Ánni nga tsín bʼasjesíni Navidad je testigole Jeobá
Jméni xi tso chjota tonga xi tsín kʼoatjín
Jotso chjota: Kuinga tsín bʼasjesíni Navidad je testigole Jeobá nga̱ tsín makjainle xi tʼatsʼe Jesús.
Jotjínni: Chjotale Cristoníjin kʼoa makjainnajin nga totʼatsʼe Jesús nga koa̱n kuitjo̱ntjé (Hechos 4:12).
Jotso chjota: Síxkoa̱yaa je xi tjío yaniʼya nga kʼoasʼin bakóyale chjota nga tsín Navidad katabʼasje.
Jotjínni: Nʼio mandosinnajin nga nda katabatiokao xínkjín je xi tjío yaniʼya, kuinga bakoyanilaijin jotso Biblia nga nda katabatiokao xínkjín.
Jotso chjota: A likui bʼétsaojin nga kui nichxin, alikui jme xi tsjoákjoatjaole xínkjín, likui bakó kjoanyʼán kʼoa alikui batiojtín.
Jotjínni: Bʼenelaijin yaonajin nga nyʼán biyokoaijin ngatsʼi chjota. Kʼoa ali tsa totsen tjínjin nichxin nga jme xi bʼaikjoatjaolaijin xíngijin, kʼoanʼiaijin tojme nichxinni (Proverbios 11:25; Romanos 12:18). Tobʼelañá, alikui tao̱n nijélaijin chjota kʼianga biyojtínjin, kʼoa alikui machjínajin nga ʼmiyasuinjin, kui mangíntjenngijin jme xi kitso je Jesús: “Tokjoatjao kitsʼaino, tokjoatjao tʼainio” (Mateo 10:8). Xi ijngosani, bakoyalaijin chjota nga tojé Chjotaxále Niná xi koa̱nle kjoaʼaíkao kjoanyʼán i̱ Sonʼnde (Mateo 10:7).
Ánni nga tsín bʼasjesíni Navidad je testigole Jeobá
Je Jesús kʼoakitso nga katafaʼaitsjenya je kjoabiyale, alikui kʼoakitso tsa kui si̱kjaʼaitsjenyá kʼianga kitsin (Lucas 22:19, 20).
Je pastro kʼoa kao chjotale Cristo xi títjon tsakatio alikui tsakʼasje je Navidad. Je Diccionario del cristianismo kʼoatso nga je sʼuí jebi kʼiaa “kisʼejnatítjon ya naxinandá Roma nga nó 330”, kʼoa kʼiaa kʼoakoan nga jetsʼato jao siento nó nga kʼien je pastro xi jetʼani.
Alikui ʼyale tsa kʼianga 25 sá diciembre kitsin je Jesús, nga̱ je Biblia alikui kʼoatso kʼiani nga kitsin.
Majinnajin nga tsín sasénle Niná je Navidad, nga̱ yaa jaʼaini je costumbre xi kisʼele je chjota xi tsín Niná tsabexkón nichxin kjoatse (2 Corintios 6:17).
Ánni nga tsín kʼoati sʼínni josʼín chjota xi kjaʼaí je testigole Jeobá
Ningalani nʼio nkjín chjota xi be nga tsín ya Biblia faʼaitʼa xi tʼatsʼe Navidad kʼoa nga ya jaʼaini jmeni xi kisʼin chjota xi tsín Niná tsabexkón, tojo bʼasjee sʼuí jebi kʼoa kʼoasʼin síkjaʼaitsjen nga tsín chʼaotjín kʼoa toya kjenngile josʼín xi ngikʼa.
Je Biblia kʼoatsoná nga si̱chjén je kjoafaʼaitsjenná kʼianga chjoéjiaan jmeni xi mená sʼiaan nga jngó jngoá (Romanos 12:1, 2). Kʼoa kʼoati bakóyaná nga chjí jchatokoán je Énle Niná (Juan 4:23, 24). Ali tsa kuijin xi tsonile jebi tsa tsín mandosinnajin josʼin síkjaʼaitsjen chjota xi tʼatsainjin, tonga kʼoati likui koa̱n kuitjátonaijin jotso je kjoatéxomale Niná kʼoa tsa ya chjénngilaijin josʼín xi ngikʼa.
Kjoaixiní nga tsín chʼasjaijin je Navidad, tonga nga jngó jngóní chjota nga skósonnile josʼin xi tʼatsʼe jebi. Kʼoa kuinga tsín ʼya xi bʼechjoanilaijin xi tʼatsʼe sʼuí jebi.