Kʼianga jekisʼenngindá Jesús, je nganʼiotsjele Niná yaa kikao ya ʼndekixí. Ñachan nichxin nga tsín tijme xi kiskineni kʼoa jenʼio baole. Kʼoa je Na̱i kʼiaa kiskotʼayakao, i kitsole: “Tsa kjoaixi nga ʼNdíle Niná mai, nioxtila tikʼónyai la̱jao̱ jebi”. Tonga je Jesús kui kisichjén xi faʼaitʼa ya Énle Niná nga i̱ kitsole: “Tjítʼaxon nga tsín tokui tsojmi xi ma chine koatiokonni chjota. Kʼoati kui xi machjénle nga kjuinrʼoé jme xi tso Jeobá”.

Je Na̱i ijngokʼa kiskotʼayakao Jesús kʼoa i kitsole: “Tsa kjoaixi nga ʼNdíle Niná mai, chjíjenngi i̱ yo̱ngo̱. Tjítʼaxon nga je Niná sikasén ánkje nga kʼoasjentjaili”. Tonga Jesús tikui tikisichjénngáni je Énle Niná nga i̱ kitsole: “Tjítʼaxon nga likui koa̱n chótʼayakoai je Jeobá Nináli”.

Xijekoan, kui tsakakóle ngayeje kjoanyiná xi tjín i̱ Sonʼnde, kʼoa i kitsole: “Tsjoale ngayeje kjoanyiná jebi kʼoa kao kjoajeyale ninga toñandia kʼoétsʼoanái”. Tonga je Jesús i kitso: “Tʼin Satanás. Nga̱ tjítʼaxon nga tojekjoan Jeobá kʼoétsʼoalee”.

Nga jeki je Na̱i, kʼiaa jaʼaikonle ánkje je Jesús kʼoa kitsjoale xi kiskine. Xijekoan, Jesús kui kitsoya je énnda chjotse xi tʼatsʼe Chjotaxále Niná. Kui xá kisikasénni Niná nga kui kuitsoya. Je chjota nʼio kisasenle jmeni xi kitsoya Jesús kʼoa kitjenngile tojñani ki.

Kʼianga sá abril nó 30 Jesús ki ya Jerusalén. Nʼio nkjín chjota ki sʼuí Paxko. Kʼianga tsakʼasje je sʼuí, choo kitsjoatʼale Niná ya yo̱ngo̱. Tjínkʼa chjota xi jeyʼa cho̱ xi kitsjoatʼa kʼoa tjínkʼa xi ya Jerusalén tsakatse.

Kʼianga kicho Jesús ya yo̱ngo̱, tsabee chjota xi cho̱ tjíobaténa. Negosio tjíosʼín ya ndʼia jña ʼyaxkón je Jeobá. Jmé xi kisʼin Jesús. Jngo nʼó kisinda xi tsakʼaonsjeni je barré kao nra̱ja̱ ya yo̱ngo̱. Tsakʼétsao je yámixa̱le xi tao̱n síkʼantjai kʼoa je tao̱n kitsaobaa. Kʼoa Jesús i kitsole xi nisechxoa tjíobaténa: “Chja̱ʼaxion ngayeje jebi, ali ndi̱tsi̱njin nikao je ndʼiale Nʼaina”.

Je chjota xi tjío ya yo̱ngo̱ ñaki tokoanxkónle jme xi kisʼin Jesús. Kʼiaa jaʼaitsjenle je chjotatjenngile jme xi tso én xi tongini kinokjoa xi tʼatsʼe Mesías: “Nʼio tsjoake̱ koa̱n je ndʼiale Jeobá”.

Nga jeki nichxin kʼianga nó 33, kʼiaa kisitsje ijngokʼa Jesús je yo̱ngo̱. Ngantsjai kui xi koanmele nga ñaki kataʼyaxkón je ndʼiale Nʼaile.

Kʼianga jaʼato nichxin nga kisʼejna sʼuí Paxko, je Jesús kao chjotale kini ya Galilea. Yaa Samaria jaʼato kʼoa yaa naxinandá Sicar kisikjáya, jñani tíjna je xjáonandá xi tsʼe Jacob. Je Jesús yaa kisikjáyala ngotjo kʼianga kikatse tsojmi je chjotale ya naxinandá.

Jngo chjoón kichokʼasje nandá kʼoa je Jesús i kitsole: “Tʼainái nandá”. Je chjoón kitso: “Ánni nga an chjakaoninái nga̱ chjoón samaritanaña. Je chjota judío alikui chjota samaritano fákao”. Tonga je Jesús kitsole: “Tsa ʼyalani ʼyani jian, si̱jéjinnái nandá kʼoa an kuijin tsjoale nandá xi tsjoá kjoabijnachon”. Je chjoón kitso: “Tonga tsínngóli xi chʼa̱sjeni nandá”. Je Jesús kitsole: “Je xi skʼuí nandá xi tsjoa alikui tikʼia koa̱nfatinile”. Kʼoa je chjoón kitso: “Tʼainái nandá xi tiʼmilai, ji Nai”.

Xijekoan, je Jesús i kitsole: “Kʼoatʼinlai xʼinli nga katanroa”. Kʼoa je chjoón kitso: “Tsínna xʼin”. Je Jesús kitso: “Kjoaixi xi tisi, jekjoan aon xʼin sʼeli, tonga je xi tijnakoai ndʼai kjesa bixankaojin”. Kʼoa je chjoón kitso: “Profetalai. Je naxinandána kʼoasʼin makjainle nga i̱ nindo jebi jña koa̱n sʼe̱tsʼoale Niná, tonga je chjota judío kʼoatso nga toya Jerusalén jña koa̱n sʼe̱tsʼoale. Kʼianga kjoaʼaí je Mesías kʼiajin kʼoakuitsonajin jósʼin kʼoétsʼoalaijin Niná”. Kʼoa je Jesús kʼiaa kʼoakitsole jmeni xi kjesa ʼya xi tjínjinjinle, kitsole: “Anña je Mesías”.

Je chjoón kjitʼanangi ki ya naxinandále kʼoa i kitsole chjota samaritano: “Jekamasjaina je Mesías, ñaki be ngayeje jme xi kisʼian. Tjinnrʼoe ánni nga kataʼyasíño”. Kʼoa ki ya jña tíjna xjáonandá kʼoa kinrʼoé jme xi kitsoya Jesús.

Je chjota samaritano kʼoakitsole Jesús nga yala katabʼejnakao. Jao nichxin tsakʼejna Jesús kʼoa nʼio tse xi kitsoyale. Nʼio nkjín chjota samaritano xi koankjainle tʼatsʼe Jesús kʼoa i kitsole chjoón: “Nga jekanoʼyalaijin chjota jebi, ñaki makjainnajin nga je xi kʼoasjentjai chjotasonʼnde”.

Kʼianga jaʼato choatse nga kisʼenngindá je Jesús kitsoyason kʼoa i kitso: “Je Chjotaxále Niná jetíjnachrian”. Je Jesús kao chjotale ki ngakjijnda Galilea kao Judea. Kʼianga kicho ijngokʼa Jesús ya Nazaret, ki ya ndʼia sinagoga, kiskojndáyaa je xo̱n xi kiski Isaías kʼoa tsakʼéxkiaa, kitso: “Je Jeobá kitsjoana nganʼiotsjele nga xínyasoan je énnda chjotse”. Ánni kʼoakitsosíni. Je chjota tokui tjíokoyale nga kui kʼoakatasʼín Jesús jmeni xi tokʼoamaná. Tonga ali tokuijin xá tsakʼainile nganʼiotsje nga kʼoasʼin sichjén. Je xi ngisa chjíle kuinga kitsoyason je énnda chjotse xi tʼatsʼe Chjotaxále Niná. Xijekoan, i kitsole je chjota xi tjíonrʼoé: “Sʼaa kabitjoson én jebi”.

Xijekoan, je Jesús yaa ki ya ndáchikon Galilea. Kʼoa ño chjota tsabe xi jti̱ bʼasjengindá xi chjotale koan nga koanskanni kʼoa kitsole: “Nroatjenngináo kʼoa chjotaa kʼoéxkó”. Nga ño chjota jebi, jéní Pedro, Andrés, Santiago kao Juan. Kjitʼanangi kisikatío xá xi tjíosʼín kʼoa kitjenngile. Ki ngakjijnda Galilea nga kitsoyason tʼatsʼe Chjotaxále Jeobá. Kitsoyason ya yo̱ngo̱, ndi̱tsi̱n kao yandiaa. Nʼio nkjín chjota kitjenngile tojñani nga ki. Kison én ngakjijnda xi tʼatsʼe Jesús, saʼnda ya ʼnde xi nʼio kjintʼa joni Siria.

Nga jeki nichxin, je Jesús kʼoati kitsjoa kʼale chjotale nganʼio nga koan kisindaya xi chʼin tjínle kʼoa nga koan tsakʼasjejin je na̱i xi tjíojin kʼa yaole chjota. Kʼoati kikao je chjotale nga xinxin naxinandá kitsoyason. Kʼoati ki je xi yánchjín, jolani María Magdalena, Juana, Susana kao xi kjaʼaísa xi kitsjoale jme xi koanchjénle je Jesús kao chjotale.

Kʼianga jekisikatíonda je chjotale, je Jesús kʼoakitsole nga katafitsoyason. Kʼianga ki ya Galilea, nʼio nkjín xi chjotale Jesús koan kʼoa kisʼenngindá. Nʼio nkjín chjota xi koanmele kitjenngile, kʼoa je Jesús kui kisingósonkao jngo jñá jñani jekoa̱n sʼe̱xkó tsojmi xi jekamajchá. I kitso: “Tʼetsʼoalao Jeobá nga katasíkasénsa choʼnda xi kʼoexkó je tsojmintje”. Nga koanskanni, 70 chjotale kiskoejin kʼoa jao jao kisikasén ngakjijnda Judea nga kitsoyason. Je chjotale Jesús kitsoyale toʼya chjotani tʼatsʼe Chjotaxále Niná. Kʼianga jaʼaini, kʼoakitsole Jesús jme xi kisʼin. Alikui kʼoakoanle je Na̱i nga tsakʼéchjoale chjotale Jesús nga kitsoyason.

Je Jesús kisikatíondaa chjotale ánni nga je kʼoakisʼinsíni xá jebi nga jekini Jesús ya ngʼajmi. Je Jesús i kitsole: “Tʼinyason énnda chjotse ngakjijnda Sonʼnde. Tʼinyalao chjota je Énle Niná kʼoa cha̱nisʼenngindáo”.

Je Jesús kui xá jaʼaini i̱ Sonʼnde nga kitsoyason tʼatsʼe Chjotaxále Niná. Je Niná kitsjoale nganʼiotsjele nga kʼoakisʼin jmeni xi tomaxkónná. Jmeni xi kisʼin kui tsakakó jme xi sʼin kʼianga jekoatexoma. Tobʼelañá, je Jesús koanle kisindaya tojme chʼin xi kisʼele chjota. Tojñani nga ki, je chjota xi chʼin tjínle kʼoakitsole nga katasíndaya kʼoa kisindayaa ngatsʼi. Je xi xka̱ koantsennile, je xi tsín nrʼoé koan kinrʼoéni kʼoa je xi tsín ma fi koan kini. Kʼoa ninga to tjonnajñole kisikao koanndayani. Je Jesús kʼoati tsakʼasjejin na̱i xi tjíojin yaole chjota. Je chjota kitjenngile ngakjijnda jña ki kʼoa Jesús tsakjákao ninga jekijtale.

Ñandia kʼianga jngo xi tsín ma fi jaʼaikao chjota ya ndʼia jña tíjna Jesús. Tonga nʼio nkjín chjota tjín kʼoa tsín koan jaʼasʼen. Kuinga kiskoxʼákjásíni ya sonndʼia kʼoa yaa kiskanijenne je chjota xi tsín ma fi. Kʼoa Jesús kitsole: “Tisótjain kʼoa titómjai”. Ñaki tokʼoakoanle ngatsʼi nga tsakʼamje je chjota.

Jngo nichxin kʼianga tosʼa tíbichó Jesús ya jngo naxinandá, te chjota xi tjíofiʼndojon yaole kiskiʼndáxále kʼoa i kitsole: “Jesús, tisenkaonáijin”. Nga kui nichxin, je chjota xi tjíofiʼndojon yaole alikui ma ya síchrianle je chjota. Je kjoatéxomale Jeobá kʼoatso nga tjínnele ya koai yo̱ngo̱ kʼianga jekamandani. Je Jesús kʼoakitsole nga katafi ya yo̱ngo̱. Kʼianga tjíofi koanndayaa. Kʼianga tsabe nga koanndaya, jngo xi kinroa ijngokʼani kʼoa kitsjoale kjoanda je Jesús kʼoa tsakʼasjengʼaa Niná. Xi te mani xi koanndaya, tojngo xi kitsjoa kjoanda.

Jngo chjoón xi jetejao nó nga tímʼe, jekichobele kʼoa mele nga koanndaya. Kuinga jaʼasʼenjinsínile chjota kʼoa kʼianga kicho jto̱n yátsʼi̱n Jesús kisikao je tjonnajñole. Tikʼiakjoán koanndayani. Kʼoa je Jesús i kitso: “ʼYáni xi kasíkaona”. Ñaki kitsokjon je chjoón tonga kisichrianle Jesús kʼoa tsakʼéyanajmíle ngayeje. Je Jesús i kitsole: “ʼNdínaa, tʼinlanandai”.

Jngo chjotatítjon xi Jairo ʼmi i kitsole Jesús: “Nroai ndʼiana. Nʼio tímʼe je tsotiʼndína”. Tonga nga kjesa bichójin je Jesús ya ndʼiale Jairo, je tsotiʼndí kʼieen. Kʼianga kicho Jesús, nʼio nkjín chjota xi tjíokjiʼndá. Je Jesús kitsole: “Ali chjiʼndájion, tokijnafení je tsotiʼndí”. Kiskoé ntsja tsotiʼndí kʼoa kitsole: “Tsotiʼndí, tisótjain”. Kjitʼanangi tsakisótjen kʼoa je Jesús kʼoakitsole xijchále nga katatsjoále xi ski̱ne. Tikjaʼaitsjenlai jokji tsjoa kisatio kon je xijchále tsotiʼndí jebi.

Kʼianga jeme jngo nó basen títsoya Jesús tjín xi kisʼin xi nʼio tjínle kjoandosin. Jé kiskoejin ʼyani xi ya sixákao kʼoa xi koandiaale je jtínle. Kʼianga kje kjoejinjin, je Jesús títjon kjoanla je Jeobá kisijéle nga katabasenkao. Kuinga toje kini ya jngo nindo kʼoa tsakʼétsʼoale Jeobá tsʼajnda nitje̱n. Xi koannyaonni kisikatíoxkó kʼa je chjotale kʼoa kiskoejin xi 12 pastrole. A faʼaitsjenli jaʼaínle, jéní Pedro, Andrés, Santiago, Juan, Felipe, Bartolomé, Tomás, Mateo, Santiago tile Alfeo, Tadeo, Simón kao Judas Iscariote.

Je xi 12 pastrole yaa tsakʼamjekao Jesús jñani ki. Tsakakóyale josʼin tjínnele kuitsoya. Xijekoan, kʼiaa tsakʼéte nga katafitsoya. Je Jeobá saʼnda kitsjoale nganʼio nga koan tsakʼasjejin je na̱i xi tjíojin yaole chjota, kʼoa nga koan kisindaya je xi tjíomʼe.

Miyole koan Jesús je xi 12 pastrole kʼoa nʼiotʼaa koan. Je chjota Fariseo kʼoakitso nga tsín jme xo̱n male pastrole Jesús kʼoa nga toxkia chjota. Tonga je Jesús nʼio nda kisikatíonda nga koan kitjosonle je xá xi tsakánele. Kʼoa yaa tsakatiokao nga kjoa jaʼatojin. Tobʼelañá yaa tsakatiokao nga kjesa nikʼienjin kʼoa nga jejaʼáyale. Me ngatsʼi nga kʼoati ya tsʼe Galilea jñani tsʼe Jesús. Kʼoa tjínkʼa xi jechixan.

Je pastrole Jesús chjotajée koan, kuinga sakʼoa likui nda kisʼinni. Sakʼoaa toxkia kinchja̱ kʼoa likui nda kisikjaʼaitsjen jme xi kisʼin. Tjín nichxin nga likui tsejta koan. Saʼnda tsakjáotiyani ʼyáni xi ngisa ngʼa tíjna. Ninga kʼoalani kisʼin, nda chjota koan kʼoa tsjoake koan Jeobá. Jé tsakinyakao je jtín kʼianga tsín tiʼi̱ tíjnani Jesús i̱ Sonʼnde.

Kʼianga jekiskoejin xi 12 pastrole, je Jesús kitjojen ya nindo kʼoa yaa ki jñani nkjín chjota tjío. Chjota jebi yaa jaʼaini ya Galilea, Judea, Tiro, Sidón, Siria kʼoa ya xingoatʼa xo̱ngá Jordán. Jaʼaikaoní je chjota xi tjíomʼe kʼoa xi kjoañʼai tjíosíkjaʼá ánkjele na̱i, kʼoa je Jesús kisindayaa ngatsʼi. Xijekoan, yaa tsakʼejna jña tje̱njenjon nindo nga tsakakóya. Kui kitsoya jme xi tjínnele sʼiaan tsa mená nga miyole Niná koaan. Nga machjénná xi tʼatsʼe Jeobá kʼoa nga tsjoacha katamaa. Likui koa̱n tsjoacha koaan je Niná tsa tsín tsjoachaa je xíngiaa. Machjénní nga nda chjota katamaa kʼoa nga kixi katamaa saʼnda kao chjota kontraná.

Jesús i kitso: “Li tsa tokuijin xi machjén nga tsjoacha koai̱n je miyoli, kʼoati machjén nga tsjoacha koai̱n chjota kontrali kʼoa nga si̱chatʼalai. Kʼoa tsa ʼya xi koa̱njtile xi kao ji, kjitʼanangi tʼin kʼoa kʼoatʼinlai nga katasíchatʼali. Josʼin meli nga sikaoli je chjota kʼoati sʼin tikoai tsanda ji”.

Jesús kʼoati kitsjoa kjoafaʼaitsjen tʼatsʼe tsojmi xi tjínná. I kitso: “Ngisaa nda nga miyole Jeobá koai̱n tikʼoajinni nga tse tao̱n sʼe̱li. Nga̱ je ché koaan siché je tao̱nli, tonga je kjoamiyo xi tjínli kao je Jeobá liʼya xi koa̱n siché. Alikuijin nikjáojin jme xi chi̱nai, jme xi sʼui̱ kʼoa jme xi chʼa̱kjái. Chótsenlai je nise. Je Niná síkuindaa nga likʼia chale xi kjine. Ninga kui nʼio si̱kjáojin likui tse kuijnai. Tikjaʼaitsjain, je Jeobá bení jme xi machjénli”.

Je chjota kjesa ʼya xi nrʼoéjinle xi kʼoasʼin nchja̱ joni je Jesús. Je naʼmi likʼia kui kitsoyale je chjota. Ánni nga nda koannile kitsoya je Jesús. Kuiní nga tʼatsʼe Jeobá jaʼaini ngayeje xi kitsoya.

Ngayeje jmeni xi kisʼin je chjota fariseo tokui kʼoakisʼinni nga nda katabʼaxki̱. Yaa tsakʼétsʼoa ya jñani nkjín chjota tjío tojoni nga katabe ngatsʼi. To jko tsakʼéya jme xi kitso nga tsakʼétsʼoa kʼoa tikui tima én kisichjénni ya yo̱ngo̱ kao ya yandiaa nga katanrʼoéle chjota. Tokʼoakoanle ngatsʼi nga i̱ kitso Jesús: “Li kʼoajinsʼin bʼetsʼoai josʼín chjota fariseo. Kʼoasʼin síkjaʼaitsjen nga nda koatio ngixko̱n Niná tsa nʼio nkjín én sichjén nga kʼoetsʼoa, tonga likui kʼoatjín. Kʼianga bʼetsʼoai tojiní kao Jeobá. Kʼoa ali tikui timajin én nichjénni nga bʼetsʼoai. Je Jeobá kui xi mele nga kui kʼoakʼuínlai jotjín tokuin”.

Isʼin tʼetsʼoao kitso je Jesús: “Nʼainajin xi tijnai ya ngʼajmi, katabitjongʼa jaʼaínli. Katanroa kjoatéxomali, kʼoakatama josʼin meli i̱ tʼanangi joni ya ngʼajmi”. Xijekoan, kʼoakitsole nga kʼoati tjínnele sijé jme xi ski̱ne nga nyaon nyaon kʼoa nga katanichatʼale jéele, kʼoa jmesani xi kjaʼaí.

Kʼoa i kitso: “Alikʼiajin fajñálai nga bʼetsʼoai. Tosi tonda tijélai Nʼaili Jeobá xi ndatjín. Je xi xijchá ma kui tsjoále xtile je xi ndatjín. Tsa nioxtila sijéli ʼndíli, a la̱jao̱ kʼoailai, tsa jti̱ sijéli a yee kʼoailai”.

Je Jesús kʼoakitso josʼin tsoyanile én xi kinchja̱, kitso: “Tsa ji xi xijchá mai ndakjoan tsojmi xi bʼailai je ʼndíxtili, a tsí ngisa koa̱nle je Nʼaili Jeobá nga tsjoáli nganʼiotsje. Tokui xi machjén nga si̱jélai”. A kʼoanʼiai jokitso Jesús. Jméni xi nijélai Jeobá nga bʼetsʼoai.

Nga kjesa sʼejnajin je sʼuí Paxko nga nó 32 kʼianga jaʼaini je chjotatjenngile Jesús nga kitsoyason, jenʼio kijtale. Kʼoa je Jesús kao chjotale chitso kikao jñani Betsaida ʼmi nga sikjáya. Tonga kʼianga jekicho ya ndainandá, je Jesús tsabee nga nʼio nkjín chjota kitjenngile. Kui xi mele tsakai nga toje koatio kao chjotatjenngile. Ninga kʼoalani nda kiskoeya je chjota. Kisindayaa je xi tjíomʼe kʼoa nʼio nkjín koya xi kitsoyale. Tsʼajnda nichxin kui tsakjákaoni tʼatsʼe Chjotaxále Niná. Kʼianga jekoanxon, je chjotatjenngile i kitsole: “Jejin koanbaole je chjota. Kʼoatʼinlai nga katafi kʼoa katabásjai jme xi ski̱ne”.

Tonga je Jesús i kitsole: “Likui machjén nga koai je chjota. Jon tʼailao xi ski̱ne”. Kʼoa chjotatjenngile i kitso: “A meli nga jin koanngínkindáijin nioxtila xi koakjen”. Je Felipe i kitso: “Ningalani nʼio tse tao̱n tjínná likuijin koa̱nsonniná nga kʼoasikji nioxtila kuindálee ngatsʼi je chjota”.

Je Jesús i kitsole: Jótjín mani tsojmi xi ma chine tjíoná. Je Andrés i kitso: “Aon mani je nioxtila kʼoa to jao mani je jti̱. Tonga likuijin koa̱nsonni ngatsʼi”. Kʼiaa i̱ kitso Jesús: “Nroakao je nioxtila kao je jti̱”. Xijekoan Jesús kʼoakitsole je chjota nga ya katabatio jinjñá kʼoa nga xki̱ 50 kʼoa xki̱ 100 katabationi. Kʼiaa kiskoé je nioxtila kao je jti̱, kiskotsen ngʼá kʼoa tsakʼétsʼoaa. Kitsjoale je chjotatjenngile nga katasíkʼabíle ngatsʼi chjota. Je xi 5,000 mani chjotaxʼin xi ya tjío, kao yánchjín kʼoa kao je xtiʼndí tsakjenní josaʼnda nga koanski. Xijekoan je chjotatjenngile Jesús tsakʼéxkó xi kinjengi nga tsín katabitson. Tejao ni̱si̱nyá kisitse. A tsí tokʼoamaná jme xi kisʼin.

Ñaki tokʼoakoanle je chjota jme xi kisʼin je Jesús kʼoa saʼnda koanmele nga rey kisikao. Tonga Jeobá kje mejinle nga rey sikao Jesús. Kuinga tsakʼéteni je chjota kʼoa kʼoakitsole je chjotatjenngile nga ya katafi ya xingoatʼa ndáchikon Galilea. Yaa kiya je chitso, tonga je Jesús yaa nindo kimi toje nga kikʼétsʼoale je Nʼaile. Ningalani likuikʼia koanʼale je Jesús tsakʼasjeʼaní je nichxin nga tsakʼétsʼoa.

Je Jesús koanle kisindaya xi chʼin tjínle kʼoa kisikjaʼáyale kʼien. Kʼoa saʼnda koanle kisikʼéjyo je ntjao̱nʼio kao jtsínʼio. Kʼianga ya tíjna sonnindo je Jesús kʼoa nga jetsakʼétsʼoa yaa ndáchikon Galilea kiskotsen kʼoa tsabee nga jngo jtsínʼio tífaʼajin. Kʼoa je pastrole yaa tjíoya chitso kʼoa ñaki tjíobʼasjee nganʼio nga tjíofikao je chitso nga̱ je ntjao̱ kjaʼaísʼin tífaʼa. Kʼoa kʼiaa kinrʼoe Jesús, tsakʼamjeson ndáchikon saʼnda nga kicho jña tíjna chitso. Kʼianga tsabe je pastro nga tjín xi tsoʼbason nandá nʼio kitsokjon. Tonga Jesús i kitsole: “Ali nokjonjion, anña”.

Pedro i kitso: “Ji Nai, tsa ji kjoaixi, kʼoatʼinnái nga kjuíkonle”. Jesús i kitsole: “Nroai”. Kʼoa Pedro kitjojen chitso kʼoa tsakʼamjeson nandá nga kinrʼoe Jesús, yaa kijin jtsínʼio. Tonga kʼianga jeme bichónrʼoe Jesús, je Pedro kiskotsenle jtsínʼio kʼoa kitsokjon, nga kʼoakisʼin kiskasʼenngindá. Kʼiaa kinchja̱le Jesús, kitsole: “Chʼa̱sjentjainái Nai”. Je Jesús kiskoé ntsja kʼoa kitsole: “Ánni nga jao kasʼenili, a tsínli kjoamakjain”.

Kʼianga kikin je chitso Jesús kao Pedro, kjitʼanangi tsakʼejnajyo ntjao̱. Tonga jóxótse kisatio kon pastro nga kʼoakoan. I kitso: “Ji kjoaixiní ʼNdíle Niná”.

Ali tsa tokʼiajin nga koanle kisikʼéjyo jtsínʼio je Jesús. Ñandia kʼianga ya tjíoyale chitso Jesús kao pastrole jngo jtsínʼio jaʼai kʼoa je xóle nandá kitjomingʼaa, ngaʼi̱ ngaján kisikao chitso kʼoa sasa kitsendáni. Tonga Jesús kijnafe nga kʼia, kʼoa je pastro kisikjaʼále, i kitsole: “Maestro tisenkaonáijin nga tsa mai i̱jin kuiyáijin”. Kʼiaa tsakisótjen Jesús kʼoa i kitsole jtsínʼio: “Jyó tijnai”. Kʼoa sasa tsakʼejnajyoni je ntjao̱ kao ndáchikon. Je Jesús i kitsole je pastrole: “A tsínno kjoamakjain”. Kʼoa i kitsongañále xínkjín: “Saʼnda bʼaʼénle je ntjao̱ kao ndáchikon”. Je pastrole tsabee nga tsín jme xi tjínnele tsokjonle tsa je Jesús sinʼiotʼa yaole.

Je chjota fariseo jtike koan Jesús kuinga tsakásjainile josʼin tsoa̱. Kʼoakitso nga tsín koa̱n chjota sindaya Jesús kʼianga xoto. Ñandia nga xoto, je Jesús jngo chjota xi tsín matsenle tsabe, xi tao̱n tísíjé yandiaa. Kʼoa i kitsole je chjotale: “Chótsaon josʼin koasenkao nganʼiole Niná chjota jebi”. Je Jesús kisindá ndási kao ndáʼale. Xijekoan, kisikangi xko̱n je chjota xi tsín matsenle kʼoa i kitsole: “Tʼin kʼoa tanejonngi xkuin ya jña tíjna xjáonandá ya Siloam”. Je chjota jebi kʼoakisʼin kʼoa koantsennile.

Je chjota ñaki tokʼoakoanle kʼoa kitso: “A tsí je chjota xokji xi tao̱nná síjé axo kjaʼaíní”. Kʼoa je chjota xi xka̱ tsakaini i kitso: “Anña, xi tsínná matsenna nga kitsian”. Je chjota kitsole: “Jókoanni koanndayai”. Kʼoa tsakʼéyanajmíle jokoanni. Xijekoan, yaa kikaotʼale je chjota fariseo nga katafákao.

Chjota jebi i kitsole chjota fariseo: “Je Jesús ndási kisikangi je xkoan kʼoa kʼoakitsona nga koanejonngia. Kʼoakisʼian kʼoa ndʼai jematsennina”. Je chjota fariseo i kitso: “Tsa síndaya chjota nga xoto je Jesús, alikuijin tʼatsʼe Niná nroani je nganʼiole”. Kʼoa tjínkʼa xi i̱ kitso: “Tonga ánni nga ma síndasíni chjota tsa tsín kao nganʼiole Niná kʼoasʼínni”.

Je chjota fariseo kinchjaale je xijchále chjota xi xka̱ tsakai kʼoa kitsole: “Ánni nga matsensínile je tino”. Je xijchále chjota jebi kitsokjón nga̱ je chjota fariseo kʼoakitso nga kʼaonsje ya sinagoga toʼya chjotani xi koa̱nkjainle tʼatsʼe Jesús. Kʼoa kuinga tosa i̱ kitsoni: “Likui ʼyaijin, tosa je chjónangilao”. Je chjota fariseo tikiskonangingánile chjota xi xka̱ tsakai, kʼoa je i kitsole: “Jekʼoakaxinno jokoanni. Ánni nga tosi tonda chjonangiño”. Je chjota fariseo koanjtile kʼoa tsakʼaonsjee.

Xijekoan, je Jesús kikonle chjota xi xka̱ tsakaini kʼoa kitsole: “A makjainli tʼatsʼe Mesías”. Kʼoa je i kitso: “Tsa ʼbelaña ʼyáni je Mesías, koa̱nkjainjinna”. Je Jesús kitsole: “Anña je Mesías”. Nda chjota koan je Jesús nga kisindaya je chjota xi xka̱ kʼoa nga tsakasenkao nga kisʼele kjoamakjain, a tsí jaon.

Jan koanni miyole je Jesús xi ya Betania tsʼe. Jéní Lázaro kao ndichja xi María kʼoa Marta tsakʼin. Ñandia kʼianga ya tíjna Jesús xingoatʼa xo̱ngá Jordán, je María kao Marta kisikasén énle kʼoa i kitsole: “Je Lázaro nʼio tímʼe, kjitʼanangi nroai”. Tonga je Jesús likui ki xi tiʼa kʼiani. Jao nichxin kiskoya kʼoa kʼiaa ki. I kitsole je chjotatjenngile: “Tjían ya Betania. Je Lázaro kijnafení, kʼoa an tifisikjaʼále”. Chjotatjenngile i kitso: “Tsa totíkijnafe je Lázaro, koa̱nndayajinni”. Je Jesús kʼiaa i̱ kitsole: “Lázaro kijnakʼienní”.

Kʼianga jekicho Jesús ya Betania jeñole nichxin nga kijnakʼien je Lázaro. Nkjín koanni chjota xi kichokonle je María kao Marta nga kitsjoanganʼiole. Kʼianga jekisʼejinle Marta nga kicho Jesús kitokanrʼoe kʼoa i kitsole: “Alikuijin kʼien je ndsʼe tsa i̱lani tijnai”. Kʼoa Jesús kitso: “Kʼoéjnakon ijngokʼani. A makjainli Marta”. Kʼoa Marta i kitso: “ʼBeña nga kuisótjenni nga kjoaʼáyale xi jekʼien”. Kʼoa kʼiaa i̱ kitsole Jesús: “Anña je kjoafaʼáya kao kjoabijnachon”.

Je Marta kikonle María kʼoa i kitsole: “Jeʼi̱ tíjna Jesús”. Kʼoa María kitokanrʼoe je Jesús kʼoa kitjenngile je chjota xi ya tjíokao. Nga jekichonrʼoe, kiskangi ndso̱ko̱ kʼoa kiskiʼndá. I kitso: “Ji Nai tíjnakonjin je ndsʼe tsa i̱lani tijnai”. Nga tsabe Jesús nga nʼio bale je María kʼoati kiskiʼndá tsanda je. Je chjota xi ya tjío tsabee nga kiskiʼndá je Jesús kʼoa i kitso: “Nʼio tsjoake koan je Lázaro”. Tonga tjínkʼa xi i̱ kitso: “Ánni nga tsín tsakʼasjentjaisíni”. Jmé xi kisʼin Jesús nga koanskanni.

Je Jesús ki jña kisʼeñe je Lázaro, ya jngo ngijao jñani nga jngo la̱jao̱ sénjchxo kʼoa i kitso: “Chja̱ʼaxion je la̱jao̱”. Marta i kitso: “Jejin chʼao nje̱ nga̱ jeño nichxin tjínle nga kʼien”. Tonga tsakjaʼáxin je la̱jao̱ kʼoa Jesús i kitso nga tsakʼétsʼoa: “Tsjoale kjoanda Nʼai nga noʼyanái. ʼBeña nga noʼyantsjainái, tonga kuinga nʼio nchjaña nga katabe je chjota nga ji kinikasénnái”. Xijekoan, nʼio kinchja̱ kʼoa i kitso: “Lázaro titjui”. Kʼoa je Lázaro kitjoo ya ngijao kʼoa tojo kjijtéjonsa najño. Jesús i kitso: “Chja̱ʼaxinlao je najño xi kjijtéjon kʼoa tʼaiʼndelao nga katafi”.

Nkjín mani xi tsabe nga kʼoakoan kʼoa koankjainle xi tʼatsʼe Jesús, tonga tjínkʼa xi kikʼéyanajmíle je chjota fariseo. Saʼnda nga kʼia, je chjota fariseo koanmele kisikʼien je Jesús kao Lázaro. Kʼoa je Judas Iscariote toché kikonle je chjota fariseo kʼoa i kitsole: “Jótjín kʼoéchjínáo tsa kʼoaxínno jña tíjna Jesús”. Kʼoatsakʼinle nga 30 tao̱nchxoa kʼoaile, je Judas koanjyole kʼoa tsakásjaile josʼin tsjoátʼa Jesús.

Je chjota judío xki̱ nó tsakʼéjna je sʼuí Paxko kʼianga 14 sá nisán. Kui kisikjaʼaitsjenle nga je Jeobá kisikatíondaí nga tjíonʼio ya Egipto kʼoa nga ya kikao ʼNde xi kitso nga tsjoále. Kʼianga nó 33, je Jesús kao pastrole yaa tsakʼéjna sʼuí Paxko ya jngo kuarto xi tíjna sonngʼa. Nga jejetʼale nga tsakjen kao pastrole i kitsole: “Jngo xi ngatsʼio xi koangina”. Tokʼoakoanle je pastrole kʼoa i kitsole Jesús: “ʼYáni xosʼin”. Jesús i kitsole: “Jéní xi tsjoale nioxtila jebi”. Kʼoa jé Judas Iscariote kitsjoale. Xijekoan je Judas tsakisótjeen kʼoa ki.

Xijekoan, kʼiaa tsakʼétsʼoa je Jesús, kisixkoaa jngo nioxtila kʼoa kisikʼabíle je pastrole xi ya tjíokao. Kʼoa i kitsole: “Ticho nioxtila jebi, kui yaona tsoyanile xi tsjoa tʼatsaon”. Kʼoati tsakʼétsʼoa nga kisikʼabíle je bino, kʼoa i kitsole: “Tʼio bino jebi, njínna tsoyanile xi tsjoa nga katachatʼa jéeno”. Kʼoaxinno nga ya koatexomakaonáo ya ngʼajmi. Xki̱ nó kʼoatʼiaon ánni nga nda kʼoéjintokonsínináo. Je chjotatjenngile Jesús xki̱ nó batiojtín kʼianga jemanjio. Kui bʼéjna xi Kjoabichile Nainá ʼmi.

Kʼianga jetsakjen, je pastrole Jesús kui tsakjáotiyani ʼyáni xi ngisa ngʼa tíjna. Tonga je Jesús i kitsole: “Je xi ngisa ngʼa tíjnano, joxi ngisa nangi tíjna katasʼín”.

Jesús i kitsosale: “Miyona mao, kuinga kʼoaxinnino ngayeje xi mele Nʼaina nga xínno. Jeme kjuía ya ngʼajmi jña tíjna je Nʼaina. I kuiyo jon, tsa tsjoachao xíngio je chjota skoee nga chjotatjenngina mao. Kʼoasʼin tsjoacha katamao xíngio josʼin tsjoake̱no an”.

Xijekoanni, Jesús tsakʼétsʼoale je Jeobá nga katasíkuinda je chjotatjenngile kʼoa nga katabasenkao nga jtín kʼoa nga nyʼán katasíxá. Kʼoati tsakʼétsʼoa nga katabitjotsje je jaʼaínle Jeobá. Je Jesús kao pastrole kisele je Jeobá kʼoa xijekoan kʼiaa ki. Nga kʼia, tojeme kuindoa̱ Jesús.

Kʼianga ki Jesús kao pastrole ya nindo xi Olivos ʼmi yaa jaʼato ya konga xi tsʼe Cedrón. Jetsʼato basen nitje̱n kʼoa ndásá chon. Kʼianga jekicho ya Getsemaní, je Jesús i kitsole chjotale: “Tiyo ibi kʼoa ali soyofejion”. Xijekoan, tʼaxin ki kʼoa tsakasenxkónyʼin. Nʼio tísíkjáojin kʼoa i kitsole Jeobá: “Kʼoakatama josʼin meli”. Je Jeobá jngo ánkje kisikasén nga kitsjoanganʼiole Jesús. Kʼoa kʼianga kicho jña tjío xi jan pastrole kjiofení. Kʼoa i kitsole: “Tisótjaon ali tosoyofejinlao. Jekichoka choa̱le nga tsoa̱na chjotakontrana”.

Kʼiaa kicho je Judas kʼoa tjenkao chjota xi yá yʼa kao ki̱cha̱. Jebe nga ya koa̱nsjaile Jesús nga̱ jekjoan nkjín kʼa nga ya fikao chjotale. Je Judas tongini kʼoakitsole sondado nga je koakole ʼyani Jesús. Kinrʼoe ndiaandiaa Jesús kʼoa i kitsole: “ʼNdali Maestro”, kʼoa tsakʼéndsoʼa. Je Jesús kitso: “Judas, a kuinga tibʼendsoʼaninái nga kʼoaitʼanái”.

Jesús kisichrianle chjota xi kicho kʼoa kitsole: “ʼYáni xi tifasjao”. Je chjota kitso: “Jé Jesús xi Nazaret tsʼe”. Jesús kitso: “Anña”. Kʼoa kini yátsʼi̱n chjota jebi kʼoa kitsaojinʼnde. Kʼiaa tikiskonangingáni Jesús: “ʼYáni xi tifasjao”. Kʼoa i tikitsongáni chjota: “Jé Jesús xi Nazaret tsʼe”. Jesús i kitso: “Jekʼoakaxinno nga an. Tʼaiʼndelao chjota xokjoanbi nga katafi”.

Kʼianga tsabe Pedro jme xi kjima tsakʼasjee ki̱cha̱ espadale kʼoa tsakatetʼaa xo̱ño je Malco, je choʼndale naʼmitítjon. Tonga Jesús kisikao je xo̱ño kʼoa kisindayani. Kʼoa i kitsole Pedro: “Tikájnatjoai ki̱cha̱ espadali. Nga̱ tsakui si̱chjain kui kuiyáni”. Je sondado kitsoaa kʼoa tsakánʼio ntsja Jesús, tonga je pastro kitokaa. Je chjota yaa kikaotʼale Jesús je naʼmitítjon xi Anás ʼmi. Naʼmi jebi kisijtsoʼaa Jesús kʼoa yaa kiskanitʼale je naʼmi xi Caifás ʼmi. Tonga jókoanni je chjotatjenngile.

Nga yasa tíjna Jesús kao pastrole ya ndʼia jñani tsakjenkao i kitsole: “Nitje̱n jebi kuinjiótokonnáo ngatsʼio”. Kʼoa Pedro i kitso: “Likui tsjionkonle an. Ninga koai xi ngikʼa an likʼia sikʼéjnale”. Tonga Jesús i kitsole: “Nga kjesa kjiʼndájin cháxichá jan kʼa kʼoasí nga tsín ʼyaxkonnái”.

Kʼianga kikao sondado je Jesús ya ndʼiale Caifás, me ngatsʼi je pastrole nga kitoka. To jaosa xi ya tjenjinle je chjota. Kʼoa jngo xi ya tjenjin jéní Pedro. Jaʼasʼen ya nditsinle Caifás jña tjítse lʼí nga kisisole yaole. Jngo chjoónchoʼnda tsabe je Pedro kʼoa i kitsole: “ʼBexkonle, yaná tjenkoai Jesús”.

Pedro i kitso: “Mai, likui ʼbe jme xi tiʼminái”, kʼoa kitjoo. Tonga ijngo chjoónchoʼnda xi tsabe Pedro i kitso: “Chjota xokji yaa tjenkao Jesús”. Kʼoa Pedro i kitso: “Saʼnda tsín ʼbe ʼyáni xi Jesús ʼmi”. Kʼoa ijngo chjota xi i̱ kitso: “Ji jngui chjotale Jesús kʼoasʼin nokjoai josʼin nchja̱ je chjota galileo”. Tonga Pedro i kitso: “Likui ʼbexkoan”.

Xi tiʼakʼiani jngo cháxichá kiskiʼndá. Je Pedro tsabee nga ya tíkotsenle Jesús kʼoa kʼiaa jaʼaitsjenle jmeni xi tongini kitsole Jesús. Kitjoo kʼoa kiskiʼndá.

Je Sanedrín yaa tsakatíoxkó ya ndʼiale Caifás nga tsakʼéndajin je kjoale Jesús. Jetjínjngo kon nga sikʼien Jesús, tokui xi tjíobásjai jósʼin koangi nga koa̱n sikʼien. Tonga likui kisokole jme jée xi koane. Xijekoan, je Caifás i kitsole je Jesús: “A jiní ʼNdíle Niná”. Jesús i kitso: “Jaon anña”. Kʼoa kʼiaa i̱ kitso Caifás: “Likui jmesa choa̱ machjénná. Niná tínchja̱ʼaonle”. Je chjota xi tjío i kitso: “Tjínnele nga kuiyá je chjota jebi”. Kisijtsinʼa, tsakʼéchráʼaa, tsakʼéʼmaa xko̱n, tsakʼéle kʼoa i kitsole: “Tsa profetale Niná mai kʼoasi ʼyá xi kabʼéli”.

Kʼianga kisʼesén yaa kikao ya Sanedrín kʼoa i kitso ngindiale: “A jiní ʼNdíle Niná”. Jesús i kitso: “Tijon xobixónño nga kuijian”. Nga jekʼoakitso Jesús, je chjota kʼoakitso nga Niná tínchja̱ʼaonle kʼoa yaa kikao jña tíjna je Poncio Pilato. Jméni xi koan nga koanskanni. Kataʼyala.

Je naʼmitítjon yaa kikao Jesús ya ndʼiale chjotaxá. Kʼianga jeya tíjna, je Pilato i kitsole: “Jmé jée xi tifanao chjota jebi”. Kʼoa je naʼmi i kitso: “Kʼoatso nga reyxó”. Kʼoa je pilato i kitsole Jesús: “A jiní je reyle chjota judío”. Je Jesús kitsole: “Je kjoatéxomana likui i̱ tsʼe sonʼnde”.

Xijekoan, je Pilato yaa kisikasénle Jesús je Herodes, xi tsakatéxoma Galilea nga katabásjai jme jée xi koane. Herodes tsabee nga tsín jme jée tjínle Jesús, kʼiaa kisikasén ngindiale je Pilato. Xijekoan, je Pilato i kitso: “Lijme jée tjínle chjota jebi. Sikʼéjnandaíña”. Tonga je chjota i kitso: “Tikʼain, tikʼain”. Je chjota sondado tsakále nʼó, tsakʼéchráʼaa kʼoa tsakʼéle. Jngo korona naʼyá tsakʼéya jko̱ kʼoa totsabesin, i kitsole: “ʼNdali reyle chjota judío”. Je pilato i tikitsongánile je chjota: “Lijme jée tjínle chjota xokji”. Tonga je chjota i kitso: “Tjatʼao yá”. Kuinga je Pilato tosa je chjota kitsjoanile Jesús nga katasíkʼien.

Xijekoan, je chjota yaa kikao Jesús ya jña Gólgota tsakʼin. Kʼoa jngo yá tsakátʼa. Jesús tsakʼétsʼoale Jeobá kʼoa i kitsole: “Nʼai, tichatʼalai nga̱ likui be jme xi tjíosʼín”. Je chjota totsabesin Jesús kʼoa i kitsole: “Tsa kjoaixi nga ʼNdíle Niná mai chʼa̱sjentjai yaoli kʼoa titjojain yá”.

Jngo chjotaché xi kʼoati yá kisʼetʼa i kitsole Jesús: “Katafaʼaitsjenli xi tʼatsʼan kʼianga koatexomai”. Kʼoa Jesús i kitsole: “Yaa kuijnakaonái ya ʼNdenaxó”. Kʼianga jekoanxon jan ora kisʼenjio. Tjínkʼa chjotatjenngile xi ya tsakatio jñani kisʼetʼa yá je Jesús, je na̱le kʼoati ya tíjna. Je Jesús kʼiaa kʼoakitsole je Juan nga nda katasíkuinda.

Xijekoan, je Jesús i kitso: “Jekitjoson”. Tsakjénjeen jko̱ kʼoa kʼien. Nga jekʼien Jesús jngo cháonnʼio jaʼa. Je najño xi tjenjchxo ya yo̱ngo̱ xi síjaoya ʼNdetsje kao ʼNde xi nʼio tsje kixijndá. Nga jekʼoakoan jngo sondado xi i̱ kitso: “Ñaki kjoaixi nga ʼNdíle Niná chjota jebi”.

Kʼianga jekʼien Jesús, jngo chjotanyiná xi José tsakʼin kʼoakitsole je Pilato nga katsjoáʼndele nga skoé yaole Jesús. Je José jngo najño lino xi nʼio nda kji tsakájtéjon je yaole Jesús kʼoa tsakʼéjtenjon je xki xi nda nje̱ kʼoa yaa kisikájnaya tsjó xi sʼa kisʼenda. Xijekoan, kʼoakitso nga jngo la̱jao̱ katasʼechjoajchxoni je tsjó. Je naʼmitítjon i kitsole Pilato: “Kui tinikjáojinjin tsa je chjotatjenngile Jesús siché je yaole kʼoa kʼoakuitso nga kafaʼáyanile”. Pilato kitsole: “Tʼechjoajchxo je tsjó kʼoa tikatío chjota xi sikuinda”.

Nga jejan nichxin jaʼato, ki kʼa yánchjín kʼianga sʼa tanjio ya jña tíjna je tsjó. Nga kicho tsín je la̱jao̱ xi sénjchxo je tsjó kʼoa totítixʼaa. Jngo ánkje tíjnaʼya xi i̱ kitsole: “Ali nokjonjion. Jesús jejaʼáyale. Kʼoatʼinlao je chjotatjenngile nga katafi ya Galilea kʼoa yaa ska̱jin”.

Kjitʼanangi ki je María Magdalena nga kikásjai je Pedro kao Juan. I kitsole: “Tjín xi kafikao yaole Jesús”. Je Pedro kao Juan kitokaa jña tíjna tsjó. Kʼianga tsabe nga tokjitia kini niʼyale.

Xijekoan, je María ki ngindia jña tíjna je tsjó. Kʼoa jao ánkje tsabe xi ya tjíoʼya, i kitsole: “Likui ʼbe jñáni kafikao je Naina”. Xijekoan jngo chjota tsabe, kʼoasʼin kisikjaʼaitsjen nga je xi ya síxá kʼoa kitsole: “Nai, kʼoatʼinnái jñáni kanikájnai”. Kʼianga jekinchja̱ chjota jebi i kitso: “María”, kʼiaani tsabe María nga jeni Jesús kʼoa i kitso: “Maestro”, kʼoa kitsoanʼio. Jesús i kitsole: “Kʼoatʼinlai je ndsʼe nga kaʼyanái”. Kʼiaa kjitʼanangi kinrʼoe je chjotatjenngile Jesús je María nga kitsoyale jme xi tsabe.

Kʼianga jekoanxon xi tikuini nichxin, jao chjotale Jesús xi ya tjíofi ya Emaús. Jngo chjota xi ñatjen ki ya yandiaa kiskonangile jmé xi tjíofáoyani. Kʼoa je i kitsole: “A tsín tjínjinli. Jela jan nichxin nga je naʼmitítjon kisikʼien je Jesús. Tonga tjínkʼa yánchjín xi kʼoatjíotso nga tíjnakon”. Kʼoa chjota jebi kitsole: “A tsín makjainno tʼatsʼe profetale Niná. Kʼoanákitso nga je Cristo toxá kuiyáni kʼoa skan kjoaʼáyanile”. Xijekoan, tosi tonda kitsoyale jme xi tso je xo̱n Escritura. Kʼianga jekicho ya Emaús, kʼoakitsole chjota jebi nga ya katabʼejnakao. Kʼianga jekoa̱kjen, je chjota jebi tsakʼétsʼoantjai nioxtila kʼoa kʼiaa tsabe je chjotale nga jeni Jesús. Kʼoa tokicha Jesús.

Nga jao chjotale Jesús kitokaa saʼnda Jerusalén. Yaa kicho jña tjíojtín je pastrole Jesús kʼoa tsakʼéyanajmíle ngayeje jme xi koan. Kʼianga ya tjíoʼya, toʼikoan tsʼatsen Jesús. Je pastro likui ni̱to̱n koankjainle tsa je Jesús. Tonga Jesús i kitsole: “Chótsenlao ndsa̱ kʼoa tikaonáo. Tjítʼaná xo̱n nga je Cristo kjoaʼáyajinnile kʼien”.

Nga jekoanskanni nga tsʼatsenle pastrole Jesús, Pedro yaa kikʼasjengindá jti̱ ya ndáchikon Galilea. Ki je Tomás, Santiago, Juan kao xi ngikʼa pastro. Tsʼajnda nitje̱n tsakʼasjengindá jti̱ tonga lijme xi kitjoéle.

Kʼianga koannyaonni, nga sʼa tanjioyasa, jngo chjota tsabe xi ya séjna ndaindáchikon, i kitsole: “A katjoéno jti̱”. Je pastro i kitso: “Mai”. Je chjota jebi i kitsole: “Tikʼatjenngindáo naʼyano ya ngakixile chitso”. Kʼianga kʼoakisʼin ñaki kisʼejnakitse jti̱ naʼyale, saʼnda likui tikoan kisikinni ya chitso. Je Juan toxijña tsabe nga jeni Jesús kʼoa i kitso: “Jé Nainá”. Je Pedro kjoan kiskingindá nga ki ya ndaindáchikon. Kʼoa je chjotatjenngile xi ngikʼa yaa tsakatioya chitso nga kitjenngile.

Kʼianga jekicho ndaindáchikon, tsabee nga jngo lʼí tjítse kʼoa nga jti̱ kjiojin lʼí kao nioxtila. Je Jesús kʼoakitsole nga katakjoé jti̱ xi tsakʼasjengindá ánni nga koachjánni kʼoa xijekoan, kitsole: “Nroa kicho”.

Kʼianga jetsakjen, je Jesús i kitsole Pedro: “A ngisaa tsjoachanái tikʼoajinni jti̱ xokjoan”. Kʼoa Pedro kitso: “Jaon ji Nai ʼyaní nga tsjoake̱le”. Kʼoa Jesús i kitsole: “Tikjain je ʼndíbarréna”. Kʼoa ngindiaa i̱ kitsongáni Jesús: “Pedro, a tsjoachanái”. Pedro i kitso: “Ji Nai ʼyaní nga tsjoake̱le”. Jesús i kitsole: “Tikuindai je ʼndíbarréna”. Xi koanjanni kʼa tikui kiskonangingánile kʼoa Pedro nʼio ba koanle kʼoa i kitso: “Ji Nai ʼyaní ngayeje. ʼYaní nga tsjoake̱le”. Kʼoa Jesús i kitsole: “Tikjain je ʼndíbarréna”. Kʼoa i kitsosale: “Tosi tonda tʼintjennginái”.

Jesús yaa tsakatiojtín kao chjotale ya Galilea kʼoa jngo kjoatéxoma xi nʼio chjíle kitsjoale, i kitsole: “Tangíon, kʼoa chjotana tikao je chjota xi tjín ngakjijnda naxinandá. Tʼinyalao ngayeje xi kixinyano, kʼoa chanisʼenngindáo”. Kʼoa i kitsosale: “Nda tʼejintokon nga i̱ koatejnakaono ngantsjai”.

Kʼianga jejaʼáyale Jesús, xi 40 nichxin tsakʼejnasa i̱ sonʼnde, siento chjotale tsakakóle yaole ya Galilea kao Jerusalén. Nʼio tse xi kitsoyale kʼoa nkjín kjoaxkón tsakatío. Xijekoan, tojngokʼasa tsakatiojtín kao pastrole ya nindo xi Olivos ʼmi. Jesús i kitsole: “Nda i̱ Jerusalén tiyo. Chóyalao jmeni xi kitso je Nʼainá”.

Je pastro alikui koanjinle jme xi tsakʼinle, kuinga i̱ kitsosínile Jesús: “A reyle Israel koai̱n”. Kʼoa je Jesús i kitso: “Je Jeobá kje mejinle nga rey koa̱njian. Tonga jeme kʼoaino je nganʼiotsje xi tsjoáno nganʼio kʼoa testigona koa̱on. Tangíon ya Jerusalén, ya Judea kao Samaria kʼoa tojña saʼndani”.

Kʼianga kini ya ngʼajmi Jesús jngo yojbi jaʼachjoa xi tsakʼéʼma. Je chjotatjenngile kiskotsenle nga kimingʼa, tonga tochan kicha Jesús.

Je chjotatjenngile kitjoni ya nindo Olivos kʼoa ki ya Jerusalén. Yaa batioxkóntsjai nga bʼétsʼoa ya sonngʼale jngo ndʼia. Kui kiskoyale nga tsesa jme xi kuitsoyale Jesús.

Kʼianga nó 33, nga jete nichxin jaʼato nga kini Jesús ya ngʼajmi, kʼiaa tsakʼaile nganʼiotsje je chjotale. Kʼiaa tísʼejna je sʼuí Pentecostés ya Jerusalén kʼoa nʼio nkjín chjota kicho xi xin ʼndele. Jngo siento kao kanla chjotatjenngile Jesús xi ya tjíojtín ya sonngʼale jngo ndʼia kʼoa toxijña tjín xi koan. Je chjota xi ya tjío jolʼí kjoan xi kisatioson jko̱ kʼoa kjaʼaí kjaʼaí én kinchja̱ nga jngó jngó. Kʼoati kinoʼyale nga jngo ntjao̱nʼio jaʼa ya yaniʼya.

Je chjota xi xin ʼndele xi kicho ya Jerusalén kinrʼoé jme xi kjima kʼoa kikotseen. Tokʼoakoanle nga kinrʼoé nga kjaʼaí én tjíonchja̱ je chjotale Jesús. Kʼoa kuinga i̱ kitsoni: “Galilea tsʼe chjota xokjoan, ánni nga kui nchja̱ni je én xi nokjoaa”.

Xijekoan, je Pedro kao xi ngikʼa chjotatjenngile Jesús tsakinyando kʼoa Pedro i kitso: “Jon kinikʼaon je Jesús, tonga Jeobá jekisikjaʼáyanile. Ndʼaibi jeya tíjna ngakixile Niná. Kʼoa jekitsjoanajin je nganʼiotsje xi kitso nga tsjoánajin. Kuinga tiʼyaño je kjoaxkón xi kjima”.

Ñaki tokʼoakoanle je chjota. Jme xi kitso je Pedro kichokajin ni̱ma̱le kʼoa kuinga i̱ kitsoni: “Jmé xi sʼiainjin”. Kʼoa i tsakʼinle: “Kʼoakatamanino je jéeno kʼoa cha̱nisʼenngindáo yaono kao jaʼaínle Jesús. Kʼoa kʼiaa kʼoaino je nganʼiotsje”. Jan jmi koanni chjota xi kiskanisʼenngindá yaole nga kui nichxin. Saʼnda nga kʼia, sa nkjín sa nkjín koan chjotatjenngile Jesús ya Jerusalén. Jé nganʼiotsje tsakasenkao nga nkjín jtín tsakatío je pastro. Kʼoasʼin tsakakóyanile chjotatjenngi xi ngikʼa jme xi kitsole Jesús.

Jngo chjota xi tsín ma fi tsakʼejnajchxontsjai xo̱ntjoale yo̱ngo̱ nga kisijé tao̱n. Ñandia nga i̱ kitsole Pedro kao Juan: “Tsí jme xi kʼoaináo”. Kʼoa Pedro i kitsole: “Koaan kui tsjoale xi ngisa chjíle tikʼoajinni tao̱n. Xi kao jaʼaínle Jesús tisótjain kʼoa titómjai”. Je Pedro tsakasenkao chjota jebi nga tsakasenndo kʼoa tsakʼamjee. Je chjota nʼio tsjoa koanle kʼianga tsabe jme xi kisʼin je Pedro kʼoa nkjín xi koankjainle.

Tonga je naʼmi kao chjota saduceo nʼio jti koanle. Kitsoaa je pastro kʼoa yaa kikao ya Sanedrín, jñani bʼéndajin kjoa je chjotatítjonle relijión. I kitsole: “ʼYá xi kitsjoano nganʼio nga kinindayao chjota jebi”. Pedro kitso: “Jé Jesucristo, je chjota xi kinikʼaon”. Nʼio kinchja̱ naʼmi kʼoa i kitso: “Ali tijejin Jesús nikʼaxki̱ño”. Kʼoa je pastro kitso: “Alikui jyó kuiyuijin. Tjínnenajin nga kuinókjoanijin xi tʼatsʼe”.

Kʼianga kinikatíondaí je Pedro kao Juan, kjitʼanangi kikʼéyanajmíle je xi ngikʼa jme xi koantʼain. Ngatsʼi i kitso nga tsakʼétsʼoale Jeobá: “Tʼiain kjoanda tisenkaonáijin nga nʼiojin katamaijin ánni nga tosi tonda kuinókjoanijin xi tʼatsi”. Je Jeobá kitsjoale nganʼiotsje kʼoa tosi tonda kitsoya kʼoa kisindaya chjota. Sa nkjín sa nkjín chjota koankjainle. Je chjota saduceo nʼio koanxinkonke pastro, kuinga ndoyá kiskanini. Kʼianga koannjio nga tjíoʼya ndoyá, je Jeobá jngo ánkje kisikasén xi kiskoʼai je ndoyá kʼoa i kitsole je pastro: “Tangín ijngokʼao ya yo̱ngo̱ kʼoa tʼinyao”.

Kʼianga koannyaonni tjín xi i̱ kichotso ya Sanedrín: “Tíchjoanʼio je ndoyá, tonga je chjota xi kindoao likui ya tjíoʼya. Yaa tjíotsoya ya yo̱ngo̱”. Kitsoa ngindia je pastro kʼoa yaa kikao ya Sanedrín. Je naʼmitítjon i kitsole: “Jená kʼoatsakʼinlaijin nga tsín tije Jesús si̱kʼaxki̱ño”. Kʼoa je Pedro i kitso: “Tjínenajin nga je Niná chʼa̱ʼénlaijin tikʼoajinni je chjota”.

Toxkia jti koanle je chjotatítjonle relijión, saʼnda koanmele kisikʼien je pastro. Tonga jngo chjota fariseo xi Gamaliel tsakʼin i kitso: “Tikuindao yaono. Tsakui nichxin Niná tíjnakao chjota xokjoan. A meno nga kao Niná kuixkaon”. Tsakʼaʼén kʼoa kisikatíondaí je pastro, tonga títjonkjoanla tsakále kʼoa kʼoakitso ijngokʼale nga tsín tikatatsoyani. Tonga je pastro likui kisixa̱nle. Tosi tonda kao kjoanʼiojin kitsoya xki̱ ndʼia kao ya yo̱ngo̱.