Ánni nga tsín kjoajchán fijinsíni je testigole Jeobá
Nkjín koya tjínni anni nga tsín kjoajchán mangínjinnijin xi testigole Jeobá maijin:
Kuinga nitjosonlaijin Niná. Je Biblia kʼoatso nga je choʼndale Niná “ki̱cha̱ bʼenyi sikʼóya ki̱cha̱ espadale” kʼoa alikui tikjoajchán skótʼayani (Isaías 2:4).
Nitjosonlaijin je Jesús. Je Jesús i kitsole je pastro Pedro: “Cha̱nisʼain ki̱cha̱li yaxjoa̱le, nga̱ ngatsʼi xi skoé ki̱cha̱, ki̱cha̱ kuiyáni” (Mateo 26:52). Kʼianga kʼoakitso je Jesús kui xi kitsonile nga tsín koa̱n ki̱cha̱ kjoajchán skoé je chjotale.
Je Cristo kʼoati kitso nga je chjotale “ali tsʼe sonʼndejin”. Kʼoa kuinga tsín ya tsjonjinsíni yaole je kjoa política (Juan 17:16). Kʼoati likui jotso xi tʼatsʼe chjotakjoajchán kʼoa likui tsa bʼéchjoale je chjota xi mele kjoajchán koaijin.
Tsjoachaníjin xíngijin. Je Jesús i kitsole je chjotale: “Katamatsjoachao xíngio” (Juan 13:34, 35). Je chjotale Cristo tjío jngo tjíjtsa Sonʼnde kʼoa alikʼia nga ki̱cha̱ kjoajchán skómitjenne xínkjín (1 Juan 3:10-12).
Je chjenngilaijin chjotale Cristo xi títjon tsakatio. Jngo libro kijna xi kʼoatso nga “je chjotale Jesús xi títjon tsakatio alikui kjoajchán kijin kʼoa alikui kisitjoson je servicio militar”, nga̱ bení nga “tsín kixi tíjna kao tʼatsʼe kjoatsjoacha xi tsakakóya je Jesús kʼoa kao kjoatéxoma xi kitsjoa nga tsjoacha katamaa je kontraná” (Encyclopedia of Religion and War). Jngo chjota xi kui bʼéyanajmí jmeni xi koan ngasʼa xi Edward Gibbon tsakʼin, xi ya tsʼe Inglaterra, jngo libro tsakʼasje xi Historia de la decadencia y caída del Imperio romano ʼmi, itso: “Alikui kitsjoaʼnde je chjotale Cristo nga sondado kinikao [...] nga̱ tsín kisikatío je xá xi ngisa nʼio tsje tíjna”.
Bʼainganʼiolaijin je naxinandá
Jin xi testigole Jeobá maijin bʼainganʼioníjin ya naxinandánajin kʼoa alikui xkón nikʼéjnaijin. ʼYaxkónníjin je kjoatéxoma xi tjínle je chjotaxá tojo tso Biblia nga tjínnele kʼoasʼiaan.
“Ngatsʼi chjota katasítjosonle chjota xi xá tjínle” (Romanos 13:1).
“Tʼailao tsokʼoa César je xi tsʼe César, kʼoa tʼailao Niná je xi tsʼe Niná” (Mateo 22:21).
Kuinga nitjosonnijin je kjoatéxoma, nga bʼainijin tao̱nbasen kʼoa nga bʼainganʼionijin jmeni xi tso je chjotaxá nga nda katabʼejna je naxinandá.