Jósʼin koasenkaona je Biblia. Xi títjon: Tjasjaiyai je én xi nʼio chjíle xi nya Biblia

“Mena kʼoexkia je Biblia tonga nʼio tse mani” (Briana, 15 nóle).

Kʼiatsa kʼoati mai tsanda ji, koasenkaoli jmeni xi tso artículo jebi.

• Ánni nga nʼio chjínile nga kʼoéxkiai Biblia

• Josʼin koa̱n kʼoéxkiai Biblia

• Josʼin síkjaʼaitsjen je xti

Ánni nga nʼio chjínile nga kʼoéxkiai Biblia

A kʼoasʼin nikjaʼaitsjain nga tomatsʼelee nga Biblia bʼexkiaa. Tsakui nichxin tokʼoasʼin ʼyatokuin Biblia joni jngo libro xi jmi página tjínle, xi ʼndí kjoan letrale kʼoa xi tsín jme sén faʼaitʼa. Alikui mangóson kʼianga televisión kʼoa nga video chotsenlee.

Ningalani kʼoatjín kjoaixi, tonga koaan kʼoasʼin si̱ngósonkoai joni jngo kaxa̱ xi tsojmichjí nya xi jemeli chjóxʼángi.

Je Biblia yaa mangóson joni je kaxa̱ xi tinikʼaxkiaa, nga̱ yaa koa̱nsjaitʼali je én xi nʼio chjíle xi koasenkaoli:

• Nga koa̱nli nda chjoéjin jme xi sʼiain.

• Nga nda kʼuínkoai xijcháli.

• Nga koa̱nsjaili xi ñaki miyo.

• Nga tsín nʼio si̱kjáojin.

A koasenkaoná jngo libro xi jekjoatse kijna. Jaon, nga̱ “ngayije xo̱n Escritura Niná jinroani” (2 Timoteo 3:16). Kui xi tsonile jebi nga tsʼe Niná je kjoafaʼaitsjen xi nya Biblia.

Josʼin koa̱n kʼoéxkiai Biblia

Jngo koya josʼin koa̱n kʼoéxkiai Biblia kuinga ya kʼoétsʼiakaoni jña fitsʼiani saʼnda nga si̱kjetʼai. Tsa kʼoasʼiain ngisaa jchai jme xi tínchja̱ni. Jaola koya kataʼyaa jokoa̱n sʼiain:

• Koaan kʼoéxkiai chʼin chʼin xi 66 libro tjínle Biblia, fitsʼiakjoanni Génesis saʼnda Apocalipsis.

• Koaan kʼoasʼin kʼoéxkiai je Biblia nga kʼuínkao chʼin chʼin kʼiani kʼoakoan nga jngó jngó koya xi nchja̱ni.

Xi koa̱n sʼiain: Ya Apéndice A7 xi faʼaitʼa Traducción del Nuevo Mundo jngo lista faʼaitʼa xi kui tsoya jmeni xi kisʼin je Jesús nga tsakʼejna i̱ Sonʼnde.

Xi majaoni koya xi koa̱n sʼiain kuinga koa̱n kui chjoéjin tʼatsʼe chjota xi kui kjoa jaʼatojin jme kjoa xi tibitjatojin. Tobʼelañá:

• A meli sʼe̱li je miyo xi koa̱n si̱nʼiotʼai. Kʼiatsa jaon, koaan kui kʼoéxkiai tʼatsʼe David kao Jonatán (1 Samuel, capítulo 18 saʼnda 20) Xijekoa̱n, tʼendai je xo̱n xi faʼaitʼa jñani tso: “Cómo encontrar amigos de verdad”, ánni nga koasenkaonili jme xi tsoya.

• A meli jchai jméni xi sʼiain nga tsínkui sikinjeli je che̱n xi satíobasenli. Koaan kʼoéxkiai xi tʼatsʼe José ánni nga jcha̱ni jme xi kisʼin nga tsínkui kisikinjele (Génesis, capítulo 39). Xijekoa̱n, tʼendai je xo̱n xi faʼaitʼa jñani tso: “Cómo resistir las tentaciones” kao “Acusado falsamente”, nkjín koya tjínni xi faʼaitʼa xi nʼio koasenkaoli.

• A meli jchai jósʼin koasenkaoli tsa kʼoétsʼoai. Tʼexkiai xi tʼatsʼe Nehemías (Nehemías, capítulo 2). Xijekoa̱n, tʼendai je xo̱n xi faʼaitʼa jñani tso: “Jehová contestó su oración”, tsa kʼoasʼiain nkjín koya tjínni xi koa̱njinli.

Xi koa̱n sʼiain: Kʼianga kʼoéxkiai je Biblia jngo ʼnde tjasjai jñani tsín ʼya xi sisili.

Xi majanni koya kuinga koa̱n jngo salmo kʼoéxkiai, tsakuije̱ jme xi koan kʼoa tsa jme xi kisʼin jngo chjota, xijekoa̱n tikjaʼaitsjenjin jósʼin koasenkaoli jme xi tibʼexkiai. Nga jekʼoéxkiai, tikjaʼaitsjenjin jebi:

• Ánni nga kui tsakʼétʼani Jeobá.

• Jméni xi bakóyana jokjoan kʼoa josʼín je Jeobá.

• Jósʼin koasenkaona jme xi tibʼexkia.

Xi koa̱n sʼiain: Koaan tʼendajin kʼiáni meli kʼoétsʼiakoai nga kʼoéxkiai Biblia. Koaan si̱chjain xo̱n xi ʼmi: “Jósʼin koa̱n kʼoéxkiai Biblia”, yaa faʼaitʼa página xi tíjna ya Internet.