Je Kjoabichile Nainá: jngo kjoanikjaʼaitsjenya xi bʼasjengʼa Niná

JE Cristo kʼoasʼin tsakʼénele je chjotale nga sikjaʼaitsjenya kjoabiyale. Kjoanikjaʼaitsjenya jebi kʼoati “cenale Nainá” ʼmi (1 Corintios 11:20). Ánni nga kʼoasikji kjoandosin tjínsínile. Kʼiáni tjínnele sʼe̱jna kʼoa jósʼin.

Je Jesucristo kʼiaa tsakʼéjnabasen kjoabichi jebi nga nó 33 nitje̱n nga bʼasje sʼuí Paxko je chjota judío. Je sʼuí Paxko tojngokʼa sʼejna nga xki̱ nó nga 14 sá nisán. Je sá nisán kʼiaa fitsʼia nga jefaʼato je xomana xi títjon xi tsʼe sá marzo nga tokjinjio je sá. Je chjota judío teño nichxin bʼéxki̱ saʼnda nga fichó sʼuí Paxko, kʼianga jekantjai tsʼuí.

Nga kʼia, je Jesús tsakʼéjnaa sʼuí Paxko kao pastrole. Xijekoan, kisikitjoo je Judas Iscariote kʼoa kʼiaa tsakʼéjnabasen je Kjoabichile Nainá. Je kjoabichi jebi kui kisʼejnangajaonile je sʼuí Paxko xi bʼéjna chjota judío kʼoa kuinga toñandia tjínnesínile sʼe̱jna nga xki̱ nó.

Je libro xi kiski Mateo kʼoasʼin bʼéyanajmí jmeni xi koan, itso: “Jesús kiskoé nioxtila, kisichikontʼain, kisixkoa̱, kitsjoale chjotale, kʼoakitso: Chjóao, ticho, jebi yaonaní. Kʼia kiskoé jngo cho̱tsín, kitsjoa kjoanda, kitsjoale, kitso: Tʼio ngatsʼio. Jebi njínnaní xi tsʼe kjoachjotse xi kisʼenʼio, xi xíjten xi tʼatsʼe xi nkjín chjota, jméni nga cha̱tʼanile jéele” (Mateo 26:26-28).

Tjínkʼa chjota xi kʼoasʼin makjainle nga ñaki yaole kao njínle kisikʼóya Jesús je nioxtila kao bino. Tonga je yaole Jesús tojo kjijngo nga kitsjoale nioxtila je pastrole. A koaan kʼoakuixoán nga ñaki yaole Jesús xi kiskine je pastro kʼoa nga ñaki njínle xi tsakʼi. Maijin. Nga̱ tsa kʼoalani kisʼin yaole chjotajin xi kiskine kʼoa kjoatéxomale Ninájin jaʼatone (Génesis 9:3, 4; Levítico 17:10). Tojo tso Lucas 22:20, Jesús kitso: “Je cho̱tsínbi jéní xi kjoachjotse xi bʼendakoa kao njínna xi xíjten tʼatsaon”. Kʼoa a ñaki kui koan je cho̱tsín je kjoachjotse xi tsakʼéndakao Jesús je pastrole. Maijin. Nga̱ je Jesús jngo kjoa tsakʼéndajin kao pastrole, ali tsa jngojin tsojmi xi matsen.

Kuinga je nioxtila kao je bino totsoyanile. Je nioxtila kui tsoyanile je yao tsjele Cristo. Je nioxtila xi kisichjén Jesús kui xi kinjenngile nga jetsakjen sʼuí Paxko, xi tsín naʼyo̱san mandani (Éxodo 12:8). Je naʼyo̱san sakʼoaa jée sʼin tsoyanile ya Biblia. Kuinga je nioxtila xi kisichjén Jesús kui tsoyanile yao tsjele xi kitsjoantjainá, jngo yao xi tsín jme jée tjínle (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Je binojko kui tsoyanile je njínle Jesús, kʼoa njín jebi kao kui kisʼenʼioni je kjoasʼendajin chjotse. Jesús kʼoakitso nga xíjten njínle “jméni nga cha̱tʼanile jéele” chjota. Totʼatsʼee njínle Jesús nga tsje batio kʼasíni chjota ngixko̱n Jeobá kʼoa nga faʼasʼensíni kjoasʼendajin chjotse (Hebreos 9:14; 10:16, 17). Kʼoa xi totʼatsʼe kjoasʼendajin jebi, jngo siento kao ñachanño jmi chjotakixi koai ya ngʼajmi, xi rey kʼoa naʼmi koa̱n kʼoa nga kʼoakoa̱n tse kjoanichikontʼain sʼe̱le ngatsʼi chjota (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

ʼYáni xi tiʼndele nga koa̱n koakjen je nioxtila kʼoa nga skʼuí je bino kʼianga sʼejna je Kjoabichile Nainá. Tojosísʼin jekaʼyaa, tojé xi ya tjíojin je kjoa xi kisʼendajin chjotse, xi tsonile, je xi ya koai ngʼajmi. Jé nganʼiotsjele Niná xobʼé kon nga je kitjoejin nga rey koa̱n ya ngʼajmi (Romanos 8:16). Chjota jebi kʼoati ya tjíojin je kjoa xi kisʼendajin xi tʼatsʼe Chjotaxále Niná xi je Jesús tsakʼéndajinkao (Lucas 22:29).

Tonga jméni xi sʼín je chjota xi koyale nga i̱ koatio i̱ Sonʼnde nga jenaskánakoa̱nchon. Tojosʼin tsakʼéne Jesús, finí nga sʼejna Kjoabichile Nainá kʼoa kʼoasʼin bakóni kjoaxkóntokon ninga tsínlani kjen nioxtila kʼoa ʼbi je bino xi machjén. Je testigole Jeobá tojngokʼa bʼéjna je Kjoabichile Nainá nga xki̱ nó, nga jekantjai tsʼuí kʼianga fitsʼia 14 sá nisán. Ninga tojngo jaosa jmi mani xi tjío i̱ Sonʼnde xi kʼoatso nga ya koai ngʼajmi, ngatsʼi je chjotale Cristo nʼio bechjí kjoanikjaʼaitsjenya jebi. Jngo nichxin nga ma síkjaʼaitsjenjin jokji kjoatsjoacha tsakakóná je Niná Jeobá kʼoa kao Jesucristo (Juan 3:16).