xi kisʼejna nga siglo 1, tjínkʼa xi kʼoasʼin kisikjaʼaitsjen nga tjínnele jtíndai yaole xi xʼin xi tsín chjota judío tsa mele nga chjotale Cristo koa̱n ánni nga tsín jokuitsonile xi kjaʼaí chjota (Gál. 6:12). Ningalani tsín kisasenle Pablo nga kʼoasʼin kisikjaʼaitsjen chjotale Cristo jebi, tonga tsín tokui kini josʼin kisikjaʼaitsjen je, nangitokon koan kʼoa kʼoakitso nga tosa je katabʼéndajin kjoa jebi je pastro kao chjotajchínga xi tjío ya Jerusalén (Hech. 15:1, 2). Nga kʼoasʼin tsakʼéndajin kjoa jebi nda kikao xínkjín je chjotale Cristo kʼoa tsjoa kisatio kon (Hech. 15:30, 31).

9. Jméni xi sʼiaan nga kjuintjenngiaa choa̱le Pablo.

⁹ Tsa jmeni xi tsín sa̱sénná josʼin xíngiaa ya jinjtín koaan si̱jélee kjoafaʼaitsjen je ndsʼee xi tsakinyánda Jeobá nga bándiaaná ánni nga nda koanngínkaoñá xíngiaa. Yaa Biblia bʼangini jmeni xi tsoná naxinandále Niná kao kjoafaʼaitsjen xi faʼaitʼa je xo̱n xi bʼasje. Tsa si̱tjosoán kjoafaʼaitsjen xi bʼainá kʼoa tsa tsín tokui kjuinñá josʼin nikjaʼaitsjeen nga jngó jngoá nda kjuinkoaa xíngiaa ya jinjtín.

10. Jósasʼin tsakasenkao Pablo je ndsʼe̱ nga nda kikao xínkjín ya jinjtín.

¹⁰ Jmésa xi kisʼin Pablo nga nda kikao je ndsʼe̱. ʼNdele nga tokui koaini jñani chʼao kisʼin je ndsʼe̱ tosaa kui kuenta kisʼin jñani nda kisʼin. Tobʼelañá, nga kjesa majngojinle je carta xi kiskile je chjotale Cristo xi Roma tsʼe, nkjín xi xʼin kao xi yánchjín kisikʼaxki̱ kʼoa kui kʼoakitso jñani nda kisʼin. Jósʼin koa̱n chjénngilee Pablo. Kʼiaa nga kʼoéyanajmílee xi ngikʼa jñani nda sʼín je ndsʼee. Tsa kʼoasʼiaan ngisaa nda koaikao xínkjín je ndsʼee kʼoa ngisaa miyo kjao.

11. Jósʼiaan nga nda kjuinkao ijngokʼá xíngiaa tsa kjoa sʼe̱ná.

¹¹ Tsakui nichxin saʼnda je ndsʼee xi jetjínle kjoafaʼaitsjen tsín sa̱sénle jmeni xi sʼin xi ngikʼa kʼoa tsa saʼnda kjaoti. Kʼoakoan je Pablo kao Bernabé ninga nʼio nda miyo tsakjáo. Kui tsakjáotiyani tsa koaikao je Marcos kʼoa tsa mai nga kjin koaikakóyason. Jósʼin kichomani nga kʼoakisʼin. Je Biblia itso: “Kjoasi kisʼele. Tsakjaʼáxintʼale yaole xínkjín” (Hech. 15:37-39). Tonga tsakʼéndajin kjoa xi kisʼele je Pablo, Bernabé kao Marcos. Kʼoasʼin tsakakóni nga kui xi ngisa chjíle nga nda koaikao xínkjín je chjotale Cristo kʼoa nga jtín sʼin koatio. Nga jeki nichxin je Pablo nda kinchja̱ni tʼatsʼe Bernabé kao Marcos (1 Cor. 9:6; Col. 4:10). Ñá kʼoati machjén nga kʼoéndajiaan tojme kjoa xi sʼe̱ná kao ndsʼee xi tjío ya jinjtín kʼoa kui kuenta sʼiaan jñani nda sʼín. Tsa kʼoasʼiaan, nda kjuinkoaa xíngiaa kʼoa jtín sʼin kuiyoaa (Efes. 4:3).

JE PABLO TSAKASENKAO NDSʼE̱ NGA NʼIO KISATIO KJOAMAKJAINLE

12. Jmé kjoa xi faʼatojin kʼa je ndsʼee.

¹² Kʼoati bʼainganʼiolee je ndsʼee nga binyakoaa nga nʼio satío kjoamakjainle. Tjínkʼa xi besin xínkjín xi tsín kotʼaya Énle Niná, xi ñatjen síxá kʼoa tsa jeje̱ xi ñatjen fi skuela. Tjínkʼa xi tse kjoa faʼatojin nga táo chʼin tjínle kʼoa tsa ba tjío kon. Kʼoa tjínkʼa xi jenʼio kjoatse kisʼenngindá xi tojo tjíokoyale nga kjoaʼaí kjoafetʼa. Nga kʼoama, kui kjoa jebi xi kotʼayakao kjoamakjainná. Kʼoati kui kjoa jaʼatojin je chjotale Cristo xi tsakatio nga siglo 1. Jósʼin kitsjoanganʼiole Pablo chjotale Cristo jebi.

13. Jósʼin tsakasenkao Pablo je xi tsaʼyasin nga chjotale Cristo koan.

¹³ Kui xo̱n Escritura kisichjén Pablo nga tsakasenkao je ndsʼe̱ nga nʼio sa̱tío kjoamakjainle. Tsakui nichxin tjínkʼa chjotale Cristo xi tsín koanle jokitsole je xínkjín xi kʼoakitso nga ngisa nda je judaísmo tikʼoajinni nga chjotatjenngile Cristo koa̱n. Nʼiojin tsakinyakao je carta xi kiskile Pablo je chjotale Cristo xi chjota hebreo (Heb. 1:5, 6; 2:2, 3; 9:24, 25). Je chjotale Cristo jebi kui tsakjákaonajmíni jmeni xi kitsole Pablo je chjota xi tsín kisasenle nga chjotatjenngile Cristo koan. Kʼoa ñá, jósʼin kuinyakoaa je ndsʼee xi ʼyasin. Koakoyalee josʼin sichjén je video kao xo̱n xi bʼasje naxinandále Niná ánni nga koa̱n kuitsoyanile xi kjaʼaí. Tobʼelañá, koaan kui folleto ¿Es la vida obra de un Creador? kao El origen de la vida. Cinco cuestiones dignas de análisis si̱chjén nga kuinyakoaa xi sʼa xti nga koa̱nle kuitsoya nga tjín xi kisinda ngayeje jme xi tjín.

14. Jmé xi kisʼin Pablo ningalani tse xá kisʼele nga kitsoya Énle Niná kʼoa nga kitsoyason.

¹⁴ Je Pablo kʼoakitsole je ndsʼe̱ nga kʼoasʼin koakonile nga tsjoake xínkjín kʼianga kui xá xi ndatjín sʼin (Heb. 10:24). Ali tokʼoajin kitsole jme xi tjínnele sʼin je ndsʼe̱, jé títjon kʼoakisʼin. Tobʼelañá, kʼianga kjinrá koan ya Judea jé Pablo kikaole tsojmi je chjotale Cristo xi ya tsʼe (Hech. 11:27-30). Ningalani nʼio tse xá kisʼele Pablo nga kitsoya Énle Niná kʼoa nga kitsoyason tsakásjaile josʼin tsakasenkao je chjotale Cristo xi ma̱ tsakatio (Gál. 2:10). Kʼoasʼin tsakasenkaoni je ndsʼe̱ nga kisatiojngo kon nga je Jeobá sikuinda. Nichxin xi tiyoaa ndʼaibi, kʼoati binyakoaa je ndsʼee nga nʼio satío kjoamakjainle, nga nikʼayaa nichxinná, nga bʼainganʼioá jñani kjoaxkón sʼe kʼoa nga nikatioá tao̱n xi kʼoasʼin machjén nga fison Énle Niná jngo tjíjtsa Sonʼnde. Nga kʼoanʼia kʼoasʼin binyakaoñá je ndsʼee nga sʼejngo kon nga tsínkʼia tsjiónkon Jeobá.

15, 16. Jósʼin tjínnele jchatokoán je xi tjíonroajen kjoamakjainle.

¹⁵ Tosi tonda tsakasenkao Pablo je chjotale Cristo xi jekinroajen kjoamakjainle. Tsakakóle kjoamatokon, kisinʼio kon kʼoa ngasin nganda tsakjákao (Heb. 6:9; 10:39). Tobʼelañá, kʼianga kiskile je chjota hebreo xi chjotale Cristo ma, nkjín kʼa nga “ñá” kitso je én xi kisichjén nga kiskile, ali tsa “jon” kitsojinle. Kuinga kʼoakitsonile nga kʼoati kisitjoson Pablo je kjoafaʼaitsjen xi kitsjoa (Heb. 2:1, 3). Tojo kisʼin Pablo, kʼoati tosi tonda binyakoaa xi jejaʼajen kjoamakjainle. Kʼianga mandosinná xi tʼatsʼe binyakaoñá kʼoa kʼoasʼin bakonilee nga tsjoachaa. Nʼio chjíle jmeni xi kʼuínlee tonga kʼoati nʼio chjíle nga ngasin nganda kuinókjoakoaa.

¹⁶ Je Pablo kʼoakitsole je ndsʼe̱ nga tsín kisichajin Jeobá josʼin kisixále (Heb. 10:32-34). Kʼoati koa̱n kʼoasʼin kuisenkoaa jngo ndsʼee xi jetínroajen kjoamakjainle. Koaan kʼoakʼuínlee nga katabʼéyanajmíná jósʼin tsabexkonni je Énle Niná kʼoa tsa faʼaitsjenleje̱ josʼin sa jetsakasenkao Jeobá. Kʼianga kʼoeyanajmíná josʼin kisixále Jeobá koaan kʼoakʼuínlee nga tsín tísíchajin Jeobá jmeni xi kisʼin kʼoa nga tsínkʼia tsjiónkon nichxin xi sʼa nroa (Heb. 6:10; 13:5, 6). Kʼianga kʼoasʼin cho̱banajmíkoaa je ndsʼee kui xi koasenkao nga tosi tonda sixále Jeobá.

TOSI TONDA KʼOAINGANʼIOLEE XÍNGIAA

17. Jméni xi sʼiaan nga ngisa nda koa̱nná kuinyakoaa xi ngikʼa.

¹⁷ Nga jefi nichxin jngo chjota xi ndʼia bʼénda sa nda sa nda male bʼénda ndʼia. Kʼoati koa̱nná tsanda ñá nga sa nda sa nda kuisenkoaa je ndsʼee. Nga kuinyakoaa je ndsʼee nga chókjoajinle je kjoa xi kjoaʼatojin koaan kui kʼoéyanajmílee je choa̱ xi tsakatío choʼndale Niná nichxin kjoatse. Nda kjuinkoaa xíngiaa kʼianga kui kuenta sʼiaan jñani nda sʼín xi ngikʼa. Alikui kʼoaiʼndee nga xkoa̱ya sʼin kuiyoaa kʼoa tokjoan kʼoéndajiaan tsa jme kjoa sʼená kao ndsʼee. Tosi tonda kuinyakoaa je ndsʼee nga nʼio katasatío kjoamakjainle nga kui cho̱bakaonajmíñá jmeni xi bakóya je Biblia. Kuisenkoaa kʼianga nganʼio machjénle kʼoa kʼoainganʼiolee xi jetjíonroajen kjoamakjainle.

18. Jméni xi meli kʼoasʼiain.

¹⁸ Je ndsʼee xi ya tsjoánganʼio nga sʼenda ndʼia xi kʼoasʼin machjén nga ʼyaxkón Niná nʼio tsjoa satío kon. Kʼoati nʼio tsjoa sa̱tío tokoán tsanda ñá tsa kuinyakoaa je ndsʼee nga nʼio sa̱tío kjoamakjainle. Kʼianga jefi nichxin majto jngo ndʼia, tonga kuinyakao ngantsjai nichxin nga kʼoainganʼiolee je ndsʼee nga nʼio sa̱tío kjoamakjainle. Kuinga machjénsíni nga kʼoasʼiaan jotso 1 Tesalonicenses 5:11, nga i̱ tso: “Tijetakon xíngio tʼaisalao nganʼio xíngio”.