KJOAʼMIYA XI CHOTʼAYA 49
Koaan kuiyoaa ngantsjai nichxin
“Jé xi kjoabijnachon ngantsjai” (JUAN 17:3).
KJOAJNDA 147 Kjoabijnachon ngantsjai tsjoáná Niná
XI TÍNCHJA̱NIa
1. Jósʼin basenkaoná nga kui nikjaʼaitsjenjiaan kʼianga kʼoatsoná Jeobá nga koa̱n kuiyoaa ngantsjai nichxin.
JE Jeobá kʼoatsoná nga koa̱n kuiyoaa ngantsjai nichxin tsa si̱tjosonlee (Rom. 6:23). Ngisaa tsjoacha maa je Jeobá kʼianga kui nikjaʼaitsjeen jebi. Nga tsjoakená kui xi mele nga kuiyoaa ngantsjai nichxin, nga̱ kui xi mele nga tsínkʼia si̱kjinlee.
2. Jósʼin basenkaoná nga koa̱n kuiyoaa ngantsjai nichxin.
2 Nga kʼoatsoná Jeobá nga koa̱n kuiyoaa ngantsjai nichxin chókjoajinná je kjoa xi bitjatojiaan. Ninga kʼoakuitsoná je chjota nga sikʼienná tosi tonda je Jeobá si̱xálee. Kʼiatsa kuiyá ʼyañá nga sikjaʼáyaniná Jeobá kʼoa kui choyalee nga koa̱n kuiyoaa ngantsjai (Juan 5:28, 29; 1 Cor. 15:55-58; Heb. 2:15). Kataʼyala ánni nga tjínjngoni tokoán nga koa̱n kuiyoaa ngantsjai nichxin.
JE JEOBÁ TÍJNAA NGANTSJAI NICHXIN
3. Ánni tjínjngoni tokoán nga koa̱nle Jeobá sikatíokonná ngantsjai nichxin (Salmo 102:12, 24, 27).
3 Koaanle Jeobá sikatíokonná ngantsjai nichxin nga̱ tíjnaa ngantsjai kʼoa tʼatsʼe nroani kjoabijnachon (Sal. 36:9). Kataʼyala kʼa textole Biblia xi kʼoatso nga tíjna ngantsjai je Jeobá kʼoa nga kʼoéjna ngantsjai nichxin. Ya Salmo 90:2 kʼoatso nga tíjna ngantsjai je Jeobá kʼoa kʼoéjna ngantsjai nichxin. Kʼoa ya Salmo 102 kʼoati me tso én xi faʼaitʼa (tʼexkiai Salmo 102:12, 24, 27).b Nga tʼatsʼe Niná kinchja̱ni je profeta Habacuc, i kitso: “Ji Jeobá, xi tijnai ngantsjai nichxin. Jiní Ninána, Tsjení, alikuikʼia kuiyái” (Hab. 1:12).
4. Ánni nga tsínkui nʼio si̱kjáojinñá tsa tsín majinná tʼatsʼe nga tíjna ngantsjai je Jeobá.
4 A ñʼai maná nga majinná kʼianga kui nikjaʼaitsjeen nga tíjna ngantsjai nichxin je Jeobá (Is. 40:28). Ali tsa toñájin xi kʼoamaa. Je Elihú kʼoati i̱ kitso xi tʼatsʼe Niná: “Alikui machoyaná jotjínle nó” (Job 36:26). Tsa tsín majinná jebi tsínkui xi tsonile nga tsín kʼoatjín. Tobʼelañá, tsa tsín majinná josʼin síxá je lʼí alikui kui xi tsonile nga tsín. Tikʼoasʼinni, ñá xi chjota, tsakui nichxin tsín koa̱njinná jótjínnile nga tsín kinroatsʼiani nga tíjna Niná kʼoa nga tsínle kjoafetʼa. Tsa ñá xi tsín majinná ali tsakuijin xi tsonile nga tsín tíjna Niná ngantsjai. Alikui ñá majinyejená jokjoantjínni xi tʼatsʼe Niná (Rom. 11:33-36). Je Niná tokʼoa tíjnaa nga kjesa mandajin jmeni xi tjín ngʼajmi kao Sonʼnde, jolani je Tsʼuí kao niño. Je Biblia itso: “Jé tsakʼénda sonʼnde, kao nganʼiole tsakʼéndani”. Kʼoati tso nga je tsakʼénda ngʼajmi (Jer. 51:15; Hech. 17:24). Kataʼyala jmesani xi bʼéjngo tokoán nga koa̱n kuiyoaa ngantsjai nichxin.
KʼOASʼIN KOANNDAA NGA KOA̱N KUIYOAA NGANTSJAI NICHXIN
5. Jmé kjoanda xi kisʼele tsakai je Adán kao Eva.
5 Kʼianga kisinda Jeobá ngayeje jmeni xi tjín, tojé chjota xi tsín kuiyá tsakai. Kui kjoanda kitsjoale nga koa̱n koatio ngantsjai nichxin. Tonga je Jeobá i kitsole Adán: “Alikui koa̱n chi̱nai je tole yá xi tsʼe kjoankjíntokon xi ndatjín kao xi chʼaotjín, nga̱ nichxin nga kui chi̱nai, kuiyání” (Gén. 2:17). Alikuijin kʼien je Adán kao Eva tsa kisitjosonle Jeobá, kʼoa chanjin kʼoakitsole Niná nga koa̱n ski̱ne je tole “yá xi tsʼe kjoabijnachon” kʼoa kʼoajinsʼin tsabeni nga koatio ngantsjai nichxin (Gén. 3:22).c
6, 7. 1) Jmésa choa̱ xi tjín nga tsín kʼoasʼin koanndaa nga kuiyá. 2) Jmé xi meli sʼiain kʼianga jekuijnai ngantsjai nichxin (chótsenlai sén xi faʼaitʼa).
6 Je chjota xi tʼatsʼe xokoajkoaa kotʼayason kʼoatso nga nʼio tse xi sʼejinkon je xokoajkoaa. Jmeni xi majinná jokjitse nijchá yaoná tsʼato kʼoakji sʼejinkon je xokoajkoaa. Kʼianga nó 2010, jngo revista xi bitjo ya Estados Unidos xi kʼoakitso nga janla millón hora tjínni xi ma binyátjao je xokoajkoaa. Kʼoakitso nga koa̱nle kuinyatjao jmeni xi faʼa ya televisión tsa tsʼatolani 300 nó chótsen ʼndeʼndelee. Tonga tsakui nichxin ngisasa tse xi kuinyatjao je xokoajkoaa. Jebi kui bakóná nga kʼoasʼin kisinda Jeobá je xokoajkoaa nga ngisa nʼio tse jmeni xi sʼe̱jinkon tikʼoajinni jmeni xi ʼyaa xi 70 kʼoa 80 nó (Sal. 90:10).
7 Toxá kʼoasʼin kisindaniná Jeobá nga mená kuiyoaa ngantsjai. Je Biblia kʼoatso nga je Niná “yaa ni̱ma̱le chjota kisikʼéjnajin nga koa̱nmele koatio ngantsjai nichxin” (Ecl. 3:11). Kuinga kontraná mani je kjoabiya (1 Cor. 15:26). Tobʼelañá, kʼiatsa táo chʼin ska̱tʼaná tokjoan mangínñá tsʼe chjinexki kʼoa chineñá xki xi koasenkaoná, kuinga kʼoanʼiañá nga̱ tsín mená kuiyá. Kʼoa kʼianga jngo xíngiaa biya tsa sʼa ʼndí kʼoa tsa jejchínga nʼio ba sʼe tokoán kʼoa tsín ndi̱to̱n chajinná (Juan 11:32, 33). ʼYañá nga tsjoakená je Jeobá kʼoa kui xi mele nga kuiyoaa ngantsjai nichxin, tonga tjínsa jmeni xi bakóná nga koa̱n kuiyoaa ngantsjai nichxin. Chótʼayajinla kʼa jmeni xi kisʼin Jeobá kʼoa jmeni xi tísʼín nga tsín tíchajinle jme xi kitso saʼnda nga títjon.
Nga kui choyalee nga kuiyoaa ngantsjai nichxin, kui nikjaʼaitsjenjiaan jmeni xi sʼiaan nga kʼia (Chótsenlai párrafo 7)g
ALIKUI TÍBʼANTJAIYA JME XI TJÍNNDAJINLE JEOBÁ
8. Jmé xi tso Isaías 55:11 tʼatsʼe jme xi tjínndajinle Jeobá.
8 Alikui tíbʼantjaiya jme xi tjínndajinle Jeobá ninga tsakajngijée je Adán kao Eva kʼoa ninga kjoabiya kisikakinná (tʼexkiai Isaías 55:11).d Kui xi mele nga koatio ngantsjai nichxin je chjota xi kixi fitʼale, nga̱ ʼyañá jmeni xi tso kʼoa jmeni xi tísʼín Jeobá nga sitjoson jmeni xi tjínndajinle.
9. Jméni xi kitso Niná nga sʼin (Daniel 12:2, 13).
9 Je Jeobá kʼoatso nga sikjaʼáyanile je chjota xi jekʼien kʼoa kui kjoanda tsjoále nga koa̱n koatio ngantsjai nichxin (Hech. 24:15; Tito 1:1, 2). Je Job ñaki kʼoatsakʼé kon nga mele Jeobá sikjaʼáyanile xi jekʼien (Job 14:14, 15). Je profeta Daniel kʼoati koanjinle nga kjoaʼáyanile je kʼien kʼoa nga koa̱n koatio ngantsjai nichxin (Sal. 37:29; tʼexkiai Daniel 12:2, 13e). Je chjota judío xi kʼia tsakatio nga nichxinle Jesús kʼoati koanjinle nga koa̱nle Jeobá tsjoále kjoabijnachon xi tsínkʼia fetʼa je choʼndale xi kixi koaitʼale (Luc. 10:25; 18:18). Je Jesús nkjín kʼa kisikʼaxki̱ nga kʼoasʼin je Niná kʼoa kʼoati kinikjaʼáyanile tsanda je (Mat. 19:29; 22:31, 32; Luc. 18:30; Juan 11:25).
Jmé xi bakóyaná nga koanle Elías kisikjaʼáyale kʼien (Chótsenlai párrafo 10)
10. Jmé xi bakóyaná nga jaʼáya kʼanile chjota nichxin kjoatse (chótsenlai sén xi faʼaitʼa).
10 Jé Jeobá tsjoáná kjoabijnachon kʼoa koaanle sikjaʼáyanile xi jekʼien. Kitsjoale nganʼio je profeta Elías nga koan kisikjaʼáyale je tile ʼndíchjoónkʼan xi Sarepta tsʼe (1 Rey. 17:21-23). Nga jeki nichxin, je Jeobá kʼoati kitsjoale nganʼio je profeta Eliseo nga kisikjaʼáyale je tile chjoón xi Sunem tsʼe (2 Rey. 4:18-20, 34-37). Choa̱ jebi kao xi kjaʼaísanile kui bakóyaná nga koa̱nle Jeobá sikjaʼáyanile xi jekʼien. Je Jeobá kʼoati kitsjoale nganʼio je Jesús kʼianga jaʼai i̱ Sonʼnde nga koanle kisikjaʼáyale xi jekʼien (Juan 11:23-25, 43, 44). Ndʼaibi, yaa ngʼajmi tíjna je Jesús kʼoa jetsakʼaile “ngayije kjoatéxoma” ya ngʼajmi kao i̱ Sonʼnde. Kuinga koa̱n si̱kjaʼáyanile xi jekʼien kʼoa koaan koatio ngantsjai nichxin je xi kjoaʼáyanile (Mat. 28:18; Juan 5:25-29).
11. Jósʼin basenkaoná nga tsakʼéchjíntjainá Jesús nga koa̱n kuiyoaa ngantsjai nichxin.
11 Ánni kitsjoaʼndeni Jeobá nga tse kjoañʼai kinikjaʼá je ʼNdíle nga kinikʼien. Tijé Jesús tsoyaniná anni. I kitso: “Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Nga kisikasén ʼNdíle Niná nga kʼienntjainá koaan jchatʼa je jéená kʼoa kʼoati kui kjoanda tjínná nga koa̱n kuiyoaa ngantsjai nichxin (Mat. 20:28). Nga kitsoya je pastro Pablo xi tʼatsʼe jebi, i kitso: “Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota jaʼai kjoafaʼáyale xi kʼen. Josʼin xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni” (1 Cor. 15:21, 22).
12. Jósʼin sitjoson Jeobá jme xi tjínndajinle.
12 Je Jesús kʼoakitsole chjotatjenngile nga kui katasíjéle Niná nga katanroa Chjotaxále kʼoa nga kʼoakatama i̱ Sonʼnde josʼin mele Niná (Mat. 6:9, 10). Je xi mele Niná kuinga koatio ngantsjai nichxin je chjota i̱ Sonʼnde, kuinga je Jesús kiskoejinni nga Rey sʼin tíjnale Chjotaxále kʼoa 144,000 mani chjota tíkjoejin nga koasenkao Jesús nga sitjoson josʼin mele Niná (Apoc. 5:9, 10).
13. Jmé xi tísʼín Jeobá ndʼaibi, kʼoa jmé xi machjén nga sʼiain.
13 Nichxin xi tiyoaa ndʼaibi, je Jeobá tísíkatíojtín je chjota nga tíbakóyale josʼin nga koa̱n koatio kʼianga jekoatexoma Chjotaxále i̱ Sonʼnde (Apoc. 7:9, 10; Sant. 2:8). Ningalani xkoa̱ya tjío je chjota nga jtike xínkjín kʼoa nga kjoajchán batío, je chjota xi tísíkatíoxkó Jeobá alikui jtike xínkjín, joxi ki̱cha̱bʼenyi tjíosíkao je espadale (Miq. 4:3). ʼNdele nga kjoajchán koaijin kʼoa nga chjota sikʼien, tosaa binyakao chjota nga koa̱nsjaile xi ñaki kjoabijnachon, nga tsoyale jokjoantjínni xi tʼatsʼe Niná kao jme xi tjínndajinle (1 Tim. 6:19). Nga je Chjotaxále Niná tsjoánganʼiole tsakui nichxin koatiochjoale je familiale kʼoa tsa tao̱n ñʼai koa̱nleje̱, tonga jé Jeobá tsjoále jme xi machjénle (Mat. 6:25, 30-33; Luc. 18:29, 30). Kui jebi xi bakóná nga ñaki tíjna kjoaixi je Chjotaxále Niná kʼoa nga tosi tonda sitjoson jme xi tjínndajinle Jeobá.
KJOANDA XI CHOYALEE NICHXIN XI SʼA NROA
14, 15. Jósʼin sitjoson Jeobá nga kʼoatso nga tondiaa kjoaʼaxin je kjoabiya.
14 Je Jesús jetíbatéxoma ya ngʼajmi kʼoa sitjoson ngayeje jmeni xi tongini kitso Jeobá (2 Cor. 1:20). Saʼnda tjen nó 1914, jetíbánentsja kontrale (Sal. 110:1, 2). Je Jesús kao xi 144,000 mani jeme sikjeson chjotatsʼen (Apoc. 6:2).
15 Je xi jngo jmi nó koatexoma Jesús sikjaʼáyanile xi jekʼien kʼoa koasenkao je chjota xi sitjoson nga chjotatsje koa̱n. Kʼianga jechótʼayakao xi tofetʼani je chjota, je xi kixi sʼin skoe̱kon Jeobá “tsʼee koa̱n sonʼnde kʼoa i koatio ngantsjai nichxin” (Sal. 37:10, 11, 29). Kʼoa tondiaa tjóxin je kjoabiya (1 Cor. 15:26). Nʼio tsjoa satío tokoán nga kʼoakoa̱n.
16. Ánni nga je Jeobá nixánilee.
16 Tojosʼin tiʼyaa, yaa Énle Niná jñani kʼoatso nga koa̱n kuiyoaa ngantsjai nichxin. Kui kjoachoya jebi xi basenkaoná nga kixi mangíntʼalee Niná nga ñʼai kjimachon nichxin fetʼa xi tiyoaa ndʼaibi. Tsa mená nga tsjoa sʼe̱ kon je Jeobá ali tsa tokuijin nga kixi kjuintʼanilee je Jeobá kao Jesús kʼianga mená kuiyochoán, kuinga kʼoanʼiañá nga tsjoachaa (2 Cor. 5:14, 15). Nga tsjoacha je Jeobá kao Jesús chjenngilee jokjoan kʼoa chjakaonajmíñá xi kjaʼaí chjota tʼatsʼe kjoachoya xi tjínná (Rom. 10:13-15). Nga tsín to yaoná kjuinñá kʼoa nga nda chjota koaan ngisa koa̱nmele Jeobá nga miyoná koa̱nni ngantsjai (Heb. 13:16).
17. Jméni xi tjínnená sʼiaan nga jngó jngoá (Mateo 7:13, 14).
17 Je Jeobá kui kjoanda tsjoáná nga koa̱n kuiyoaa ngantsjai nichxin, tonga ñá xi kuixónñá tsa mená ya kjuinyaa je ndiaa xi kjoabijnachon kuichokaoná (tʼexkiai Mateo 7:13, 14).f Ya kjoaʼmiya xi ijngo kui chótʼayajiaan jósʼin kuiyoaa nga jesʼe̱ná kjoabijnachon xi tsínkʼia fetʼa.
KJOAJNDA 141 Je kjoabijnachon jngoní kjoatjao
a A meli kuijnai ngantsjai nichxin. Je Jeobá kʼoatsoná nga kjoaʼaí nichxin nga tsín tisʼe̱ni kjoabiya. I̱ kjoaʼmiya jebi, kui chótʼayajiaan ánni nga kʼoéjngosíñá tokoán nga sitjoson jmeni xi tso Jeobá.
b Salmo 102:12, 24, 27: “Tonga ji Jeobá, tijnaní ngantsjai, kʼoa jchali ngantsjai. 24 I kixian: Ninána, ali tongijin chjaʼaxinnái kjoabijnachonna, nga̱ ji tíjnaní ngantsjai. 27 Jiní ngantsjai, kʼoa tsínkʼia kjoetʼa kjoabijnachonli”.
c Chótsenlai je recuadro “Nga ngantsjai nichxin tso ya Biblia”.
d Isaías 55:11: “Kʼoakoa̱n je én xi bitjoni ndsoʼba. Alikui tokjitia nga kjoaʼaínrʼoenina; ñaki kʼoakoa̱n jmeni xi mena, kʼoa ñaki kʼoasʼin kuichotsjoá jme xá tisikasénña”.
e Daniel 12:2, 13: “Nkjín xi kjiofe ya jinnangi xi kjoaʼánile, tjínkʼa xi sʼe̱le kjoabijnachon xi tsínkʼia fetʼa kʼoa tjínkʼa xi kjoasoa koatiojin kʼoa chʼaosʼin jchatokon tokʼia saʼndani. 13 Tonga ji, tosi tonda tʼinyai ndiaali. Si̱kjáyaní, tonga kuisenndoní nga kuichokjetʼa nichxin nga kʼoaili je ʼnde xi bʼakaoli”.
f Mateo 7:13, 14: “Titjásʼennio xo̱ntjoa xi nrʼoeya, nga teya xo̱ntjoa, kʼoa teya je ndiaa xi fini jña nga cha̱jin, kʼoa ali kʼoakji nkjín xi ya faʼasʼen. 14 Nga̱ nrʼoeya je xo̱ntjoa, kʼoa xkóya je ndiaa xi fini kjoabijnachon, kʼoa choa mani xi ya masjaile”.
g XI TÍNCHJA̱NI SÉN XI FAʼAITʼA: Jngo ndsʼee xi jejchínga kui tísíkjaʼaitsjenjin jmeni xi sʼin nga jekʼoéjna ngantsjai nichxin.