Je Jeobá “miyona” kitsole je Abrahán

1, 2. 1) Jósʼin ʼyañá nga kʼoati koa̱n miyole Niná koaan. 2) Jméni xi koakoyaná kjoaʼmiya jebi.

SAʼNDA nga tsiaan kʼoa saʼnda nga biyaa, je xi ngisa nʼio machjénná kui kjoatsjoacha. Ñá xi chjotaa machjénná nga ñaki tsjoake katamaná je miyoná. Tonga je xi ngisa machjén nga si̱miyoaa jé Niná, kʼoa je Niná koakoná kjoatsjoachale. Nʼio nkjín chjota xi kʼoasʼin síkjaʼaitsjen nga tsín koa̱n miyoná koa̱n Niná, nga̱ je Niná likui matsen kʼoa tse nganʼio tjínle. Tonga ñá ʼyañá nga koa̱n miyoná koa̱n je Jeobá.

² Jósʼin ʼyañá nga koa̱n miyoná koa̱n je Niná. Kuinga síkʼaxki̱ ya Biblia je chjota xi kʼoati miyole Niná koan. Machjénní nga si̱kjaʼaitsjenjiaan chjota jebi kʼoa nga kjuintjenngiaa je choa̱le. Nga miyole Niná koaan kui xi ngisa nʼio chjíle. I̱ kjoaʼmiya jebi kui koakoyaná xi tʼatsʼe Abrahán (tʼexkiai Santiago 2:23). Je Abrahán kuinga miyole koanni je Niná nga kisʼele kjoamakjain. Kʼoa je Biblia kʼoatso nga je Abrahán “nʼaile ngatsʼi chjota [...] xi makjainle” (Romanos 4:11). Kʼianga chótʼayá kjoaʼmiya jebi chjónangilee yaoná: “Jméni xi sʼian nga kʼoati kui kjoamakjain sʼe̱na joni tsa Abrahán kʼoa nga kʼoati miyole Jeobá koa̱n”.

JÓKOANNI KʼIANGA MIYOLE JEOBÁ KOANNI JE ABRAHÁN

3, 4. 1) Kʼiáni nga ngisa nʼio ñʼai koanle je Abrahán nga kichotʼayakao kjoamakjainle. 2) Nga tjínle kjoamakjain, jótsakʼé kon.

³ Cha̱niyala jkoaa je Abrahán nga tobijbi tífimi jngo nindo, kʼiala 125 nóle.^[1] Yaa tjenngile je Isaac, je ʼndíle, kʼoa kʼiaa 25 nóle. Je Abrahán yʼaa tsojmi xi koanchjénle kʼoa kao kuchiyo. Kʼoa jé Isaac yʼale chikín. Nʼiojin ñʼai koanle je Abrahán nga kimi ya nindo jebi. Tonga ali tsakuijin nga jejchínga nga̱ tojo tjínsale nganʼio. Kuinga ñʼai koannile nga je ʼndíle tsjoátʼa tojo kitsole je Jeobá (Génesis 22:1-8).

⁴ Kʼianga kʼoasʼin kitsjoatʼa je ʼndíle kʼiaa nga nʼio kichotʼayakao kjoamakjainle Abrahán. Tjínkʼa chjota xi kʼoatso nga nʼio tsʼen je Niná nga kʼoakitsole je Abrahán nga je ʼndíle katatsjoátʼa. Kʼoati tjío xi kʼoatso nga kuinga kitsjoatʼani nga tsín tsjoake je Isaac. Je chjota xi kʼoatso tsínle kjoamakjain kʼoa alikui be jokjoantjínni xi kjoamakjain ʼmi (1 Corintios 2:14-16). Je Abrahán bení jmeni xi kisʼin. Kisitjosonle je Niná nga̱ ñaki koankjainle xi tʼatsʼe. Kʼoa bení nga tsínkui sijéle Jeobá jmeni xi sikiʼaon. Kʼoa bení kʼiatsa sitjosonle Niná, sichikontʼainní, jé kʼoa kao ʼndíle. Kʼianga kʼoasikji nʼio kisʼejna kjoamakjainle Abrahán, kjoankjíntokon kʼoa kjoafaʼaitsjen koanchjénle.

5. 1) Jósʼin tsabeni Abrahán xi tʼatsʼe Jeobá. 2) Jósʼin tsakasenkao je kjoankjíntokon xi kisʼele je Abrahán.

⁵ Kjoankjíntokon. Je Abrahán yaa kitsin ya naxinandá jñani Ur tsakʼin. Ya ʼnde jebi niná ndiso bʼétsʼoale chjota. Kʼoa je nʼaile Abrahán kʼoati niná ndiso tsakʼétsʼoale (Josué 24:2). Jósʼin tsabeni Abrahán je Jeobá. Je Biblia kʼoatso nga ya kitjenni ntje̱le Sem, je tile Noé. Kʼoa kʼiala 150 nóle je Abrahán nga kʼien je Sem. Je Sem nʼio koankjainle xi tʼatsʼe Jeobá, kʼoa tsakui nichxin kui tsakjákaoni xi tʼatsʼe Jeobá je familiale. Kʼoa tochale kʼoasʼin tsabeni Abrahán xi tʼatsʼe Jeobá. Kʼianga kisʼele kjoankjíntokon jebi, je Abrahán tsjoake koan je Jeobá kʼoa kisʼele kjoamakjainle xi tʼatsʼe.

6, 7. Jókoanni nga nʼio kisʼejna kjoamakjainle je Abrahán.

⁶ Kjoafaʼaitsjen. Jósʼin kisʼele kjoafaʼaitsjen je Abrahán xi tsakasenkao nga kisʼele kjoamakjain. Tjínkʼa chjota xi kʼoatso kʼianga je kjoankjíntokon títjon ya bichósʼejnajin ni̱ma̱ná kʼoa xijema kʼiaa kʼoanʼia jmeni xi kasʼejnajin ni̱ma̱ná. Je Abrahán kʼoakoan nga tsabe xi tʼatsʼe Niná. Je kjoankjíntokon xi kisʼele kui tsakasenkao nga tsabexkón je Jeobá “je Niná xi nʼiosa ngʼa tíjna” (Génesis 14:22). Je Biblia kʼoatso nga “kitsakjonke” je Niná, alikui kui kʼoakisʼin xi tsín sasénle je Jeobá (Hebreos 5:7). Kʼoa nga kʼoakisʼin kui xi tsakasenkao nga kisitjosonle ngantsjai je Jeobá. Kʼiatsa mená nga miyole Niná koaan, kʼoati machjén nga kuinókjonchá (Salmo 25:14).

⁷ Je Niná kʼoakitsole je Abrahán kao Sara nga katabitjo ya ʼndele kʼoa nga ya koaikatio ya naxinandá jñani tsín bexkon. Nga kʼoatsakʼinle ali tsa sʼajin xti, kʼoa jñani koaikatio to ndʼianajño koaikatioʼya. Je Abrahán kʼoati tse kjoa kjoaʼatojin. Tonga kʼoatsakʼé kon nga sitjosonle je Jeobá. Kʼianga kisitjoson je Abrahán, kisichikontʼain je Niná kʼoa kisikuindaa. Tobʼelañá, ya Biblia kʼoatso nga jao kʼa nga tjín xi kikao je Sara, kʼoa kui kʼoakoantʼainni nga naskánakisʼe. Je Abrahán nʼiojin kisikuinda yaole nga tsín kinikʼien. Tonga jé Jeobá tsakasenkao nga jao kʼa kjoa jebi kʼoa kisikuindaa (Génesis 12:10-20; 20:2-7, 10-12, 17, 18). Kʼianga kui kjoa jaʼatojin ngisa nʼio kisʼejna kjoamakjainle je Abrahán.

8. Jméni xi sʼiaan kʼianga sʼe̱ná je kjoankjíntokon kao kjoafaʼaitsjen xi koasenkaoná nga nʼiosa koa̱nmiyoaa je Jeobá.

⁸ Kʼoa ñá, a koaan miyole Niná koaan. Jaon. Kʼoa machjénní nga kataʼyaa xi tʼatsʼe Jeobá tojo kisʼin je Abrahán. Kʼoati machjénná kjoankjíntokon kao kjoafaʼaitsjen. Kʼoa kijnaná ngakjijngo je Biblia (Daniel 12:4; Romanos 11:33). Je Biblia kui nya je kjoankjíntokonle “Niná xi nʼiosa ngʼa tíjna”. Kʼiatsa chótʼayá kui xi koasenkaoná nga koa̱ntsjoachaa je Jeobá kʼoa nga jchaxkoán kʼoa si̱tjosonlee. Kʼoa je Jeobá sikuindaná kʼoa sichikontʼainná kʼoa kʼoasʼin sʼe̱niná kjoafaʼaitsjen xi machjénná nga nʼio sʼe̱jna kjoamakjainná. Kʼianga kao ngayeje ni̱ma̱ná si̱xánilee je Jeobá tsjoa sʼe̱ tokoán kʼoa sʼe̱ná kjoanyʼán (Salmo 34:8; Proverbios 10:22). Kʼianga sa sʼe̱ sa sʼe̱ná je kjoankjíntokon kao kjoafaʼaitsjen ngisa nʼio koa̱nmiyosaa je Jeobá.

JMÉNI XI KISʼIN ABRAHÁN NGA TOSI TONDA MIYOLE JEOBÁ KOAN

9, 10. 1) Jméni xi sʼiaan nga ñaki nʼio sʼe̱jna kjoamiyoná. 2) Jméni xi kisʼin je Abrahán nga tsín kisicha je kjoamiyo xi kisʼele kao Jeobá.

⁹ Jngo miyo nʼio chjíle (tʼexkiai Proverbios 17:17).a Alikui kʼoasʼin mangóson joni tsa jngo tiixolo xi nʼio chjíle xi tokui xá tíjnani nga katatsjoále sén ya niʼya jñani tíjna. Je xi miyo ʼmile yaa mangóson joni tsa jngo naxó xi machjénle nga koa̱nkuinda. Je Abrahán tsabe nga nʼio chjíle je kjoamiyo xi kisʼele kao Jeobá. Kuinga kisikuindasíni. Jméni xi kisʼin.

¹⁰ Je Abrahán kisitjosonle ngantsjai je Niná kʼoa tsabexkónní. Tobʼelañá, kʼianga tjen kao familiale kʼoa kao choʼndale nga tjíofi ya jña kitsole Niná, kisitjoson ngantsjai josʼin tsakándiaale Niná. Kuenta kisʼin ni tse kʼoa ni choa kjoa xi jaʼatojin. Jngo nó tongini nga kjesa tsinjin je Isaac, je Jeobá kʼoakitsole Abrahán nga katatindai yaole ngatsʼi je chjotaxʼin xi ya tjío niʼyale (chótsenlai je rekuadro “Jósʼin tsoyanile”). Kʼianga kui nichxin 99 nóle je Abrahán. Jókisʼin. A kisitjosonle je Jeobá. Axo tojme xi tsakasenngini yaole nga tsín kisitjoson. Majain. Kisinʼiotʼa je Niná kʼoa tikuini nichxin kisitjoson jme xi tsakʼinle (Génesis 17:10-14, 23).

11. 1) Ánni nga koankjáojinsínile je Abrahán. 2) Jósʼin tsakasenkao Jeobá je Abrahán.

¹¹ Je Abrahán nʼio miyole koanni je Jeobá kʼoa ñaki je kisinʼiotʼa ngantsjai, ni tse kʼoa ni choa kjoa jaʼatojin. Koan tsakjákaoni tojmeni xi mele, saʼnda kʼoakitsole jmeni xi tsín koanjinle. Tobʼelañá, kʼianga kʼoakitso je Jeobá nga sikjeson je naxinandá Sodoma kao Gomorra, je Abrahán nʼio koankjáojinle. Ánni. Kuinga kʼoasʼin kisikjaʼaitsjen nga kuiyá tojokji chjotani ni xi nda tjíosʼín kʼoa ni xi chʼao tjíosʼín. Tsakui nichxin je tikjaʼmele kisikjaʼaitsjenjin, je Lot kao familiale xi ya tjío ya Sodoma. Tonga je Abrahán kisinʼiotʼaa je Jeobá “je xi Jues tíjnale jngo tjíjtsa sonʼnde”. Kuinga tsakʼéyanajmísínile Niná jmeni xi koankjáojinle. Jósʼin tsakasenkao je Jeobá. Tsejta koan kʼoa kʼoakitsole je Abrahán nga tjínle kjoamatokon. Kʼoati kitsole nga kʼianga faʼaikao kjoaxkón básjainí je xi nda chjota kʼoa bʼasjentjainí (Génesis 18:22-33).

12, 13. 1) Kʼianga kʼoakitsole Jeobá je Abrahán nga katatsjoátʼale je ʼndíle, jósʼin tsakasenkao je kjoankjíntokon kao kjoafaʼaitsjen xi kisʼele. 2) Jósʼin ʼyañá nga koankjainle Abrahán xi tʼatsʼe Jeobá.

¹² Je kjoankjíntokon kao kjoafaʼaitsjen xi kisʼele je Abrahán kui xi tsakasenkao nga tosi tonda miyole koanni je Jeobá. Kʼianga kʼoakitsole je Jeobá nga katatsjoátʼale je Isaac, je Abrahán bení nga nda chjota je Niná, nga tsejta kʼoa tjínle kjoamatokon. Kʼoati be nga tsín toxijña chʼao koa̱nkjoan je Niná.

¹³ Kʼianga kjesa fimijin ya nindo, je Abrahán kao Isaac, i kitsole je choʼndale: “I̱la tiyo jñani séjna je búrró. Je ti kʼoa kao an yala timangínjin yaján, nga jchaxkuínjin Niná, kʼoa sʼa tinroanrʼoenilaijin” (Génesis 22:5). Ánni kʼoakitsosínile je choʼndale je Abrahán kʼianga kjoaʼaí ijngokʼani kao je tile. A totsakʼéndisole. Mai. Ya Biblia kʼoatso nga be kʼianga je Jeobá sikjaʼáya ijngokʼanile je Isaac (tʼexkiai Hebreos 11:19). Bení kʼianga je Niná xokisʼin nga jngo ʼndí kisʼele ninga jejchínga kjoan, je kao chjoónle (Hebreos 11:11, 12, 18). Kʼoa kuinga beni nga koa̱nle Niná tojmeni. Ninga tsínlani be jmeni xi koa̱n nga kui nichxin. Ninga kuiyálani je Isaac koankjainle nga sikjaʼáyanile je Jeobá kʼianga kuitjoson jmeni xi tongini kitsole. Kuinga kʼoatsosíni Biblia nga nʼaile mani “ngatsʼi chjota [...] xi makjainle”.

14. 1) Jméni kjoa xi faʼatojin kʼa je choʼndale Jeobá. 2) Jósʼin basenkaoná je choa̱le Abrahán.

¹⁴ Nichxin xi tiyoaa ndʼaibi, alikui kui tísíjéná je Jeobá nga xtiná kʼoaitʼalee. Tonga kʼoatsoná nga si̱tjosoán kjoatéxomale. Tsakui nichxin sakʼoa tsín majinná jmeni xi tsoná je Jeobá. Kʼoa tsa sakʼoa ñʼai maná nga nitjosoán. Tsakui nichxin soa maná nga ʼmiyasoán kʼoa ñʼai maná nga nokjoakoaa chjota xi tsín ʼyaxkoaan. Kʼoa tsakui nichxin nokjoaan nga tsín kʼoanʼia jmeni xi sʼín je chjota xi ñatjen nixá kʼoa tsa je xti xi ñatjen titsomaa skuela (Éxodo 23:2; 1 Tesalonicenses 2:2). Kʼiatsa kʼoasatío tokoán, jméni xi sʼiaan. Si̱kjaʼaitsjenjiaan je kjoamakjain kao kjoanʼiojin xi kisʼele je Abrahán. Kʼiatsa si̱kjaʼaitsjenjiaan jmeni xi kisʼin je chjota xi kixi koan nichxin kjoatse, ni xi xʼin ni xi yánchjín, kjuintjenngiñá je choa̱le kʼoa miyoná koa̱n je Jeobá (Hebreos 12:1, 2).

NGA MIYONÁ MA NINÁ KUI XI TSJOA BʼÉ TOKOÁN

15. Jósʼin ʼyañá nga ñaki tsakʼéjngo kon je Abrahán nga kisitjosonle je Jeobá.

¹⁵ Je Abrahán kisitjosonle ngantsjai je Jeobá. Jósʼin ʼyañá. Nga̱ ya Biblia kʼoatso nga 175 nóle nga kʼien. Jejchínga kʼoa ñaki tjín jngo jngoo kon nga kʼien (Génesis 25:8). Ali tsakuijin xi tsonile tsa tsín tikoanmenile tsakʼejna. Tonga ñaki tsjoa kisʼe kon nga kui kisikjaʼaitsjen josʼin tsakʼejna. Nga̱ je xi ngisa nʼio tsabechjí kui kjoamiyo xi kisʼele kao Jeobá.

16. Ánni nga nʼio tsjoa sʼe̱sínile je Abrahán nga kʼoéjna ya ʼNdenaxó.

¹⁶ Je Biblia kʼoatso kʼianga je Abrahán “kiskoyale je naxinandátsebe xi tjínle xjáoja̱ma̱, jñale xi tijeni Niná tsakʼénda, kʼoa kisinda” (Hebreos 11:10). Naxinandá jebi kui tsoyanile je Chjotaxále Niná. Je Abrahán koankjainle nga kuichoka nichxin nga skoe̱ kʼianga koatexoma jngo tjíjtsa Sonʼnde je Chjotaxále Niná. Cha̱niyalai jkui jokji tsjoa sʼe̱le Abrahán nga kʼoéjna ya ʼNdenaxó kʼoa nga ngisa tinʼio miyo koa̱nngánile je Jeobá. Nʼiojin tsjoa koa̱nle nga jesʼe̱jinle kʼianga nʼio nkjín choʼndale Niná tsakinyakao je kjoamakjain xi kisʼele. Kʼoajin tiskoe̱ nga nʼio chjíle jme xi kitsoyanile nga jetítsjoátʼale Niná tsakai je Isaac (Hebreos 11:19). Kʼoa jokji aon koanle nga títsjoátʼa je Isaac kʼoati skoe̱ nga miyón chjota tsakinyakao nga koanjinle jokji aon koanle Jeobá nga kisikasén ʼNdíle i̱ Sonʼnde nga kʼienntjai chjota (Juan 3:16). Je choa̱le Abrahán nʼio tíbasenkaoná nga tiʼyachjiá je kjoabʼechjíntjaile Jesús. Kʼoa kui kjoatsjoacha jebi xi ngisa nʼio tsakakó je Jeobá.

17. 1) Jméni xi machjénná nga sʼiaan. 2) Jméni xi chótʼayá kjoaʼmiya xi ijngo.

¹⁷ Kjuintjenngiaa ngantsjai je choa̱le Abrahán. Kʼoati machjénná tsanda ñá nga sʼe̱ná kjoankjíntokon kao kjoafaʼaitsjen. Kʼiatsa tosi tonda chótʼayá xi tʼatsʼe Jeobá kʼoa si̱tjosonlee, jchañá josʼin sichikontʼainná kʼoa josʼin sikuindaná (tʼexkiai Hebreos 6:10-12). Kʼiatsa kʼoasʼiaan miyoná koa̱n ngantsjai. Je kjoaʼmiya xi ijngo ngi jan choa̱le chjota jchaa xi kʼoati miyole Niná koan.