“Je Espíritu Santo tsakʼékjaono”
JE Pablo i kitsole je chjotale Cristo xi Éfeso tsʼe: “Tikjaínlao xíngio nga tjaochao. Tixítíyalao yaono nga tojngo tiyokjao nga nyʼán tiyo, nga je Espíritu Santo tsakʼékjaono” (Efes. 4:2, 3).
Je Pablo kʼoakitso nga ya nroani tʼatsʼe nganʼiotsjele Niná nga jtín biyoaa. Tonga kʼoati kitso nga tjínnele kʼoénelee yaoná nga jngó jngoá nga jtín kuiyoaa.
Tobʼelañá, tsa jngolani carro tíbʼaikjoatjaoná ñá kjinená nga si̱kuindaa. Kʼiatsa kuitsónlani alikuijin je kjoánelee xi kitsjoakjoatjaoná.
Tʼatsʼe Niná nroani nga jtín biyoaa, tonga ñá xi kuixónñá tsa nda kjuinkoaa xíngiaa. Kʼiatsa tsín nda mangínkoaa jngo ndsʼee kʼoa tsa jngo tichjaa, koaan i̱ tso xi si̱kjaʼaitsjenjiaan: “A tibʼenele yaona nga mena kʼoendajian kjoa kʼoa nga nda koanngínkoaijin xíngijin”.
TʼENELAO YAONO NGA NDA KOANNGÍNKAO XÍNGIO
Je Pablo kʼoakitso nga kʼoénelee yaoná nga nda koanngínkoaa je xíngiaa. Kʼoa ngisaa timachjénngáni nga kʼoasʼiaan tsa ʼya xi jokisikaoná kʼoa tsa jokitsoná ya jinjtín. Ninga tsínkjoan machjén nga kʼoakʼuínlee nga tsín kisasenná jmeni xi kitso kʼoa tsa jokisʼin. Koaan i̱ tso xi si̱kjaʼaitsjenjiaan: “Tsa tokui nʼio kuenta sʼian jmeni xi koan a ngisaa nda koanngínkoaijin xíngijin”. Tsa jmeni xi síkaoná xíngiaa ngisaa nda nga tosi̱chajiaan kʼoa si̱chatʼalee xíngiaa (Prov. 19:11; Mar. 11:25).
“Tsa tokui kuenta sʼian jmeni xi koan a ngisaa nda koanngínkoaijin xíngijin axo ngisaa koa̱ntseya je kjoa”
Je Pablo i kitso: “Tikjaínlao xíngio nga tjaochao” (Efes. 4:2). Nga kʼoakitso Pablo kui xi kitsonile nga nda si̱koaa xíngiaa kʼoa nga tsínkui kjuinñá josʼín. Kuenta sʼiaan nga chjotajée ma tsanda je joni ñá. Ngatsʼiñá nga mená nga kui kʼoasʼiaan josʼin mele Niná (Efes. 4:23, 24). Tonga kʼoati majinná nga tsínkjoan kʼoasʼin kuitjosonná (Rom. 3:23). Tsa si̱kjaʼaitsjenjiaan jebi alikuijin kui nʼio kuenta sʼiaan josʼin kʼoa jokuitso xi ngikʼa, tosajin si̱chatʼalee kʼoa nda kjuinkoaa xíngiaa.
Tosi tonda nda kjuinkoaa xíngiaa tsa si̱chatʼalee kʼoa tsa si̱chajiaan tsa ʼya xi jokuitsoná kʼoa tsa josikaoná. Kʼianga én griego nga “tiyokjao” tso ya Efesios 4:3 kʼoati kui nchja̱ni naxá xi tjíokjaoni nindaná. Nga tsjoachaa xíngiaa kʼoa nga nda biyokoaa kui xi basenkaoná nga jtín sʼin biyoaa tojosʼin basenkao naxá xi tjíokjaoni nindaná nga tsín tokjao.
Tsa jngo ndsʼee sijtiná kʼoa tsa tsín sa̱sénná jokuitsoná tosa si̱jinlee yaoná nga toxá kʼoamani kʼoa tsín tokui kuenta sʼiaan jñani chʼao sʼín (Col. 3:12). Nga chjotajée maa kʼoajinti jekinijtilee tsa ʼyani. Tsa kuenta sʼiaan jebi kui xi koasenkaoná nga nda kjuinkoaa xíngiaa.