Xi koa̱n sʼiaan kʼianga chótʼayá

Kʼianga chótʼayá je Biblia kui xi mená nga katamajinná jme xi chótʼayá kʼoa nga katasʼejinkoaan. Chjénngilee jokisʼin je Esdras nga títjonkjoanla tsakʼéjnanda “je ni̱ma̱le nga kiskotʼajin je kjoatéxomale Jeobá” (Esd. 7:10). Jósʼiaan nga kjuintjenngiaa choa̱le Esdras.

Kʼoétsʼoaa. Kʼianga kjesa chotʼayajián kʼoakʼuínlee Jeobá nga katabasenkaoná nga koa̱njinná jmeni xi chótʼayá kʼoa si̱tjosoán jmeni xi koa̱njinná (Sal. 119:​18, 34).

Nangitokon katamaa. Je Niná alikui bʼéjnatsenle jotjínni xi kjoakixi je chjota xi ngʼakon kʼoa xi totsʼe kjoafaʼaitsjen síchjén (Luc. 10:21). Alikui kui xá chótʼayañá nga koakolee xi ngikʼa nga ngisa ʼyaa je Énle Niná. Kʼiatsa machjén nga si̱ndayaa yaoná, nangitokon katamaa kʼoa kʼoasʼiaan.

Kuinóʼyalee je kjoajnda xi bʼasje naxinandále Niná. Jmeni xi jndaa bichókajin ni̱ma̱ná. Kʼiatsa kui títjon kuinóʼyalee je kjoajnda xi tjíoná nga kjesa chotʼayajián, ngisaa sʼe̱jinkoaan jmeni xi bakóyaná je Jeobá kʼoa kuichokajin ni̱ma̱ná.