JE XI KJONANGI XTI
Ánni nga nʼio chjínile nga bʼetsʼoaa
Tjínkʼa chjota xi kui kiskonangiya ya Estados Unidos tsa bʼétsʼoale Niná ngatsʼi je xti xi ya tsʼe. Xijekoan, kʼoakitso nga me tongatsʼi je xti nga bʼétsʼoa kʼoa nga tobasen mani je xi nyaon nyaon kʼoasʼín. Tsakui nichxin tjínkʼa xi i̱ kuitso: “Nga bʼetsʼoaa, a yaa mangóson joni jngo xki xi nda bʼé tokoán”.
Ánni nga bʼetsʼoañá
Nga bʼetsʼoaa jéni Jeobá xi chjakaonajmiá, je xi kisinda ngayeje xi tjín. Kuentala tʼiain jebi, ninga tsín mangósoán je Niná “tsín tsa kjin tíjnaná nga jngójngoá” (Hechos 17:27). Ya Biblia itsoná: “Tichriantʼalao Niná, kʼia kʼoati je sichriantʼano nga jon” (Santiago 4:8).
Jméni xi sʼiain nga koa̱nchriantʼalai je Niná
Tʼetsʼoalai. Nga kʼoanʼia kʼoasʼin nokjoakaoñá je Niná.
Chótʼayai Biblia. Nga chotʼayá Biblia kʼoasʼin fákaoniná je Niná.
Tsa kʼoétsʼoalai kʼoa tsa chótʼayai Biblia kui xi koasenkaoli nga ngisa koa̱nmiyui je Niná.
“Nga ma chjakaonajmiá Jeobá je Niná xi nʼiosa ngʼa tíjna, jngo kjoanda xi nʼio tse tjínná xi chjota” (Jeremy).
“Nga bʼeyanajmíle Jeobá jotjín tokoan ngisaa machriantʼale” (Miranda).
A nrʼoé kjoaixiná je Niná
Ninga makjainli xi tʼatsʼe Niná kʼoa ninga bʼetsʼoalai, sakʼoajin kʼoasʼin si̱kjaʼaitsjain tsa nrʼoé kjoaixili. Ya Biblia itso xi tʼatsʼe Jeobá: “Ji xi noʼyai kjoabʼetsʼoa” (Salmo 65:2). Xi ijngosani, kʼoati tsoli nga koa̱n kʼoéyanajmílai ngayeje xi makjáojinli nga̱ je Niná mandosinle xi tʼatsi (1 Pedro 5:7).
Tikjaʼaitsjenlai jebi: A chjakaonajmí ntsjaini je miyoli. Koaan kʼoati sʼiain xi kao Niná. Ntsjaintsjai chja̱kaonajmí kʼoa tichjain jaʼaínle nga Jeobá ʼmi (Salmo 86:5-7; 88:9). Ya Biblia kʼoatso nga ntsjaintsjai kʼoétsʼoalee je Niná (1 Tesalonicenses 5:17).
“Nga bʼetsʼoa kʼoasʼin fakaonajmíña je Jeobá kʼoa bʼeyanajmíyejele jotjín tokoan” (Moises).
“Bʼeyanajmíle je Jeobá jmeni xi sikjaʼaitsjen tojo sʼian kao mana kʼoa kao miyona” (Karen).
Jméni xi koa̱n si̱jé kʼianga kʼoétsʼoaa
Ya Biblia itso: “Tojmenibe xi machjénno, tijélao Niná, tʼetsʼoalao, kʼoa tʼailao kjoanda. Kʼoasʼin katasʼejinle Niná jme xi nijáo” (Filipenses 4:6).
A kui xi tsonile nga koa̱n kʼoéyanajmílai jme kjoa xi bitjatojin. Jaon. Ya Biblia itsosa: “Je Jeobá tikʼami je chʼáli, kʼoa jé koasenkaoli” (Salmo 55:22).
Tonga ali tsa tokuijin xi koa̱n kʼoéyanajmílai jmeni xi ñʼai mali. Jngo tsoti xi Chantelle ʼmi itso: “Nʼiojin chʼao sʼian kʼiatsa tokui kʼoetsʼoanile je Jeobá nga nganʼio machjénna”. Kʼoa itsosa: “Xi machjén nga títjon sʼiaan kuinga kʼoailee kjoanda, xi kjoaixi, nʼio nkjín koya tjínni xi koa̱n kʼoainilee kjoanda”.
Tikjaʼaitsjenlai jebi: Jméni xi tsjoa bʼé tokuin xi koa̱n kʼoainilai kjoanda je Niná. Janla koya tikjaʼaitsjain xi koa̱n kʼoainilai kjoanda je Jeobá ndʼaibi.
“Ninga tojngo naxó chótsenlee xi naskánakji, mamená bʼetsʼoalee je Jeobá nga bʼailee kjoanda” (Anita).
“Kui tikjaʼaitsjenjin jngo textole Biblia xi nʼio tsjoachai kʼoa tsa maije̱ kui tikjaʼaitsjenjin jmeni xi kisinda je Jeobá xi ñaki tokʼoamali nga chotsenlai. Xijekoa̱n, kʼia tʼailai kjoanda” (Brian).