KJOACHJONANGI 6
Jósʼian nga tsín tsjoaʼnde nga jme xi kʼoenena xi ngikʼa
JÓSʼIAIN TSA JILANI
Tikjaʼaitsjenlai jebi: Je Brian ñaki tsokjón kʼianga be nga jao xti xi ñatjen tjíotsoma skuela nroánrʼoe. Xomana jebi jekjoan jao kʼa nga na̱jno̱ tíbʼaitʼale kʼoa i janni kʼa nga kʼoatíʼmile.
Jngo xi i̱ tsole:
“A toji kanroai, jáon, ánni nga tsín koa̱ntsʼesíni”.
Tjín xi bʼasje ya xijtsale kʼoa jé Brian tsjoále.
Je Brian be je na̱jno̱ xi yʼatonntsja xti jebi kʼoa ngisa tinʼio tsokjónngáni.
“Majain, jená kʼoakixinle nga tsín. . . ”.
Je ti xi ijngo itsole: “Ánni nga kainili, jmé xi nokjonlai”.
“Mai, ali tsokjonjian” tso chʼinxkón je Brian.
Ti jebi tsoasin itsole nga nchja̱ndʼéle: “Chjoai nga̱ to na̱jno̱ní”.
Ti xi títjon tsjoátʼale je na̱jno̱ kʼoa itso chéle: “Alikui ʼya xi jokʼuínlaijin. Toñá katasʼejinná”.
Jókinʼiai tsa jilani je Brian.
TINKJÍNLAI TOKUIN
A be jmeni xi tjíomasʼín je xti xi ñatjen tjíotsoma skuela je Brian. A ñaki je xi kʼoatjío kon nga kʼoatjíosʼínni. Tochale tsa mai. Tochale tokui kʼoasʼínni nga kʼoasʼín xi ngikʼa. Kui xi mele nga katasímiyo xi ngikʼa kʼoa kuinga to tsjoáʼndesíni nga je xi ngikʼa kʼoakatatso josʼin.
Tsa jilani xi kʼoakjimatʼain, jósʼiain kʼoa a nʼio kuijnalai tsa ʼya xi tjín xi kʼoeneli nga jme xi sʼiain.
TONGINI TIJNANDAI
Je Biblia itso: “Je xi sínkjínle kon be jmeni xi xkón tíjna kʼoa bʼejnaʼmale, tonga je xi tsínle kjoafaʼaitsjen alikui binya kʼoa kjoa tsaojin” (Proverbios 22:3).
Sakʼoaa tongini ʼyaa jmeni xi kjoa sikʼéjnajinná. Tikjaʼaitsjenlai tsa yandiaa tjenyai kʼoa jngo jtín xti xi na̱jno̱ tjíokjen jchai. Tsa tongini si̱kjaʼaitsjain nga jekui kjoa tijnajin, jchaní josʼiain..
TIKJAʼAITSJAIN
Je Biblia itso: “Katasʼeno kjoafaʼaitsjen xi nda tjín” (1 Pedro 3:16).
Chjónangilai yaoli: “Jósʼe̱ tokoan tsa tsjoaʼnde nga kui kʼoasʼian jmeni xi sʼín xi ngikʼa”. Tochale simiyo choatseli je xti xi ñatjen ʼmi skuela. Tonga jósʼe̱ tokuin nga koa̱nskanni. A tokui kʼoasʼianni nga katasasénle xti xíngi xi tʼatsi kʼoa si̱chai ngayeje kjoanda xi tjínli (Éxodo 23:2).
CHJOÉJIN JOSʼIAIN
Je Biblia itso: “Je xi chjine kosonnile josʼín kʼoa xin bʼejnale xi chʼaotjín” (Proverbios 14:16).
Bichóka nichxin nga ñá chjoéjiaan jmeni xi mená sʼiaan ni nda kuichotsjoá kʼoa ni mai. Ya Biblia síkʼaxki je chjota xi kui kiskoejin xi ndatjín, jolani tsa José, Job kao Jesús. Tonga kʼoati síkʼaxki je chjota xi kui kiskoejin xi chʼaotjín, jolani tsa Caín, Esaú kao Judas. Kʼoa ji jósʼiain.
Je Biblia itso: “Nʼio tangíntʼalao xi nda tjín” (Romanos 12:9). Kʼiatsa jetongini kinikjaʼaitsjain josʼin kuichomani jmeni xi sʼiain kʼoa tsa jekichjoejin jmeni xi sʼiain, ngisa choa ñʼai koa̱nli nga kʼoakʼuínlai je xti xíngi jotjín tokuin. Kʼoa kjoanda tsini.
Alikuijin nʼio nikjáojin, alikui tsa nʼio síxkón kʼuínlai je xti xíngi. MAI, totʼinlai. Kʼoati koa̱n kʼoakʼuínkixilai nga tsín si̱kʼantjaiyai kjoafaʼaitsjenli. Koaan i̱ kʼuínlai:
“Jeʼyai nga tsín kʼoasʼian”.
“Alikui kʼoasʼian”.
“Jeʼyai josʼin sikjaʼaitsjen”.
Je xi machjén kuinga kjitʼanangi kuinókjoai kʼoa nga tsín kuinókjuin. Kʼiatsa kʼoasʼiain, jchaní nga tsín jme xi tikʼoenenili je xti xíngi.
JÓSʼIAN KʼIATSA ʼYA XI SKOE̱SINNA
Kʼiatsa kui kʼoasʼiain jmeni xi bʼéneli je xti xi ñatjen ʼmi skuela to jngoyale robot skoe̱konli
Tsakui nichxin je xti xíngi kjoasoa sikʼéjnajinli. Tsa i̱ kuitsoli: “Ánni nga kainili. A nokjonní”. Kʼoatsole xínkjín xti kʼianga tjín xi bʼénele nga sʼin. Jókoa̱n sʼiain. Jaola koya kataʼyaa jokoa̱n sʼiain:
To tʼejngoʼai. Koaan i̱sí: “Xi kjoaixi tsokjonña”. Kʼoa tʼinyalai anni.
Tʼinyalai jotjínni. Kʼoatʼinlai ánni nga tsín kʼoanʼiani kʼoa i̱ tʼinlai: “Jngo chjota xi nda síkjaʼaitsjen joni tsa ji, alikuijin na̱jno̱ skén”.
Kʼiatsa tosi tonda nʼio bʼéneli nga tjín xi sʼiain je xti xíngi, tosa totʼin. Nga̱ tsa tosi tonda ya kuijnai ngisa nʼiosa kʼoeneli. Kʼianga kuisenxinlai tibakoní nga ji chjoéjin jmeni xi meli sʼiain.
Xi kjoaixi, toxá sʼeeni chjota xi kʼoeneli nga jme xi sʼiain. Tonga koaan ji chjoéjin jmeni xi meli sʼiain, kʼianga ñaki kʼoakʼuínlai josʼin nikjaʼaitsjain alikui ʼya xi kjoanʼio kʼoeneli. Nga̱ ji xi síni jmeni xi meli sʼiain (Josué 24:15).