Jósʼiaan nga ndasa kʼuínyasoán: katamaná josʼin chja̱koaa tsa ʼyani xi tokʼoechjoaʼaná

Ánni nga nʼio chjísínile nga kʼoasʼiaan. Tikjaʼaitsjenlai tsa jetjínjinli nga jngo kjoaxkón sʼe̱ kʼoa nga nʼio nkjín chjota kjoeson tsa tsín koasjaiʼndele yaole jñani koaikatio. Kʼuínkjajinkonjin je chjota ndainiʼyali. Tonga tsa kʼoakuitsoli nga tsín ale, a tokʼoéjngoní tokuin. Maijin. Kʼoatisʼinni ndʼaibi, nʼio nkjín chjota xi tsín nrʼoé je én xi ʼmiyasoán nga̱ tsín be tsa kjoabitjontjai tje̱nkao. Tsakui nichxin kui kʼoasʼínni nga kjoanikjaojin tjínle kʼianga bichochonlee (Mat. 24:37-39). Kʼoa tsakuije̱ tʼatsʼe énndiso xi tso chjota xi tʼatsaan (Mat. 11:18, 19). Tochale kʼoasʼin síkjaʼaitsjen nga kʼoati chʼao sʼín je relijión xi tiyojiaan josʼín xi ngikʼa (2 Ped. 2:1, 2). Kʼiatsa tsín koa̱nndosinle je chjota nga tosʼa títjon chja̱koaa, alikui tokʼoéjngoaa tokoán.