Jósʼin xi jechixan nga ndasʼin koatio

1. Ninga nʼio tsjoa tjíole nga tosʼa bixan je chjota, jméni xi ma nga jetjíokao xínkjín (chótsenlai sén xi faʼaitʼa ibi).

KʼIANGA tosʼa bʼetsomakao xínkjín jngo chjoón jngo xʼin, sa tsjoake sa tsjoake ma xínkjín kʼoa chaan bixan. Kʼianga bixan nʼio tsjoa satío kon kʼoa kʼoatso nga ñaki kixi koa̱nle xínkjín ngantsjai nichxin. Kʼianga jekabixan, tjínnele sikʼantjaiya yaole jokjoan ánni nga ndasʼin koationi. Jé Jeobá tsakʼéndajin nga kjoabixan tjín kʼoa kui xi mele nga ndasʼin katabatio kʼoa nga tsjoa katasatíole xi jekabixan. Kuinga tsjoánile kjoafaʼaitsjen kʼoa yaa Biblia faʼaitʼa kjoafaʼaitsjen jebi (Proverbios 18:22). Ninga bʼailanile kjoafaʼaitsjen, je Biblia kʼoatso nga chjotajée maa kʼoa nga je xi bixan tojo sʼele kjoa (1 Corintios 7:28). Jósʼin xi jechixan nga tsín nʼio tse kjoa sʼe̱le. Kʼoa jméni xi sʼin nga ndasʼin koatio.

2. Jósʼin tjínnele tsjoake koa̱n xínkjín xi jechixan.

² Je Biblia kʼoatso nga nʼio chjíle je kjoatsjoacha. Nkjín koya kjoatsjoacha tjín xi tjínnele koakole xínkjín xi jekabixan. Tjínnele tsjoake koa̱n xínkjín kʼoa tjao koa̱nle xínkjín. Kʼoa tsa xti tjínle, machjén nga tsjoake koa̱n xínkjín ngatsʼi. Tonga je xi ngisa koasenkao nga nda koatio, kuinga kʼoasʼin tsjoake koa̱n xínkjín josʼin mele Niná. Je pastro Pablo itso xi kiski: “Jngójngó ngatsʼiobi ñaki kʼoasʼin tsjoacha katamao yánchjínno, josʼin tsjoachao yaono. Je xi chjoón xkón katabe xʼinle” (Efesios 5:33).

XÁ XI KJINELE JE CHJOÓN KAO JE XʼIN

3. Jókji tsjoake koa̱n xínkjín xi jechixan.

³ Je Pablo i kitso: “Jon xi xʼion, tsjoacha katamao yánchjínno, josʼin nga Cristo koantsjoake naxinandále, kʼoa kitsjoantjai yaole xi tʼatsʼe” (Efesios 5:25). Nichxin xi tiyoaa ndʼaibi, ñá xi chjotale Cristo maa kui choa̱le Cristo timangíntjenngiaa nga tsjoacha kjimaa xíngiaa tojosʼin tsjoake koan chjotale je Cristo (tʼexkiai Juan 13:34, 35;a 15:12, 13b). Jókji tsjoake koa̱n xínkjín xi jechixan. Tjínnele nʼio tsjoake koa̱n xínkjín. Tsa nʼio tsjoake xínkjín saʼnda kuiyántjai xínkjín. Tonga kʼianga kjoa sʼele tsakui nichxin kʼoasʼin síkjaʼaitsjen nga tsínni nʼio tsjoake xínkjín. Jméni xi kuinyakao. Kui kjoatsjoacha xi nchja̱ni Biblia. Nga̱ je kjoatsjoacha jebi “síkjaínle ngayije, makjainle ngayije, koyale ngayije, ngayije jchókjoakaole” kʼoa “nikʼiajin fetʼa” (1 Corintios 13:7, 8). Tjínnele sikjaʼaitsjen nga kʼoakitsole xínkjín kʼianga chixan nga tsjoake koa̱n kʼoa nga kixi koa̱nle xínkjín. Kʼoa xi koasenkao kuinga je Jeobá sijéle nganʼio kʼoa nga kuinyakaongañá xínkjín nga kʼoendajin je kjoa xi sʼe̱le.

4, 5. 1) Jmé xi kjinele je xi xʼin. 2) Jósʼin tjínnele sikjaʼaitsjen je chjoón tʼatsʼe jme xi kjinele. 3) Jókisʼin jngo tichjaa kao xʼinle.

⁴ Je Pablo kui kinchja̱ni tʼatsʼe xá xi kjinele je chjoón kao je xʼin. I kitso: “Je yánchjín nangi katabatiole xʼinle, josʼin nga nangi tjíole Nainá. Je xʼinbe ngʼajko̱le chjoónle, josʼin nga Cristo ngʼajko̱le naxinandále” (Efesios 5:22, 23). Je xi chjotale Cristo ma tjínnele koako kjoatsjoacha joni Jesús, xi jko̱ tíjnale je naxinandále Niná. Je xi chjoón alikui kʼoasʼin síkjaʼaitsjen nga ngisa nangi tíjna tikʼoajinni je xʼinle. Je Jeobá kʼoakitso nga nʼio chjíle jmeni xi sʼín je chjoón: I kitso: “Alikui ndatjín nga tosi tonda toje kʼoéjna je xʼin. Sinda jngole je xi koasenkao, je xi koa̱njngotʼanile” (Génesis 2:18). Je chjoón basenkao je xʼinle nga nda basentítjonle je familiale. Kʼianga bakó kjoatsjoacha je xi xʼin, alijme xi síkjáojin je chjoónle. Kʼoati ngisa choa ñʼai male nga bakóle kjoaxkóntokon kʼoa nga tsjoánganʼiole nga jme xi kjoejin.

⁵ Jngo tichjaa xi Cathy ʼmi itso: “Kʼianga sʼa toʼan tijna, toʼan bʼa yaona kʼoa toʼan sikuinda yaona. Tonga kʼianga jechixan, likui tikʼoakisʼinña nga̱ jé xʼinna jekisʼian kuenta”. Je Cathy kʼoatso nga sakʼoa ñʼai male, tonga nga kʼoasʼín josʼin mele Jeobá kui xi tjíobinyakao nga ngisa kjimachriantʼale xínkjín.^[1] Je xʼinle Cathy, Fred ʼmi kʼoa itso: “Ñʼai mana nga kjoejian jmeni xi sʼian, kʼoa nga jejao mañá ngisaa ñʼai maná. Tonga sa choa sa choa ñʼai mana nga̱ jé Jeobá sijéle nganʼio kʼoa nrʼoele jme xi tso je chjoónna. Binyakaongañáníjin xíngijin”.

6. Jósʼin basenkao je kjoatsjoacha xi jechixan kʼianga kjoa sʼele.

⁶ Jméni xi koasenkao xi jechixan nga nʼio sʼe̱jna kjoabixanle. Je Biblia itso: “Tosi tonda katakano xíngio kʼoa kao kjoatsjoa tichatʼalao xíngio”. Nga chjotajée ma, je chjoón kao je xʼin sakʼoajin sa̱téngi kʼoa kjoa sʼe̱le. Kʼianga kʼoakoa̱n, tjínnele nga kuenta sʼin jméni xokasíkao nga kjoa kasʼenile ánni nga tsín tikʼoasʼinni nga koa̱nskanni. Kʼoati machjén nga sichatʼale xínkjín kʼoa nga tsjoake koa̱n xínkjín tojo tso ya Biblia, nga̱ je kjoatsjoacha kui xi jtín sʼin síkatíoná (Colosenses 3:13, 14, TNM). Je xi jechixan, tjínnele tsejta koa̱n, ndʼé koa̱n kʼoa tsínkui kʼoejinkon xi chʼaotjín (1 Corintios 13:4, 5). Tjínnele nga kjitʼanangi kʼoendajin je kjoa xi sʼe̱le nga tikuini nichxin (Efesios 4:26, 27). Kjoanangitokon machjén kʼoa kjoanʼiojin machjén nga “tichatʼanái” kuitsole xínkjín. Kʼianga síjéle kjoanichatʼa xínkjín xi jechixan, kui xi binyakao nga bʼéndajin je kjoa xi sʼele kʼoa ngisaa machriantʼale xínkjín.

NʼIO CHJÍLE NGA TJAO KATAMALE XÍNKJÍN XI JECHIXAN

7, 8. 1) Jmé kjoafaʼaitsjen tsjoá je Biblia tʼatsʼe nga fayokao xínkjín xi jechixan. 2) Ánni nga tjínnenile tjao skoe̱ xínkjín xi jechixan.

⁷ Je Biblia tsjoále kjoafaʼaitsjen xi jechixan xi kuinyakao nga kʼoasʼin skoe̱kon nga fayokao xínkjín josʼin tjínnele (tʼexkiai 1 Corintios 7:3-5).c Nʼio chjíle nga kuenta sʼin jmeni xi machjénle kʼoa jotjío kon nga jngó jngó. Tsa je xi xʼin tsín tjao be je chjoónle, ñʼaijin koanle je chjoónle nga tsjoa sʼe̱ kon nga fayokao xínkjín. Je Biblia kʼoatso nga je xi xʼin ma tjínnele koa̱nchoyale jotjín kon je chjoónle (1 Pedro 3:7). Tsín tjínnele kʼoenele je chjoónle kʼianga kjoáyokao xínkjín. Nga jao xi kuitsoni kʼiani koa̱nmele kjoáyokao xínkjín. Je xi xʼin ngisaa choa ñʼai male nga bajnakao je chjoónle. Tonga tjínnele kʼia kjoáyokao xínkjín kʼianga kʼoatjío kon nga jao.

⁸ Je Biblia kʼoatso nga katabakóle kjoatsjoacha xínkjín xi jechixan. Ninga tsínkjoan kʼoatso kixi ya Biblia josʼin koakole kjoatsjoacha xínkjín, kʼoatso nga tjínnele kʼoasʼin (El Cantar de los Cantares 1:2; 2:6). Tojosʼin tiʼyaa, je chjotale Cristo xi jechixan tjínnele tjao koa̱nle xínkjín.

9. Ánni nga nʼio chʼaotjínsíni kʼiatsa je si̱metokoán xi tsín chjoónná kʼoa xi tsín xʼinná mani.

⁹ Tjínkʼa xi tsín tinda tjíokaoni xínkjín xi totʼatsʼe nga kui jekoanngatʼale pornografía kʼoa tsa kjaʼaí xi símekon xi tsín chjoónle kʼoa tsa xi tsín xʼinle mani. Kjoa jebi nʼio chʼaotjín kʼoa machjén nga kuixkantʼakoaa. Tsa nʼio tsjoachaa je Jeobá kao xíngiaa, tsínjin kʼoaiʼndee nga jme xi sikitsónjin je kjoabixanná. Jngo xi jechixan, alikui koa̱n nga kjaʼaí chjota si sikao. Tsa kʼoasʼin tsínjin tíbakó kjoatsjoacha. Tsa si̱kjaʼaitsjeen nga be Niná ngayeje jmeni xi nikjaʼaitsjeen kʼoa jmeni xi nʼia, kui xi koasenkaoná nga kui kʼoasʼiaan josʼin mele kʼoa nga kixi koa̱nlee je chjoónná kʼoa tsa xʼinná (tʼexkiai Mateo 5:27, 28;d Hebreos 4:13e).

KʼIANGA KJOA SʼE

10, 11. 1) Jótjín chjota xi jechixan tsjionni xínkjín. 2) Jótso je Biblia xi tʼatsʼe nga binyaxinle xínkjín xi jechixan. 3) Jmé xi kuinyakao xi jechixan nga tsín tokjoaská koa̱nle nga kuinyaxinle xínkjín.

¹⁰ Tjínkʼa chjota xi binyatʼaxinle xínkjín kʼoa xi tsjion xínkjín kʼianga tsín male josʼin bʼéndajin je kjoa xi sʼele. Tjín naxinandá jñani tsʼato basen chjota xi bixan xi tsjionni xínkjín. Xi je testigole Jeobá nʼio tosakʼoa kʼoama. Tonga sa nkjín sa nkjín mani xi kʼoati tse kjoa tjíosʼele.

¹¹ Je Biblia itso: “Je chjoón ali basentʼaxinjinle xʼinle. Tsa koase̱ntʼaxin, kʼoasʼin katʼejna nga tsín tsa kuixan, axo katafáondani ngijngokʼa kao xʼinle. Kʼoa je xi xʼin ali tsjiónjin je chjoónle” (1 Corintios 7:10, 11). Tsakui nichxin tjínkʼa xi kʼoakuitso nga tosa kuinyaxinle xínkjín nga nʼio tse kjoa tjínle. Tonga je Jesús kʼoakitso nga tsín tokjoaská tjenkao nga binyaxinle xínkjín xi jechixan kʼoa ijngokʼa kisikʼaxki̱ jme xi kitso Niná tʼatsʼe kjoabixan, xijekoan i kitso: “Je xi Niná tsakʼékjao, ali bʼasjexinjin chjota” (Mateo 19:3-6; Génesis 2:24). Jebi kui xi bakó nga kui xi mele Jeobá nga tondiaa katabatiokao xínkjín xi jechixan (1 Corintios 7:39). Tsa si̱kjaʼaitsjeen nga kuenta sijéná Jeobá tʼatsʼe jmeni xi nʼia, kui xi koasenkaoná nga kjitʼanangi kʼoéndajiaan je kjoa xi tjínná tiʼani nga kjesa matsejin kjoa.

12. Ánni nga sakʼoa kʼoasʼin síkjaʼaitsjensíni xi jechixan nga ngisa nda nga kuinyatʼaxinle xínkjín.

¹² Ánni nga nʼio tse kjoa tjínkʼasínile xi jechixan. Tjínkʼa xi tsínni tsjoa tjíokon nga̱ tsínni kʼoasʼin tjío josʼin kisikjaʼaitsjen. Kuinga kjoa sʼenile nga kjaʼaí kjaʼaísʼin koanjchínga kʼoa kjaʼaí kjaʼaí sʼín nga jngó jngó. Kʼoa sakʼoaa kjoa sʼele tʼatsʼe xínkjín, tʼatsʼe tao̱n kʼoa tsakuije̱ josʼin sijchá ʼndíxtile. Tonga me ngatsʼi je chjotale Cristo xi kjimale tjíobʼéndajin je kjoa xi tjíosʼele nga̱ tsjoáʼndee nga je Niná bándiaale.

13. Kʼiáni nga koa̱n kuinyaxinle xínkjín xi jechixan.

¹³ Sakʼoaa tjínnele binyaxinle xínkjín xi jekabixan. Tjínkʼa xi kuinga kʼoasʼínni tsa je xi xʼin ñaki kaile nga koa̱njngíʼa je familiale. Tsa nʼio totaon tíʼya je xi chjotale Cristo ma kʼoa tsa kjoanʼio tísʼenele nga katafaʼatone je kjoatéxomale Niná. Kʼianga kjoa tjínle je chjotale Cristo tjínnele nga sijéle nganʼio je xi chjotajchínga sʼin tjío. Je ndsʼee jebi nʼio tse kjoafaʼaitsjen tjínle kʼoa koaan kuinyakao xi jechixan nga koaitjenngi je kjoafaʼaitsjen xi tsjoá Niná. Tsa je xi jechixan sijéle Jeobá je nganʼiotsjele, kui xi kuinyakao nga koaitjenngi kjoafaʼaitsjen xi tsjoá Biblia kʼoa nga kʼoakoa̱nkjoan josʼin mele Niná (Gálatas 5:22, 23).^[2]

14. Jméni xi tsole Biblia je chjotale Cristo xi tsín testigole Jeobá ma je xʼinle kʼoa tsa chjoónle.

¹⁴ Je Biblia kʼoatso anni nga tsín katatsjionni xínkjín je chjotale Cristo ninga tsín testigole Jeobá ma xʼinle kʼoa tsa chjoónle (tʼexkiai 1 Corintios 7:12-14).f Je xi tsín testigole Jeobá ma ndasʼin tíjna ngixko̱n Niná nga̱ je tíjnakao jngo xi Jeobá síxále. Kʼoa je xtile kʼoati ndasʼin tjío ngixko̱n Niná. Je Pablo i kitsole je chjotale Cristo: “Jósʼin ʼyani ji chjoón tsa tsín kʼoasʼin chʼa̱sjentjai xʼinli, axo jósʼin ʼyani ji xʼin tsa tsín kʼoasʼin chʼa̱sjentjai chjoónli” (1 Corintios 7:16). Nʼio nkjín choa̱ tjín tʼatsʼe tichjaa kao ndsʼee xi chan kʼoati testigole Jeobá koan nga koanskanni je chjoónle kʼoa tsa xʼinle.

15, 16. 1) Jmé kjoafaʼaitsjen tsjoále Biblia je tichjaa xi tsín Jeobá síxále je xʼinle. 2) Jósʼin je chjotale Cristo tsa je chjoónle kʼoa tsa je xʼinle xi koase̱ntʼaxin.

¹⁵ Je pastro Pedro i kitsole je yánchjín xi chjotale Cristo ma: “Kʼoatisʼinni jon xi yánchjón, nangi tiyolao xʼinno, jméni nga je xʼinno xi tsín makjainle je énle Niná kuinje̱tʼasínile Cristo, ali totʼatsʼe énle yánchjínlejin, tokui kjoa nga nda fikao yaole je yánchjínle. Nga̱ kotsenno nga tsje tiyokao yaono, nga bijkonchao”. Kʼoa xijekoan i kitsole: “Tichjáon xi tíjnaʼma jajin ni̱ma̱ná, xi tsín tsa fitson nga tsʼe ni̱ma̱ndʼé xi tojbi. Je xi ngisa tse chjíle ngixko̱n Niná” (1 Pedro 3:1-4). Tsa kʼoasʼin je tichjaa jotso én jebi, tsakui nichxin kuinga koa̱nmenile je xʼinle nga kʼoati testigole Jeobá koa̱n, tikʼoajinni tsa tokui kjoakaoʼndeni je Énle Niná.

¹⁶ Tonga tsa je xʼin xi tsín testigole Jeobá ma mele koase̱nxinle chjoónle, jósʼin je chjoón. Je Biblia itso: “Tsa je xi tsín makjainle koa̱sentʼaxin, katabasentʼaxin. Tsa kʼoasʼin tjín kjoa, je ndsʼee axo tichjaa likui tjínnele nga koatiokao xi tsín makjainle. Tosa Niná kinchjaná nga nyʼán kuiyoaa” (1 Corintios 7:15). Tojo tso testo jebi, je xi chjotale Cristo ma likui koa̱n kʼoenele je xʼinle kʼoa tsa chjoónle nga katabʼejna tsa je xi mele koai. Kʼoa ninga ngisa nyʼán kʼoéjna je tichjaa kʼoa tsa ndsʼee, je Biblia kʼoatsole nga tsín ndaí tíjna nga kuixan ijngokʼa. Tsakui nichxin je xi kafi kjoaʼaí ijngokʼani kʼoa koa̱nmenile ndasʼin koatiokao ijngokʼani xínkjín. Kʼoa tsakui nichxin saʼnda testigole Jeobá koa̱nni nga koa̱nskanni.

JMÉNI XI NGISA CHJÍLE

17. Jméni xi ngisa chjí skoe̱kon je chjotale Cristo xi jechixan.

¹⁷ Nʼio ñʼai kjimachon nichxin xi tiyoaa ndʼaibi, nga̱ toje tífikjetʼa nichxin (2 Timoteo 3:1-5). Xi koasenkaoná nga si̱kuindaa yaoná, kuinga miyole Jeobá koaan. Je Pablo kʼoakitso nga jetochoasa nichxin tíjna. Kʼoa xijekoan, i kitso: “Je xi tjínle yánchjín, kʼoasʼin katatio joni je xi tsínle. [...] Kʼoa je xi síchjén xi tsʼe sonʼnde joni je xi tsín tsa nʼio síchjén” (1 Corintios 7:29-31). Je Pablo ali tsakuijin xi kitsonile nga tsín tikuenta katasʼínni je chjoónle kʼoa tsa xʼinle je xi chjotale Cristo ma. Kui xi kitsonile nga je xi ngisa chjíle kuinga je Jeobá si̱xálee nga̱ toje nichxin fetʼa tiyoaa ndʼaibi (Mateo 6:33).

18. Jméni xi sʼin je chjotale Cristo xi jechixan nga ndasʼin koatio.

¹⁸ Nga nʼio ñʼai chon nichxin xi tiyoaa ndʼaibi, nkjín chjota xi jechixan xi tsín nda tjíokao xínkjín. Jméni xi koasenkao kʼianga ndasʼin koatio. Xi koasenkao kuinga tosi tonda sichriantʼale je Jeobá kao naxinandále, nga sitjoson je kjoafaʼaitsjen xi tsjoá je Biblia kʼoa nga tsjoáʼnde nga kui nganʼiotsjele Niná koandiaale. Tsa kʼoasʼin, tjíobexkón “je xi Niná tsakʼékjao”, xi tsonile je kjoabixanle (Marcos 10:9).