Nʼio sjeya kjima jngo tjíjtsa Sonʼnde | Jótso je Biblia

Nga sá julio nó 2022 toxkia nʼio sjeya koan jngo tjíjtsa Sonʼnde:

• “Me 70 naxinandá xi ya nchja̱ni China xi i̱ jao kʼani nga nʼio sjeya kjima xi tokui sá jebi” (25 sá julio nó 2022, servicio de noticias de la CNN).

• “Xi totʼatsʼe nga nʼio sjeya kjima nʼio nkjín naxinandá títingi ya Europa” (17 sá julio nó 2022, The Guardian).

• “Tjínkʼa naxinandá xi nʼio sjeya koan i̱ Estados Unidos nichxin taingo, jolani costa este, ya sur kʼoa kao ya Medio Oeste” (24 sá julio nó 2022, The New York Times).

A chan likui tisʼe̱ni kjoabijnachon i̱ Sonʼnde nga kʼoasikji sjeya kjima. Jótso Biblia tʼatsʼe kjoa jebi.

A tsoya Biblia nga nʼio sjeya kjima nichxin xi tiyoaa ndʼaibi

Jaon, ya Biblia tsoya nga toxá sjeya koa̱nni nichxin xi tiyoaa. Tobʼelañá, je Jesús i kitso: “sʼe̱ kjoaxkón” (Lucas 21:11). Nʼio nkjín chjota xi makjáojinle nga sa sjeya sa sjeya kjima kʼoa tjíokʼa xi kʼoasʼin síkjaʼaitsjen nga kuicho nichxin nga likui tisʼe̱ni kjoabijnachon i̱ Sonʼnde.

A kuicho nichxin nga tsín tisʼe̱ni kjoabijnachon i̱ Sonʼnde

Mai, je Niná kui xá kisindani je Sonʼnde nga chjota koatioson ngantsjai nichxin (Salmo 115:16; Eclesiastés 1:4). Je Niná alikui tsjoáʼnde nga je chjota sikitsón Sonʼnde. Jmeni xi sʼin je Niná kuinga kjoaʼaxin je xi “sikitsón sonʼnde” (Apocalipsis 11:18).

Jao koya tjínni jmeni xi sʼin je Niná xi kao Sonʼnde:

• “Ya ʼndekixí kao jñani tokijna tsjotsjo sʼee kjoatsjoa, kʼoa ya ʼndekixí jñani son chon tsjoa koa̱nle kʼoa xóngaa joma je azafrán” (Isaías 35:1). Je Niná alikui tsjoáʼnde nga to ʼndekixí katama je Sonʼnde, tosaa sindachon.

• “Tinikuindaní je nangi kʼianga nʼio katasʼe tsojmi kʼoa nga nda katama tsojmintje” (Salmo 65:9). Je Niná ʼndenaxó sikao je Sonʼnde.

Tsa mesali jchai jotso je Biblia nga kʼoasʼin nʼio sjeya kjima, tʼexkiai jñani tso: “¿Qué dice la Biblia sobre el cambio climático y nuestro futuro?”.

Tsa mesali jchai jotso je Biblia nga koa̱nndachon je Sonʼnde, tʼexkiai jñani tso: “¿Quién salvará el planeta?”.