Kuitjoson jmeni xi choyalee

1. Ánni nga ñaki kisʼejngoni kon Abrahán nga kuitjoson jme xi kiskoyale.

JE Jeobá kʼoakitsole Abrahán nga ya ntje̱le kjuinroani nga koa̱nchikontʼain ngatsʼi naxinandá (Gén. 15:5; 22:18). Nga koankjainle xi tʼatsʼe Niná, ñaki tsakʼéjngo kon nga kuitjoson jmeni xi tsakʼinle. Kʼianga jeme 100 nóle Abrahán kʼoa 90 nóle je chjoónle tojo kje tsínjinle xti (Gén. 21:​1-7). Je Biblia kʼoatso nga “kao kjoachoyakaokjoa koankjainnile Abraham, nga koa̱n nʼaile nkjín naxinandá, josʼin nga tsakʼinle” (Rom. 4:18). Jmeni xi kiskoyale Abrahán kitjosonní, kʼoa je ʼndí xi kisʼele Isaac tsakʼin. Ánni nga ñaki tsakʼéjngoni kon Abrahán nga sitjoson Jeobá jmeni xi kitsole.

2. Ánni tsakʼéjngosíni kon Abrahán nga sitjoson Jeobá jmeni xi kitsole.

² Nga nʼio nda tsabexkon Abrahán je Jeobá, kuinga tsakʼéjngoni kon nga kuitjoson jme xi kitsole (Rom. 4:21). Nga koankjainle, je Jeobá chjotakixi sʼin tsabekon kʼoa miyole koan (Sant. 2:23). Ya Romanos 4:18 kʼoatso nga koankjainle kʼoa nga kisʼele kjoachoya. Kuila kataʼyaa jmeni xi kitso pastro Pablo xi tʼatsʼe kjoachoya tojo sʼin faʼaitʼa ya capítulo 5 xi tsʼe Romanos.

3. Jméni xi kitso Pablo xi tʼatsʼe kjoachoya.

³ Je Pablo kʼoakitso ánni nga ñaki kʼoéjngosíñá tokoán nga kuitjoson jmeni xi choyalee (Rom. 5:5). Kʼoati síjinná jméni xi sʼiaan nga ñaki sʼe̱jngo tokoán nga kuitjoson jme xi choyalee. Kʼianga chótʼayajiaan jmeni xi tso Romanos 5:​1-5, si̱kjaʼaitsjenjiaan tsa ngisa tjínjngo tokoán ndʼaibi nga kuitjoson jmeni xi choyalee tʼatsʼe nichxin xi sʼa nroa. Kʼoati kui chótʼayajiaan jméni xi sʼiaan nga sa koa̱nkjain sa koa̱nkjainná nga kuitjoson jmeni xi choyalee. Kuila títjon kataʼyaa jmeni xi kitso Pablo nga ñaki bitjoson jmeni xi choyalee.

JE KJOACHOYA XI TJÍNNÁ

4. Jmé xi nchja̱ni Romanos 5:​1, 2.

⁴ (Tʼexkiai Romanos 5:​1, 2).b Jmeni xi tso texto jebi jé xokitsole Pablo je chjotale Cristo xi Roma tsʼe. Kʼianga tsabe jotjínni xi tʼatsʼe Jeobá kao Jesús koankjainle kʼoa chjotale Cristo koan. Je Niná chjotakixi sʼin tsabekon chjota jebi kʼoa kitsjoale nganʼiotsjele. Ñaki kʼoatsakatío kon nga tjoéle je kjoanda xi kiskoyale.

5. Jmé kjoachoya xi tjínle je chjotale Cristo xi ya koai ngʼajmi.

⁵ Je Pablo kʼoakitsole jme kjoachoya xi tsjoále Niná je chjotale Cristo xi Éfeso tsʼe. Kʼoakitsole nga jngo kjoatjao sʼe̱le (Efes. 1:18). Kʼoa je chjotale Cristo xi Colosas tsʼe kʼoakitsole nga ya ngʼajmi tjoéle je kjoanda xi tjíokoyale (Col. 1:​4, 5). Je chjotale Cristo jebi yaa ngʼajmi kjoaʼáyanile kʼoa yaa koatexomakao Jesús (1 Tes. 4:​13-17; Apoc. 20:6).

6. Jókitso jngo ndsʼee xi ya ngʼajmi kisʼele kjoachoya.

⁶ Je chjotale Cristo xi ya ngʼajmi koai nʼio chjí be je kjoachoya xi tjínle. Tobʼelañá, kʼianga nó 1991, i kitso je ndsʼee Frederick Franz: “Ñaki tjínjngoo tokoán nga kuitjoson jmeni xi tichoyalee nga jngó jngoá xi 144,000 mañá, saʼnda tsín machoyaná ndʼai jokji kjoanda sʼe̱ná”. Kʼoakitso jokisʼe kon nga nkjín nó nga ñaki to xále Niná kisʼin. I kitso: “Nʼio chjí ʼyaa nga kui kjoachoya tjínná kʼoa ngisaa chjí ʼyaa ninga sa tse sa tse kjoaʼato, ninga millón nó chóyaa. Nga̱ tsín tsa toxitsjoajin nga tichoyá”.

7, 8. Jmé kjoanda xi tjínná xi i̱ Sonʼnde choyalee kuiyoaa (Romanos 8:​20, 21).

⁷ Me tongatsʼiaa nga kui kjoachoya tjínná joni Abrahán nga i̱ Sonʼnde kuiyoaa, nga jekoatexoma Chjotaxále Niná (Heb. 11:​8-10, 13). Je Pablo kʼoati kinchja̱ni tʼatsʼe kjoachoya jebi (tʼexkiai Romanos 8:​20, 21).c Kʼianga tosʼa kichotʼayai Biblia, jméni xi ngisa koanndosinli jokoa̱nchon nichxin xi sʼa nroa. A kuinga tsín tisʼeni chʼin, nga tsín tikoa̱njchíngañá kʼoa nga tsín tikuiyáñá. Axo kuinga kjoaʼáyanile xíngiaa kʼoa nga ya sonʼndenaxó koatio. Ñaki kuitjoson jebi nga̱ jé Niná xi kui kjoachoya tsjoáná.

⁸ Ninga ya ngʼajmi tjínná kjoachoya kʼoa ninga i̱ Sonʼnde choyalee nga kuiyoaa, tsjoa sʼe tokoán nga kui kjoanda tjínná. Jmé xi koa̱n sʼiaan nga tosi tonda sʼe̱jngo tokoán nga kuitjoson jmeni xi choyalee. Nga koa̱njinná jebi, kataʼyala jmesa xi kitso je Pablo. Jmeni xi kitso basenkaoná nga sʼejngo tokoán nga kuitjoson jmeni xi choyalee.

JÓSʼIAAN NGA SʼE̱JNGO TOKOÁN NGA KUITJOSON XI CHOYALEE

9, 10. Tojo koan Pablo, jmé kjoa xi kʼoati kuitjátojiaan (Romanos 5:3; kʼoati chótsenlai sén xi faʼaitʼa).

⁹ (Tʼexkiai Romanos 5:3).d Je Pablo kʼoakitso nga ngisa nʼio sʼejna je kjoachoya xi tjínná kʼianga kjoa bitjatojiaan. Ñá xi chjotale Cristo maa ʼyañá nga toxá kjoa kuitjátojinñá. Kataʼyala jmeni xi kitsole Pablo je chjotale Cristo xi Tesalónica tsʼe. I kitsole: “Kʼia nga tojo ya tsakiyokaolaijin, kʼoasʼin tongini tsakʼinlaijin nga kjoañʼai chja̱ʼá, jo kjima” (1 Tes. 3:4). Kʼoa je chjotale Cristo xi Corinto tsʼe, i kitsole: “Likui menajin nga tsín jchao xi tʼatsʼe kjoañʼai xi koantʼainjin [ . . . ], saʼnda nga mekʼainjin” (2 Cor. 1:8; 11:​23-27).

¹⁰ Kʼoati ma nichxin xi tiyoaa ndʼaibi, tsee kjoa bitjatojiaan (2 Tim. 3:12). Jmé kjoa xi tibitjatojin saʼnda nga tosʼa tsaʼyaxkuin je Énle Niná. Tsakui nichxin besinli je xíngi, miyoli kʼoa tsa totaon beli. Tsakui nichxin kʼoati kjoa tísʼeli jñani nixái nga kixi ʼmikoai yaoli (Heb. 13:18). Kʼoa tsa batiochjoali je chjotaxá nga Énle Niná ʼmiyasuin. Je Pablo kʼoakitso nga tsjoa kjoáyaa tokoán tojme kjoa xi kuitjátojiaan. Ánni nga tsjoa kʼoésíñá tokoán.

11. Ánni machjénni nga chókjoajinná je kjoa xi bitjatojiaan.

¹¹ Kuinga tsjoa sʼeni tokoán nga kjoa bitjatojiaan nga̱ basenkaoná nga nindayaa yaoná jokjoaan. Ya Romanos 5:​3, itso: “Je kjoañʼaibe síjchájinná kjoatsejta”. Ngatsʼiñá nga toxá kjoa kuitjátojinñá kʼoa machjén nga ñaki kʼoakʼoé tokoán nga chókjoajinná je kjoa xi kuitjátojiaan kʼoa so̱koná je kjoanda xi tichoyalee. Alikui mená nga ya koa̱nngósonkoaa je na̱xi̱n xi kitso Jesús, nga kʼoakitso nga je xi kitsao jña la̱jao̱ chon yaa mangóson je chjota xi tsínti kotʼayani Énle Niná nga kjoa faʼaine (Mat. 13:​5, 6, 20, 21). Ningalani tsín mená nga kjoa kuitjátojiaan, nda bichómani nga chókjoajinná. Kataʼyala jósʼin basenkaoná.

12. Jósʼin bichómani nga kaná je kjoa xi bitjatojiaan.

¹² Je Santiago kʼoakitso josʼin bichómani nga kaná je kjoa xi bitjatojiaan. I kitso: “Je kjoatsejta katamajngo, jméni nga kʼoasʼin ñaki nda koa̱njngosínio, nga tsínjme xi cha̱no” (Sant. 1:​2-4). Je Santiago kʼoakitso nga basenkaoná nga chókjoajinná. Tobʼelañá, ngisaa tsejta maa, nʼio sʼejna kjoamakjainná, ngisaa ninʼiotʼaa je Niná kʼoa nkjínsa koya josʼin basenkaoná.

13, 14. Jósʼin basenkaoná nga chókjoajinná je kjoa xi bitjatojiaan, kʼoa jósʼin basenkao je kjoachoya xi tjínná (Romanos 5:4).

¹³ (Tʼexkiai Romanos 5:4).e Je Pablo kʼoakitso nga “je kjoatsejtabe síjchájinná nga nda kuitjoaa”, xi tsonile, nda biyoaa ngixko̱n Niná. Alikui xi tsonile nga tsjoa sʼe kon Niná nga kjoa bitjatojiaan, kuinga tsjoa sʼeni kon nga chókjoajinná. Nda sʼe tokoán nga ʼyaa nga tsjoa sʼe kon Niná kʼianga kaná je kjoa xi bitjatojiaan (Sal. 5:12).

¹⁴ Si̱kjaʼaitsjenjinla jokoan Abrahán. Nga kichokjoajinle je kjoa xi jaʼatojin ndasʼin tsakʼejna ngixko̱n Niná. Je Jeobá miyole sʼin tsabekon kʼoa chjotakixi sʼin tsabekon (Gén. 15:6; Rom. 4:​13, 22). Tikʼoasʼinni, kʼianga nda kuiyoaa ngixko̱n Niná ali tsakuijin xi kuitsoni josʼin tinixálee kʼoa tsa jme xá tjínná jinnaxinandále. Xi ngisa chjíle kuinga kixi koanngíntʼalee kʼoa nga chókjoajinná je kjoa xi bitjatojiaan. Koaanná kʼoasʼiaan jebi ninga sʼa xtiaa kʼoa ninga jetjínná nó, tojosʼin tinijchá yaoná kʼoa ninga nkjín koya jmeni xi maná nʼia. Kʼiatsa jme kjoa tibitjatojiaan kuenta sʼiaan nga nda kuiyoaa ngixko̱n Niná kʼiatsa kixi koanngíntʼalee. Kʼianga ʼyaa nga tsjoa tjín kon Jeobá xi tʼatsaan ñaki sʼejngo tokoán nga kuitjoson jmeni xi choyalee.

NGISAA SʼEJNGO TOKOÁN NGA KUITJOSON XI CHOYALEE

15. Jmésani xi kitso Pablo, kʼoa jméni xi tsakui nichxin kʼoakuixoán.

¹⁵ Tojosʼin tiʼyaa, je Pablo kʼoakitso nga nda kuiyoaa ngixko̱n Niná kʼiatsa chókjoajinná je kjoa xi bitjatojiaan. Kʼoa i kitsosa: “Nga nda kuitjoaa, kui xi síjchájinná kjoachoyakaokjoa. Kʼoa je kjoachoyakaokjoa alikui sísoa” (Rom. 5:​4, 5). Ya Romanos 5:​2, je Pablo sa jekʼoakitsole je chjotale Cristo xi tsakatio ya Roma nga kui kjoachoya tjínle nga skoe̱ kjoajeyale Niná. Tsakui nichxin i̱ bixoán: “Tsa jetjínle kjoachoya chjotale Cristo jebi, ánni nga kui kisikʼaxki̱ ijngokʼanile Pablo”.

16. Kʼoasi jósʼin sʼejngoni tokoán nga kuitjoson kjoaixi jmeni xi tso je Biblia (kʼoati chótsenlai sén xi faʼaitʼa).

¹⁶ Kʼiatsa kuenta sʼiaan nga sa sʼe̱jngo sa sʼe̱jngo tokoán nga kuitjoson jme xi choyalee koa̱njinná jmeni xi kitso je Pablo. Tobʼelañá, kʼianga kʼoatsakʼinná nga koa̱n kuiyoaa i̱ Sonʼnde nga jeʼndenaxó koa̱n, tsakui nichxin kʼoasʼin kinikjaʼaitsjeen nga tsínkʼia kʼoakoa̱n jmeni xi tíʼminá. Tonga kʼianga ngisasa nda tsaʼyaa xi tʼatsʼe Jeobá kʼoa nga tsakʼinyaná jmeni xi tso je Biblia ngisaa koa̱nkjainná nga kʼoakoa̱n kjoaixi.

17. Jméni xi basenkaoná nga ngisa sʼejngo tokoán jmeni xi choyalee kʼianga jemangínsʼenngindá.

¹⁷ Nga tosi tonda chotʼayá Énle Niná nga jemangínsʼenngindá ngisaa sʼejngo tokoán jmeni xi choyalee (Heb. 5:13–6:1). Kʼoajinti maa jotso ya Romanos 5:​2-4, nga je Jeobá basenkaoná nga kjoa bitjatojiaan. Nga ʼyaa nga tsjoa tjín kon Jeobá xi tʼatsaan ngisaa timakjainngániná nga kuitjoson jmeni xi tso kʼoa ngisaa sʼejngo tokoán nga kuitjoson jme xi choyalee. Basenkaoná nga nda biyoaa kao familianá, ngisaa ʼyaa jmeni xi chjoejiaan kʼoa nda nichjén je nichxinná.

18. Jméni xi tsoná Jeobá xi bʼéjngo tokoán.

¹⁸ Kʼianga kʼoakitso Pablo nga sʼená kjoachoya nga nda tijnaa ngixko̱n Niná, kʼoati kitso nga nʼio tjínle kjoandosin nga kʼoéjngoaa tokoán nga kuitjoson jmeni xi choyalee. Je Pablo i kitsole je chjotale Cristo: “Je kjoachoyakaokjoa alikui sísoa, nga̱ je kjoatjaochale Niná kisitseya ni̱ma̱ná xi totʼatsʼe je Espíritu Santo xi tsakʼainá” (Rom. 5:5). Kuinga ñaki kʼoéjngoñá tokoán nga kuitjoson jmeni xi choyalee.

19. Jméni xi ñaki kʼoéjngolee tokoán.

¹⁹ Je Niná kisitjoson jmeni xi kitsole Abrahán. Kisasenle jmeni xi kisʼin kʼoa miyole sʼin tsabekon kʼoa kitjoson jmeni xi kiskoyale je Abrahán. Ya Biblia kʼoatso nga tsejta koan Abrahán kʼoa je Niná kitsjoale jmeni xi kitsole (Heb. 6:15; 11:​9, 18; Rom. 4:​20-22). Tojo koan je Abrahán, tsa kixi kjuintʼalee je Jeobá sʼe̱jngo tokoán nga kuitjoson jmeni xi choyalee kʼoa tsjoa sʼe̱ tokoán (Rom. 12:12). Je Pablo i kitso: “Je Niná xi tsjoá kjoachoyakaokjoa, katasítseno kao ngayije kjoatsjoa, kʼoa kao kjoanyʼántakon nga makjainno, jméni nga koa̱nnkjínyasínino kjoachoyakaokjoa xi totʼatsʼe nganʼiole je Espíritu Santo” (Rom. 15:13).