ʼYákjoánni je Niná

1. Ánni nga jchaxkónsíñá je Niná.

Je Niná tokʼoa tíjna saʼnda ngasʼa, alikui kitsʼia kjoabijnachonle kʼoa alikuikʼia kjoetʼa. Jé kisinda ngayeje xi tjín (Salmo 90:2). Tʼatsʼe tínroani je énnda chjotse xi faʼaitʼa ya Biblia (1 Timoteo 1:11). Kʼoa mani nga je títsjoáná kjoabijnachon, tojéní xi tjínnená jchaxkoán kʼoa kʼoasʼiaan josʼin mele. Tʼexkiai Apocalipsis 4:11.

2. Jókji je Niná kʼoa jókjoan.

Nisajngojinla chjota xi be jokji Niná nga̱ espírituní. Ngisa nʼio ngʼa tíjna tikʼoajinni ñá (Juan 1:18; 4:24). Tonga koaan jchaa jokjoan je Niná tsa chótsenlee je tsojmi xi kisinda. Tobʼelañá, jotjín koya to xi ma chine kisinda kʼoa jotjín koya naxó xi tsakʼéntje kui bakóyaná nga tsjoakená kʼoa nga nʼio tse kjoafaʼaitsjen tjínle. Kʼoa jokji tse kijna ngʼajmi kao Sonʼnde kui bakóyaná nga nʼio tse nganʼio tjínle. Tʼexkiai Romanos 1:20.

Kʼoati jchaa je Niná tsa kʼoéxkiaa je Biblia, nga̱ yaa tsoyaná jokji kjoanda bakóle je chjota, jme xi sasénle kʼoa jme xi tsín sasénle. Je Biblia kʼoati tsoyaná josʼín Niná kʼianga jme kjoa sʼe, jolani kʼianga sokójéená. Tʼexkiai Salmo 103:7-10.

3. A tjínle jaʼaín je Niná.

Je Jesús i kitso: “Nʼainajin xi tijnai ngʼajmi, kataʼyaxkón jaʼaínli” (Mateo 6:9). Ningalani nʼio nkjín koya josʼin ʼmile Niná, je én jebi kui bʼéjnatsen nga tjínle jaʼaín. Kʼianga kao énná “Jeobá” bixoán, kʼoa kʼoati machjén je xi “Yavé” tso. Kʼoa nga jngó jngó én kjaʼaí kjaʼaísʼin nokjoa jaʼaínle Niná. Tʼexkiai Salmo 83:18 (tjínkʼa Biblia xi ya 82:19 faʼaitʼa).

Nʼio nkjín Biblia kjio jña kitjoxin jaʼaínle Niná kʼoa kui én xi “Niná” kʼoa “Señor” tso kisationgajaonile. Tonga nga sʼa kichji je Biblia ñatola jmi kʼa kisʼetʼa. Kʼoa je Jesús kjitʼa kisichjén jaʼaínle Niná kʼianga kitsoyale chjota. Tʼexkiai Hebreos 2:12.

Chótsenlai je video A tjínle jaʼaín je Niná

4. A mandosinle Niná jmeni xi maná.

Ánni nga títsjoáʼndesíni Niná nga kjoañʼai tichjaʼá kʼiatsa tsjoakená. Tjínkʼa chjota xi kʼoatso nga kjoañʼai síkjaʼáná Niná nga kotʼayakaoná. Tonga alikui kʼoatjín jotso. Tʼexkiai Santiago 1:13.

Je Jeobá títsjoáʼndená nga koa̱n chjoéjiaan je ndiaa xi mená chjoé. Jósʼin kʼoailee kjoanda nga títsjoáná kjoandaí. Kuinga je si̱xálee (Josué 24:15). Tonga nʼio nkjín chjota xi tsín kʼoatjíosʼín, tosa to xínkjín tjíomasíkiʼaon. Kʼoa yaa tínroani nga kʼoasikji kjoañʼai tjín. Je Jeobá aon male nga kʼoatjíosʼín je chjota, nga̱ tsín kixi tíjna jebi. Tʼexkiai Génesis 6:5, 6.

Je Jeobá jeme kjoaʼaxin je chjotatsʼen kʼoa kao jme xi tjíomasʼín. Kʼoa kui kʼoasʼinni nga̱ tsjoakená kʼoa mele nga naskásʼin si̱jchá yaoná. Je Jeobá ali tsa toxkia títsjoáʼndejin nga kjoañʼai tichjaʼá, be anni nga kje faʼáxinsíni. Yaa kjoaʼmiya 8 chótʼayá anni. Tʼexkiai 2 Pedro 2:9 kao 3:7, 13.

5. Jméni xi sʼiaan nga koa̱nchriantʼalee Niná.

Je Jeobá sʼínná kuenta nga jngó jngoá kʼoa kʼoatsoná nga kʼoétsʼoalee ánni nga koa̱nchriantʼasínilee (Salmo 65:2; 145:18). Je Jeobá tíjnanda nga síchatʼaná kʼoa bení jokji bʼenelee yaoná nga kʼoanʼia josʼin mele, ninga likui kʼoakjoansʼin bitjoson sakʼoaná. Koaan miyole koaan je Niná ningalani chjotajée maa. Tʼexkiai Salmo 103:12-14 kao Santiago 4:8.

Mani nga je Niná kitsjoaná kjoabijnachon, tojéní xi machjén nga ngisa tsjoacha koaan tikʼoajinni toʼyani (Marcos 12:30). Kʼoa jósʼin koakoá nga tsjoachaa je Niná. Kʼiaa nga chótʼayá xi tʼatsʼe kʼoa si̱tjosoán kjoatéxomale. Tsa kʼoasʼiaan, ngisa koa̱nchriantʼalee. Tʼexkiai 1 Timoteo 2:4 kao 1 Juan 5:3.