Chjénngilee je ánkje

1, 2. 1) Jméni xi tsín mangósoán kao ánkje. 2) Jméni xi mangósoán kao ánkje.

KʼIANGA tsaʼyaa xi tʼatsʼe Jeobá, jé xi kʼoasʼin koanmele nga ya naxinandále tsakiyojiaan. Tjío je ndsʼee kao tichjaa jngo tjíjtsa Sonʼnde kʼoa tsjoachañá xíngiaa nga naxinandále Niná tiyojiaan. Kʼoati ya maxki̱kao je ánkje xi millón mani xi tjío ngʼajmi (Dan. 7:​9, 10). Kʼianga nikjaʼaitsjenjiaan xi tʼatsʼe ánkje, tsakui nichxin kui nikjaʼaitsjeen nga tsín mangósoán kao je. Jolani nga je títjon koannda tikʼoajinni chjota (Job 38:​4, 7). Tsje kʼoa ngisaa kixi tikʼoajinni ñá nga̱ chjotajée maa kʼoa ngisaa tse nganʼio tjínle (Luc. 9:26).

² Kʼoati tjín josʼin mangósoán kao ánkje. Tojo sʼín je ánkje nga kjenngile jokjoan je Jeobá, kʼoati koa̱n kʼoasʼiaan tsanda ñá. Ñá chjoejiaan jmeni xi nʼia, tjínná jaʼaín, kjaʼaí kjaʼaí kjoaan nga jngó jngoá kʼoa kjaʼaí kjaʼaí xá kjinená jinnaxinandále Niná. Joni je ánkje kʼoati machjénná tsanda ñá nga jchaxkoán Niná (1 Ped. 1:12).

3. Jmé xi bakóyaná josʼín je ánkje.

³ Je ánkje nʼio nda choa̱ batíoná kʼoa koaan chjénngilee. I̱ kjoaʼmiya jebi kui chótʼayajiaan jósʼin chjénngilee je ánkje nga nangitokon ma, nga tsjoake je chjota, nga tjíokale jmeni xi kjima kʼoa nga tjíotsjoánganʼio nga tsje sʼin tíbʼejna je jtín.

NANGITOKON JE ÁNKJE

4. 1) Jósʼin bakó nga nangitokon je ánkje. 2) Ánni nangitokonni je ánkje (Salmo 89:7).

⁴ Je ánkje nangitokon kʼoa sítjoson jmeni xi tsole Jeobá ninga tse nganʼio tjínle kʼoa ninga nʼio chjine (Sal. 103:20). Alikui yaole bʼasjengʼa kʼianga sítjoson je xá xi bánele Jeobá kʼoa alikui kui bʼasjengʼani yaole nga tse nganʼio tjínle. Tsjoa satío kon nga sítjoson jmeni xi mele Niná ningalani tsín ʼya xi be joʼmi (Gén. 32:​24, 29; 2 Rey. 19:35).a Alikui sasénle tsa je kuitjongʼa nga̱ be nga toje Jeobá xi tjínnele kuitjongʼa. Kuinga nangitokonni je ánkje nga̱ tsjoake je Jeobá kʼoa bexkón (tʼexkiai Salmo 89:7).b

5. Jósʼin tsakakó nga nangitokon ma jngo ánkje kʼianga tsakatekjáyale je Juan (kʼoati chótsenlai sén xi faʼaitʼa).

⁵ Kataʼyala jngoaa choa̱ xi bakó nga nangitokon je ánkje. Nga chrian nó 96, jngo sén tsakakóle je Juan, je ánkje jebi alikui ʼyale joʼmi (Apoc. 1:1). Kʼianga tsabe Juan je sén xi kisakole, tsakasenxkónyʼintʼale je ánkje. Tonga je ánkje kʼoakitsole nga tsín kʼoakatasʼín. I kitsole: “Ali kʼoajin nʼiai. Kʼoati an choʼnda nía joni ji, kao je ndsʼai [ . . . ]. Jchaxkuín Niná” (Apoc. 19:10). Nangitokon koan je ánkje, nga̱ tsín koanmele nga je kitjongʼa. Tosaa kʼoakitsole je Juan nga je Jeobá katabexkón kʼoa tsín ngisa chjí tsabekon yaole tikʼoajinni Juan. Ningalani ngisa tse nganʼio tjínle kʼoa jengisa kjoatse nga je Jeobá tísíxále tikʼoajinni Juan, nangitokon koan kʼoa i kitsole: “Choʼnda nía joni ji”. Ngasin nganda tsakjákaonajmí kʼianga tsakatekjáyale kʼoa koanjinle jokisʼe kon je Juan kʼianga jngo sén kisakole.

6. Jósʼin koa̱n chjénngilee je ánkje nga nangitokon.

⁶ Chjénngilee je ánkje nga nangitokon. Alikui yaoná chʼa̱sjengʼaa kʼianga si̱tjosoán je xá xi kjinená (1 Cor. 4:7). Kʼoa tsín kʼoasʼin si̱kjaʼaitsjeen nga ngisa tse jmeni xi maná tikʼoajinni xi ngikʼa tokuini nga jekjoatse tinixálee Jeobá kʼoa tsa jme xá kjinená jinnaxinandále. Kʼianga sa tse sa tse xá sʼená jinnaxinandále Niná ngisaa timachjénngáni nga nangitokon koaan (Luc. 9:48). Tojo sʼín je ánkje, kʼoati binyakoaa xi ngikʼa, alikui mená nga kʼoasʼin katasíkjaʼaitsjen nga ngisa chjíle je xá xi nʼia tikʼoajinni je.

7. Tsa nangitokon maa, jósʼiaan kʼianga kjoafaʼaitsjen kʼoailee tsa ʼyani.

⁷ Tsa nangitokon maa, jósʼiaan kʼianga kjoafaʼaitsjen kʼoailee je xtiná kʼoa tsa je ndsʼee xi tjío ya jinjtín, tsakui nichxin machjén nga kʼoakʼuínkixilee jñani tsín nda tísʼín. Kʼoati sʼiaan jokisʼin je ánkje xi tsakjákaonajmí je Juan, ngasin nganda chja̱kaonajmiá ánni nga tsín chʼao sʼe̱ni kon. Tsa tsín kʼoasʼin si̱kjaʼaitsjeen nga ngisa nda nʼia tikʼoajinni xi ngikʼa, ngasin nganda chja̱kaonajmiá kʼoa yaa Biblia chʼa̱ngiñá jmeni xi kʼuínlee (Col. 4:6).

JE ÁNKJE TSJOAKE JE CHJOTA

8. 1) Tojo tso Lucas 15:​10, jósʼin bakó je ánkje nga tsjoake chjota. 2) Jósʼin binyakaoná je ánkje kʼianga ʼmiyasoán (kʼoati chótsenlai sén xi faʼaitʼa ).

⁸ Je ánkje kuenta sʼín je chjota. Tsjoa satío kon kʼianga kʼoamanile jéele jngo chjota kʼoa tsa kʼiaje̱ nga faʼaijin ijngokʼani naxinandále Niná jngo xi jekisikjin tsakai. Kʼoati tsjoa satío kon kʼianga jngo chjota kotʼaya Énle Niná, nga síkʼantjaiya yaole nga je Jeobá síxále (tʼexkiai Lucas 15:10).c Kʼoati binyakaoná je ánkje nga ʼmiyasoán (Apoc. 14:6). Ningalani tsín jesoa fákaonajmíni Énle Niná je chjota, koaanle koandiaaná nga ska̱jiaan jngo chjota xi mele skótʼaya Énle Niná. Alikui ʼyaa kʼiákjoánni nga je ánkje bándiaaná nga kajiaan jngo chjota, nga̱ nkjínsa koya jmeni xi sʼín je Jeobá nga be chjota xi tʼatsʼe. Sakʼoa kui nganʼiotsjele síchjén nga be chjota xi tʼatsʼe kʼoa nga bándiaale je choʼndale (Hech. 16:​6, 7). Tonga kʼoati síchjén Jeobá je ánkje, kuinga tjínjngoni tokoán nga je ánkje tjenkaoná kʼianga ʼmiyasoán (chótsenlai je recuadro “Kinrʼoéle Niná kʼianga tsakʼétsʼoale”).d

9. Jósʼin chjénngilee je ánkje nga tsjoake je chjota.

⁹ Chjénngilee je ánkje nga tsjoake je chjota. Tsjoa kʼoé tokoán tojo sʼín je ánkje kʼianga kʼoatso én noʼyá ya jinjtín nga jngo xi kichʼasjejin kjoaʼaíkʼejnajin ijngokʼani naxinandále Niná. Nda chjoéyaa ndsʼee jebi. Tsa kʼoasʼiaan, kʼoasʼin tichjenngilee je ánkje (Luc. 15:​4-7; 2 Cor. 2:​6-8). Kʼoati je ánkje chjenngilee kʼianga kʼoakji ʼmiyasoán jokji tjen bichó nganʼioná (Ecl. 11:6). Tojo sʼín je ánkje nga binyakaoná, kʼoati koa̱n kuinyakoaa je ndsʼee nga tsoyason. Koaan ñatjen kuitjokʼinyasoán kao jngo xi tosʼa choatsele nga títsoyason. Kʼoati koa̱n kʼoakʼuínlee jngo ndsʼee xi jejchínga kʼoa tsa xi chʼin tíbʼetʼale nga ñatjen kʼuínyasoán.

10. Jmé xi bakóyaná jokisʼin Sara.

¹⁰ Ninga tsín tikʼoamaniná kʼoakji ʼmiyasoán josʼin mená tsakai, koaan kjoásjailee josʼin kʼuínyasoán nga ñatjen si̱xá kao ánkje. Kataʼyala jokoan jngo tichjaa xi India tsʼe, xi Sara ʼmi.e Kʼianga jekan nó nga precursora sʼin tísíxá tichjaa jebi, kitjochʼinle kʼoa to tsakajnasa. Nga kʼoakoan nʼio ba kisʼe kon, tonga nga tsakinyakao je ndsʼee kʼoa nga tsakʼéxkia Biblia tobijbi nda kisʼe ijngokʼani kon. Tsakásjaile josʼin kitsoyason. Nga tsín tikoan tsakʼejnakixini nga carta kiski, teléfono kinchja̱le chjota. Jé kinchja̱le chjota xi fisíxatʼa tsakai, kʼoa chjota jebi kʼoakitsole nga tjíosa xi mele skótʼaya Biblia. Nga kʼoasʼin kitsoyason je tichjaa, tochoatse jaʼato nga 70 koanni chjota xi kitsjoale estudio. Nga tsín kʼoakoanle nga toje kitsoyale ngatsʼi, jé ndsʼee xi tjío ya jinjtín kʼoakitsole nga katatsoya kʼale, kʼoa nkjín chjota xi je kitsoyale xi jefi kjoajtín. Nʼiojin tsjoa satío kon je ánkje nga ñatjen síxá kao je ndsʼee xi kʼoasʼín josʼín je Sara, nga kʼoakji tjen tsoyason jokji tjen kʼoamale.

JE ÁNKJE TJÍOKALE JMENI XI KJIMA

11. Jósʼin tjíobakó je ánkje nga tjíokale jmeni xi kjima.

¹¹ Je ánkje nda choa̱ batíoná nga tjíokale jmeni xi kjima, nga̱ jejmi nó tjínle nga tjíokale nga tsín kixi jmeni xi ma kʼoa nga kʼoasikji kjoatsʼen tjín. Tsabe nga nkjín ánkje xi tsín tikisitjosonnile Niná nga̱ yaa kijtakao je Na̱i (Gén. 3:1; 6:​1, 2; Jud. 6). Ya Biblia nchjani tʼatsʼe jngo ánkje xi kiskan kao jngo sénnichxin xi chʼaokjoan (Dan. 10:13). Kʼoa jokji tífaʼato nichxin, je ánkje tjíobe nga tochoa mani chjota xi je Jeobá tjíosíxále. Ninga kʼoalani, kixi tjíofitʼale Jeobá kʼoa tosi tonda kao kjoatsjoa tjíosíxále. Be nga kuicho nichxin nga kjoaʼaxin Niná ngayeje xi chʼaotjín.

12. Jmé xi koasenkaoná nga chókjoajinná.

¹² Chjénngilee je ánkje nga tjíokale jmeni xi kjima. Ningalani tsín kixi tjín jmeni xi ma kʼoa nga sakʼoa chjota fitjenngikená, tjínjngoo tokoán nga kjoaʼaxin Niná ngayeje xi chʼaotjín kʼianga kuichoka choa̱le. Kuinga machjénni nga tosi tonda kui xi ndatjín kʼoasʼiaan tojo sʼín je ánkje (Gál. 6:9). Kʼoa je Jeobá kʼoatsoná nga je koasenkaoná nga chókjoajinná (1 Cor. 10:13). Koaan si̱jélee je nganʼiotsjele nga tsejta katamaa kʼoa nga tsjoa sa̱tío tokoán (Gál. 5:22; Col. 1:11). Kʼiatsa chjota batiochjoaná je Jeobá si̱nʼiotʼaa kʼoa tsín kuijkoán, jé koasenkaoná kʼoa tsjoáná je nganʼiole nga chókjoajinná (Heb. 13:6).

JE ÁNKJE TSJOÁNGANʼIO NGA TSJE SʼIN BʼEJNA JE JTÍN

13. Jmé xá xi nʼio chjíle kʼoatjíosʼín je ánkje nichxin fetʼa xi tiyoaa ndʼaibi (Mateo 13:​47-49).

¹³ Nʼio chjíle je xá xi tíbánele Jeobá je ánkje nichxin fetʼa xi tiyoaa ndʼaibi (tʼexkiai Mateo 13:​47-49).f Nga tíʼmiyason nkjín chjota xi mandosinle Énle Niná kʼoa síkʼantjaiya yaole, tonga tjínkʼa xi tsín kʼoasʼín. Kui xá kjinele je ánkje nga síkinyátʼaxin jókjoan je chjota xi mele nga je Niná sixále kʼoa jókjoan xi mai. Kʼoasʼin tsjoánganʼioni nga tsje sʼin bʼejna je jtín. Tonga ali tsakuijin xi tsonile nga tsínkʼia kjoa sʼe̱ ya jinjtín kʼoa tsa jngo chjota xi tsínti koa̱nndosinnile Énle Niná ali tsakuijin xi tsonile nga tsínti koa̱n kjoaʼaí ijngokʼani jinjtín. Tsín jao tjín tokoán nga nʼio nda tjíotsjoánganʼio je ánkje nga tsje sʼin tíjna je jtín.

14, 15. Jósʼin chjénngilee je ánkje nga kʼoati kʼoainganʼioá nga tsje katabʼejna je jtín (kʼoati chótsenlai sén xi faʼaitʼa).

¹⁴ Chjénngilee je ánkje nga kʼoainganʼioá nga tsje katabʼejna je jtín. Nda mangínkoaa yaoná kʼoa nda biyoaa ngixko̱n Jeobá. Jé nimiyoaa chjota xi sítjosonle Jeobá kʼoa tsínkui kʼoanʼia xi chʼaotjín. Kʼianga kʼoanʼia kʼoasʼin bʼainganʼioñá nga tsje bʼejna je jtín (Sal. 101:3). Kʼoati koa̱n kuinyakoaa je ndsʼee nga tosi tonda kixi katafitʼale Jeobá. Tobʼelañá, tsa sʼe̱jinná nga tsakajngijée jngo ndsʼee koaan kʼoakʼuínlee nga katabʼéyanajmíle xi chjotajchínga sʼin tjío. Tsa kʼoakʼuínlee je ndsʼee, kʼoasʼin koakonilee nga tsjoachaa. Kʼoa tsa tsín kʼoasʼin, ñá bʼakaoná kʼoakʼuínlee je xi chjotajchínga sʼin tjío, nga̱ kui xi mená nga tiʼa katabʼainganʼionile je ndsʼee nga tsín tinda tíjnani ngixko̱n Jeobá (Sant. 5:​14, 15).

¹⁵ Kʼianga ai jée bajngi kʼa je ndsʼee chʼasjejin jinjtín kʼoa alikui tije fajtañá (1 Cor. 5:​9-13).g Kʼianga kʼoanʼia, tsje bʼejnani je jtín. Kʼiatsa tsín tiya kjoájtañá tsakuini nichxin sikjaʼaitsjenjin kʼoa koa̱nmele sichriantʼa ijngokʼale Jeobá. Tsa kʼoasʼin, nʼiojin tsjoa sʼe̱ kon je Jeobá kao ánkje kʼoa kʼoati tsjoa sa̱tío tokoán tsanda ñá (Luc. 15:7).

16. Jméni xi sʼiaan nga chjénngilee je ánkje.

¹⁶ Tsee kjoanda tjínná nga ʼyaa jmeni xi sʼín je ánkje kʼoa nga ñatjen nixá kao je. Chjénngilee nga nangitokon, nga tsjoake chjota, nga tjíokale jmeni xi kjima kʼoa nga tsjoánganʼio nga tsje bʼejna je jtín. Tsa chjénngilee je ánkje, kui kjoanda sʼe̱ná nga je Jeobá jchaxkoán ngantsjai nichxin kao ngatsʼi xi je bexkón.