Jngo choa̱ xi koa̱n chjénngia ngatsʼiaa

Je Noé nʼio nda je choa̱ xi tsakʼéjnaná ngatsʼiaa, xi koa̱n chjénngia ninga sʼa xtiaa kʼoa ninga jekoanjchíngaa. Je Noé nda tsakʼejna ngixko̱n Jeobá kʼoa miyole koan. Jokji tse tsakʼejna ñaki kui kʼoakisʼin josʼin koanmele Jeobá. “Je Noé yaa tsakʼamjekao Niná xi kixi” kʼoa kuinga tse kjoanda tsakʼainile (Gén. 6:9). Je pelíkula xi Niná tsakʼamjekao Noé ʼmi koasenkaoná nga jchaa jósʼin kikao yaole, jméni xi kisʼin kʼianga nda tsakʼejna ngixko̱n Jeobá kʼoa jósʼin chjénngilee jokoankjoan.

Kʼianga jechótsenlee pelíkula jebi si̱jinlee yaoná kjoachjonangi jebi: 1) Jméni xi nʼio chʼaotjín kisʼin kʼa ánkje, kʼoa ʼyáni xi nefilim tsakʼin (Gén. 6:1, 2, 4). 2) Ánni nga nʼio tsʼen koansíni je chjota nga kui nichxin, kʼoa jósʼin kisikjaʼaitsjen Niná nga kʼoakisʼin je chjota (Gén. 6:4-6). 3) Jméni xi tsín koanngóson je Noé kao chjota xi ngikʼa (Gén. 6:22). 4) Jósʼin kinikjeson ngatsʼi chjotatsʼen xi kisʼe kʼia (Gén. 6:17). 5) Jókisʼe je kaxa̱je xi kisinda Noé (Gén. 6:15). 6) Jmésani xá xi nʼio tjínle kjoandosin kisʼin Noé, kʼoa a kinrʼoéle chjota (Mat. 24:38, 39; 2 Ped. 2:5). 7) Jnga jngó jngó koya cho̱ xi tjín, jótjín kisikʼasʼen Noé ya yakaxa̱ (Gén. 7:2, 3, 8, 9). 8) Jótjín nichxin tsakʼa jtsí, kʼoa jótjín nichxin kitsendá Sonʼnde (Gén. 7:11, 12; 8:3, 4). 9) Ánni nga kitjontjaisínile yaole je Noé kao yaniʼyale (Gén. 6:18, 22; 7:5). 10) Jñáni kichosʼejnanʼio je kaxa̱ (Gén. 8:4). 11) Jókoanni tsabe je Noé tsa jekoa̱n kuitjoni ya yakaxa̱ (Gén. 8:6-12). 12) Jméni xi kisʼin Noé nga jekitjoni ya yakaxa̱ (Gén. 8:20-22). 13) Jmé xi tsoyanile je ʼya̱ (Gén. 9:8-16). 14) Jósʼin tsoyanile kʼianga Niná kuitsomakoaa (Gén. 6:9, 22; 7:5). 15) Jméni xi sʼiaan kʼiatsa mená jchaa je Noé ya ʼndenaxó (Mat. 28:19, 20; 1 Ped. 2:21).

Jósʼin basenkaoná je choa̱le Noé, josʼin kixi kitʼale Niná kʼoa josʼin kisitjosonle, nga tosi tonda je Niná kuitsomakoaa kʼoa nga katamakjainná nga koa̱nle kʼoasjentjainá xi choʼndale maa (Gén. 7:1; Prov. 10:16; Heb. 11:7; 2 Ped. 2:9).