“Nʼio tiyokao xi makjainno”

1. 1) Jméni xi koanle Pedro ya ndáchikon Galilea kʼianga jngo jtsínʼio xi ntjao̱ tjenjin jaʼa. (Chótsenlai sén xi faʼaitʼa ibi.) 2) Ánni nga kiskangindásíni je Pedro.

ÑANDIA kʼianga nitje̱n, je Pedro kao xi ngikʼa je pastro jngo chitso tjíoya nga tjíofaʼatondá ya ndáchikon Galilea kʼoa jngo jtsínʼio xi ntjao̱ tjenjin jaʼaine. Kʼoa toʼikoan tsabe je Jesús nga tsoʼbason ya nandá. Je Pedro kʼoakitsole Jesús tsa koa̱n nga kʼoati kʼoámjeson tsanda je ya nandá. Je Jesús kʼoakitsole nga koa̱n. Je Pedro kitjoo ya chitso kʼoa kison nandá nga kinrʼoe Jesús. Tonga nga jejao jan tsakinyá ndso̱ko̱, kiskangindá. Ánni. Kuinga kui kiskotsenle je jtsínʼio kao ntjao̱ kʼoa kitsokjon. Kʼoa je Pedro kʼoakitsole Jesús nga katabasenkao. Je Jesús kiskoé ntsja Pedro kʼoa kitsole: “Ji xi choa makjainli ánni nga jao kabʼesíni takuin” (Mateo 14:24-32).

2. Jméni xi chótʼayá i̱ kjoaʼmiya jebi.

² I̱ kjoaʼmiya jebi jan koya jchaa jmeni xi bakóyaná jokoan je Pedro. Xi títjon, josʼin tsakakó nga títjon nga kisʼele kjoamakjain xi kao Jeobá nga je koasenkao. Xi majaoni, ánni nga kinroajensíni kjoamakjainle. Kʼoa xi majanni, jósʼin koantaja ijngokʼa kjoamakjainle. Kʼianga jchaa nga jan koya jebi kui xi koasenkaoná nga taja sʼe̱ kjoamakjainná (1 Corintios 16:13).

KATASʼENÁ KJOAMAKJAIN XI KAO JEOBÁ

3. 1) Ánni nga kitjosíni Pedro ya chitso kʼoa nga tsakʼamjesonsíni nandá. 2) Jméni xi kinʼia ñá xi kʼoati mangóson.

³ Kʼianga kinchja̱le Jesús je Pedro, je Pedro kitjoo ya chitso kʼoa tsakʼamjeson nandá. Ánni kʼoakisʼinsíni. Kuinga koankjainle xi tʼatsʼe Jeobá nga̱ be nga je koasenkao josʼin tsakasenkao Jesús. Kʼoati mangóson jmeni xi tinʼia ñá. Kʼianga jetsaʼyaa jmeni xi tso je Biblia kʼianga kʼoatsoná je Jesús nga chjotale katamaa, tsakʼaitʼalee yaoná je Jeobá kʼoa tsangínsʼenngindáñá. Kuinga kʼoakinʼiañá nga nʼio kisʼená kjoamakjain xi tʼatsʼe Jeobá kao Jesús nga je kuinyakaoná (Juan 14:1; tʼexkiai 1 Pedro 2:21).

4, 5. Ánni nga nʼio chjísínile je kjoamakjain.

⁴ Je kjoamakjain nʼio chjíle nga̱ basenkaoná nga kʼoanʼia tsa jmeni xi nʼio ñʼai tjínle (Mateo 21:21, 22). Tobʼelañá, kui kjoamakjainle xokisikao je Pedro nga koan kisonni nandá. Kʼoati ñʼai tjío jmeni xi tinʼia xi totʼatsʼe kjoamakjainná. Tobʼelañá, tjínkʼa xi ñaki kisikʼantjaiya yaole jokjoan tsakai. Kʼoa je chjota xi bexkonná tjíobe nga tsʼantjaiya kjoaixiaa. Kuinga kʼoakinʼiañá nga tsjoachaa je Jeobá kʼoa nga je tsakasenkaoná nga koan kinikʼantjaiyaa je yaoná (tʼexkiai Colosenses 3:5-10). Xi ijngosani, xi totʼatsʼe kjoamakjainná tsakʼaitʼalee yaoná je Jeobá kʼoa miyole koaan. Alikuijin koan kʼoakinʼia kʼiatsa tsín je Niná tsakasenkaoná (Efesios 2:8).

⁵ Je kjoamakjain kuinga nʼio chjínile nga kʼoati tsjoáná nganʼio nga bixkantʼakoaa jmeni xi síkatíobasen je Na̱i, nga̱ kʼoati tse nganʼio tjínle (Efesios 6:16). Xi ijngosani, je kjoamakjainná kʼoati basenkaoná nga chókjoajinná je kjoa xi sʼená. Je Jeobá kʼoatsoná kʼiatsa tjínná kjoamakjain xi tʼatsʼe kʼoa je si̱xálee, jé tsjoáná ngayeje xi machjénná (Mateo 6:30-34). Kʼiatsa tjínná kjoamakjain, kʼoati tsjoáná kjoanda je Niná nga ya kuiyoaa ngantsjai ya ʼNdenaxó (Juan 3:16).

ALIKUI SI̱KINROAJEEN KJOAMAKJAINNÁ

6, 7. 1) Jméni xi mangóson je jtsínʼio kao ntjao̱ xi kitsokjonle je Pedro. 2) Jósʼin ʼyañá nga koa̱n kjuinroajen kjoamakjainle toʼyani.

⁶ Kataʼyalasaa je choa̱le Pedro. Ánni nga kitsokjonsíni je Pedro kʼianga jetífison je nandá. Je Biblia kʼoatso nga tsín tikiskotsennile Jesús kʼoa tosa kui jtsínʼio kao ntjao̱ kiskotsenle (Mateo 14:30). Je kjoamakjainle kinroajen kʼoa kiskangindá. Je jtsínʼio kao ntjao̱ jebi kui mangóson je kjoa xi tjínná nga nyaon nyaon kʼoa kao jme xi satíobasenná. Ninga sakʼoa ñʼai tjín kjoa xi sʼená, je Jeobá koaanle tsjoánganʼioná nga ska̱ná. Tonga tsa tokui kjuinñá je kjoa xi tjínná, tochale kjuinroajen kjoamakjainná kʼoa tsín tikʼoasʼin si̱kjaʼaitsjenñá nga je Jeobá koasenkaoná.

⁷ Koaan kjuinroajen kjoamakjainle toʼyani. Ánni kʼoabixónsíñá. Kuinga ya Biblia kʼoatso nga je jée xi ngotjo kajinñá kuinga nroajen kjoamakjainná (Hebreos 12:1). Kʼiatsa tokui kjuinñá je kjoa xi tjínná tojo kisʼin je Pedro, kjuinroajenjin kjoamakjainná. Jósʼin jchañá tsa jexkón tíjna je kjoamakjainná. Nkjínla koya kataʼyaa je xi koasenkaoná jósʼin jchañá tsa kʼoakjimaa.

8. Jméni xosikaoná nga tsín tikoa̱nkjainniná jmeni xi tso je Jeobá.

⁸ A tojo tjínná kjoamakjain tʼatsʼe jmeni xi tso je Jeobá. Tobʼelañá, je Jeobá jekʼoakitso nga jeme sikjeson je sonʼndele Na̱i. Tonga tsakui sichanganá je kjoasʼetsaojin xi tjín i̱ Sonʼnde tochale kjuinroajen kjoamakjainná kʼianga jemachrianle je kjoafetʼa (Habacuc 2:3). Ijngola choa̱ kataʼyaa. Je Jeobá kʼoati tso nga sichatʼa je jéená xi totʼatsʼe kjoabʼechjíntjai xi kitsjoa Jesús. Tonga tsa tosi tonda kui si̱kjaʼaitsjeen je jée xi tsakijnyaa ngasʼa, tochale jao sʼe̱ tokoán kʼoa kʼoakuixoán nga tsín sichatʼaná je Jeobá (Hechos 3:19). Tochale likui tikao kjoatsjoa si̱xánilee Jeobá kʼoa tsín tikʼuínyasonñá.

9. Jméni xi koa̱n kʼiatsa tsín tije Jeobá si̱kʼéjnatítjonñá.

⁹ A tojo kao ni̱ma̱ná tinixánilee je Jeobá. Kʼianga nʼio nixálee je Jeobá kui xi basenkaoná nga kuenta nʼia je kjoabijnachon xi tsínkʼia fetʼa. Tonga jméni xi koa̱n kʼiatsa tokjaʼaíla kjoa ngisa títjon si̱kʼéjnaa. Tobʼelañá, tsakui nichxin ya si̱xá jñani nʼio nda koa̱nchjíná tonga tsa tsín tikʼoakoa̱nniná nga nʼio si̱xálee je Jeobá tojo tinʼia. Tsa kʼoasʼiaan, kjuinroajen kjoamakjainná kʼoa likuijin tikao ngayeje ni̱ma̱ná si̱xánilee je Jeobá (Hebreos 6:10-12).

10. Ánni bakosíñá nga tjínná kjoamakjain kao Jeobá nga nichatʼalee xíngiaa.

¹⁰ A ñʼai maná nga nichatʼaa. Kʼianga ʼya xi jokasíkaoná, a majtiná kʼoa a tsín tinokjoanilee. Kʼiatsa kʼoasʼiaan, tsakui nichxin tokui nʼio timangínñá je kjoafaʼaitsjenná. Tonga tsa si̱chatʼalee je xi josíkaoná, tibakoñá nga tjínná kjoamakjain kao Jeobá. Ánni kʼoabixónsíñá. Kʼiatsa mená nga sichatʼaná je jéená je Jeobá, machjénní nga kʼoati si̱chatʼalee xi ngikʼa (Lucas 11:4). Kʼianga nichatʼalee xíngiaa, tibakoñá nga tjínná kjoamakjain nga tsjoa sʼe̱le Jeobá xi tʼatsaan kʼoa nga sichatʼaná. Jebi ngisa chjíle tikʼoajinni nga kʼoasi̱kaongajaoñá tsa jmeni xi kasíkaoná xíngiaa. Je chjotale Jesús tsabe nga kjoamakjain machjén nga nichatʼalee xíngiaa. Kʼianga kʼoakitsole Jesús nga katasíchatʼale ninga je xi nkjín kʼa josikao, chjotale kitso: “Tisenkaonajin, jméni nga ngisa nʼio koa̱nkjainsíninajin” (Lucas 17:1-5).

11. Jméni xi tsín koa̱n sʼiaan kʼianga ʼya xi síkixiyandaná.

¹¹ A majtiná kʼianga nikixiyandaná. Kʼiatsa ʼyani xi sikixiyandaná, kui kuenta sʼiaan josʼin koasenkaoná je kjoafaʼaitsjen xi títsjoáná ʼndele nga kui kuenta sʼiaan jñani tsín nda sʼín chjota jebi kʼoa jmeni xi tso (Proverbios 19:20). Tongisa chjíle nga katasʼená kjoamakjain kʼoa nga kjoa sʼená kʼoasʼin si̱kjaʼaitsjeen josʼin síkjaʼaitsjen je Jeobá.

12. Jméni xi tibakoá kʼiatsa toje si̱kʼaxki̱ʼndee je chjota xi tíbándiaale je jtín.

¹² A nikʼaxki̱ñá je xi tjíobándiaale je jtín. Kʼianga jekinrʼoé je chjota israelita nga tsín nda tso én kichokao je xi te mani kikotsenché ya ʼnde jñani kʼoaile, alikui ndasʼin kisikʼaxki̱ je Moisés kao Aarón. Kuinga je Jeobá i̱ kitsonile je Moisés: “Kʼiá saʼndani nga tsín koa̱nkjainle xi tʼatsʼan” (Números 14:2-4, 11). Kʼianga je chjota israelita chʼaosʼin kisikʼaxki̱ je chjota xi kitsjoale xá je Jeobá nga koandiaale, kui tsakakó nga tsínle kjoamakjain xi tʼatsʼe Niná. Tikʼoasʼinni ndʼaibi, kʼiatsa toje si̱kʼaxki̱ʼndee je chjota xi tísíchjén Jeobá nga tíbándiaale je jtínle, kui tibakoá nga jetínroajen kjoamakjainná.

13. Ánni nga tsín kʼoaiʼndesíñá kʼiatsa jchaa nga jetínroajen kjoamakjainná.

¹³ Kʼianga jekaʼyaa xi tʼatsʼe jebi, tsakui nichxin jchaa nga jetínroajen kjoamakjainná. Tonga alikui kʼoaiʼndee nga tosi tonda kʼoakatama. Si̱kjaʼaitsjeen je pastro Pedro nga kitsokjon kʼoa nga saʼnda kinroajen kjoamakjainle. Kʼoati si̱kjaʼaitsjeen nga je Jesús sakʼoa kisikixiyanda ngatsʼi pastrole kʼianga choa kjoamakjain kisʼele (Mateo 16:8). Ninga kʼoalani kjimaa, nʼio chjíle jmeni xi bakóyaná jmeni xi kisʼin nga koanskanni je pastro Pedro kʼianga jekinroajen kjoamakjainle kʼoa nga kiskasʼenngindá ya ndáchikon.

JÓSʼIN KOA̱NTAJA IJNGOKʼA KJOAMAKJAINNÁ

14, 15. 1) Jméni xi kisʼin je Pedro nga jetíkasʼenngindá. 2) Jósʼin koa̱n chótsenlee je Jesús.

¹⁴ Jméni xi kisʼin je Pedro kʼianga jetíkasʼenngindá. Je Pedro nda koanle nandá kʼoa koan ki ijngokʼani ya chitso tsa je xi koanmele (Juan 21:7). Tonga alikui kʼoakisʼin. Ánni. Alikui toje tsakʼasjentjai je yaole, tosa je Jesús kiskotsenle kʼoa jé kisijéle nganʼio. Tikʼoasʼinni tsanda ñá, kʼiatsa jchaa nga jetínroajen je kjoamakjainná, koaan chjénngilee je Pedro. Jósʼiaan.

¹⁵ Je Pedro jé kiskotsenle Jesús. Kʼoati ñaki nda chótsenlee tsanda ñá je Jesús, tojo tso ya Biblia (Hebreos 12:2, 3). Tonga ñá alikui jchañá xkoaan je Jesús tojosʼin tsabe je Pedro. Tonga jósʼin chótsenlee je Jesús. Kʼianga nda chótʼayasoán jmeni xi kisʼin kʼoa jmeni xi kitsoya kʼoa nga kjuintjenngiaa je choa̱le. Kʼiatsa kʼoasʼiaan kui xi koasenkaoná nga ijngokʼa koa̱ntaja kjoamakjainná. Kataʼyala kʼaa choa̱ josʼin koa̱n chjénngilee je Jesús.

16. Jósʼin si̱tajaa kjoamakjainná kao Biblia.

¹⁶ Kao Biblia si̱tajañá kjoamakjainná. Je Jesús ñaki kʼoatjín kon nga tʼatsʼe Niná jaʼaini je Biblia kʼoa nga nʼio nda kjoafaʼaitsjen faʼaitʼa (Juan 17:17). Kʼiatsa mená nga chjénngilee je Jesús kʼoa nga taja sʼe̱jna kjoamakjainná, machjénní nga nyaon nyaon kʼoéxkiaa je Biblia, nga chótʼayá kʼoa nga si̱kjaʼaitsjenjiaan jmeni xi chotʼayá. Kʼoati kjoásjeyaa tsa jmeni xi jao sʼená. Tobʼelañá, a ñaki tjínjngo tokuin ji kʼianga jenichxin fetʼa tiyoaa ndʼaibi. Chótʼayai jmeni xi tongini kitso je Biblia tʼatsʼe nichxin fetʼa kʼoa titajai kjoamakjainli. A jao tjínli nga sitjoson je Jeobá nichxin xi nroaján jmeni xi kitso. Chótʼayajin jmeni xi tongini kitso Biblia xi jekitjoson kʼoa titajai kjoamakjainli. A ñaki tjínjngo tokuin nga nʼio machjén ndʼaibi je kjoafaʼaitsjen xi tsjoá je Biblia. Chótʼayajin tʼatsʼe ndsʼee xi kisindaya yaole kʼianga kitjenngi je kjoafaʼaitsjen xi tsjoá je Biblia kʼoa koa̱ntajaa je kjoamakjainli (1 Tesalonicenses 2:13).a

17. 1) Jméni xi tsakasenkao je Jesús kʼianga kiskale ninga ñʼai tjín kjoa jaʼatojin. 2) Jósʼin koa̱n chjénngiaa choa̱le Jesús.

¹⁷ Si̱kjaʼaitsjeen jmeni xi tongini kitso je Jeobá. Je Jesús kui kisikjaʼaitsjen jmeni xi tongini kitsole je Jeobá. Kʼoa kui xi tsakasenkao nga kiskale ninga nʼio ñʼai kjoa jaʼatojin (Hebreos 12:2). Alikui kui kisichanganile yaole jmeni xi tjín sonʼnde nga kʼia (Mateo 4:8-10). Jósʼin kjuintjenngiaa choa̱le Jesús. Kuinga si̱kjaʼaitsjeen jmeni xi tongini kitso je Jeobá. Jméni xi koasenkaoli nga kʼoasʼiain. Koaan cha̱niyai jkui jokoa̱nchon ya ʼNdenaxó. Koaan chjí kʼoa koaan si̱ndai dibujo tʼatsʼe xi meli sʼiain nga jeya tijnai. Koaan kʼoétʼai jaʼaínle je chjota xi kjoaʼáyale xi meli chja̱kaonajmí kʼoa jmeni xi kʼuínlai. Tikjaʼaitsjain jmeni xi tongini kitso je Jeobá, ji xokitsoli.

18. Jméni xi koasenkaoná nga tsesa kjoamakjain sʼe̱ná.

¹⁸ Si̱jélee Jeobá nga tsesa kjoamakjain katatsjoáná. Je Jesús kʼoakitsole je chjotale nga katasíjéle Jeobá nganʼiotsje (Lucas 11:9, 13). Je nganʼiotsjele Niná kui koasenkaoná nga ngisasa tse kjoamakjain sʼe̱ná, nga̱ je kjoamakjain kʼoati ya tínroani je nganʼiotsje. Kʼoati koa̱n si̱jélee je Jeobá nga katatsjoáná nganʼio nga tsínkui katasíkinjená je kjoa xi síkinroajen kjoamakjainná. Tobʼelañá, kʼiatsa ñʼai maná nga nichatʼalee xíngiaa koaan si̱jélee nganʼio je Jeobá nga katabasenkaoná nga taja katasʼe kjoamakjainná kʼoa nga katabasenkaoná nga koa̱nná si̱chatʼalee xíngiaa.

19. ʼYáni xi koa̱n si̱miyoaa.

¹⁹ Je si̱miyoaa je xi taja kjoamakjainle. Je Jesús ñaki nda kiskoejin je miyole. Je xi nʼio kisimiyo jéní pastrole nga̱ kixi kitʼale kʼoa kisitjosonle (tʼexkiai Juan 15:14, 15). Kʼoati je si̱miyoaa tsanda ñá je xi taja kjoamakjainle kʼoa je xi sítjosonle je Jesús. Je xi ñaki miyoná mani kʼoatsokixiná tsa jña chʼao tinʼia. Tsjoáná kjoafaʼaitsjen kʼianga machjénná. Kʼoa tsa ñá xi kjoafaʼaitsjen kʼoailee kʼoati sítjoson (Proverbios 27:9).

20. Ánni nga kuinyakaosíñá xi kjaʼaí nga katamataja kjoamakjainle.

²⁰ Kuisenkoaa xi kjaʼaí chjota nga katamataja kjoamakjainle. Je Jesús kui kʼoakisʼin kʼoa kui kʼoakitso jmeni xi kisitaja kjoamakjainle je chjotale (Marcos 11:20-24). Kʼoati koa̱n kuisenkoaa tsanda ñá je xi kjaʼaí chjota nga katamataja kjoamakjainle. Tsa kʼoasʼiaan, kʼoati koa̱ntaja kjoamakjainná tsanda ñá (Proverbios 11:25). Jósʼin koa̱n si̱tajaa kjoamakjainle xi kjaʼaí. Kʼianga ʼmiyasonlee je chjota koaan kʼoakʼuínle ánni kʼoasʼin makjainniná nga tíjna je Niná, nga mandosinle xi tʼatsaan kʼoa nga tʼatsʼe kinroani je Biblia. Kʼoati koa̱n kuinyakoaa je ndsʼee nga katamataja je kjoamakjainle. Tobʼelañá, kʼiatsa jngola ndsʼee kuinóʼyalee xi chʼaosʼin tísíkʼaxki̱ xi tjíobándiaale je jtín, alikui koa̱n nga chʼaosʼin si̱kjaʼaitsjeen xi tʼatsʼe kʼoa tsa tsín tichja̱kaoñá. Koaan kuisenkoaa ndsʼee jebi nga katasʼesale kjoamakjain xi kao Jeobá kʼoa nga katasínʼiotʼa je ndsʼee xi nyatítjon (Judas 22, 23). A sʼa xti kʼoa a sʼa skuela titomjai. Kʼiatsa kui kuinchja̱ni je maestroli tʼatsʼe evolución, nʼiojin katamai kʼoa titoánntjai kjoamakjainli nga tjín xi kisinda ngayeje xi tjín. Ali kʼoajinsʼin nikjaʼaitsjain tsa tsín kjuinrʼoé je maestroli kao xti xíngi. Tsakuini nichxin nʼio nda kjuinrʼoé.

21. Jósʼin koasenkaoná je Jeobá nga jngó jngoá.

²¹ Tojosʼin tiʼyaa, je Jeobá kao Jesús tsakasenkao je Pedro nga tsín tikitsokjonni kʼoa nga koantaja kjoamakjainle. Nga jeki nichxin, je Pedro jngo choa̱ xi nʼio nda tsakʼéjnaná nga kjuintjenngiaa kjoamakjain xi kisʼele. Je Jeobá kʼoati koasenkaoná nga jngó jngoá kʼianga nʼio sʼe̱jna kjoamakjainná (tʼexkiai 1 Pedro 5:9, 10). Ninga tse kjoama̱ kʼoéngiaa nga koa̱ntaja kjoamakjainná, nʼio chjíle nga kʼoasʼiaan.