Nga kixi maa ngisaa nʼio chjíle tikʼoajinni la̱jao̱chjí

Je Haykanush kao xʼinle yaa naxinandá Armenia tjío. Nga jao chjota jebi jebakóyason Énle Niná tonga kje fisʼenngindájin. Ñandia kʼianga je Haykanush jngo pasaporte koansjaile ya chrian niʼyale. Kʼoa nkjín tarjeta xi tsʼe banco kjioʼnyo kʼoa kʼoati nʼio tse tao̱n kjioʼnyo. Kʼianga kicho niʼyale kʼoakitsole je xʼinle jme xi koansjaile.

Nʼio ñʼai chonle tao̱n kʼoa kʼoati tse tao̱n kitjenle. Tonga ʼndele nga toje skoé tao̱n xi kisokole, tosa ya kikao ya dirección xi tjítʼa je pasaporte. Je chjota xi tsʼe kʼoa kao familiale tokʼoakoanle nga kʼoasʼin kichokaole pasaportele. Kʼoa je Haykanush kao xʼinle tsakʼéyanajmíle chjota jebi nga Biblia tjíokotʼaya kʼoa kuinga beni nga tjínnele chjotakixi koa̱n. Tsakjákaoni tʼatsʼe testigole Jeobá kʼoa tsakáyole je xo̱n xi Biblia yʼangini.

Je familia jebi mele nga tao̱n tsjoále tsakai je Haykanush tonga alikui kiskoé. Kʼianga koannyaonni, je chjoónle xi tsʼe pasaporte kicho ya niʼyale Haykanush. Kʼoakitsole nga nʼio tsjoále kjoanda nga kichokaonile pasaportele kʼoa jngo tao̱njngo xi la̱jao̱chjí tjínle kitsjoale.

Nʼiojin nkjín chjota xi kʼoati tokʼoakoa̱nle jmeni xi kisʼin Haykanush kao xʼinle. Tonga a tokʼoamale je Jeobá. Jósʼin síkjaʼaitsjen tʼatsʼe chjota jebi. A nda kisʼin nga kʼoakisʼin.

XI NGISA CHJÍLE TIKʼOAJINNI TAO̱N

Je choʼndale Niná bení nga je Jeobá ngisaa nʼio bechjí nga chjenngilee jokjoan tikʼoajinni tao̱nsine, la̱jao̱chjí kʼoa tojme tsojmini. Alikui mangóson jmeni xi bechjí je Jeobá kao xi bechjí je chjota (Isaías 55:8, 9). Je Jeobá nʼio bechjí nga bʼénele yaole je choʼndale kʼianga kjenngile jokjoan.

Tobʼelañá, je Biblia itso tʼatsʼe kjoamajintokon kao tʼatsʼe kjoachjine: “Tsjoa tjínle je chjota xi masjaile kjoachjine kʼoa je chjota xi sokóle kjoamajintokon. Nga̱ ngisaa nda nga kui sʼená tikʼoajinni tsa tao̱nchxoa kuinje̱ná, kʼoa ngisaa nda tikʼoajinni tsa tao̱nsine tjínná. Ngisaa nʼio chjíle tikʼoajinni je coral; nijmejin tsojmi xi nimetokuin xi mangóson” (Proverbios 3:13-15). Tojo tso testo jebi, je Jeobá ngisaa nʼio bechjí jokjoaan tikʼoajinni tojme la̱jao̱chjíni.

Jótso je Jeobá tʼatsʼe nga kixi maa.

Je Jeobá ñaki kixiní. Je Biblia kʼoatso nga “tsín male bʼéndiso” (Tito 1:2, TNM). Kao nganʼiotsjele Jeobá, je pastro Pablo itso én xi kiskile je chjotale Cristo: “Tʼetsʼoantjainajin, nga̱ nda ʼyatakuinjin nga nda kjoafaʼaitsjen tjínnajin, nga̱ menajin nga nda koangínkoaijin yaonajin ngayije kjoa” (Hebreos 13:18).

Je Jesucristo kʼoati jngo choa̱ kisikʼéjnaná nga kixi koan. Ñandia kʼianga je xi naʼmitítjon sʼin tíjna i̱ kitsole: “Bʼenele xi tʼatsʼe Niná xi tíjnakon nga kʼoatʼinnajin tsa ji ní je Cristo, ʼndíle Niná”. Je Jesús kʼoakitso nga jé xi Cristo ma. Alikui énndiso kinchja̱ ninga be nga kʼoakuitso je Sanedrín nga Niná tínchja̱ʼaonle kʼoa nga ni̱kʼien nga kʼoakuitso (Mateo 26:63-67).

Jónʼia ñá, jósʼiaan tsa tao̱n kuinje̱sonná kʼiatsa tsín kʼoéyanajmíyejee jotjínni kjoa kʼoa tsa si̱kʼantjaiya choalee jokuixoán. A tojo chjotakixi koaan.

ÁNNI NGA ÑʼAI MANINÁ NGA KIXI MAA

Nichxin xi tiyoaa ndʼaibi nʼio ñʼai maná nga kixi maa, nga̱ nʼio nkjín chjota xi to yaole fini kʼoa nʼio tsjoake tao̱n (2 Timoteo 3:2). Kʼianga ñʼai machon xi tʼatsʼe tao̱n kʼoa nga tsín xá, nʼio nkjín chjota xi tsínkui fini ninga siché, ninga kʼoanacha kʼoa tsa jmesani xi sʼin. Nga toje kʼoasʼin ngale chjota kʼoasʼin síkjaʼaitsjen nga tokʼoasʼin koa̱n so̱kole jme xi mele. Saʼnda tjínkʼa chjotale Cristo xi kui kʼoasʼín xi tsín kixi tjín kʼoa likui tinda bationi ya jinjtín (1 Timoteo 3:8; Tito 1:7).

Tonga me ngatsʼi je chjotale Cristo nga kʼoasʼín jokisʼin je Jesús kʼoa ñaki chjotakixi kjima. Bení nga kui xi ngisa chjíle kʼianga chjenngilee jokjoan Niná tikʼoajinni kjoanyiná. Kuinga je xti xi chjotale Cristo ma, tsín bʼanachasíni ya ndʼiaskuelale tojoni nga nda kʼoasje xo̱nle (Proverbios 20:23). Likuijin tongantsjai nga tjín xi kʼoaingajaoniná nga kixi koaan, tojo koantʼain je Haykanush. Tonga je Niná kʼoatso nga ndatjín kʼianga kixi maa. Kʼoa tsa kʼoasʼiaan nda sʼe̱ kjoafaʼaitsjenná kʼoa kui xi ngisa chjíle.

Jme xi koantʼain je Gagik kʼoati kui bakóná nga nʼio nda nʼia kʼianga kixi maa. Je Gagik kʼoatso nga nʼioje kji negosio ya jñani kisixá kʼianga kjesa testigole Jeobá majin. Kʼoa tojoni nga tsín kʼoechjíson je negosiole je xi nai ma kʼoatso nga nʼio tochoa njele. Kʼoa nga director sʼin tíjna je Gagik, kui xi mele je naile nga tao̱n katatsjoále je chjotale gobierno xi bichókotsen ánni nga tsín jokuitsosíni jme xi kjima ya negosio. Kʼianga kʼoakisʼin je Gagik kʼoasʼin tsaʼyale nga tsín chjotakixi koan. Tonga kʼianga kiskotʼaya Biblia, alikui titsakʼanachani ninga tochoasa koanchjíle. Kʼoa tosa jngo negosio xi tsʼe tsakʼéjna. Saʼnda nga tsakʼétsʼiakao negosiole tsakʼétʼaxoon kʼoa tsakʼéchjíntjai jotso kjoatéxoma (2 Corintios 8:21).

Je Gagik kʼoatso nga tobasensa kʼoakji kinjele jotjín njele ngasʼa kʼoa nga nʼio ñʼai koanle nga tsakajngiʼa je familiale. Tonga ndʼaibi ngisaa tsjoa tjín kon kʼoa tsje tjín kjoafaʼaitsjenle ngixko̱n Jeobá. Nda choa̱ tíbʼéjnale nga jao xtile kʼoa kʼoati tjínle kjoanda nga bʼaixále ya jinjtín. Kʼoa nda síkʼaxki̱ je chjota xi ya síxákao kʼoa kao chjotale gobierno xi bichókotsen ya negosiole, nga̱ bení nga chjotakixi je Gagik.

JÉ JEOBÁ BASENKAONÁ

Je Jeobá tsjoake ʼyani xi bʼasjengʼa nga kjenngile jokjoan, jolani nga kixi ma (Tito 2:10). Je Jeobá kʼoatso nga koasenkaoná kʼiatsa chjénngilee jokjoan. Je rey David i kitso: “Kʼoati xti koan tsanda an kʼoa jekoanjchínga ndʼaibi, tonga nisañandiajinla ʼbe tsa njiotokon jngo chjota xi kixi, kʼoa tsa tsínle jme xi tjíokjine je xtile” (Salmo 37:25).

Jngo choa̱ tíjnaná xi tsʼe Rut. Je Rut nʼio kixi koan, ninga jenʼio chjotajchínga je na̱chále alikui kitsjionkon. Je Rut yaa kikʼejna ya naxinandá Israel, jñani koan tsabexkón je Jeobá (Rut 1:16, 17). Je Rut kixi koan kʼoa nʼio kisixá. Kui tsakʼéxkó tsojmi xi njengile chjota kʼianga bʼéxkó tsojmintjele tojo tso je kjoatéxomale Moisés. Je Jeobá kisikuindantsjai je Rut kao na̱chále, tojo kisikao je David nga koanskanni (Rut 2:2-18). Kʼoa ali tsa tokuijin xi kisʼin Jeobá nga kisikuinda je Rut kʼoa nga kitsjoale jme xi machjénle, kʼoati kitsjoale kjoanda nga ya ntje̱le kinroani je rey David kao je Cristo (Rut 4:13-17; Mateo 1:5, 16).

Nichxin xi tiyoaa ndʼaibi, nʼio nkjín choʼndale Niná xi ñʼai male nga sokóle jme xi machjénle. Tonga alikui bʼanacha tojoni nga ngotjo so̱konile jme xi machjénle. Tosa bʼénele yaole nga nda síxá. Nga kʼoasʼín, bakóní nga ngisa chjíle nga chjénngilee jokjoan Niná tikʼoajinni nga kjoanyiná sʼe̱ná (Proverbios 12:24; Efesios 4:28).

Jngo tjíjtsa Sonʼnde, je chjotale Cristo kui choa̱le Rut fitjenngi kʼoa bakó nga makjainle nga je Jeobá sikuinda. Makjainle nga i̱ tso je Jeobá: “Likui xin koatejnale, nitsjionkonjinle” (Hebreos 13:5). Je Jeobá basenkao ngantsjai je xi chjotakixi ma. Sítjosonntsjai je énle nga tsjoále choʼndale jme xi machjénle (Mateo 6:33).

Je chjota nʼio chjí be je la̱jao̱chjí kʼoa kao tsojmi xi kjaʼaísanile. Tonga je Jeobá ngisaa bechjí nga kixi maa tikʼoajinni la̱jao̱chjí.