A tsjoá diezmo je testigole Jeobá

Mai, jin xi testigole Jeobá maijin alikui tsa diezmo bʼaijin. Je tao̱n xi machjén nga tíbitjoson je xále Niná kuiní je tao̱n xi tsjoá chjota jotjín nroajinni ni̱ma̱le. Tonga, jñá jaʼaini nga diezmo tsjoá chjota, kʼoa ánni nga tsín kʼoasʼínni je xi testigole Jeobá ma.

Je kjoatéxoma xi tsakʼaile naxinandá Israel nichxin kjoatse kʼoatsakʼinle nga diezmo katatsjoále je naʼmi, xi tsonile, jngoya xi te ya mani tsojmi xi tjínle. Tonga je Biblia kʼoatsokixi nga je chjotale Cristo likui tjínnele nga kui kjoatéxoma jebi sitjoson. Kuinga nichxin xi tiyoaa ndʼaibi alikui tisʼenenile nga diezmo tsjoá (Hebreos 7:​5, 18; Colosenses 2:​13, 14).

ʼNdele nga diezmo tsjoá je testigole Jeobá kʼoa nga kjoanʼio sʼe̱nele nga jme xi tsjoátʼale Niná, tosa kui choa̱le je chjotale Cristo xi títjon tsakatio fitjenngi. Jao koya josʼin kitsjoanganʼio je chjotale Cristo nichxin kjoatse. Xi títjon, kitsjoanganʼio jotjín kinroajin ni̱ma̱le. Xi majaoni, kitsoyason kʼoa tokjoatjao kitsoyale chjota je énle Niná.

Kʼianga kʼoakisʼin kui kitjenngi jotso je Énle Niná, jñani tso: “Nga jngójngó katatsjoá josʼin kosonnile ni̱ma̱le, ali kao kjoabajin, nikao kjoanʼiojin, nga̱ Niná tsjoake je xi kao kjoatsjoa tsjoá” (2 Corintios 9:7).