Jósʼiaan nga ndasa kʼuínyasoán: ya jña negosio tjín

Ánni nga nʼio chjísínile nga kʼoasʼiaan. Ngisa nda nga tosa ya mangínkʼinyasoán ya jñani tjíosíxá je chjota nga̱ nʼio nkjín xi síxá bʼajnda nichxin. Tse kjoatsjoa tjenkao nga ya ʼmiyasoán ya jña negosio tjín kʼoa ndasʼin bichómani, nga̱ tsaojinñá je chjota kʼoa je xi ya síxá ndʼé síkao je xi ya bichó nga̱ kʼoasʼin síkjaʼaitsjen nga tjín xi koatse. Kʼianga ngisasa nda kuichomani nga sa̱kóyason ya jña negosio tjín, je xi ya tsoyason tjínnele skósonnile josʼin kjoakao je chjota kʼoa jokjoáyo (2 Cor. 6:3). Je superintendente xi tsʼe servicio nʼio kuenta sʼin jókji tse sakóyasonni ya jña negosio tjín kʼoa ʼyáni xi ya bakóyason.

Jókoa̱n sʼiaan:

Tongini chótʼayá jme xi kʼuínlee je chjota. Tsa nʼio tse chja̱koaa je chjota xi ya síxá tsakui nichxin likui tikjoakaonajmíniná xi ngindia.
Ngisa nda nga kʼia koanngínkʼinyasoán ya jña negosio tjín kʼianga choa chjota tjín, jolani kʼianga tosʼa tjíokjoxʼá je negosio.
Je títjon chja̱kaonajmiá je xi kjinele negosio kʼoa ndʼé si̱koaa. Koaan i̱ kʼuínlee: “I tichjakaonajmí ngotjuijin je chjota i̱ tʼaxále nga̱ tosa kʼoasʼin tsaojinjin”. Kʼoailee tsa jngo tratado, tsa rebista kʼoa tsa kjaʼaísa xo̱n xi kichʼá kʼoa tongotjo chja̱kaonajmiá. Kʼoa alikui kui si̱kʼaxki̱lee nga koa̱n tsjoá choa̱ tao̱n xi tʼatsʼe je xo̱n xi tifayolee ánni nga tsín kʼoasʼin katasíkjaʼaitsjensíni nga xo̱n tibatenaa, tokʼiakjoán nga koa̱n kʼoakʼuínlee kʼiatsa kui skónanginá.
Kʼiatsa ndʼé sikaoná je xi kjinele negosio koaan kʼoakʼuínlee tsa koa̱n chja̱kaonajmí ngotjoá je chjota xi ngikʼa xi kʼoati ya síxá. Tjíokʼa negosio jñani kʼoati koa̱n si̱jéʼndee tsa koa̱n si̱káyo kʼaa je xo̱n xi kichʼá ya jñani kjen je chjota xi ya síxá.
Chósonnilee josʼiaan. Tobʼelañá, kʼiatsa tsín ale je chjota kʼoa tsa je tífákaonajmí jngo chjota xi tjín xi kabichókatse, koaan kʼia kuinókjoakoaa nga jekoa̱nʼale.

I̱ tʼiain sá jebi:

Je Nichxin nga chotʼayajtíon Énle Niná ya niʼyano koaan kʼoasʼianchoyao josʼin chja̱kao je chjota kʼiatsa ya kʼoakaono kʼuínyason ya jña negosio tjín.