A nrʼoé kjoaixiná Jeobá kʼianga bʼetsʼoalee

1, 2. Ánni nga sakʼoa kʼoasʼin nikjaʼaitsjenñá nga tsín nrʼoéná Jeobá kʼianga bʼetsʼoalee.

YA Salmo 37:​4, itso: “Ñaki kao kjoatsjoa tixálai je Jeobá, kʼoa je tsjoáli jme xi mele ni̱ma̱li”. A kui xi tsonile texto jebi nga tokjoan tsjoáná Jeobá jmeni xi nijélee. Si̱kjaʼaitsjenjiaan jebi: Tsa jngolani tichjaa xi tíjna toje kʼoatsole Jeobá nga mele koai Skuela xi síchjine je xi bakóyason tʼatsʼe Chjotaxále Niná, tonga alikui nokjoale nga ya koai skuela jebi. Tsa jngo ndsʼee xi sʼa xti xi chʼin tjínle kʼoatsole Jeobá nga katasíndaya ánni nga ngisa nda tsjoánganʼioni ya jinjtín, tonga alikui tjoxinle je chʼin xi tjínle. Tsa jngo ndsʼee kao chjoónle kʼoatso kʼianga bʼétsʼoa nga tosi tonda ya katabʼejnajin naxinandále Niná je tile, tonga ti jebi bitjojin naxinandále Niná.

² Tsakui nichxin tjín xi kinijélai Jeobá kʼianga tsakʼetsʼoalai, tonga kje tsjoájinli jme xi kinijélai. Tsa kʼoasʼin nikjaʼaitsjain nga toje nrʼoéle Jeobá je xi ngikʼa kʼoa ji alikui nrʼoéli. Kʼoa tsakui nikjaʼaitsjainje̱ nga kui kʼoakinʼiai xi tsín ndatjín kʼoa kuinga tsín tsjoánili Jeobá jmeni xi nijélai. Kʼoasʼin kisikjaʼaitsjen jngo tichjaa xi Janice ʼmi.b Tichjaa jebi kao xʼinle kʼoakitsole Jeobá nga ya Betel mele koaisíxá. Je Janice, itso: “Kʼoasʼin kisikjaʼaitsjen nga kjitʼanangi kuinókjoanajin”. Tonga tsínni kinokjoale. Itso tichjaa jebi: “Ba kisʼe tokoan kʼoa kui kisikjaʼaitsjen jñáni tsín nda kisʼian. Ñaki kʼoakixinle Jeobá nga ya Betel mena kjuísixá tonga likui ʼbe ánni nga tsín kinrʼoénina”.

3. Jmé xi chótʼayajiaan i̱ kjoaʼmiya jebi.

³ Tsakui nichxin kʼoasʼin nikjaʼaitsjeen tsa nrʼoé kjoaixiná Jeobá kʼianga bʼetsʼoalee. Kʼoati kui jebi kisikjaʼaitsjen je choʼndale xi tsakatio nichxin kjoatse (Job 30:20; Sal. 22:2; Hab. 1:2). Jmé xi koasenkaoná nga sʼe̱jngo tokoán nga nrʼoéná Jeobá (Sal. 65:2). Kʼianga koa̱njinná jebi, janla koya tjínni xi chótʼayajiaan. Xi títjon, jméni xi sʼín Jeobá xi tʼatsaan. Xi majaoni, jméni xi mele Jeobá nga sʼiaan. Kʼoa xi majanni, ánni machjén sakʼoani nga si̱kʼantjaiyaa jmeni xi si̱jélee Jeobá.

JMÉNI XI SʼÍN JEOBÁ XI TʼATSAAN

4. Tojo tso Jeremías 29:​12, jméni xi tsoná je Jeobá.

⁴ Je Jeobá kʼoatso nga nrʼoéná kʼianga bʼetsʼoalee (tʼexkiai Jeremías 29:12).c Kuinga tsjoakená Jeobá nga nrʼoéniná kʼianga bʼetsʼoalee (Sal. 10:17; 37:28). Tonga jebi alikui xi tsonile nga tsjoáyejená jmeni xi nijélee. Tsakui nichxin machjén nga chóyala saʼnda nga kjoaʼaí je sonʼnde chjotse nga tsjoáná Jeobá jmeni xi nijélee.

5. Jméni xi kuenta sʼín Jeobá nga nrʼoé kʼianga bʼetsʼoalee.

⁵ Kʼianga tsjoáná Jeobá jmeni xi nijélee kui kuenta sʼín jmeni xi tjínndajinle (Is. 55:​8, 9). Jmeni xi tjínndajinle Jeobá kuinga je koatio i̱ Sonʼnde je chjota xi sitjosonle Chjotaxále ánni nga kao kjoatsjoa sixánile kʼoa nga jtín sʼin koationi. Tonga je Na̱i kʼoatso nga ngisa nda kuiyoaa tsa toñá chʼaa yaoná (Gén. 3:​1-5). Kʼianga jchale nga to énndiso jmeni xi tso Na̱i, je Jeobá títsjoáʼndele je chjota nga tije katabatéxomanile xínkjín kʼoa kuinga kʼoasikji kjoa tjínni ndʼaibi (Ecl. 8:9). Alikui tífaʼáxin Jeobá je kjoa xi tjín ndʼaibi. Tsa kʼoalani sʼin, kʼoajinsʼin sikjaʼaitsjen chjota nga nda batéxomale xínkjín kʼoa nga male bʼéndajin je kjoa xi tjín.

6. Ánni kʼoéjngoñá tokoán nga tsjoakená Jeobá kʼoa nga kui kʼoasʼín ngantsjai xi kixi tíjna.

⁶ Nkjín koya josʼin tsjoáná Jeobá jmeni xi nijélee kʼianga bʼetsʼoalee. Tobʼelañá, kisindayaa je rey Ezequías kʼianga kisijéle nganʼio nga chʼin kiskatʼale (2 Rey. 20:​1-6). Tonga tsín kisindaya Pablo kʼianga kʼoakitsole nga jonaʼyá ma xi sésʼenjin yaole, tsakui nichxin kui chʼin xi kisʼele xokitsole (2 Cor. 12:​7-9). Kʼoalati si̱kjaʼaitsjenjiaan jokoan je pastro Santiago kao Pedro. Je rey Herodes koanmele kisikʼien chjota jebi. Ningalani tsakʼétsʼoantjai je chjotale Cristo, je Santiago kinikʼieen kʼoa je Pedro kitjontjaile yaole nga̱ jé Jeobá tsakasenkao (Hech. 12:​1-11). Tsakui nichxin kʼoasʼin si̱kjaʼaitsjeen ánni nga tojngo xi tsakʼasjentjaini Jeobá. Ningalani tsín kʼoatso je Biblia, tonga jmeni xi sʼín Jeobá ñaki kixi kʼoa tsjoake koan je Pedro kao Santiago (Deut. 32:4; Apoc. 21:14).d Sakʼoa likuikjoan kui tsjoáná Jeobá jmeni xi nijélee kʼianga bʼetsʼoalee, tonga alikui yaoná nijtilee nga̱ ñaki tjínjngo tokoán nga tsjoakená kʼoa nga kui kʼoasʼín xi kixi tjín (Job 33:13).

7. Jméni xi tsín kʼoanʼia, kʼoa ánni.

⁷ Alikui koa̱n nga xíngiaa si̱ngósonkoaa yaoná. Tobʼelañá, tsakui nichxin kʼoakʼuínkixilee Jeobá jmeni xi mená, tonga tsa tsín tsjoáná. Kʼoa tsa skan sʼe̱jinná nga tsakasenkao Jeobá jngo ndsʼee xi kʼoati kui kisijé jmeni xi kinijélee kʼianga tsakʼetsʼoalee. Kʼoakoan jngo tichjaa xi Anna ʼmi. Je Matthew, xi xʼinle ma tichjaa jebi cáncer kisʼele kʼoa je tichjaa kʼoakitsole Jeobá nga katamandaya je xʼinle. Nga tiʼakʼiani, jao tichjaa xi jejchínga xi kʼoati cáncer kisʼele, kʼoa je Anna tsakʼétsʼoantjai tsanda je. Nga jao tichjaa xi cáncer kisʼele koanndayani, tonga je Matthew kʼienní. Je Anna kui kisikjaʼaitsjen tsa je Jeobá xi kʼoasʼin koanmele nga koanndaya nga jao tichjaa. Tsa kʼoalani, ánni nga tsín koanndayani je xʼinle. Ninga tsínlani majinná ánni nga koanndayani je tichjaa, ʼyañá nga kuicho nichxin nga kjoaʼaxin Jeobá jmeni xi kjoañʼai síkjaʼáná kʼoa nga sikjaʼáyanile xi jekʼien (Job 14:15).

8. 1) Tojo tso Isaías 43:​2, jósʼin basenkaoná Jeobá. 2) Jósʼin basenkaoná nga bʼetsʼoaa kʼianga kjoa bitjatojiaan (chótsenlai je video Nga bʼetsʼoaa basenkaoná nga chókjoajinná je kjoa xi bitjatojiaan).

⁸ Je Jeobá basenkaoná ngantsjai. Tsjoakená kʼoa tsín nda sʼe kon nga kjoañʼai chjaʼá (Is. 63:9). Tonga alikui tongantsjai nga faʼáxinná Jeobá je kjoa xi bitjatojiaan, xi ya mangóson xo̱ngá kao lʼí (tʼexkiai Isaías 43:2).e Kʼoatsoná Jeobá nga je koasenkaoná nga chókjoajinná tojme kjoa xi kuitjátojiaan kʼoa tsín tsjoáʼnde nga tondiaa kjoañʼai chja̱ʼá. Kʼoati tsjoáná nganʼiotsjele nga chókjoajinná je kjoa xi bitjatojiaan (Luc. 11:13; Filip. 4:13). Kuinga machjénni nga kʼoéjngoaa tokoán nga je Jeobá koasenkaoná nga chókjoajinná je kjoa xi kuitjátojiaan kʼoa nga kixi kjuintʼalee.f

XI MELE JEOBÁ NGA SʼIAAN

9. Jósʼin basenkaoná jmeni xi tso Santiago 1:​6, 7 nga bʼejngoaa tokoán nga je Jeobá koasenkaoná.

⁹ Kui xi mele Jeobá nga je si̱nʼiotʼaa (Heb. 11:6). Kʼianga tse kjoa bitjatojiaan sakʼoajin kʼoasʼin nikjaʼaitsjeen nga tsín basenkaoná je Jeobá. Je Biblia kʼoatso nga je Niná tsjoáná nganʼiole nga chókjoajinná tojme kjoa xi kuitjátojiaan (Sal. 18:29). Kuinga tsín jao kʼoéñá tokoán, tosa ntsjaintsjai kʼoétsʼoaa nga̱ ʼyañá nga kjuinrʼoéná je Jeobá (tʼexkiai Santiago 1:​6, 7).g

10. Jngo choa̱ tʼejnai jmeni xi koa̱n sʼiaan kʼianga jekabʼetsʼoaa.

¹⁰ Kui xi mele Jeobá nga kʼoasʼiaan jmeni xi kaʼmilee nga kabʼetsʼoalee. Si̱kjaʼaitsjenla tsa jngolani ndsʼee xi kʼoatítsole Jeobá nga katabasenkao nga sijékjoale je naile nga koai kjoajtíntse. Je Jeobá koasenkaojin ndsʼee jebi nga nʼiojin koa̱n nga koaikjákao je naile kʼoa tsakui nichxin nkjín kʼa sijékjoale nga tsjoáʼndele. Koa̱njin kʼoakuitso ndsʼee jebi nga kjaʼaí nichxin sixángajaoni kʼoa tsa kʼoakuitsoje̱ nga tsín katamachjínle je nichxin xi sicha.

11. Ánni nga kjitʼa kʼoétsʼoañá.

¹¹ Kui xi mele Jeobá nga kjitʼa kʼoétsʼoalee tsa jme xi kjimakjáojinná (1 Tes. 5:17). Je Jesús kʼoakitso nga sakʼoa tsín tokjoan koasenkaoná Jeobá kʼianga kʼoétsʼoaa (Luc. 11:9). Kuinga machjénni nga ntsjaintsjai kʼoétsʼoaa kʼoa si̱jélee Jeobá nga katabasenkaoná tsa jme xi tinikjáojiaan (Luc. 18:​1-7). Nga nkjín kʼa bʼetsʼoalee Jeobá kʼoasʼin bakoñá nga machjén kjoaixiná jmeni xi tinijélee kʼoa nga ñaki tjínjngo tokoán nga je koasenkaoná.

ÁNNI MACHJÉN SAKʼOANI NGA SI̱KʼANTJAIYAA JMENI XI SI̱JÉLEE JEOBÁ

12. 1) Jméni xi koa̱n si̱kjaʼaitsjenjiaan, kʼoa ánni. 2) Jméni xi koa̱n sʼiaan nga katanrʼoéná Niná kʼianga bʼetsʼoalee (chótsenlai je recuadro “A bakoñá kjoaxkóntokon kʼianga nijélee Jeobá jmeni xi mená”).

¹² Kʼiatsa tsín kʼoakoa̱n jmeni xi kanijélee Jeobá, si̱kjaʼaitsjenjiaan nga jan koya jebi. Xi títjon, “a kui xi machjén kjoaixina jmeni xi tisijé”. Sakʼoa tokui nijé jmeni xi kjenndiaaná, tonga tsínni kui xi machjén kjoaixiná. Tsakui nichxin kui tinijé nga kʼoasʼin katasʼendajin je kjoa xi tjínná josʼin mená ñá, tonga tsa koa̱nni nga kjaʼaísʼin sʼe̱ndajin. Kʼoa tsakui nijé sakʼoa jmeni xi tsín mangóson kao josʼin síkjaʼaitsjen Jeobá (1 Juan 5:14). Si̱kjaʼaitsjenjinla je xijchá xi kanikʼaxki̱ná ya párrafo 1, nga kʼoakitsole Jeobá nga tosi tonda ya katabʼejnajin tile ya naxinandále. Tsakui nichxin kʼoasʼin si̱kjaʼaitsjeen nga ndatjín jmeni xi kisijé xijchá jebi, tonga je Jeobá alikui ʼya xi bʼénele nga je katasíxále, kui xi mele nga ñaki ni̱ma̱ná kjuinroajinni nga si̱xálee (Deut. 10:​12, 13; 30:​19, 20). Jméni xi koa̱n sʼin xijchá jebi. Koa̱njin kui sijéle Jeobá nga katatsjoále kjoachjine jósʼin kuinyakao je tile nga tsjoake koa̱n Jeobá kʼoa nga ni̱ma̱le kjuinroajinni nga kʼoasʼin (Prov. 22:6; Efes. 6:4).

13. Tojo tso Hebreos 4:​16, kʼiáni basenkaoná Jeobá.

¹³ Xi majaoni koya xi koa̱n si̱kjaʼaitsjenjiaan kui jebi: “Jótso Jeobá, a ndʼaikjoán machjénna jmeni xi tisijéle”. Sakʼoa kui xi mená nga ndi̱to̱n kʼoakatama jmeni xi nijé, tonga jé Jeobá xi ngisa nda be kʼiáni machjén nga koasenkaoná (tʼexkiai Hebreos 4:16).h Tsa tsín ndi̱to̱n tsjoáná Jeobá jme xi nijélee, tsakui nichxin kʼoasʼin si̱kjaʼaitsjeen nga tsín nrʼoéná. Je Jeobá basenkaoná ngantsjai, tonga tsakui nichxin i̱ni títsoná: “Kjesa choa̱lejin”. Si̱kjaʼaitsjenla ijngokʼa je choa̱le ti xi kuiná kisijé nga katamandaya nga chʼin tjínle. Tsa kisindayalani Jeobá ti jebi, kʼoajin kitso je Na̱i nga tokui nga koanndaya nga je Jeobá tísíxánile (Job 1:​9-11; 2:4). Je Jeobá jebe kʼiáni nga kjoaʼaxin je chʼin (Is. 33:24; Apoc. 21:​3, 4). Kuinga ʼyañá nga tsín tokjitʼanangi tjóxinná ndʼaibi kʼiatsa chʼin tjínná. Jmé xi koa̱n kuitso ti xi kanikʼaxkiaa kʼianga kʼoetsʼoa. Koaan kui sijéle Jeobá nga katachókjoajinle nga chʼin tjínle kʼoa nga tosi tonda kixi koaitʼale (Sal. 29:11).

14. Jméni xi bakóyali jokoan je Janice.

¹⁴ Si̱kjaʼaitsjenla ijngokʼa tʼatsʼe tichjaa Janice nga kuiná kisijéle Jeobá nga Betel mele koaisíxá. Aon nó jaʼato nga koanjinle tichjaa jebi nga kinrʼoéle Jeobá jmeni xi kisijéle. Itso: “Je xi aon nó, je Jeobá tsakasenkaona nga kisindaya yaona jokjoan. Tobʼelañá, ngisaa kisinʼiotʼa, ngisaa nda kiskotʼaya nga toʼan kʼoa koanjinna nga koa̱n tsjoa sʼe̱ tokoán tojñani nga tinixálee Jeobá”. Nga koanskanni, je tichjaa Janice kao xʼinle superintendente xi tsʼe circuito sʼin kisixá. Je Janice itso: “Je Jeobá kinrʼoéna nga tsakʼetsʼoale, ninga tsínkjoan kʼoakoan josʼin koanmena. Tsee jaʼato nga koanjinna nga nʼio naskánatjín je kjoanda xi kitsjoana Jeobá. Tsjoale kjoanda nga tiʼbe nga tsjoakena kʼoa nʼio tsjoa tjín tokoan”.

15. Ánni ndatjínni nga kʼoaiʼndelee Jeobá nga je katabándiaaná kʼoa nga tsín tokui si̱jélee jmeni xi mená sʼiaan (kʼoati chótsenlai sén xi faʼaitʼa).

¹⁵ Xi majanni koya jmeni xi koa̱n si̱kjaʼaitsjenjiaan kui jebi: “A kui sijéle Jeobá jmekjoanni xi mena”. Ningalani ndatjín nga kʼoanʼia, kʼoati ndatjín nga bʼaiʼndelee nga je katabándiaaná ánni nga jchañá jmeni xi mele nga sʼiaan. Si̱kjaʼaitsjenla ijngokʼa je tichjaa xi kʼoanákitsole Jeobá nga kui xi mele nga koai je Skuela xi síchjine je xi bakóyason tʼatsʼe Chjotaxále Niná. Kuinga kʼoatsoni tichjaa jebi nga̱ kui xi mele nga ya koaitsjoánganʼio jñani ngisa machjén xi tsoyason. Jmésani xi koa̱n kuitsole Jeobá nga kʼoetsʼoale. Koaan kui sijéle nga katabasenkao jmésani xi koa̱n sʼin nga sixále (Hech. 16:​9, 10). Kʼianga jekʼoetsʼoa, koa̱njin skónangile je superintendente xi tsʼe circuito jñáni nga ngisa machjén je xi tsoyason. Kʼoati koa̱n ya sucursal skónangi jñáni nga ngisa machjén nganʼio.i

16. Jméni xi ñaki kʼoéjngolee tokoán.

¹⁶ Tojosʼin tiʼyaa, ñaki kʼoéjngoaa tokoán nga kjuinrʼoéná Jeobá nga kʼoétsʼoalee, nga̱ tsjoakená kʼoa kʼiakjoán koasenkaoná nga machjénná (Sal. 4:3; Is. 30:18). Sakʼoajin tsín kʼoakoa̱n jokjoansʼin mená ñá, tonga tsín jao tjínná nga nrʼoéná Jeobá kʼianga bʼetsʼoalee. Tsjoakená kʼoa tsínkʼia tsjiónkonná (Sal. 9:10). Je Jeobá si̱nʼiotʼaa ngantsjai kʼoa tosi tonda kʼoéyanajmílee jotjín tokoán (Sal. 62:8).