Koakoá nga tjínná kjoamakjain kʼoa kui chjoéjiaan xi ndatjín

1. Jméni xokisikao je Caín nga tsín ndatjín xi kiskoejinni, kʼoa jósʼin kichomani.

JE Caín nʼio tjínle kjoandosin jmeni xi tjínnele kiskoejin. Kui tjínnele kiskoejin jmeni xi sʼin. Tsa kʼoechjoale yaole nga tsín ndatjín jmeni xi tísíkjaʼaitsjen, ndasʼin kuichomani, tonga tsakui sikinjele je xi chʼaotjín, chʼaosʼin kuichomani. Je Biblia kʼoatso nga tsín ndatjín jmeni xi kiskoejin je Caín. Kisikʼieen je ndsʼe̱ kʼoa tsín tindasʼin tsakʼejnani kao Jeobá (Génesis 4:3-16).

2. Ánni nga nʼio chjínile nga nda chjoéjiaan jmeni xi sʼiaan.

² Ngatsʼiñá nga tjínnele chjoejiaan jmeni xi nʼia. Tjín jmeni xi nʼio tjínle kjoandosin chjoejiaan kʼoa tjín jmeni xi mai. Tojmeni xi chjoejiaan sakʼoaa ndasʼin bichómani kʼoa sakʼoa mai. Tsa nda chjoéjiaan jmeni xi sʼiaan, tsakui nichxin tsín nʼio nkjín kjoa sʼe̱ná kʼoa nyʼán kuiyoaa. Tonga tsa tsín nda chjoéjiaan jmeni xi sʼiaan, tsejin kjoa kuiyojiaan kʼoa tsínjin nda sa̱tío tokoán (Proverbios 14:8).

3. 1) Jméni xi tjínnele sʼiaan nga nda chjoéjiaan jmeni xi sʼiaan. 2) Jméni xi chótʼayajiaan i̱ kjoaʼmiya jebi.

³ Jméni xi koasenkaoná nga nda chjoéjiaan jmeni xi sʼiaan. Tjínnele sʼe̱ná kjoamakjain nga je Niná koasenkaoná. Tjínnele ñaki kʼoakʼoé tokoán nga mele koasenkaoná kʼoa nga tsjoáná je kjoachjine xi machjénná. Xi kʼoati koasenkaoná kuinga sʼe̱ná kjoamakjain tʼatsʼe jmeni xi tso je Énle Niná kʼoa nga kjuintjenngiaa je kjoafaʼaitsjen xi tsjoá (tʼexkiai Santiago 1:5-8).a Tsa ngisasa si̱miyoaa je Jeobá kʼoa tsa tsjoacha koaan je Énle, ngisajin si̱nʼiotʼaa nga ngisa be jmeni xi koasenkaoná. Kʼoa kui xi koasenkaoná nga títjonkjoanla kui kjoásjee jotso je Énle Niná nga kjesa jme xi nʼiajián. Jméni xi koasenkaoná nga koa̱nná nga kui xi ndatjín chjoéjiaan. Kʼoa tsa jekichjoejiaan jmeni xi sʼiaan, a tsí tikoa̱n si̱kʼantjaiyañá. Kui jchaa i̱ kjoaʼmiya jebi.

NGATSʼIÑÁ NGA TJÍNNELE CHJOEJIAAN JMENI XI NʼIA

4. Jméni xi kiskoejin je Adán, kʼoa jósʼin kichomani jmeni xi kisʼin.

⁴ Saʼnda nichxinle Adán, je chjota tjíokjoejin jmeni xi tjíosʼín xi nʼio tjínle kjoandosin. Tobʼelañá, je Adán kui tjínnele kiskoejin a jé Niná sitjosonle axo jé Eva sitjosonle, xi chjoónle koanni. Je Adán jé Eva tsakʼaʼénle kʼoa tsín nda kichomani nga kʼoakisʼin. Je Jeobá tsakʼaonsjejin je Adán ya ʼndenaxóle Edén kʼoa kʼieen nga koanskanni. Saʼnda nichxin xi tiyoaa ndʼaibi tíbʼakaotʼaná nga tsín ndatjín jmeni xi kiskoejin je Adán.

5. Ánni nga tjínnenile si̱chjén je kjoafaʼaitsjenná nga ñá chjoéjiaan jmeni xi sʼiaan.

⁵ Tjínkʼa chjota xi kʼoasʼin síkjaʼaitsjen nga ngisa choa ñʼai koa̱nle tsa tsín je skoéjin jmeni xi sʼin. Kʼoa ñá, a kʼoatisʼin nikjaʼaitsjeen. Tonga je Jeobá alikui kʼoasʼin tsakʼéndaná jokjoan je robot, nga tsín male síkjaʼaitsjen kʼoa nga tsín male je kjoejin jmeni xi sʼín. Je Jeobá kui je Énle tsjoáná nga koa̱nná nda chjoéjiaan jmeni xi sʼiaan. Je Niná kui xi mele nga si̱chjén je kjoafaʼaitsjenná nga ñá chjoéjiaan jmeni xi sʼiaan, kʼoa jebi ali tsa tokjoaskájin tjenkao.

6, 7. 1) Jméni xi tjínnele kiskoejin je chjota israelita (chótsenlai sén xi fitsʼiani kjoaʼmiya jebi). 2) Ánni nga nʼio ñʼai koannile nga nda kiskoejin jmeni xi kisʼin.

⁶ Kʼianga jeya tjío je chjota israelita ya ʼnde jñani kitsjoale Niná, tjínnele kiskoejin tsa je Jeobá sixále kʼoa tsa kjaʼaí niná sixále (tʼexkiai Josué 24:15).b Tsakui nichxin likui nʼio kitsjoale kjoandosin xi tʼatsʼe jebi. Tonga nʼio chjíle nga kiskoejin ʼyani xi sixále, nga̱ kui xi kuitsoni tsa koatiokon kʼoa tsa mai. Kʼoa kʼianga tsakatio xi jues koan ya naxinandá Israel, tojo tsínkui xi ndatjín kiskoejin je chjota israelita. Alikui tije Jeobá tsakʼétsʼoanile, tosaa to niná ndiso tsakʼétsʼoale (Jueces 2:3, 11-23). Nga koanskanni, nichxin nga tsakʼejna je profeta Elías, je chjota israelita tjínnele kiskoejin tsa je Jeobá sixále kʼoa tsa je niná ndiso xi Baal ʼmi sixále (1 Reyes 18:21). Tsakui nichxin kʼoakuixoán nga choa ñʼai koanle kiskoejin, nga̱ ʼyañá nga kui xi ngisa nda nga je Jeobá nixálee. Jngo chjota xi chjine alikuijin je sixále jngo niná xi tsín tíjnakon. Tonga je chjota israelita ñʼai koanle nga kiskoejin ʼyani xi sixále. Je Biblia kʼoatso nga jao kisatio kjoafaʼaitsjenle. Je Elías chjine koan nga kʼoakitsole nga je Jeobá katabexkón, je xi ñaki Niná kjoaixi.

⁷ Ánni nga ñʼai koannile je chjota israelita nga nda kiskoejin jmeni xi sʼin. Xi títjon, tsín kisʼele kjoamakjain xi tʼatsʼe Jeobá kʼoa tsín kinrʼoéle. Alikui je kisinʼiotʼa kʼoa alikui kisikʼaya nichxin nga tsabe xi tʼatsʼe Jeobá. Tsa kʼoalani kisʼin, koanjínle nga kui xi ndatjín kiskoejin (Salmo 25:12). Xi majaoni, alikui koanle nga kui xi ndatjín kiskoejin nga̱ kui kini josʼin kisikjaʼaitsjen je chjota xi kjaʼaí naxinandále. Saʼnda kitsjoaʼnde nga kjaʼaí chjota kʼoakitsole jmeni xi sʼin. Je chjota israelita jé kiskenngile chjota xi xin tsʼe kʼoa niná ndiso tsakʼétsʼoale. Je Jeobá nʼio tongini tsakájinkon nga kʼoakoa̱n tsa tsín koa̱nle nda skoéjin jmeni xi sʼin (Éxodo 23:2).

A TJÍNNELE NGA KJAʼAÍ XI KʼOAKUITSONÁ JMENI XI SʼIAAN

8. Jméni xi nʼio chjíle tsoyaná jokisʼin je chjota israelita.

⁸ Jmeni xi kisʼin je chjota israelita kui tsoyaná nga machjén nga kui Énle Niná katabándiaaná kʼianga koa̱nná nda chjoéjiaan jmeni xi sʼiaan. Ya Gálatas 6:5 kʼoatso kʼianga jngó jngóñá nga kjinená jmeni xi chjoejiaan. Kuinga tsín tjínnenile kʼoaiʼndee nga kjaʼaí xi kʼoakuitsoniná jmeni xi sʼiaan. Tjínnele jchaa jméni xi ndasʼin tíjna ngixko̱n Niná kʼoa kui kʼoasʼiaan.

9. Ánni nga tsín ndatjínni nga kjaʼaí xi kʼoakuitsoná jmeni xi sʼiaan.

⁹ Ánni nga bʼaiʼnde sakʼoasíñá nga kjaʼaí xi kʼoatsoná jmeni xi nʼia. Kui xosíkaoná jmeni xi tsoná (Proverbios 1:10, 15). Alikui ndatjín nga kjaʼaí xi kʼoakuitsoná jmeni xi sʼiaan. Kʼianga jekao kui Biblia kanichjineñá je kjoafaʼaitsjenná, tjínnele nga kui kjuintjenngiaa josʼin koandiaaná. Tonga tsa kʼoaiʼndee nga kjaʼaí xi kʼoakuitsoná jmeni xi sʼiaan, jéjinni tjíobándiaaná kʼoa chʼaojinsʼin kuichomani.

10. Jméni xi tongini tsakájinkon je pastro Pablo je chjotale Cristo xi ya Galacia tsʼe.

¹⁰ Je pastro Pablo tongini tsakájinkon je chjotale Cristo xi ya Galacia tsʼe, nga kʼoakitsole nga tsín katatsjoáʼnde nga kjaʼaí xi kʼoakuitsole jmeni xi sʼin (tʼexkiai Gálatas 4:17).c Tjínkʼa je chjotale Cristo xi ya tsakatio nga je koanmele kʼoakitso josʼin je ndsʼe̱ xi ngikʼa. Kui xi koanmele nga kui katafitjenngi jmeni xi kitso je, ʼndele nga kui kʼoasʼin jmeni xi kitsoya je pastro. Ngʼakon koan kʼoa tsínkui kini nga tiʼndele je ndsʼe̱ nga je skoéjin jmeni xi sʼin.

11. Jósʼin kuinyakoaa je ndsʼee kʼianga jme xi skoéjin.

¹¹ Koaan chjénngilee ngatsʼiaa jokisʼin je pastro Pablo. Tsabee nga tjínle ʼnde je ndsʼe̱ nga je skoéjin jmeni xi sʼin (tʼexkiai 2 Corintios 1:24).d Nichxin xi tiyoaa ndʼaibi, je xi chjotajchínga sʼin tjío tjínnele kui choa̱le je pastro Pablo skénngi kʼianga tsjoále kjoafaʼaitsjen jngo ndsʼee xi tjín xi mele skoéjin. Kao kjoatsjoa tsjoále kjoafaʼaitsjen xi ya yʼangini je Énle Niná. Tonga alikui je kʼoakuitsole jmeni xi sʼin, nga̱ be nga je ndsʼee kjinele tsa nda kuichotsjoá kʼoa tsa mai jmeni xi skoéjin. Nʼio chjíle jmeni xi tsoyaná jebi. Kui tsoyaná nga koa̱n kʼuínyalee jngo ndsʼee jmeni xi tso je Biblia tʼatsʼe jmeni xi tífaʼatojin. Tonga jé kjinele skoéjin jmeni xi sʼin. Kʼianga kʼoasʼín ndasʼin bichómani. Alikʼia kʼoasʼin si̱kjaʼaitsjeen nga tjínná ʼnde kʼianga ñá kʼoakuixoán jmeni xi tjínnele sʼin je ndsʼee.

ALIKUI TOKUI KJUINÑÁ JOSʼE TOKOÁN

12, 13. Ánni nga xkón tíjnasíni tsa kʼia si̱kjaʼaitsjeen jmeni xi sʼiaan kʼianga jtiná kʼoa tsa tsín sin tjínná.

¹² Nichxin xi tiyoaa ndʼaibi, nʼio nkjín chjota xi tokui fini je ni̱ma̱le kʼianga kui kjoejin jmeni xi sʼin (chótsenlai je rekuadro “Jósʼin tsoyanile”). Tonga xkón tíjna kʼiatsa tokui ni̱ma̱ná kjuinñá. Kʼianga kui chjoéjiaan jmeni xi sʼiaan, kʼoatsoná je Biblia nga tsín tokui kjuinñá jotjín ni̱ma̱ná kʼoa jotjín tokoán, nga̱ chjotajée maa (Proverbios 28:26). Alikui je ni̱ma̱ná nʼio si̱nʼiotʼaa, nga̱ “je ni̱ma̱ná ngisa nʼio bʼanacha tikʼoajinni tojmeni, kʼoa matso maskále” (Jeremías 17:9). Ya Biblia nʼio nkjín chjota síkʼaxki̱ xi chʼaosʼin kichomani jmeni xi kisʼin nga tokui ni̱ma̱le kisinʼiotʼa (1 Reyes 11:9; Jeremías 3:17; 13:10). Jméni xi koa̱n kʼiatsa tokui kjuinñá je ni̱ma̱ná kʼianga kui chjoéjiaan jmeni xi sʼiaan.

¹³ Je Jeobá kʼoatsoná nga tsjoacha katamaa kao ngayeje ni̱ma̱ná kʼoa nga kʼoatisʼin tsjoacha katamaa je xíngiaa josʼin tsjoachaa yaoná (Mateo 22:37-39). Tonga tjínnele nda chósonnilee jmeni xi sʼiaan. Tojo tso je testo xi faʼaitʼa ya párrafo xi jekabitjakoaa, xkón tíjna kʼiatsa tokui kjuinñá je ni̱ma̱ná josʼin si̱kjaʼaitsjeen kʼoa jmeni xi sʼiaan. Tobʼelañá, alikuijin ndasʼin kuichomani tsa kʼia si̱kjaʼaitsjeen jmeni xi sʼiaan kʼianga jtiná (Proverbios 14:17; 29:22). Kʼoajinti likui ndasʼin kuichomani tsa kʼia si̱kjaʼaitsjeen jmeni xi sʼiaan kʼianga likui sin tjínná (Números 32:6-12; Proverbios 24:10). Tjínnele kʼoaiʼndee nga kui kjoatéxomale Niná koandiaale je kjoafaʼaitsjenná (Romanos 7:25). Kʼianga nʼio tjínle kjoandosin jmeni xi sʼiaan, alikui tokui kjuinñá jotjín tokoán.

KʼIÁNI SI̱KʼANTJAIYAA JMENI XI BʼENDAJIAAN

14. Ánni kʼoabixónsíñá nga ndatjín nga nikʼantjaiya sakʼoaa jmeni xi bʼendajiaan.

¹⁴ Ngatsʼiñá nga tjínnele nda chjoéjiaan jmeni sʼiaan. Ninga kʼoalani, jngo chjota xi chjine be nga sakʼoa sikjaʼaitsjenjin ijngokʼa jmeni xi jekabʼéndajin kʼoa skósonnile tsa tjínnele sikʼantjaiya. Je Jeobá nʼio nda choa̱ bʼéjnaná xi tʼatsʼe jebi. Kataʼyala jokisikao je chjota xi Nínive tsʼe kʼianga nichxinle Jonás. Je Biblia itso: “Kʼianga tsabe je Niná xi kixi jmeni xi kisʼin chjota jebi, nga tsín tikʼoakisʼinni jmeni xi chʼao tjíomasʼín, kʼoakoannile tʼatsʼe je én xi kitso nga kjoañʼai tsjoále; kʼoa tsínni kʼoakisʼin” (Jonás 3:10). Je Jeobá likuini kʼoakisʼin jmeni xi kitso nga títjon kʼianga tsabe nga je chjota xi Nínive tsʼe likui tikui xi chʼaotjín kʼoakisʼinni. Nga kʼoakisʼin je Jeobá, tsakakó nga kosonnile jme xi sʼín, nga tjínle kjoanangitokon kao kjoamatokon. Je Jeobá alikui mangóson kao chjotasonʼnde, nga̱ je Jeobá nʼio nda síkjaʼaitsjen jmeni xi sʼín, ningalani kʼia nga jtile.

15. Kʼiáni tjínnele nga si̱kʼantjaiyaa jmeni xi jetjínndajinná tsakai.

¹⁵ Sakʼoajin tjínnele si̱kjaʼaitsjen ijngokʼá tsa kixi tíjna jmeni xi kabʼendajiaan. Jolani kʼianga bʼantjaiyajin jotjínni je kjoa. Si̱kjaʼaitsjeen nga sakʼoa kisikʼantjaiya je Jeobá jmeni xi kisʼin (1 Reyes 21:20, 21, 27-29; 2 Reyes 20:1-5). Tsakui nichxin kʼoati tjínnele si̱kʼantjaiyaa jmeni xi jetjíndajinná tsakai kʼianga sʼejinnda ijngokʼaná jokjoantjínni kjoa. Kataʼyala jokisʼin je rey David. Kʼianga tsakʼéndajin jmeni xi sʼin tʼatsʼe jngo tindaile Saúl, kui tsakʼangini jmeni xi kisʼejinle nga títjon, tonga kʼianga kisʼejinndale jokjoantjínni kjoa, kisikʼantjaiyaa jmeni xi jetsakʼéndajin tsakai (2 Samuel 19:24-29). Sakʼoajin kʼoati tjínnele kʼoasʼiaan tsanda ñá.

16. 1) Jmé kjoafaʼaitsjen xi koasenkaoná kʼianga kui chjoéjiaan jmeni xi sʼiaan. 2) Ánni nga tjínnenile si̱kjaʼaitsjenjin ijngokʼá jmeni xi jetsakʼendajiaan, kʼoa jméni xi tjínnele sʼiaan.

¹⁶ Je Biblia kʼoatso nga títjonkjoanla nda si̱kjaʼaitsjeen jósʼiaan tsakui chjoéjiaan jmeni xi nʼio tjínle kjoandosin, nga tsín xitso xiská kʼoasʼiaan (Proverbios 21:5). Tjínnele chʼa̱sjeʼaa nichxin nga nda si̱kjaʼaitsjenjiaan. Tsa kʼoasʼiaan ndasʼin kuichotsjoá (1 Tesalonicenses 5:21). Tobʼelañá, je xi ngʼajko̱ tjíole ya yaniʼya, tjínnele sikʼayale nichxin nga koasjai jotso je Biblia kao xo̱n xi Énle Niná yʼangini kʼianga kjesa kjoejinjin jmeni xi sʼin. Kʼoati ndatjín nga kjuinrʼoéle jotso xi ngikʼa ya yaniʼya. Si̱kjaʼaitsjeen nga je Niná kʼoakitsole je Abrahán nga katanrʼoéle jmeni xi títsole je chjoónle (Génesis 21:9-12). Je xi chjotajchínga sʼin tjío tjínnele kʼoasjeʼa nichxin nga skótʼaya. Kʼiatsa jme xi ngisa nda koa̱njinle kʼoa tsa tjínnele sikʼantjaiyajin jmeni xi jetsakʼéndajin, tjínnele kʼoasʼin ninga tjíokʼa xi tsín sa̱sénle. Je xi chjotajchínga sʼin tjío, xi nda kosonnile jmeni xi sʼín kʼoa xi nangitokon ma, tjínnele sikʼantjaiya josʼin síkjaʼaitsjen kʼoa jmeni xi jetsakʼéndajin kʼiatsa machjén nga sikʼantjaiya. Ndatjín nga chjénngiaa ngatsʼiaa je choa̱le. Tsa kʼoasʼiaan, nyʼán sʼin kuiyoaa ya jinjtín kʼoa jtín sʼin kuiyoaa (Hechos 6:1-4).

KʼOASʼIAAN JMENI XI JETJÍNNDAJINNÁ

17. Jméni xi koasenkaoná nga nda chjoéjiaan jmeni xi sʼiaan.

¹⁷ Jmeni xi nʼia tjínkʼa xi nʼio tjínle kjoandosin. Tobʼelañá, tsa kuixaan kʼoa ʼyá xi kuixankoaa. Kʼoati nʼio tjínle kjoandosin nga nda chósonnilee kʼiáni nga ñaki to xále Niná sʼiaan. Nga kjesa kʼoanʼiajián, tjínnele ndakjoanla si̱kjaʼaitsjeen kʼoa si̱jélee je Jeobá nga katabándiaaná. Nichxin tjenkao nga nda chjoéjiaan jmeni xi sʼiaan. Tsa mená nga ndasʼin kuichotsjoá jmeni xi chjoéjiaan, tjínnele si̱nʼiotʼaa je Jeobá, kuinóʼyalee jmeni xi tsoná kʼoa kjuintjenngiaa josʼin koandiaaná (Proverbios 1:5). Jé Jeobá xi ngisasa nda kjoafaʼaitsjen tsjoáná, kʼoa yaa Biblia faʼaitʼa. Kuinga nʼio tjínnile kjoandosin nga chótʼayá kʼoa si̱jélee je Jeobá nga je katabándiaaná. Jé tsjoáná kjoafaʼaitsjen josʼiaan nga ndasʼin kuichotsjoá jmeni xi chjoéjiaan tsakui kuenta sʼiaan josʼin mele. Nga kjesa jme xi nʼiajián, tjínnele chjónangilee yaoná jebi: “Jmeni xi kakjoejian nga kʼoasʼian, a bakó nga tsjoake̱ je Jeobá. A koasenkao je familiana nga tsjoa sa̱tío kon kʼoa nga nyʼán sʼin koatio. Kʼoa a bakó jmeni xi kakjoejian nga tjínna kjoanda kao kjoatsejta”.

18. Ánni nga kui xi menile je Jeobá nga ñá chjoéjiaan jmeni xi sʼiaan.

¹⁸ Je Jeobá alikui kjoanʼio bʼénená nga tsjoacha katamaa kʼoa nga si̱xálee. Tsjoáná kjoandái nga ñá chjoéjiaan tsa mená kʼoasʼiaan. Je Jeobá kʼoatso nga tjínná ʼnde nga ñá chjoéjiaan tsa si̱xálee kʼoa tsa mai (Josué 24:15; Eclesiastés 5:4). Tonga xi mele je Jeobá, kuinga si̱tjosoán jmeni xi jekachjoejiaan nga kʼoasʼiaan kʼoa nga ya chʼa̱ngiñá jmeni xi tso je Énle. Tsa makjainná josʼin bándiaaná je Jeobá kʼoa tsa si̱tjosoán je kjoafaʼaitsjen xi tsjoáná, ndasʼin kuichomani jmeni xi sʼiaan. Xi ijngosani, koakoñá nga ñaki tjínjngo tokoán jmeni xi nʼia, nga tsín jao tjín tokoán (Santiago 1:5-8; 4:8).