Nga kjoetʼa ngayeje kjoatsʼen

JMÉNI xi tiʼyai ibi. Jaon, jngo jtín mani chjota kjoajchán xi naxín chxoa tjíosonle. Tonga chótsenlalai jñáni tjíonroani. ¡Je naxín ñaki nʼio tjíonroajin yojbi ya ngʼajmi! A tjín xótse naxín ya ngʼajmi.

Majain, a litsa ñaki naxínjin xokjoan. Kui kʼoabixónsíñá nga tsín koa̱n tókajin naxín ya jinyojbi, a tsí mai. Tonga ya Biblia síkʼaxki naxín xi tsʼe ngʼajmi. A ʼyaní ánni.

Kuinga nʼio koanchjén naxín nichxin kjoatse nga kisatio kjoajchán. Kʼoa kuinga kʼoatsosíni Biblia nga tjío chjota xi naxín tjíosonle xi ya nroajenni ngʼajmi nga kui xi bakó nga jngo kjoajchán tíjnale Niná kao chjota xi tjín Sonʼnde. Jóʼmi kjoajchán jebi. Armagedón ʼmi, kʼoa sikjeson ngayeje kjoatsʼen xi tjín Sonʼnde.

Jé Jesús koandia kjoajchán xi Armagedón ʼmi. A faʼaitsjenli kʼianga Niná jéná kiskoejin Jesús nga rey koa̱n kʼoa nga jé koatéxoma saʼnda tjen ngʼajmi. Kuinga corona tjíasínile Jesús. Kʼoa je kicha espada xi yʼasí kui bakó nga sikʼien ngatsʼi je chjota kontrale Niná. A to katamaxkónná kʼianga sikjeson Niná ngatsʼi je chjota tsʼen.

Chótsenlalai Kjoaʼmiya 10. Jméni xi kjima. Jaon, Jtsínʼio kisikjeson je chjota tsʼen. ʼYáni xi jaʼaikao Jtsínʼio jebi. Je Niná Jeobá. Kʼoa chótsenlalai ya Kjoaʼmiya 15. Jméni xi kjima. Lʼí kisikjeni Jeobá ya Sodoma kao Gomorra.

Yala chótsenlai Kjoaʼmiya 33. Chótsenlalai jméni xi kjimale je naxínle kao carretale chjota kjoajchán egipcio. ʼYáni xokisikao nga kʼoasʼin nandá kisʼejnajtsaneni. Jé Jeobá. Kui kʼoakisikaosíni nga tsakʼasjentjai je naxinandále. Chótsenlalai ya Kjoaʼmiya 36 kao 76. Kui ʼya ibi nga saʼnda kitsjoaʼnde Jeobá nga kinikjeson naxinandále kʼianga chʼao kisʼin.

Kuinga tsín to katamaxkónsíniná kʼianga Jeobá sikasén je chjota kjoajchánle xi tjío ngʼajmi nga kjoaʼaxín ngayeje kjoatsʼen xi tjín Sonʼnde. Jméni xi koa̱n nga koa̱nskanni. Titjákaolai xi fini kʼoa kataʼyala.