Jé Jeobá basenkaoná

Kʼianga nó 1999, je gobierno xi Francia tsʼe kʼoakitsole je Betel nga katabʼéchjíntjai jotjín tao̱n koanña xi kitsjoa nga jngó jngó jtín tjen nó 1993 saʼnda nó 1996. Tsangínchonlaijin je chjotaxá xi tjío naxinandá jebi tonga tsín kisisinnajin, kʼoa je gobierno tsʼato 4,500,000 euro (6,300,000 dólar) kiskoé xi tsʼe Betel xi ya banco tíjna. Kuinga ya tsangínnijin ya Tribunal Europeo, tonga kʼoatsakʼinnajin nga je kjoanla títjon chja̱kaonajmíjin je chjotale gobierno josʼin kʼoéndajinjin kjoa jebi.

Kui kinikjaʼaitsjainjin tsa kʼoakʼuínnajin nga basen tao̱n kʼoailaijin je gobierno jotjín kisijénajin, kichobayanijin nga nijngo bixojin tao̱n kʼoailaijin nga̱ tsa kʼoasʼiainjin kuitjátonejinjin jmeni xi tso Énle Niná, nga̱ je ndsʼee kui xá kitsjoani je tao̱n nga tosi tonda koaison je xále Niná ali tsakuijin nga je gobierno kʼoaile (Mat. 22:21). Tonga kinitjosonníjin jme xi kitso je Tribunal Europeo, tsangínchonlaijin je chjotale gobierno.

Yaa koanñanijin jñani batiojtínni je chjotaxá xi tsʼe Tribunal Europeo. Je chjoón xi xá tjínle kʼoakjoan kitsonajin nga kui xi mele nga je testigole Jeobá xi tjío ya Francia nga basen katabʼéchjíntjai je xá xi sʼín. Kʼoa to i koan nga i̱ tsakʼinlaijin: “A jetjínjinno nga je gobierno jetsʼato ño millón basen euro xi tíjnanajin banco kiskoé”.

Ñaki tokʼoakoanle nga kʼoatsakʼinlaijin, nga̱ tsín tjínjinle kʼoa je chjotale gobierno kʼoakitso nga kʼoakisʼin kjoaixi, kʼoa chjoón jebi koanjtile kʼoa kiskankao. Tsaʼyaníjin nga je Jeobá tsakasenkaonajin kʼoa tsjoa kisatio tokuinjin.

Kʼianga 30 sá junio nga nó 2011 kinjenajin ngixko̱n kjoatéxoma, kʼoatsakʼinle je gobierno nga katasíjndani je tao̱n xi kiskoé kʼoa nga katabʼéchjísonnajin. Nga kʼoasʼin kisʼendajin kjoa jebi ngixko̱n kjoatéxoma tojo tjíobinyakao saʼnda ndʼaibi je ndsʼee xi Francia tsʼe. Nga kʼoatsakʼinlaijin je chjoón xi xá tjínle jme xi kjimatʼainjin kui xi tsakasenkaonajin nga kinjenajin ngixko̱n kjoatéxoma, kʼoakoainjin jokoan je David nga kisikinjele je Goliat, kʼoa je David kʼoakitso nga je Jeobá tsakasenkao nga kinjele (1 Sam. 17:​45-47).

Ningalani batiochjoa je chjotaxá kʼoa kao chjota xi nyatítjonle religión, nga mangínjin ngixko̱n kjoatéxoma 1,225 kʼa jekinjenajin xi 70 naxinandá tjínni. Nga kʼoasʼin njenajin ngixko̱n kjoatéxoma kui xi basenkaoná nga tjoʼndená nga tosi tonda ʼmiyasoán, nga tsín njín xinyáná, nga tsín himno nacional jndaa kʼoa nga tsín nʼia saludar je bandera.

Yaa tijna tsakai jña tjen sʼendiaanile xále Niná ya Nueva York (Estados Unidos). Kʼoalaxínno jókoanni nga ya kichokasenkaoña je ndsʼee xi tjío ya Europa.

MISIONERO SʼIN TJÍOSÍXÁ JE XIJCHÁNA KʼIANGA SʼA ʼNDÍ KJIʼE̱

Je nʼaina George ʼmi kʼoa je mana Lucille ʼmi, ki je Skuela xi tsʼe Galaad xi mani 12 kʼoa yaa Etiopía tjío nga nó 1956 kʼianga kitsian. Philip sʼin kitsjoajaʼaínna, kui kʼoakitsonina nga Felipe tsakʼin je xi kinchja̱ya xi tʼatsʼe Niná (Hech. 21:8). Nga koan ñanóni, je gobierno tsakʼéchjoale je xále Niná, ningalani sʼa ʼndí kjiʼe̱ faʼaitsjenna nga toʼma tsakatiojtín je xijcháná kʼoa nga toʼma kitsoyason kʼoa kʼiaa nga nó 1960 tsakichonsjenajin ya naxinandá Etiopía.

Yaa tsangínkiyuijin ya Wichita (Kansas, Estados Unidos). Je xijchána tojo kʼoasʼin kitsoyason jokisʼin kʼianga misionero koan, kui kitsoyanajin nga nʼio chjíle nga ñaki to xále Niná nʼia kao je tichja xi majchínga xi Judy ʼmi kʼoa kao tindsʼe xi maʼndí xi Leslie ʼmi, kʼoa je xtindsʼe kʼoati ya Etiopía kitsin. Kʼiaa kisʼe̱nngindá nga 13 nóna kʼoa nga jan nó koanskanni yaa Arequipa (Perú) tsangínkiyuijin jñani ngisa machjén xi tsoyason.

Kʼianga nó 1974 nga 18 nóna, je Betel xi tsʼe Perú aon koannijin xi precursor especial sʼin kisikasénnajin ya cordillera de los Andes. Tsakʼinyalaijin Énle Niná je chjota xi én quechua nchja̱ kao xi én aimara nchja̱. Je carro xi tsangínkoaijin tiyaa kisoyoyanijin, nga ño xíngi tjínle arcale Noé sʼin tsakʼaijaʼaínlaijin. Kʼianga kixinyale Énle Niná je chjota xi ya tsʼe kʼoakixinle nga kuicho nichxin nga kjoaʼaxin Jeobá je chʼin kao kjoabiya kʼoa nga tsín tima̱ si̱jcháñá yaoná (Apoc. 21:​3, 4). Kʼoa nkjín chjota xi koankjainle xi tʼatsʼe Niná.

KʼIANGA KINOKJOANA JÑA TJEN SʼENDIAANILE XÁLE NINÁ

Kʼianga nó 1977, jé ndsʼee Albert Schroeder kichosíxatʼa ya naxinandá Perú, ndsʼee jebi yaa tíjnajinle Cuerpo Gobernante. Kʼoakitsona nga sikasén solicitudna nga ya kjuítsjoanganʼioa jña tjen sʼendiaanile xále Niná, kisikasénña solicitud kʼoa kʼiaa nga 17 sá junio nga nó 1977 kinokjoana ya Betel xi tíjna Brooklyn. Ño nó nga ya kisixá ya departamento de Limpieza kao departamento de Mantenimiento.

Kʼiaa tsaʼbexkoan je tichjaa Elizabeth Avallone kʼianga sá junio nga nó 1978 kʼianga kisʼejna jngo kjoajtíntse ya Nueva Orleans (Luisiana). Je xijchále tichjaa kʼoati nda tjíosíxále Jeobá, je tichjaa jeño nó nga precursora regular sʼin tísíxá kʼoa kui xi koanmele nga ñaki to xále Niná sʼin, kinimiyoníjin xíngijin kʼoa kʼiaa chixainjin nga 20 sá octubre nga nó 1979 kʼoa kitjoʼndenajin nga ya Betel tsakiyuijin.

Je jtín xi títjon tsakʼainganʼiuijin kʼianga jechixainjin yaa jtín xi Brooklyn Spanish ʼmi. Je ndsʼee xi ya tjío nda kiskoéyanajin kʼoa ngi ján jtín tsakʼainganʼiuijin nga koanskanni, kʼoati tjao tsabenajin je ndsʼee xi ya tjío kʼoa kisinʼio tokuinjin nga tosi tonda ya kʼoainganʼiuijin ya Betel. Kʼoati bʼailaijin kjoanda je ndsʼee, miyonajin kʼoa kao xíngijin xi tsakinyakaonajin nga kisikuinda je xijchánajin kʼianga jekoanjchínga.

NGA KISITOÁNNTJE NAXINANDÁLE NINÁ NGIXKO̱N KJOATÉXOMA

Nga sá enero nga nó 1982 yaa kisixá ya Departamento de Asuntos Legales. Jan nó koanskanni, kʼiaa kinikasénna ya universidad nga kisikjetʼa xo̱nna nga abogado koa̱n. Kʼianga kiskotʼaya kui tsakjasjaiyaijin nga ngixko̱n kjoatéxoma fi je testigole Jeobá nga sʼendajinle kjoa. Nga kʼoasʼín, kʼoati binyakao xi kjaʼaí chjota ya Estados Unidos kao jña xinsa naxinandá. Kui kichotʼayajinjin je kjoa xi sʼendajinle ngixko̱n kjoatéxoma.

Kʼianga nó 1986, nga jekante nóna superintendente sʼin tsakatejnale ya Departamento de Asuntos Legales, tsjoa kisʼe tokoan nga kui xá kitsʼaina ningalani sʼa xtia, tonga kʼoati ñʼai koanna nga̱ nkjín koya jmeni xi tsín ʼbe.

Kʼiaa nga nó 1988 kitsʼaina xo̱nna nga abogado jekoan, tonga tsín tinda kisixánile Niná nga kʼoasʼin kiskotʼaya. Kʼianga universidad chotʼayá yaa nroani nga ngisa ngʼa chʼasjee yaoná kʼoa nga kʼoasʼin nikjaʼaitsjeen nga ngisa tse kjoachjine tjínná tikʼoajinni xi ngikʼa. Je chjoónna tsakasenkaona nga tikʼoasʼin kisixá ijngokʼanile Jeobá jokisʼian ngasʼa kʼoa koanjinna nga kui xi ngisa chjíle nga je Jeobá nimiyoaa tikʼoajinni nga kui kjoachjine xi tjín sonʼnde sʼe̱ná.

TINOKJOANTJAINÍJIN NGIXKO̱N KJOATÉXOMA JE ÉNLE NINÁ NGA TOSI TONDA KATAʼMIYASON

Kʼianga abogado jekoan ngisaa nda tsakasenkoa je Departamento de Asuntos Legales, nga katasʼeya xo̱n ngixko̱n kjoatéxoma je xá xi ma ya Betel kʼoa nga katatjoʼndená nga tosi tonda kʼuínyasoán. Ningalani nda kisitjosoan je xá xi kisʼenena tonga kʼoati sakʼoa ñʼai koanna nga̱ ngotjo bʼantjaiyajinni josʼin síxá je naxinandále Niná. Tobʼelañá, kʼianga nó 1990 kʼoatsakʼinnajin nga kui xo̱n kʼoéndaijin xi kʼoatso nga tsínti kʼoakʼuínnile chjota jotjín tao̱n tsjoá kʼianga sʼeyole je xo̱n xi Énle Niná yʼangini. Saʼnda nga kui nó, je testigole Jeobá alikuiti kisikʼéchjíni je chjota nga tsakáyole je xo̱n, tojésa chjota xi kitsoni jotjín koanmele kitsjoa. Nga kʼoakoan, koanchoayaa je xá xi kjima ya Betel kao ya jinjtín kʼoa tsín tijme xo̱n koanchjíntjaini. Tjínkʼa xi kʼoasʼin kisikjaʼaitsjen nga tsínti so̱koni je tao̱n xi koa̱nchjén nga kuitjo je xo̱n xi Énle Niná yʼangini kʼoa nga ñʼai koa̱n je xo̱n xi sʼe̱yole je chjota kʼianga sa̱kóyason tonga tsínni kʼoakoan, nga̱ jaoya kʼoakji mani ndʼaibi je choʼndale Jeobá jotjín ma kʼianga nó 1990, kʼoa koan kisʼeyole chjota je xo̱n xi Énle Niná yʼangini ninga tsínle tao̱n. Ansoa tiʼbe josʼin tíbasenkao Jeobá je naxinandále nga jme xi síkʼantjaiyajin nga̱ jé tíbándiaale je choʼndale (Éx. 15:2; Mat. 24:45).

Kʼianga ndasʼin mangínkoaa yaoná kui xi binyakaoná nga njená ngixko̱n kjoatéxoma ali tsa tokuijin jmeni xi tso je ndsʼee xi abogado ma kʼianga nchja̱ntjainá. Tobʼelañá, kʼianga kisʼejna jngo kjoajtíntse ya Cuba nga nó 1998, jan ndsʼee xi ya tjíojinle Cuerpo Gobernante kicho, nga nda chjota je ndsʼee kʼoa nga bakó kjoaxkóntokon to ngisaa kui kuenta kisʼin je chjotaxá tikʼoajinni jme xi tsakʼinlaijin kʼianga tsangínchonlaijin kʼoa tsínti kʼoasʼin kisikjaʼaitsjenni xi tʼatsʼe testigole Jeobá josʼin síkjaʼaitsjen tsakai.

Ningalani mangián ngixko̱n kjoatéxoma nga katatjoʼndená nga tosi tonda kʼuínyasoán, tonga sakʼoa tsín tsjoáʼnde je chjotaxá (Filip. 1:7). Tobʼelañá, je chjotaxá xi Europa tsʼe kao xi Corea del Sur tsʼe nkjín nó nga kʼoasʼin tsakʼénele ndsʼee nga servicio militar katasʼín. Nga kʼoakisʼin 18,000 ndsʼee xi ndoyá kichaní ya Europa kʼoa tsʼato 19,000 ndsʼee xi ndoyá kichaní ya Corea del Sur nga tsín kisʼin servicio militar.

Kʼianga 7 sá julio nga nó 2011, nga jekisʼendajinle kjoa je ndsʼee Bayatyan nga ndoyá kinikʼéjnaʼya ya Armenia, je Tribunal Europeo de Derechos Humanos kʼoakitso nga ngatsʼi chjota xi kaile nga servicio militar sʼin nga katatjoʼndele nga ya katatsjoánganʼio jmeni xá xi ma ya ʼndele. Nga koanskanni, kʼianga 28 sá junio nga nó 2018 je chjotaxá xi Corea del Sur tsʼe kʼoati kitsjoaʼndele je ndsʼee nga ya katatsjoánganʼio jmeni xá xi ma ya ʼndele kʼoa nga tsín servicio militar katasʼín, kuinga tínjeniná ngixko̱n kjoatéxoma nga kixi tjíofitʼale Niná je ndsʼee xi ndoyá tjíoʼya.

Je Departamento de Asuntos Legales xi tíjna jña tjen sʼendiaanile xále Niná kʼoa kao xi tjío ya Betel xi tjín jngo tjíjtsa Sonʼnde tojngoo síxá ngatsʼi nga nchja̱ntjai je Énle Niná. Tsee kjoanda tjínnajin nga nokjoantjaijin je ndsʼee kʼianga chjotaxá batiochjoale. Ni kuinje̱ná kʼoa ni mai ya ngixko̱n kjoatéxoma, je xi tsjoa bʼé tokoán kuinga sʼejinle je chjotaxá josʼin makjainná (Mat. 10:18). Je xo̱n xi mangínkoaijin ngixko̱n kjoatéxoma textole Biblia yʼangini kʼoa je juez kao chjotale gobierno sʼejinle josʼin makjainná. Nga be chjota ʼyáni je testigole Jeobá kʼoa nga ya Biblia chʼangiñá josʼin makjainná nkjín xi mamele kotʼaya.

JÉ JEOBÁ BʼAILEE KJOANDA

Je xi 40 nó tífaʼato, titsjoanganʼiole je Betel xi tjío jngo tjíjtsa Sonʼnde, ñatjen nixáníjin kao je ndsʼee xi ya tjíojinle ya Departamento de Asuntos Legales kʼoa nkjín kjoa jetsakʼendajinjin ngixko̱n kjoatéxoma. ʼBexkónña je ndsʼee xi ya síxá ya departamento jebi nga̱ nda sítjoson je xá xi sʼenele. Nʼio tse kjoanda tísokóna kʼoa tsjoa tjín tokoan.

Nda títsjoánganʼiona je chjoónna nga tíbitjosonna je xá xi tísʼenena jinnaxinandále Niná je xi 45 nó tífaʼato, ningalani chʼin tjínle kʼoa ningalani tsínti nanda chókjoanile.

Tiʼyaníjin nga kui nga njeniná ngixko̱n kjoatéxoma kʼoa nga nʼiojin mañá nga je Jeobá basenkaoná, kʼoatjín jokitso je David nga je Jeobá tsjoále nganʼio je naxinandále (Sal. 28:8).