Kjoafaʼaitsjen xi tsakʼaile chjotale Cristo

SANTIAGO kʼoa kao Judas ndsʼe̱jon koan Jesús kʼoa je Pedro kao Juan pastrole koanni. Nga ño chjota jebi ñato xo̱nkarta kiski xi faʼaitʼa ya Escrituras Griegas Cristianas (je “Nuevo Testamento”), kʼoa jé Niná tsakándiaale jotsakʼé. Nga jngó jngó xo̱n jebi kʼoaʼmi jotsakʼin xi kiski. Kui xá kichjini nga koasenkao je chjotale Cristo nga kixi koaitʼale Niná kʼoa nga kui títjon sikʼéjnantsjai xále Niná.

Jósʼin koakoá kjoamakjainná. Ali tsa toyajintje̱n tíjna nga kuixoán: Makjainna. Machjénní nga kao xáná koakoñá kjoamakjainná. Tojo kitso Santiago: “Je xi makjainná tochajinní, tsa tsín ndatjín xáná” (Santiago 2:26). Je chjota xi jé sínʼiotʼa Niná nga kjoa faʼatojin ngisa matajasa kjoamakjainle. Tonga tjínnele sijé kjoaʼisentokonle Niná kʼoa nga katabʼéjngo kon nga kʼoaile. Kʼiatsa kixi koaitʼale Jeobá, je Jeobá nda sasénle xi tʼatsʼe (Santiago 1:2-6, 12). Je Niná basenkao ngantsjai ʼyani xi kixi fitʼale xi tsín yátsʼi̱n basénle. Kuinga i̱ kitsosíni Santiago: “Tichriantʼalao Niná, kʼia kʼoati je sichriantʼano nga jon” (Santiago 4:8).

Je chjotale Cristo tjínnele sitaja kjoamakjainle ánni nga tsínkui jtsaojinsíni che̱n xi satíobasenle kʼoa nga tsínkui skénngisíni kjoa xi chʼaotjín. Kʼianga tsakʼejna je Judas, nʼio xájndí koanle chjota xi tsakatio kʼoa kuinga i̱ kitsosínile chjotale Cristo: “[Bʼ]eneno nga nʼio sinchjákaosao tʼatsʼe xi makjainná” (Judas 3).

Nga tsje koannginkoaa yaoná. Je Jeobá kui xi mele nga tsje katama choʼndale tojmeni xi sʼin. Je Pedro i̱ kitso: “Tsje katamao josʼin manginkao yaono. Kʼoasʼin tjítʼa xo̱n: Tsje katamao nga jon, nga [an Jeobá] tsjenía” (1 Pedro 1:15, 16). Kʼianga tsje koa̱n tjínnele nga je choa̱le Cristo koaitjenngi tojo kitso je Pedro: “Jméni nga kʼoati jon kuimasínio josʼin tsakʼamjen nga je” (1 Pedro 2:21). Ninga ñʼai ma sakʼoale nga sítjoson kjoatéxomale Niná, xi ngisa chjíle kuinga nda satío “kjoafaʼaitsjen[le]” (1 Pedro 3:16, 17). Je Pedro kʼoakitso nga nʼio machjén nga nda koaikao yaole je chjotale Cristo. Kʼianga kao xále koakoni nga tjíobexkón Niná saʼnda nga kjoaʼaí nichxinle Niná kʼoa kao je sonʼnde chjotse “jña nga tíjnantsjai xi kjoakixi” (2 Pedro 3:11-13).

Nga koakoá kjoatsjoacha. Je Juan i̱ kitso: “Jé Niná xi kjoatjaocha”. Je Jeobá tsakakó nga nʼio tsjoakená kʼianga “kisikasén ʼndíle xi jéentjainá koanle”. Jméni xi tjínnele sʼiaan ñá kʼianga kʼoasʼin tsakakóná kjoatsjoachale Niná. Je Juan i̱ kitsosa: “Jon xi tsjoake̱no, tsa Niná kʼoasʼin koantsjoakená, kʼoati machjénná nga ñá nga tjaocha koaan xíngiaa” (1 Juan 4:8-11). Jngo koya josʼin koakolee kjoatsjoacha xi ngóson sʼin makjainná kuinga nda chjoéyaa kʼoa kʼoainganʼiolee (3 Juan 5-8).

Kʼoa jósʼin bakó je chjotale Cristo nga tsjoake je Jeobá. Je Juan i̱ kitso: “Kʼoasʼin tjaochaa Niná, nga nikjitjosoán kjoatéxomale. Je kjoatéxomale ali ñʼaijin tjín” (1 Juan 5:3; 2 Juan 6). ʼYani xi sítjosonle alikui sicha kjoatsjoachale Niná kʼoa nichxin xi nroaján sʼeele “kjoabijnachon ngantsjai” (Judas 21).

(Yaa yʼangini Santiago, 1 Pedro, 2 Pedro, 1 Juan, 2 Juan, 3 Juan kao Judas.)