Ánni nga tsín ya tsjonjinsíni yaole testigole Jeobá je kjoa política
Jin xi testigole Jeobá maijin kuinga tsín ya nojinnijin yaonajin je kjoa política xi totʼatsʼe josʼin makjainnajin kʼoa yaa Biblia chʼanginijin. Alikui partido bʼendaijin, alikui nʼiaijin votar, alikui bʼaiʼndaijin nga xá tjoaijin kʼoa alikui kontra biyolaijin je chjotaxá. Tiʼyaníjin jmeni tso je Biblia kʼoa kuinga tsín ya nojinnijin yaonajin je kjoa política.
Kui mangíntjenngijin je choa̱ xi tsakʼéjna je Jesús, nga tsín kitsjoaʼnde nga xá kitjoé (Juan 6:15). Je Jesús kʼoakitso nga je chjotale nga kʼoati tsín i̱ tsjónjin yaole i̱ Sonʼnde kʼoa kuinga nijngojin partido bʼainganʼionijin (Juan 17:14, 16; 18:36; Marcos 12:13-17).
Jé Chjotaxále Niná bʼainganʼiolaijin, je xi kisikʼaxki̱ Jesús kʼianga kitso: “Je énnda xi tʼatsʼe je kjoatéxomale ngʼajmi [je Chjotaxále Niná] kuinókjoayani ngakijnda sonʼnde” (Mateo 24:14). Nga tʼatsʼe Chjotaxále Niná nokjoanijin kuinga tsín ya nojinnijin yaonajin je kjoa política, tojñani kʼoa ninga ya jñani ʼndenajin. Kʼoa kui xá kjinenajin nga ʼmiyaijin xi tʼatsʼe chjotaxá jebi (2 Corintios 5:20; Efesios 6:20).
Kʼianga kʼoasʼin tsín ya nojinjin yaonajin je kjoa política, kui xi basenkaonajin nga ma chjakaonijin toʼya chjotani xi tʼatsʼe énnda chjotse xi tsʼe Chjotaxále Niná. Kao kui bakonijin jonʼiaijin kʼoa jobixuínjin nga makjainnajin nga je Chjotaxále Niná xi koa̱nle kʼoendajin je kjoa xi tjín sonʼnde (Salmo 56:11).
Kʼiatsa ya kuinójinjin yaonajin je kjoa política alikuijin tijtín sʼin kuiyonijin kao xíngijin xi tjío jngo tjíjtsa Sonʼnde (Colosenses 3:14; 1 Pedro 2:17). Nga̱ je religión xi ya fijin je kjoa política alikui jtín tjío je chjota xi ya tjíojin (1 Corintios 1:10).
ʼYaxkónníjin je chjotaxá. Ningalani tsín ya nojinjin yaonajin je kjoa política tonga ʼyaxkónníjin je chjotaxá. Kʼoasʼin nitjosuinjin jmeni xi tso je Énle Niná ya Romanos 13:1 jñani tso: “Ngatsʼi chjota katasítjosonle chjota xi xá tjínle”. Nitjosonníjin je kjoatéxoma, bʼainíjin tao̱nbasen kʼoa bʼainganʼiolaijin jme xi bʼéndajin je chjotaxá josʼin nga nda koatio je naxinandá. Kʼoa alikui mangínnaijin je chjotaxá tosa kʼoanʼiaijin jotso je Biblia nga bʼetsʼoantjaijin “chjotatítjon kao ngatsʼi xi ngʼa tjío”, kʼoa ngisa kʼianga jme kjoatéxoma bʼasje xi kʼoetʼale je religión (1 Timoteo 2:1, 2).
Kʼoati ʼyaxkuínjin nga jngó jngó chjota nga tiʼndele nga tsen skoéjin josʼin koaikao yaole xi tʼatsʼe kjoa política. Tobʼelañá, alikui biyochjoaijin kʼianga ma votar kʼoa alikui bʼechjoalaijin tsa ʼyani xi mele sʼin votar.
A chriansʼaa nga kʼoasʼin tsín ya nojinjin yaonajin je kjoa política. Mai. Je pastro kʼoa kao je chjotale Cristo xi tsakatio nga siglo 1 kʼoati likui ya kitsjonjin yaole je kjoa política. Jngo libro xi i̱ tso: “Ningalani be nga tjínnele nga skoe̱xkón chjota xi xá tjínle, tonga je chjotale Cristo xi títjon tsakatio alikui ya kitsjonjin yaole je kjoa política” (Beyond Good Intentions—A Biblical View of Politics). Xi ijngosani, je chjota teólogo xi Orígenes tsakʼin xi tsakui nichxin kʼia tsakʼejna nga siglo 2 kʼoa tsa siglo 3, i kitso: “Je chjotale Cristo alikui tsjoáʼnde nga xá bʼaile xi kjoa política tjenkao”.
Nga kʼoasʼin tsín ya nojinjin yaonajin je kjoa política, a xkón síkʼéjna je naxinandá. Mai. Alijme xá tsokjonni je chjotaxá, nga̱ kui tsjoachaijin je xi kjoanyʼán tjenkao. Tobʼelañá, jmeni xi tso je én xi kitsjoa Academia Nacional de Ciencias de Ucrania nga nó 2001 xi tʼatsʼe nga tsín ya nojinjin yaonajin je kjoa política, i kitso: “Tsakui nichxin nʼio nkjín xi tsín sasénle ndʼaibi nga kʼoasʼín je testigole Jeobá. Kʼoa saʼnda totʼatsʼee kjoa jebi nga kjoañʼai kisikjaʼáni je chjota nazi kao chjota comunista nichxin kjoatse”. Kʼoa itsosa én xi kitsjoa xi tsʼe naxinandá Unión soviética, je testigole Jeobá “nʼio tsabexkón je kjoatéxoma” kʼoa “kisitjoson jme xá xi kisʼenele kʼoa nʼio tsakʼénele yaole nga kisixá jña sʼentje kʼoa ya jñani tjío fábrica” kʼoa “nikʼiajin nga je tsakʼetʼale kʼoa nga xkón kisikatío je partido comunista”. Kʼoa je én xi tokisikjetʼani kʼoakitso nga je kjoamakjainle kʼoa kao jmeni xi sʼín je testigole Jeobá nichxin xi tiyoaa ndʼai “alikui xkón síkatío je naxinandá kʼoa ni chjotajinla síxkoa̱ya”.