Je Jesús ya tsakakóya jña tíjna jngo nindo

CHÓTSENLALAI Jesús nga tíjnasí ibi. Ya tíbakóyale ngatsʼi chjota xokjoan ya nindo xi tíjna ya Galilea. Kʼoa je xi yasí tjíotʼachrianle jéní chjota tjenngile. Tejao mani xi kiskoejin nga pastro koa̱n. Jé pastro xi ngisa tsakʼetsomakao Jesús. A ʼyaní jótsakʼin ngatsʼi.

Je xi títjon, je Simón Pedro kʼoa kao ndsʼe xi Andrés tsakʼin. Xijema, je Jacobo (Santiago) kʼoa kao ndsʼe xi Juan tsakʼin. Kʼoati tsakʼejna ijngo pastro xi Jacobo (Santiago) tsakʼin, kʼoa ijngosa xi Simón tsakʼin. Jao pastro xi Judas tsakʼin. Jngo xi Judas Iscariote tsakʼin, kʼoa xi ijngo Judas (Lebeo) kʼoati Tadeo tsakʼin. Kʼoati tíjna je Felipe kʼoa kao Natanael (xi kʼoati Bartolomé tsakʼin), kʼoa je Mateo kao Tomás.

Kʼianga je jaʼaini Samaria, kʼia tsakʼétsʼiakao títjon Jesús nga kitsoyason, kʼoa kitso: “Je machrianle nga koatexoma je Rey xi kiskoejin Niná”. A ʼyaní jméni xi tsoyanile jebi. Kui tsoyanile nga Jesús kiskoejin Niná nga rey koa̱n kʼoa nga ya tjen ngʼajmi koatexomani kʼoa nga kjoanyʼán kjoaʼaikao i̱ Sonʼnde. Rey jebi sonʼndenaxó sikao i̱ Sonʼnde.

Je Jesús kui tíbakóyale ibi je chjota josʼin koatexoma Niná i̱ Sonʼnde. Títsole: “Isʼin tʼetsʼoao: Nʼainajin xi tijnai ngʼajmi, kataʼyaxkón jaʼainli. Katanroa katéxoma je rey xi ji kichjoejin, kʼoakatama josʼin meli, joni ya ngʼajmi kʼoati katama i̱ Sonʼnde”. Nʼio nkjín chjota xi “Kjoabʼetsʼoale Nainá” tsole kjoabʼetsʼoa jebi. Kʼoati tjín xi “Padrenuestro” tsole. A koa̱n kʼoasí ngayeje kjoabʼetsʼoa jebi.

Jesús kʼoati kitsoyale chjota josʼin koaikao xínkjín. Kitsole: “Josʼin meli nga sikaoli je chjota kʼoatisʼin tikoai tsanda ji”. A tsí tsjoa mali kʼianga nda síkaoli je chjota. Kuinga nda sikaosíniñá je chjota. ¡Nʼiojin nda koa̱nchon ya sonʼndenaxó kʼianga kʼoasʼin koatiokao xínkjín ngatsʼi chjota! A tsí jaon.