Tjínkʼa xi kjonangi

Ñandia kʼianga jngo sén tsabe je Ezequiel, jngo chjota xi ndájín yʼa kʼoa jaon chjota xi ki̱cha̱ kjoajchán yʼa tsabe. Jmé xi tsoyanile jebi.

Jé tsoyanile ánkje xi tjío ngʼajmi xi kisikjeson naxinandá Jerusalén, xi kʼoati sikjeson jme xi chonle sonʼnde je Na̱i kʼianga kjoaʼaí Armagedón. Tsʼantjaiyaa josʼin majinná tsakai jebi. Ánni.

Tongileni nó 607 nga kjesa faʼaijin Cristo, je Jeobá tsakakóle je Ezequiel jmeni xi koa̱n ya Jerusalén nga kjesa nikjesonjin. Nga kisakole sén jebi je Ezequiel kui tsabe nga nʼio chʼao tjíosʼín je chjota xi tjío ya Jerusalén. Xijekoan, jaon chjota tsabe xi ki̱cha̱ kjoajchán yʼatonntsja. Kʼoati tsabe jngo chjota xi najño lino yʼakjá, xi ndájín yʼa (Ezequiel 8:6-12; 9:2, 3). Je Jeobá kʼoakitsole chjota jebi nga ya katafaʼa ngabasenle naxinandá Jerusalén kʼoa nga katabʼéchoa̱ totjen je chjota xi tjíofaʼátsele kʼoa tjíotsene xi totʼatsʼe nga nʼio chʼao kjima ya naxinandá. Kʼoa je chjota xi jaon mani kʼoakitsole nga katasíkʼien ngatsʼi je xi tsín tjíochoa̱ totjen (Ezequiel 9:4-7). Jméni xi tsoyaná jebi. Kʼoa ʼyáni xi tsoyanile je chjota xi ndájín yʼa.

Je én jebi kʼiaa kʼoakitso je Ezequiel nga nó 612 nga kjesa faʼaijin Cristo. Kʼoa aon nó koanskanni kitjoson, kʼianga kitsjoaʼnde je Jeobá nga je chjotakjoajchán xi Babilonia tsʼe kichosíkje naxinandá Jerusalén. Je Jeobá jé naxinandá Babilonia kisichjén nga kitsjoale kjoañʼai je naxinandále nga tsín kisitjosonle (Jeremías 25:9, 15-18). Jókoan je chjota judío xi kixi koan, xi kjoañʼai tsakjaʼá xi totʼatsʼe jmeni xi koan ya Jerusalén. Jé Jeobá tsakasenkao nga kinjengile yaole.

Ya sén jebi, je Ezequiel aliʼya xi ñaki totjen tsakʼéchoa̱ kʼoa ni yajinla tsakjajin nga kinikje naxinandá Jerusalén. Jé ánkje xi kisikjeson naxinandá Jerusalén. Jebi kui xi basenkaoná nga ʼyaa jmeni xi ma ya ngʼajmi. Je Jeobá kʼoakitsole je ánkjele nga katasíkjeson je chjota xi tsín kixi tjíofitʼale kʼoa nga katasíkinjengi je chjota xi kixi.a

Kʼiáni kʼoa jósʼin bitjoson xi mani jao kʼa je én jebi. Nga títjon, je xo̱n xi bʼasje naxinandále Niná kʼoakitso nga je chjota xi ndájín yʼa jé tsoyanile je chjotale Cristo xi ya koai ngʼajmi xi tjíosa i̱ Sonʼnde. Kʼoati kitso nga kʼia sʼechoa̱ totjen je chjota nga nrʼoé kʼianga ʼmiyasonlee je Énle Niná. Tonga tsʼantjaiyaa josʼin tsoyanile jebi. Ánni. Nga chriansʼa kichotʼayajiaan je Mateo 25:31-33 koanjinná nga jé Jesús xi síjtsoʼa je chjota kʼoa nga kʼoati je sijtsoʼa kʼianga jetíjna kjoañʼai xi nʼio tse. Nga kʼia, jé Jesús xi kuitsoni ʼyáni xi barré sʼin skoe̱kon kʼoa ʼyáni xi tindso sʼin skoe̱kon. Je xi barré sʼin skoe̱kon kuinje̱ngile yaole, tonga je xi tindso sʼin skoe̱kon ni̱kjesonní.

Jméni xi majinná tʼatsʼe sén xi tsabe je Ezequiel. Aonla koya tjínni xi kataʼyaa.

1. Nga kjesa nikjesonjin je naxinandá Jerusalén, je Jeobá jé kisichjén je Ezequiel, Isaías kao Jeremías nga je tsakájinkon je naxinandá jmeni xi koa̱n. Nichxin xi tiyoaa ndʼaibi, je Jeobá tochoa mani choʼndale xi ya koai ngʼajmi xi tísíchjén nga tjíotsoyale je choʼndale kʼoa tjíobájinkon je chjota nga kjesa faʼaijin je kjoañʼai xi nʼio tse. Kui xá tjíosʼín ngatsʼi je choʼndale Niná, xi ya koai ya ngʼajmi kao xi koatio i̱ Sonʼnde, nga tjíobájinkon je chjota (Mateo 24:45-47).

2. Je Ezequiel tsín ñaki tsakʼéchoa̱ je chjota xi kinjengile yaole. Kʼoatisʼinni nichxin xi tiyoaa ndʼaibi, je choʼndale Niná tsín ñaki bʼéchoa̱ je chjota, tokui xi sʼín nga tsoyason kʼoa bájinkon je chjota tʼatsʼe jmeni xi koa̱n nichxin xi nroaján. Kʼoa jé ánkje binyakao nga bitjosonle xá jebi jngo tjíjtsa Sonʼnde (Apocalipsis 14:6).

3. Kʼianga nichxinle Ezequiel tsín ñaki kisʼechoa̱ totjen chjota xi kinjengile yaole. Nichxin xi tiyoaa ndʼaibi, kʼoati tsín ñaki sʼe̱choa̱ je chjota xi kuinje̱ngile yaole nga kjoaʼaí kjoañʼai xi nʼio tse. Jméni xi tjínnele sʼin je chjota nga kuinje̱ngile yaole. Kʼianga kjuinrʼoé jotso je Énle Niná, tjínnele kui choa̱le Jesús koaitjenngi, nga tsjoátʼale yaole Niná kʼoa nga kuinyakao je chjotale Cristo xi ya koai ngʼajmi nga kuitsoyason je Énle Niná (Mateo 25:35-40). Nga jetíjna je kjoañʼai xi nʼio tse, je chjota jebi kʼiaa sʼe̱choa̱, xi tsonile, kuinje̱ngile yaole.

4. Je chjota xi ndájín yʼa jé Jesús tsoyanile. Nga jetíjna je kjoañʼai xi nʼio tse, je Jesús kʼiaa kʼoechoa̱ je chjotankjín xi barré sʼin skoe̱kon. Kʼoa chjota jebi tjóʼndele nga koa̱n koatio ngantsjai nichxin i̱ Sonʼnde (Mateo 25:34, 46).b

5. Nichxin xi tiyoaa ndʼaibi, je chjota xi jaon mani xi ki̱cha̱ kjoajchán yʼa, jé tsoyanile je ánkje xi tjío ngʼajmi kʼoa jé Jesús bándiaale. Jeme sikjeson je naxinandá xi tjín kʼoa sikjeson ngayeje jmeni xi chʼaotjín (Ezequiel 10:2, 6, 7; Apocalipsis 19:11-21).

Nga aon koya jebi kui xi tsoyaná nga je Jeobá tsín je sikjeson je choʼndale xi kixi tjíofitʼale kʼianga sikjeson je chjotatsʼen (2 Pedro 2:9; 3:9). Kʼoati síkjaʼaitsjenjinná nga nʼio chjíle nga kʼuínyasoán nichxin xi tiyoaa ndʼaibi. Tjínnele sʼe̱jinle ngatsʼi je chjota je Énle Niná nga kjesa faʼaijin je kjoafetʼa (Mateo 24:14).