Je xi sísinle kjoa xi tsʼe Espíritu Santo, tjínle kjoabijnachon kao kjoanyʼán
“Je xi kʼoasʼin fikao yaole josʼin mele Espíritu Santo, sísinle kjoa xi tsʼe Espíritu Santo” (ROMANOS 8:5).
1, 2. Ánni nga nʼio mandosinnile je chjotale Cristo xi ya ngʼajmi koai jmeni xi tso kapítulo 8 xi tsʼe Romanos.
KʼIANGA faʼaitsjenya je Kjoabiyale Cristo, tsakui nichxin bʼexkiaa Romanos 8:15-17. Testo jebi kui tsoya jósʼin beni jngo chjotale Cristo nga ya ngʼajmi koai. Romanos 8:1 kʼoatso nga je chjotale Cristo xi ya ngʼajmi koai jéní “xi tjíokao Cristo Jesús”. Tonga a tojé kichjile kapítulo 8 xi tsʼe Romanos axo kʼoati binyakao je chjotale Cristo xi i̱ Sonʼnde koatio.
2 Je xi ngisa bakinle jotso kapítulo 8 xi tsʼe Romanos jé chjotale Cristo xi ya ngʼajmi koai. Chjotale Cristo jebi bʼaile “je Espíritu Santo” kʼoa koyale nga kʼoasʼin skoe̱kon Niná “joni tsa xtile” nga jendaí koatiole je yaole (Romanos 8:23). Kʼianga faʼáyale ya ngʼajmi xtile Niná ma. Xi totʼatsʼe nga tsakʼéchjíntjainá je Jesús, je Jeobá síchatʼale jéele kʼoa chjotakixi sʼin bekon kʼoa kuinga xtile tsonile (Romanos 3:23-26; 4:25; 8:30).
3. Ánni nga kʼoati tjínnenile skótʼaya kapítulo 8 xi tsʼe Romanos je chjotale Cristo xi i̱ koyale koatio ngantsjai nichxin i̱ Sonʼnde.
3 Tonga ya kapítulo 4, je Pablo tʼatsʼe Abrahán kinchja̱ni. Je Abrahán alikui kui kjoachoya kisʼele nga ya ngʼajmi koai, tonga je Jeobá chjotakixi sʼin tsabekon. Je Abrahán nʼio tongini tsakʼejna nga kjesa faʼaikʼéchjíntjaijinná je Jesús (tʼexkiai Romanos 4:20-22).a Nichxin xi tiyoaa ndʼaibi, je Jeobá kʼoati chjotakixi sʼin bekon je chjotale Cristo xi koyale nga i̱ Sonʼnde koatio ngantsjai nichxin. Kʼoa kʼoati nʼio nda binyakao je kjoafaʼaitsjen xi nroatʼa ya kapítulo 8 xi tsʼe Romanos.
4. Jméni xi chjónangilee yaoná kʼianga kʼoéxkiaa Romanos 8:21.
4 Ya Romanos 8:21, je Jeobá kʼoatso nga ya sonʼndenaxó je chjota ndaí koatiole je jée kao kjoabiya. Bersíkulo jebi kʼoatso nga “kʼoéyondaí kao kjoajeya xi tsʼe ʼndíle Niná”. Kʼianga bʼexkiaa bersíkulo jebi koaan chjónangilee yaoná: “A sikjaʼaitsjenña nga jeya tijna ya ʼndenaxó”. Kataʼyala jmeni xi sʼiaan nga koa̱n ya kuiyoaa.
JE XI “SÍSINLE KJOALE YAONÁ”
5. Jméni xi kisikʼaxki̱ je Pablo ya kapítulo 8 xi tsʼe Romanos.
5 (Tʼexkiai Romanos 8:4-8, 12, 13).b Ya kapítulo 8 xi tsʼe Romanos, je Pablo jao koya chjota kisikʼaxki̱. Kisikʼaxki “je xi kʼoasʼin fikao yaole josʼin mele yaoná” kʼoa kao “je xi kʼoasʼin fikao yaole josʼin mele Espíritu Santo”. Tjínkʼa xi kʼoatso nga bersíkulo jebi jé tínchja̱ni xi chjotale Cristo ma kʼoa kao xi tsínkui. Tonga je Pablo jé chjotale Cristo kiskile, i kitsole: “Tikjino ngatsʼio [...] xi tsjoakeno Niná, xi kinokjoano nga chjotale Cristo koa̱on” (Romanos 1:7). Je xi kʼoasʼin tjíofikao yaole josʼin mele yaoná kʼoa kao xi kʼoasʼin tjíofikao yaole josʼin mele je espíritu santo chjotale Cristoní. Jméni xi tsín koanngóson.
6, 7. 1) Jósʼin tínchja̱ni je én xi “yaoná” tso xi síkʼaxki̱ Biblia. 2) Jmé xi tínchja̱ni nga “yaoná” síkʼaxki̱ ya Romanos 8:4-8, 12, 13.
6 Kʼianga “yaoná” tso xi síkʼaxki̱ Biblia, nkjín koya tínchja̱ni. Sakʼoaa kui tsoyanile je yao xi tjínná ngatsʼiaa (Romanos 2:28; 1 Corintios 15:39, 50). Kʼoati sakʼoa kui tínchja̱ni je xi xíngiaa mani. Tobʼelañá, je Biblia kʼoatso nga je “Jesucristo Nainá xi ʼndíle Niná, xi jinroani ntje̱le David jo kjoan yaole”. Kʼoa je Pablo kʼoati i̱ kitso tʼatsʼe chjota judío: “Ndsʼe, xi xíngia xi tongóson yaonajin” (Romanos 1:3; 9:3).
7 Kʼianga kui síkʼaxki̱ “yaoná” ya Romanos 8:4-8, 12, 13, jméni xi tínchja̱ni. Nga koa̱njinná jme xi tínchja̱ni, kataʼyala jotso Romanos 7:5. Itso: “Kʼia nga tsakiyoaa jo koan kjoan yaoná, je kjoachi̱nga̱le jéebe [...] kisixájin ngayije jko̱yale yaoná”. Je Pablo kʼoakitso nga “je xi kʼoasʼin fikao yaole josʼin mele yaoná” jéní xi tsjoáʼndele yaole nga kui síkinjele xi chʼaotjín símekon kʼoa kʼoasʼín josʼin mele.
8. Ánni kʼoakitsonile Pablo je chjotale Cristo xi ya ngʼajmi koai nga tsínkui kʼoakatasʼín josʼin mele yaole.
8 Ánni nga kʼoakitsosínile Pablo je chjotale Cristo xi ya ngʼajmi koai nga tsín kʼoakatasʼín josʼin mele yaole. Kuinga tsínkui títjon sikatío jme xi mamekon. Tobʼelañá, je Pablo kʼoakitso nga tjínkʼa je chjotale Cristo xi ya tsʼe Roma xi kui kʼoatjíosʼín jme xi mele yaole. Tsakui nichxin kui ngisa tjíofitʼale je kjoachajngi, tsojmi xi kjine kao xi kjaʼaísanile (Romanos 16:17, 18; Filipenses 3:18, 19; Judas 4, 8, 12). Kʼoa ya naxinandá Corinto, jngo chjotale Cristo tsakʼejna xi je kisichajngikao je chjoónle nʼaile (1 Corintios 5:1). Kuinga koanchjénnile je chjotale Cristo xi tsakatio nga siglo 1 je kjoafaʼaitsjen xi kitsjoale Pablo nga tsínkui kʼoakatasʼín josʼin mele yaole (Romanos 8:5, 6).
9. Jósʼin tjínnele koa̱njinná jme xi tínchja̱ni Romanos 8:6.
9 Kʼoati machjénná tsanda ñá je kjoafaʼaitsjen xi tsakʼaile je chjotale Cristo. Saʼnda jngo xi jekjoatse tísíxále Jeobá tsakui nichxin kui kʼoasʼin josʼin mele yaole. Tonga a kui xi kitsonile Pablo ya Romanos 8:6 nga tsín koa̱n kui si̱kjaʼaitsjeen tsojmi xi chinee, josʼin si̱xá, josʼin kʼoétsaojiaan kʼoa tsa ʼya xi koa̱ntsjoachaa. Mai, ali tsakuijin xi kitsole, nga̱ ngayeje jebi toxá kʼoanʼiañá. Saʼnda je Jesús tsakʼétsaojinkao tsojmi xi kiskine, nkjín chjota kisikjen, kʼoa kʼoati kisikjáya. Kʼoa je Pablo kʼoakitso nga toxá kjoáyokaoni xínkjín xi jekabixan.
Jméni xi ngisa nʼio nokjoañá (Chótsenlai párrafo 10 kao 11)
10. Jósʼin tsoyanile je én xi “sísinle” sʼin jaʼatoya ya Biblia.
10 Jósʼin tsoyanile je én xi “sísinle” sʼin jaʼatoya ya Biblia. Je én griego xi kisichjén Pablo kui tsoyanile tsa jmeni xi tokui nikjaʼaitsjeen ʼndeʼndee kʼoa tojmeni xi nʼia ñaki tokui nikjaʼaitsjeen. Jngo chjotachjine kʼoakitso nga én jebi kui tínchja̱ni je chjota xi ñaki tokui tjíosíkjaʼaitsjen jme xi mele kʼoa tokui tjíofáoyani ngantsjai. Kui ngisa tsjoále kjoandosin jme xi mele kʼoa tokui batéxomale.
Jméni xi ngisa bʼailee kjoandosin
11. Jméni xi ngisa koa̱nndosinná tsa tsín si̱kuindaa yaoná.
11 Je chjotale Cristo xi tsakatio ya Roma tjínnele nga kisikjaʼaitsjenjin jméni xi ngisa kitsjoale kjoandosin. A kui ngisa koanndosinle je xi mele yaole. Kʼoati machjén nga si̱kjaʼaitsjeen tsanda ñá jméni xi ngisa mandosinná. Kʼianga jchaa jméni xi ngisa tibʼailee kjoandosin, chjónangilee yaoná: “Jméni xi ngisa nchjaña. Jméni xi ngisa tsjoake nga sʼian”. Tjínkʼa xi beni nga tokui tjíosíkjaʼaitsjenntsjai nga kjaʼaí kjaʼaí bino skʼuí, tsa niʼyale sindachon, tsa najño koatse, tsa tao̱nle sixákao kʼoa tsakui kʼoendajin jñani koai vacación. Ngayeje jebi alikui chʼaotjín. Tonga, tobʼelañá xi tʼatsʼe bino jaola choa̱ si̱kjaʼaitsjenjiaan. Je Jesús ñandia nga bino kisikʼóya je nandá kʼianga tíbixan chjota. Kʼoa je Pablo kʼoakitsole Timoteo nga tosa bino kataʼbikao choa je tsʼoa̱ (1 Timoteo 5:23; Juan 2:3-11). Tonga ali tsakuijin bino xi ngisa kisindosin je Pablo kao Timoteo. Kʼoa ñá, jméni xi ngisa mandosinná.
12, 13. Ánni nga si̱kuindasínilee yaoná jmeni xi ngisa mandosinná.
12 Je Pablo i kitso: “Je xi sísinle kjoale yaoná, tjínle kjoabiya” (Romanos 8:6). Jmé xi tsoyanile jebi. Tsakui ngisa nʼio nisinlee “kjoale yaoná” si̱chajián je kjoamiyo xi tjínná kao Jeobá kʼoa tsínjin sʼe̱ná kjoabijnachon nichxin xi nroaján. Jósʼiaan nga tsín kʼoakatamaa. Koaan si̱kʼantjaiyaa yaoná. Si̱kjaʼaitsjenla je chjota xi jená kanikʼaxkiaa xi tsakʼejna ya Corinto. Tsakichonsjejin naxinandále Niná. Tonga kisikʼantjaiyaa yaole, alikui tikui kʼoakisʼinni je kjoa xi mele yaole kʼoa kisixá ijngokʼanile je Jeobá kʼoa tsje kikao yaole (2 Corintios 2:6-8).
13 Ninga nʼio tse jée tsakajngi chjota xi tsakʼejna ya Corinto, koan kisikʼantjaiya yaole. Tsa jngo chjotale Cristo xi kui kʼoatísʼín jmeni xi mele yaole ʼndele nga kjoatéxomale Jeobá koaitjenngi, koaan sikʼantjaiya yaole. Nga si̱kjaʼaitsjenjiaan jmeni xi kitso je Pablo koasenkaoná nga si̱kʼantjaiyaa yaoná.
JE XI “SÍSINLE KJOA XI TSʼE ESPÍRITU SANTO”
14, 15. 1) Jméni xi nʼio si̱sinlee tojo kitso je Pablo. 2) Jósʼin tsoyanile nga jngo chjota kui “sísinle kjoa xi tsʼe Espíritu Santo”.
14 Kʼianga jekʼoakitso Pablo jokji xkón tíjna nga kui nisinlee kjoa xi mele yaoná, kʼoakitso nga je xi kui “sísinle kjoa xi tsʼe Espíritu Santo, tjínle kjoabijnachon kao kjoanyʼántakon”.
15 Je xi kui “sísinle kjoa xi tsʼe Espíritu Santo” alikuijin xi tsonile tsa ñaki tokui tísíkjaʼaitsjen ʼndeʼnde tʼatsʼe Jeobá kao Biblia kʼoa tsa tokui tínchja̱ ʼndeʼndeni. Tobʼelañá, je chjotale Cristo xi tsakatio nga siglo 1, tsakjen, tsakʼi, chixan, kisʼele xti kʼoa kisixá, tojo sʼín ngatsʼi chjota (Marcos 6:3; 1 Tesalonicenses 2:9).
Je xi ngisa chjí tsabekon je Pablo kuinga Niná kisixále
16. Jméni xi ngisa kitsjoale kjoandosin je Pablo.
16 Je Pablo kao chjotale Cristo xi tsakatio nga siglo 1 alikui kitsjoaʼndele yaole nga kui ngisa kitsjoale kjoandosin je kjoa xi kanikʼaxkiaa. Tobʼelañá, je Pablo ndʼianajño kisinda nga tsakajngiʼa yaole tonga alikui kui xi ngisa koanndosinle. Je xi ngisa chjí tsabe kuinga Niná kisixále. Kui xi ngisa kisʼin nga kitsoyason kʼoa nga tsakakóya (tʼexkiai Hechos 18:2-4;c 20:20, 21, 34, 35d). Je ndsʼee xi tsakatio ya Roma kui choa̱le Pablo kiskenngi kʼoa kʼoati tjínnele sʼiaan tsanda ñá (Romanos 15:15, 16).
17. Jmé kjoanda xi so̱koná tsakui si̱sinlee “kjoa xi tsʼe Espíritu Santo”.
17 Jmé kjoanda xi so̱koná tsakui si̱sinlee “kjoa xi tsʼe Espíritu Santo”. Romanos 8:6 itso: “Je xi sísinle kjoa xi tsʼe Espíritu Santo, tjínle kjoabijnachon kao kjoanyʼántakon”. Kui xi tsonile nga bʼaiʼndee nga je Jeobá bándiaale kjoafaʼaitsjenná kao nganʼiotsjele kʼoa nga kʼoasʼin nikjaʼaitsjeen josʼin síkjaʼaitsjen je. Tsa kʼoasʼiaan, je Jeobá kʼoatso nga nda kuiyoaa ndʼaibi kʼoa nga sʼe̱ná kjoabijnachon xi tsínkʼia fetʼa nichxin xi nroaján.
Tojé Jeobá xi male nyʼán bʼé tokoán
18. Jósʼin sʼená kjoanyʼán kʼianga kui nisinlee “kjoa xi tsʼe Espíritu Santo”.
18 Je Pablo kʼoakitso nga kʼoati sʼe̱ná kjoanyʼán kʼiatsa kui si̱sinlee “kjoa xi tsʼe Espíritu Santo”. Ngatsʼiñá nga mená nyʼán kuiyoaa kʼoa je xi ngisa mená kuinga nyʼán sʼe̱ tokoán. Tonga nʼio tochoa chjota xi nyʼán tjío kon. Tojé Jeobá xi male nyʼán bʼé tokoán. Kʼoati nyʼán tiyokoaa je familianá kʼoa kao ndsʼee. Nga chjotajée maa, sakʼoaa sʼená kjoa kao ndsʼee, tonga kui mangíntjenngiaa je kjoafaʼaitsjen xi kitsjoa Jesús nga kitso: “Timiyo ngijngokʼai ndsʼai” (Mateo 5:24). Si̱kjaʼaitsjeen nga kʼoati Jeobá tjíosíxále je ndsʼee, “je Niná xi síkinjenyʼánjinná” (Romanos 15:33; 16:20).
19. Jmé kjoanyʼánni xi sʼe̱ná.
19 Tsakui si̱sinlee “kjoa xi tsʼe espíritu santo”, kʼoati nyʼán kuiyoaa kao Niná. Je profeta Isaías kʼoakitso nga je Jeobá sikuinda ʼyani xi ñaki je sinʼiotʼa kʼoa nga tsjoále kjoanyʼán tokʼia saʼndani (Isaías 26:3; tʼexkiai Romanos 5:1e).
20. Jmé kjoanda xi so̱koná tsa koanngíntjenngiaa kjoafaʼaitsjen xi faʼaitʼa kapítulo 8 xi tsʼe Romanos.
20 Tojñani tjínná kjoachoya, a yaa ngʼajmi axo i Sonʼnde, koasenkaoná je kjoafaʼaitsjen xi kitsjoa Pablo ya kapítulo 8 xi tsʼe Romanos. Bʼailee kjoanda je Jeobá nga kʼoatsoná Biblia nga kui títjon si̱kʼéjnaa nga Jeobá si̱xálee kʼoa mai nga tokui si̱kjaʼaitsjeen jmeni xi mele yaoná. Tsakui si̱sinlee “kjoa xi tsʼe Espíritu Santo” koaan so̱koná kjoanda xi síkʼaxki̱ Biblia. Itso: “Je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23).
a Romanos 4:20-22: “Tonga nda koankjainle. Likui jao tsakʼékon xi tʼatsʼe xi Niná kitsjoale tsʼoa. Tosa ngisa nʼio nda koankjainle, tsʼasjejeya Niná, kʼoa nʼio nda tsakʼélekon nga ngayije xi Niná kitsjoale tsʼoa, kʼoati Niná tjínle nganʼio nga kʼoasʼin. Kui nga Niná chjotakjoakixi kitsole”.
b Romanos 8:4-8, 12, 13: “Jméni nga je kjoakixi xi bʼénená kjoatéxoma kuitjosonjinsíniná ñábi, xi tsín tsa kui kʼoasʼin kuitsomakoaa josʼin mele yaoná, tonga josʼin mele Espíritu Santo. Nga̱ je xi kʼoasʼin fikao yaole josʼin mele yaoná, sísinle kjoale yaoná, tonga je xi kʼoasʼin fikao yaole josʼin mele Espíritu Santo, sísinle kjoa xi tsʼe Espíritu Santo. Je xi sísinle kjoale yaoná, tjínle kjoabiya, tonga je xi sísinle kjoa xi tsʼe Espíritu Santo, tjínle kjoabijnachon kao kjoanyʼántakon. Nga̱ je xi sísinle kjoale yaoná kontra file Niná, nga tsín nangi batiole kjoatéxomale Niná, niʼi̱tséjin koa̱nle. Kʼoasʼin je xi kʼoasʼin yaole tjíoni, likui male sítsjoayale Niná. Kʼoasʼin ndsʼe, nijmejin xi kitje̱nná tʼatsʼe yaoná, nga kuiyochonnía josʼin mele yaoná. Tsa kuiyo josʼin mele yaoná, kuiyáníoʼni, tonga tsa kao je Espíritu Santo si̱kʼaon je kjoa xi sʼín yaoná, kuiyochonníoʼni”.
c Hechos 18:2-4: “Kisatejin jngo chjota judío xi Aquila ʼmi, xi ya nangi Ponto kitsin. Tosʼa choa nichxin tjín nga jaʼaini Italia kao Priscila chjoónle (nga̱ je Claudio tsakatéxoma nga ngatsʼi chjota judío kuitjosjejin ya Roma). Pablo jichokonle. Kui nga tijeni xá tjínle tsakʼejnakao nga je, kisixákao. Kui xá tjínle nga bʼénda karpa. Ya ndʼia sinagoga ñaki kʼoasʼin tsakjákao ngantsjai nichxin nikjáya. Kʼoasʼin koanmele nga siʼindajin chjota judío kao chjota griego”.
d Hechos 20:20, 21, 34, 35: “Nitojmejin xi koankaina nga kinchjayajinno xi koanchjénno, nga kixinyano ngixkon ngatsʼio, kʼoa xki̱ niʼyano. Kitsjoale én je chjota judío kao chjota xi li judíojin nga katasíkʼantjaiya kjoafaʼaitsjenle xi tʼatsʼe Niná kʼoa katamakjainle xi tʼatsʼe Nainá Jesucristo. Nanda ʼyao nga je ndsa̱ kisixá xi tʼatsʼe xi koanchjénna, kʼoa xi tʼatsʼe xi tjíokaona. Ñaki kʼoasʼin tsakakono nga kjaínga tomachjén nga kʼoasʼin nixá nga kuinyakoaa xi tjíomʼe, nga si̱kjaʼaitsjeen je énle Nainá Jesús xi kitso: Tongisa ndaní nga kʼoee kaoni tsa nga chjoé”.
e Romanos 5:1: “Kui nga jetʼa jéená xi totʼatsʼe nga makjainná, tjínná kjoa xi nyʼán tjín tʼatsʼe Niná, xi totʼatsʼe Nainá Jesucristo”.