Jao ndsʼee xi sʼa tsakatiojinle Cuerpo Gobernante

KʼIANGA kisʼejna je kjoajtín xi xki̱ nó sʼejna nga 5 sá octubre nga nó 2024, kʼiaa kisʼejinkon je ndsʼee nga jeya tjíojinle Cuerpo Gobernante xi tsʼe testigole Jeobá je ndsʼee Jody Jedele kao Jacob Rumph. Nga jao ndsʼee jebi jenkjín nó nga nda tjíosíxále Jeobá.

Je ndsʼee Jedele yaa Misuri (Estados Unidos) kitsin. Jé xijchále kitsoyale Énle Niná kʼoa yaa tsakatio ya jngo ʼnde jñani tochoa mani je testigole Jeobá. Nkjín ndsʼee tsabexkon xi xinxin naxinandá jaʼaini xi ya kichokakóyason. Nga tsabe nga jtín tjío je ndsʼee kʼoa nga tjaole xínkjín kʼoati koanmele tsanda je nga je Jeobá sixále. Kʼiaa kisʼenngindá nga 15 sá octubre nga nó 1983 kʼoa nʼio tsjoake koan nga kitsoyason. Kʼianga jetʼale secundaria, precursor regular sʼin kisixá nga sá septiembre nó 1989.

Kʼianga sʼa ʼndí kjoan je ndsʼee Jedele kao ndichja, je xijchále fikao ya Betel kʼoa koanmele nga ya sixá nga jekoa̱njchínga. Nga koanskanni, yaa Betel kisixá je ndsʼee kao ndichja. Kʼianga sá septiembre nga nó 1990 yaa kisixá je ndsʼee ya Betel xi tíjna Wallkill. Nga títjon, yaa Departamento de Limpieza kisixá kʼoa nga koanskanni yaa Servicios Médicos kisixá.

Xi tiya chrianni, nkjín jtín tjío xi én kastía nchja̱ kʼoa xi nganʼio machjénle. Je ndsʼee Jedele yaa kitsjoánganʼio kʼoa koanle én kastía. Nga koanskanni, kʼiaa tsabexkon jngo precursora, xi Dámaris ʼmi. Kʼianga jechixan yaa Betel kisixá nga jao.

Kʼianga nó 2005 alikui tiya Betel tsakationi nga̱ xijchále kisíkuinda. Nga kʼia, precursor regular sʼin kisixá, nkjín kʼa nga je kitsoya ndsʼee nga kisatio je Skuela xi tsʼe Precursor. Kʼoati ya tsakʼejnajinle je Comité de Enlace con los Hospitales kao Comité Regional de Construcción xi tjío ya jñani tsakatio.

Kʼianga nó 2013 kʼiaa kinokjoa ijngokʼale ya Betel nga ya sixá nga tísʼenda Warwick. Xijekoan, kʼoati ya kisixá ya Patterson kao Wallkill. Yaa kitsjoanganʼio ya Departamento Local de Diseño y Construcción kao Servicios de Información sobre Hospitales. Kʼianga sá marzo nga nó 2023 yaa tsakasenkao je Comité de Servicio. Itso je ndsʼee tʼatsʼe xá xi tísʼenele: “Sakʼoa ñʼai maná nga xá sʼenená kʼoa kʼiaa nga ngisa machjén nga je Jeobá si̱nʼiotʼaa nga̱ jé xi koa̱nle koasenkaoná”.

Je ndsʼee Rumph yaa California (Estados Unidos) kitsin. Kʼianga sʼa ʼndí kji alikui tixále Niná sʼínni je male, tonga kitsoyale xi tʼatsʼe Niná. Je majchále kʼoakitsole nga Niná katasíxále, kʼoa kʼoakisʼin je ndsʼee, kʼiaa nga 13 nóle kiskotʼaya Biblia kʼoa kʼiaa kisʼenngindá nga 27 sá septiembre nga nó 1992. Xijekoan, je male kisixá ijngokʼanile Jeobá kʼoa ngatsʼi xínkjín kiskotʼaya kʼoa kisʼenngindá.

Kʼianga sʼa xti je ndsʼee Rumph tsabe nga tsjoa tjío kon je ndsʼee xi precursor sʼin tjíosíxá. Kʼianga jetʼale secundaria, precursor sʼin kisixá nga sá septiembre nga nó 1995. Kʼianga nó 2000 yaa kitsjoánganʼio ya jngo ʼnde xi tíjna Ecuador jñani tochoa mani ndsʼee xi tsoyason. Yaa kiskajin jngo tichjaa xi Canadá tsʼe xi Inga ʼmi kʼoa jé chixankao. Kʼianga jechixan yaa kitsjoanganʼio ya jngo ʼnde xi tíjna Ecuador jñani tochoa mani ndsʼee xi tsoyason kʼoa ndʼaibi jejngo jtín tíjna ʼnde jebi.

Nga koanskanni, precursor especial sʼin kisixá, kʼoa xijekoan, superintendente xi tsʼe circuito koan. Kʼianga nó 2011 kʼiaa ki Skuela xi tsʼe Galaad, xi mani 132. Kʼianga jejetʼale skuela nkjín naxinandá kitsjoánganʼio kʼoa nkjín koya josʼin kisixále Niná jolani nga ya Betel kisixá, nga misionero koan kʼoa nga superintendente xi tsʼe circuito koan. Kʼoati je kitsoya ndsʼee kʼianga kisatio Skuela xi síchjine je xi bakóyason tʼatsʼe Chjotaxále Niná.

Kʼianga koan chʼin COVID-19 ki ijngokʼani ya Estados Unidos. Kʼoatsakʼinle nga ya tsjoánganʼio ya Betel xi tíjna Wallkill. Je ndsʼee tsakʼinyale josʼin maxá ya Departamento de Servicio. Nga koanskanni yaa kinikasén ya Betel xi tíjna Ecuador kʼoa yaa tsakʼejnajinle je Comité xi tsʼe Sucursal. Kʼianga nó 2023, yaa Warwick kinikasén ijngokʼa kʼoa kʼianga sá enero nga nó 2024 yaa tsakasenkao je Comité de Servicio. Kʼianga síkʼaxki̱ je ʼnde jñani kitsjoanganʼio je ndsʼee, itso: “Je xi ngisa chjíle kuiní nga binyakoaa je ndsʼee ali tsakuijin xi chjíle jñani tinixálee Jeobá”.

Chjí ʼyatokoán kʼoa kuenta nʼia je xá xi sʼín ndsʼee jebi (Filip. 2:29).