Jmé énnda chjotse xi tíbájinkonná Niná

1. Jmé énnda chjotse xi tíbájinkonná Niná.

Je Niná kui xi mele nga naskásʼin katabatio je chjota. Kʼoa kuinga kisindani ngayeje xi tjín i̱ Sonʼnde nga̱ tsjoakená. Jeme kjoaʼaxin jmeni xi kjoañʼai síkjaʼáná ánni nga nda kuiyosíñá nichxin xi nroaján. Tʼexkiai 1 Timoteo 6:19.

Nijngojinla chjotaxá xi kjimale tífaʼáxin kjoatsʼen, chʼin kao kjoabiya. Tonga je Niná nʼio nda tso énnda chjotse xi tíbájinkonná, kʼoatso nga jeme kjoaʼaxin ngatsʼi chjotaxá sonʼnde kʼoa nga je Jesús koatexomason Sonʼnde. Je choʼndale Niná nyʼán koatio kʼoa likui tiʼya xi chʼin sʼe̱nile. Tʼexkiai Isaías 25:8; 33:24, kao Daniel 2:44.

2. Ánni nga nʼio maxátíyasínile nga sʼe̱jinkon chjota.

Je Niná kjoaʼaxin ngatsʼi je chjotatsʼen ánni nga tsín ʼya xi tikjoañʼai kjoaʼasíni (Sofonías 2:3). Tonga kʼiáni kʼoasʼin. Je Biblia tongini kʼoakitso nga nʼio tse kjoa sʼe̱ nichxin xi tiyoaa ndʼaibi. Kʼoa nga jekʼoakjima kui xi bakó nga jeme kjoaʼaxin Niná je chjotatsʼen. Tʼexkiai 2 Timoteo 3:1-5.

3. Jméni xi sʼiaan.

Machjénní nga chótʼayá je Biblia ánni nga jchasíñá xi tʼatsʼe Niná. Je Énle Niná kʼoasʼin mangóson joni tsa jngo karta xi síkasénle jngo nʼai je ʼndíxtile. Yaa kʼoatsoná jósʼin nda kuiyoaa ndʼaibi kʼoa jméni xi sʼiaan kʼianga so̱koná kjoabijnachon xi tsínkʼia fetʼa. Tonga alikui tosa̱sénle ngatsʼi je chjota nga Biblia chótʼayai. Tonga ali bʼaiʼndejin nga kui sikinroajen tokuin, nga̱ nʼio tse kjoanichikontʼain sʼe̱li nichxin xi nroaján kʼiatsa tosi tonda chótʼayai Énle Niná. Tʼexkiai Proverbios 29:25 kao Apocalipsis 14:6, 7.