Nkjín chjota kisikjen Jesús

TJÍN jmeni xi nʼio chʼaokoan. Je Juan Bautista kinikʼien. Je Herodías, chjoónle rey, nʼio jtike koan je Juan. Kʼoa tsakásjaile jokisʼin nga tsakʼéne je rey nga katabichasin Juan.

Kʼianga je kisʼejinle Jesús xi tʼatsʼe jebi, ba koanle. Ya ki jngo ʼnde jñani toje tojngo tsakʼejna. Tonga kitjenngile je chjota. Kʼianga tsabe Jesús je chjotankjín, koanmake. Kuinga, tsakakóyasínile josʼin koatexoma Niná i̱ Sonʼnde, kʼoa kisindaya je xi chʼin tjínle.

Nga je kjimaʼña kichokonle chjota tjenngile kʼoa kitsole: “Je kjimajnjio, kʼoa likui jme xi tjín i̱ ʼnde jebi. Kʼoatʼinlai nga katafi je chjota, ánni nga koaisíni ya naxinandáʼndí, kʼoa katabatsele yaole jme xi skine”.

Kitso Jesús: “Likui tjínnele nga koai. Jon tʼailao jmeni xi skine”. Xijekoan, je Jesús kiskoʼa Felipe kʼoa kitsole: “Jñáni kuindálee tsojmi xi skine chjota xosichon”.

Kitso Felipe: “Nʼiojin tse taon sʼenginá nga kuindá je tsojmi kʼianga soko choa choale xi skine”. Andrés kitso: “Je ti xi tíjna ibi, aon nioxtila kʼoa jao jti̱ yʼa. A likuijin koa̱nnile chjota xosichon”.

Jesús kitso: “Kʼoatʼinlao je chjota nga ya katabatiojin ya jinjñá”. Xijekoan, je Jesús kitsjoale kjoanda je Niná, kʼoa kisixkoa̱ya. Je chjota tjenngile kitsjoale je nioxtila kʼoa kao jti̱ ngatsʼi je chjota. Aon jmi mani xi xʼin, kʼoa kʼoati jmi mani je yánchjín kao xtiʼndí. Tsakjen ngatsʼi saʼnda nga koanski. ¡Kʼianga je tsakʼéxkó je chjota tjenngile je xi kinjengi, tejao ni̱si̱n koansonni!

Je Jesús kʼoakitsole chjota tjenngile nga jngo chitso katafaʼasʼen kʼoa nga katafaʼato xingoatʼa ndáchikon xi kijna ya Galilea. Kʼianga kui nitjen ntjao̱ jaʼajin ndáchikon, kʼoa je xóle nandá ngaʼi ngaján kisikao je chitso. Je chjota tjenngile nʼio kitsokjon. Xijekoan, kʼianga je nitjen, tjín xi tsabe xi ya tsoʼbason nandá xi ya tífi jñani tjío. Ñaki kitsokjon kʼoa kiskiʼndáxá, nga tsín be jméni xokji.

Kitso Jesús: “Ali nokjonjion. ¡Anña!” Tojo likui koankjainle. Kuinga kitsosíni Pedro: “Ji Nai, tsa jiní, kʼoatʼinnai nga kjuikonle ya sonnandá”. Jesús kitsole: “¡Nroai!” ¡Kʼoa Pedro kitjojenle chitso kʼoa tsakʼamjeson nandá! Tonga xi koan kitsokjon kʼoa kiskasʼenjinndá, tonga Jesús tsakʼasjentjai.

Xijekoan, je Jesús nʼio nkjín jmi chjota ti kisikjenngáni. Nga kʼia ñato mani je nioxtila kʼoa tojngo jao mani jti̱ xi ʼndí kjoan tjíole. Kʼoati kisokongánile ngatsʼi je chjota. ¡Jótonda nga ʼya josʼin kisisinle chjota je Jesús! ¡Kʼianga je koatexoma, a lijme xi ti sikjaojinñá!