A tíbasenkaoná je kjoachjine xi títsjoáná Jeobá
1. Jméni xi tísʼín je Jeobá nichxin xi tiyoaa ndʼaibi.
1 Je Jeobá, je xi nʼio nda bakóya, nʼio mandosinle nga katanichjine je choʼndale (Is. 30:20). Nichxin xi tiyoaa ndʼaibi, je Jeobá tíbándiaa nga kʼoasʼin nʼio nkjín chjota tjíonichjine. Tojo kitso je Isaías, nʼio nkjín miyón chjota xi tjío ngakjijnda Sonʼnde xi tjíobichó ya “nindo xi tíjnason niʼyale Jeobá”, xi tsonile, je relijión xi kixi (Is. 2:2). Ánni. Kuinga ya tjíoʼmiyale tʼatsʼe ndiaale Niná (Is. 2:3).
2. Jósʼin tíbasenkaoli je kjoachjine xi títsjoá je Jeobá.
2 Nʼio ndasʼin tínichjinená. Nʼio tjíobinyakaoná josʼin tísíchjinená je Jeobá. Tobʼelañá, ʼyañá je jaʼaínle kʼoa nga mandosinle xi tʼatsaan (Sal. 83:18; 1 Ped. 5:6, 7). Kʼoati tíbakóyaná tʼatsʼe xi nʼio chjonangilee yaoná jolani: Ánni nga kjoañʼai chjaʼasíñá kʼoa biyasíñá. Jósʼin nga tsjoa sʼe̱ tokoán. Jmé xá tiyoñá. Tonga ali tsa tokuijin xi tíbakóyaná je Jeobá, kʼoati títsoyaná nga tsje koanngínkoaa yaoná, nga̱ kui xi koasenkaoná nga nda kuitjo tojmeni xi sʼiaan (Jos. 1:8).
3. Jótjíosʼín kʼa je jtín nga tjíobinyakao je xi tsín male kji kʼoa bʼéxkia, kʼoa jméni xi sʼin kʼiatsa ʼyani xi mele nga kʼuínyale.
3 Je Jeobá kʼoati tísíchjine je chjota xi tsín male kji kʼoa bʼéxkia. Nkjín jtín xi kʼoasʼin bʼéndajin nga kataʼmiya josʼin sʼexkia kʼoa josʼin chji. Kʼoa jenʼio nkjín ndsʼee kʼoa kao chjota xi jebichó kjoajtín tjíobinyakao. Kʼiatsa tjíokʼa xi tsín male kji kʼoa bʼéxkia, je xi chjotajchínga sʼin tjío koaan kʼoendajin nga kataʼmiyale. Kui xá kʼoasʼin sʼendajinni “nga je xi bichó katamale josʼin sʼexkia kʼoa josʼin chji, ánsíni nga koa̱nnile kʼoexkia je Biblia kʼoa nga koakoyale Énle Niná xi kjaʼaí” (km-S 10/11 p. 4; be-S p. 21-23). Kʼiatsa nda kjuintjenngiaa josʼin tísíchjinená je Jeobá nda kuiyoaa ndʼaibi kʼoa kʼoati nda kuiyoaa ya sonʼnde chjotse (Sal. 119:105; Juan 17:3).