Ánni nga tsín kjoajchán mangínñá jokisʼin chjota israelita

KʼIANGA kisʼejna Kjoajchántse xi majaoni, jngo sondado nazi xi i̱ kitsole je testigole Jeobá: “Tsa ʼyani xi koa̱nkaile nga koaikján ya Francia kao Inglaterra, kuiyáño ngatsʼio”. Ningalani nʼio nkjín ma je sondado xi tsʼe SS xi ya nyachrian xi yʼa chʼinsá kao tjo̱, nijngojinla ndsʼee xi kʼoakitso nga kjoajchán koai. Nʼiojin koan. Jokisʼin je ndsʼee nʼio nda choa̱ bʼéjnaná jonʼia ngatsʼiaa xi testigole Jeobá maa. Alikui kjoajchán mangínjiaan kʼoa tsín kjoasi nojiaan yaoná ninga kʼoakʼuínná nga si̱kʼienná.

1. TOJNGO ʼNDEE TSAKATIO NGATSʼI CHOʼNDALE NINÁ NICHXIN KJOATSE

Nichxin kjoatse, jé naxinandá Israel kiskoéjin Niná nga naxinandále koa̱n. I kitsole je chjota israelita: “Tsʼaan xínno tikʼoajinni je naxinandá xi ngikʼa” (Éx. 19:5). Kʼoati totsen kitsjoale ʼnde jña tsakatio. Kʼianga kʼoakitsole nga tjínnele koaikján kao xi kjaʼaí naxinandá, je chjota israelita ali tsa tijejin chjota israelita xínkjín kisikʼienni.a

Nichxin xi tiyoaa ndai, je choʼndale Jeobá tjío ngakjijnda ʼnde kao naxinandá (Apoc. 7:9). Tsa kjoajchánlani koaijin je choʼndale Niná ndʼaibi, tijejin ndsʼe̱ kʼoetʼanile kʼoa tijejin sikʼienni.

2. JÉ JEOBÁ XOKITSOLE CHJOTA ISRAELITA NGA KJOAJCHÁN KI

Nichxin kjoatse, jé Jeobá xokitsole chjota israelita kʼiáni kʼoa ánni nga kjoajchán kini. Tobʼelañá, kʼoakitsole nga katasíkjeson je chjota cananeo, nga̱ chjota jebi jé tsakʼétsʼoale sénnichxin xi chʼaokjoan, nʼio kisichajngi kʼoa xtiʼndí kisikʼien nga kitsjoatʼale je ninále. Jé Jeobá xokitsole chjota israelita nga katasíkjeson chjota jebi xi ya tjío ya ʼNde jña tsakʼinle nga kʼoaile, ánni nga tsín kʼoatisʼinsíni tsanda je (Lev. 18:24, 25). Kʼianga jeya tjío chjota israelita ya ʼNde jña tsakʼinle nga kʼoaile, je Jeobá kitsjoaʼndele nga kisitoánntjai yaole tʼatsʼe je kontrale (2 Sam. 5:17-25). Tonga tsínkʼia kitsjoaʼndele chjota israelita tsa toje xi kʼoasʼin koanmele nga kjoajchán ki. Kʼianga tsín je Jeobá xokitsole nga kjoajchán ki, nʼio nkjín kʼa nga tsín ndasʼin kichomani (Núm. 14:41-45; 2 Crón. 35:20-24).

Nichxin xi tiyoaa ndʼai, alikui je Jeobá xotsole chjota nga kjoajchán katabatío. Je naxinandá tokui sítoánntjai xi ngisa mandosinle, ali tsa tʼatsʼe Ninájin nga kjoajchán fi. Tsakui nichxin kuinga kjoajchán batíoni nga ngisa tse ʼnde kuinjele jña koatexoma, tsakuije̱ nga ngisasa tse tao̱n katasʼele kʼoa tsa tokui xi meleje̱ nga kʼoasʼin katamakjainle chjota josʼin makjainle je xi tʼatsʼe kjoa política. Kʼoati tsín je Niná xotsole chjota xi kʼoatso nga tʼatsʼe Niná nga kjoajchán batío, nga sítoánntjai josʼin makjainle kʼoa nga kʼoasʼin síkjaʼaitsjenje̱ nga sikjeson je kontrale Niná. Kʼoatso Jeobá nga je sitoánntjai je xi ñaki choʼndale ma kjoaixi kʼoa sikjeson je kontrale kʼianga kʼoejna kjoajchán nichxin xi sʼa nroa, nga kjoaʼaí Armagedón (Apoc. 16:14, 16). Nga kʼia, jé xi tjío ya ngʼajmi xi skan, ali tsa jejin choʼndale xi tjío i̱ Sonʼnde (Apoc. 19:11-15).

3. JE CHJOTA ISRAELITA ALIKUI KISIKJESON JE XI KOANKJAINLE TʼATSʼE JEOBÁ

Nichxin kjoatse, kʼianga ki kjoajchán je chjota israelita, nkjín kʼa tsakakóle kjoamatokon je xi koankjainle tʼatsʼe Niná kʼoa tojé kisikʼien xi kʼoakitso Jeobá nga katanikʼien. Jaola choa̱ kataʼyaa. Ningalani kʼoakitso Jeobá nga ni̱kjeson naxinandá Jericó, je chjota israelita tsakʼasjentjai je Rahab kao xínkjín nga̱ koa̱nkjainle xi tʼatsʼe Niná (Jos. 2:9-16; 6:16, 17). Kʼoa nga koanskanni, kʼoati tsín jokisikao je chjota xi naxinandá Gabaón tsʼe nga̱ tsakakó nga bexkón Niná (Jos. 9:3-9, 17-19).

Nichxin xi tiyoaa ndʼai, je sondado xi kjoajchán fijin alikui síchatʼale ninga je chjota xi makjainle tʼatsʼe Niná, kʼoa sakʼoa síkʼien xi toxkia chjota.

4. JE CHJOTA ISRAELITA KUI KJOATÉXOMA KITJENNGI JOKITSOLE JEOBÁ JOSʼIN TJÍNNELE KʼOEJNA KJOAJCHÁN

Nichxin kjoatse, jé Jeobá xokitsole chjota israelita jotjínnele sʼin kʼianga koai kjoajchán. Tobʼelañá, sakʼoa kʼoakitsole nga katabásjai kjoanyʼán kao xi kontrale mani (Deut. 20:10). Je Jeobá kʼoati kitso nga je sondado kao jña tsakationi nga tjínnele tsje sʼin kʼoa tsje koaikao yaole (Deut. 23:9-14). Xi ijngosani, je Jeobá alikui kitsjoaʼndele chjota israelita nga tsabetaon je yánchjín xi ya tsʼe ya ʼnde jñani kichosíkjeson, tojo kisʼin je chjotakjoajchán xi ya chrian tsʼe. Tobʼelañá, tsa jngolani sondado xi chjota israelita ma je mele chixankao jngo chjoón xi ya tsʼe ya naxinandá jñani kichosíkjeson, tjínnele jngo sá kiskoya nga koan chixankao (Deut. 21:10-13).

Nichxin xi tiyoaa ndʼai, me tongatsʼi naxinandá jñani kʼoasʼin bʼéndajin josʼin tjínnele sa̱tío kjoajchán, nga kʼoasʼin bʼéndajin kui xi mele nga sikuinda je xi toxkia chjota. Tonga tsínni kʼoasʼin bitjoson.

5. JE NINÁ KISITOÁNNTJAI NAXINANDÁLE

Nichxin kjoatse, je Jeobá kisitoánntjai chjota israelita kʼoa sakʼoa kjoaxkón tsakʼéjna kʼianga koan kinjele nga kiskan. Tobʼelañá, tsakasenkao nga kitjoéle naxinandá Jericó. Kui kitjenngi jmeni xi kitsole Jeobá, je chjota israelita nʼio tsakʼésonxá kʼoa kʼiaa chixojen je xjáo xi kjindai Jericó. Kʼoasʼin tsakasenkaoni Jeobá nga kitjoéle naxinandá jebi (Jos. 6:20). Kʼoa xi koanskanni, kʼoati kisikinjele chjota amorreo, naxinandá xi kontrale mani. Jósʼin kisikinjele. Je Jeobá yaa tjen ngʼajmi kisikʼani jtsílao̱ xi nʼio yʼai kjoan nga kisikjeson chjota jebi. Ngisaa nkjín chjota kisikʼien je jtsílao̱ tikʼoajinni jotjín koanni xi kisikʼien chjota israelita (Jos. 10:6-11).

XI CHJOTALE CRISTO MA KJOAIXIAA KJOANYʼÁN FASJEE

Tojosʼin tiʼyaa, alikui kʼoachon ndʼaibi jokoanchon nga tsakatio chjota israelita. Tonga ali tsa tokuijin jebi anni nga tsín kjoajchán mangínjinñá, nga̱ je Niná tongini kʼoakitso nga to jetífikjetʼa nichxin, je xi skoe̱ xi tʼatsʼe Jeobá tsín tikjoajchán skótʼayani. Kʼoa tsínkʼia nga kjoajchán koatio (Is. 2:2-4). Xi ijngosani, je Jesús kʼoakitso nga je chjotale tsín i̱ tsjónjin yaole jme xi chon sonʼnde, tsín kjoasi koaijin (Juan 15:19).

Je Jesús kʼoakitsole chjotale nga tsínkui kʼoakatasʼín jmeni xi kʼoengijtini kon xi kjaʼaí, jmeni xi sijtile xi kjaʼaí kʼoa jmeni xosikao nga skanni (Mat. 5:21, 22). Kʼoati kitsole nga kjoanyʼán katabásjai kʼoa nga tsjoake katama chjota xi jtike (Mat. 5:9, 44).

Jmé xi bakóyaná jebi. Alikui mená nga kjoajchán kjuinjiaan. Tonga jótjín jinni̱ma̱ná. Tsa bʼengijtilee tokoán xi tjío ya jinjtín kui xosikaoná nga xkoa̱ya kuiyoaa kʼoa nga kuixkan. Chja̱ʼaxinlee yaoná tsa kʼialani nga kʼoasʼin tinikjaʼaitsjeen (Sant. 4:1, 11).

ʼNdele nga ya kʼoainganʼiolee nga kjoasi bʼétsʼiakao naxinandá, xi chjotale Cristo maa tosaa kjoanyʼán fasjee kʼoa tsjoachañá xíngiaa (Juan 13:34, 35). Ñaki kʼoakʼoé tokoán nga tsín ʼya xi kʼoainganʼiolee kʼianga kjoajchán batío je chjota, tosa kui chóyalee nga kjoaʼaí je nichxin nga tondiaa kjoaʼaxin Jeobá je kjoajchán (Sal. 46:9).