Je Niná tjasjao kʼianga ndasʼin kuiyokao xíngio

Jé Jeobáa kisikixan je chjoón kao xʼin xi títjon tsakatio. Je Biblia kʼoatso kʼianga je Niná kisinda je chjoón kʼoa nga ya kikaole je Adán. Je Adán nʼio tsjoa kisʼele kʼoa i kitso: “Jebi ñaki nindalení nindana kʼoa ñaki yaolení yaona” (Génesis 2:22, 23). Je Jeobá tojo kui xi mele nga tsjoa katasatío kon xi jechixan.

Kʼianga sʼa bixan je chjota tsakui nichxin kʼoasʼin síkjaʼaitsjen nga ñaki ndasʼin koatio.b Tonga toxá sʼenile kjoa ninga je xi ngisasa nʼio tsjoake xínkjín (1 Corintios 7:28). I̱ foyeto jebi nkjín kjoafaʼaitsjen faʼaitʼa xi tsʼe Biblia. Kʼiatsa si̱tjoson kjoafaʼaitsjen jebi, ngisa tsjoa sa̱tío tokon nga tiyokao xíngio kʼoa ngisa nda kuiyo ya yaniʼyano (Salmo 19:8-11).

1 TITJOSUIN XÁ XI KJINELI TOJOSʼIN TJÍNNDAJINLE JEOBÁ

JE BIBLIA ITSO: Je ngʼajko̱le yaniʼya jéní xi xʼin (Efesios 5:23).

Kʼiatsa jetjínli chjoón, je Jeobá kʼoatso nga tjao katamali ʼndíchjoónli (1 Pedro 3:7). Kui xá kisindani nga koasenkaoli, kʼoa kui xi mele nga jchaxkuín kʼoa nga tsjoacha koai̱n (Génesis 2:18). Tjínnele nga nʼio tsjoacha koai̱n kʼoa nga ngisa kuenta sʼiain jmeni xi mandosinle chjoónli tikʼoajinni ji (Efesios 5:25-29).

Kʼiatsa jetjínli xʼin, je Jeobá kui síjéli nga xkón jchai kʼoa nga kuisenkoai jme xá xi kjinele (1 Corintios 11:3; Efesios 5:33). Tʼainganʼiolai kʼianga jme xi sʼín kʼoa kao kjoatsjoa tisenkoai (Colosenses 3:18). Kʼiatsa kʼoasʼiain nʼio chjí skoe̱konli je xʼinli kʼoa kao Jeobá (1 Pedro 3:1-6).

KOAAN I̱ SʼIAIN:

• Chjónangilai je chjoónli jmeni xi koa̱n sʼiain nga ngisa sa̱sénle xi tʼatsi. Nda tinóʼyalai jmeni xi kuitsoli kʼoa tʼenelai yaoli nga kʼoatʼiain jokuitsoli

• Tsejta katamai. Tse bichómani nga ʼyaa jmeni xi tsjoa bʼé kon xi ijngo kʼoa nga kui kʼoanʼia

2 TAKUI NGA MANDOSIN KJOAIXILI JOTJÍN KON

JE BIBLIA ITSO: Nʼio chjíle nga kuenta sʼiain jmeni xi mandosinle je chjoónli (Filipenses 2:3, 4). Tjao katamali chjoónli, nga̱ je Jeobá kʼoatsoná nga ndʼé katamaa ngantsjai (2 Timoteo 2:24). Chósonnilai josʼin kuinókjoai. Je Biblia itso: “Je énle chjota xi tsín síkjaʼaitsjen josʼin nchja̱ kʼoama joni tsa ki̱cha̱ tíbʼésʼenjin yaoná. Tonga je ni̱je̱n chjota xi chjine síndayaná” (Proverbios 12:18). Je xi koasenkaoli nga ndʼé tso én xi kuinókjoai kui je nganʼiotsjele Jeobá (Gálatas 5:22, 23; Colosenses 4:6).

KOAAN I̱ SʼIAIN:

• Kʼiatsa kui cho̱bayaño xi nʼio tjínle kjoandosin, tongini tʼetsʼoalai Niná ánni nga nyʼán katasʼeni ni̱ma̱li kʼoa nga kuinóʼyai jmeni xi kuitsoli je chjoónli kʼoa nga tsín tokoa̱njtili

• Nda tikjaʼaitsjain josʼin kuinókjoai kʼoa josí

3 TIKJAʼAITSJAIN NGA TOJNGO YAO MAÑO NGA JAO

JE BIBLIA ITSO: Kʼianga jebixan jngo chjoón jngo xʼin, “to[ma]jngoni yaole” (Mateo 19:5). Ninga kʼoalani, tojo jao mani kʼoa sakʼoaa likui koa̱nngóson kjoafaʼaitsjenle. Kuinga nʼio machjénsíni nga koa̱nle ngóson sʼin sikjaʼaitsjen kʼoa nga ngóson sa̱tío kon (Filipenses 2:2). Nga jtín sʼin tjío, kui xi nʼio kuinyakao kʼiatsa jmeni xi mele sʼin. Je Biblia itso: “Kʼianga nijé kjoafaʼaitsjen, ñaki nda bitjo jme xi tjínndajin” (Proverbios 20:18). Kʼiatsa jmeni xi sʼiaon xi nʼio tjínle kjoandosin, kui kjoafaʼaitsjen xi faʼaitʼa Biblia tangíntjenngio (Proverbios 8:32, 33).

KOAAN I̱ SʼIAIN:

• Ningalani nkjín koya xi chjakaonajmíni je chjoónli, kʼoati tʼeyanajmílai jotjín tokuin

• Kʼiatsa jmeni xi sʼiain, jekjoanla kʼoatʼinlai je chjoónli