Tokʼoakoanna nga tsaʼbe jmeni xi tso je Biblia, nga ñaki kʼoatjín kʼoa nga ñaki kixi jotso

NGASʼA.

Yaa kitsian ya Székesfehérvár, jngo ʼnde xi tíjna ya Hungría, jetsʼato jngo jmi nó tíjna naxinandá jebi. Tojo faʼaitsjenna jokji kjoañʼai kisʼe nga jejaʼato je Kjoajchántse xi majaoni.

Je kisijchána je pajchána kao majchána. Nʼio faʼaitsjenna xi tʼatsʼe nga jao, kʼoa xi ngisa nʼio faʼaitsjenna je majchána xi Elisabeth tsakʼin. Jé tsakakóyana xi tʼatsʼe Niná. Nga jan nóna nyaon nyaon tsakʼexkiaijin je Padrenuestro nga jemanjio. Tonga, kʼiaa saʼnda koanjinna josʼin tsoyanile kjoabʼetsʼoa jebi nga jeme kante nóna.

Jé pajchána kao majchána kisikuindana nga sʼa ʼndí kjiʼe̱, nga̱ je xijchána nichxin kao nitje̱n kisixá nga jngo niʼya xi tindakjoanni kji koatse. Ngatsʼi je familiana xki̱ xjaʼaon nichxin bichijtínjin kʼianga xoto. Kʼoa likui chajinna nga kʼoasʼin tsakichijtínjin.

Nga nó 1958, kitjoson josʼin kisikjaʼaitsjen je xijchána. Jngo niʼya tsakatse. Kʼoa jeya kikatejnakoa kʼoa nʼio tsjoa kisʼena. Tonga tochoatse nga tsjoa kisationajin, nga̱ xijekoanni jaon sá, cáncer kisikʼien je pana.

Nʼio ba koanna. Faʼaitsjenna nga i̱ kixinle Niná: “Kʼoanákixinle nga tindayai je pana. Nʼio machjénna je pana. Ánni nga tsín kinoʼyasíninái”. Ñaki jekjoán mena skoe jñani tíjna je pana kʼoa i kixian: “A yaa ngʼajmi ki tsokʼoa axo jngokʼa toje kichajin”. Koanxinkonkeña je xti xi tjíosa xijchále.

Nʼio nkjín nó nga me nyaon nyaon kʼia ya nyʼoá. Basenña xkóna ya jña kijna je tsjóle nʼaina kʼoa i xian: “Tʼiain kjoanda, Niná kʼoatʼinnái jñani tíjna je pana”. Kʼoati kisijéle nga katabasenkaona nga katamachoyana jmé xá kisindaniná.

Nga tejan nóna én alemán kiskotʼaya, kʼoa kʼoasʼin kisikjaʼaitsjen nga koa̱nsjaina jmeni xi mena skoe kʼianga kʼoexkia jotjín koya xo̱n tjín xi én alemán faʼaitʼa. Nga nó 1967, yaa kikotʼaya ya naxinandá xi tíjna ya Jena, xi ya nchja̱ni ʼnde jña Alemania oriental tsakʼin. Tsakʼexkiayejeña jotjín libro tsakʼasje chjota filósofo xi Alemania tsʼe, je xi nʼio tsakʼexkia kui xo̱n xi kui tínchja̱ni jme xá tjíoni je chjota. Ninga nda tso kʼa je kjoafaʼaitsjen xi tsjoá, tonga alikui tsakʼéjngo tokoan. Tosi tonda kisijéle Niná nga katabakóna jmeni xi mena skoe.

JE BIBLIA KISIKʼANTJAIYANA.

Nga nó 1970, yaa ki ijngokʼa ya Hungría kʼoa yaa kiskajian je Rose xi chjoónna koan. Nga kui nichxin je naxinandá Hungría jé chjota comunista kjinentsja. Tochoatse jaʼato nga jechixainjin, yaa tsangínjin ya Austria. Kʼoasʼin tsakʼendajinjin nga ya koanngínjin ya Sydney, xi nchja̱ni Australia, jñani tíjna jngo tsinina.

Sasa kisokoxánina ya Austria. Ñandia kʼianga je chjota xi ñatjen nixáijin kʼoakitsona nga ya koa̱nsjaina ya Biblia jmeni xi kjonangile yaona kʼoa jao libro kitsjoana xi tʼatsʼe Biblia nroatʼa. Ngotjo tsakʼexkiaña, tonga koanmesana tsaʼbe, kʼoa kiskile je testigole Jeobá, xi tsakʼasje libro jebi, kʼoa nkjínsa xo̱n kisijéle.

Kʼiakjoán nga jejenajin jngo nó nga chixainjin jngo ti xi testigole Jeobá ma kichokonnajin. Yʼana jokjoan je xo̱n xi kisijé kʼoa kʼoakitsona nga koakoyana je Biblia. Kjitʼanangi koanjyona kiskotʼaya. Nʼio koanmena nga koa̱nna, jao kʼa kiskotʼaya nga jngo xomana, nga ñandia ñandia ño ora kichotʼayaijin.

Nʼio kisasenna jmeni xi faʼaitʼa Biblia, xi tsakakóyana je testigole Jeobá. Tokʼoakoanna nga tsakakóna ya Bibliana je jaʼaínle Niná, xi én húngaro nroatʼa. Jekanñatona nó nga fia mixa̱ kʼoa niñandiajinla kinrʼoe je jaʼaín xi Jeobá tso. Tokʼoakoanna nga tsaʼbe jmeni xi tso je Biblia, nga ñaki kʼoatjín kʼoa nga ñaki kixi jotso. Jngo koya xi koanjinna kuinga je xi jekʼien alikui tijme xi beni, jngoyale tokjiofe (Eclesiastés 9:5, 10; Juan 11:11-15). Kʼoati tsaʼbe nga jngo sonʼnde chjotse kjoaʼaíkao Niná jñani nga tsín “tisʼe̱ni kjoabiya” (Apocalipsis 21:3, 4). Jeʼbe ndʼaibi nga “kjoaʼáyale xi kʼen” ya sonʼnde chjotse kʼoa nga skoe ijngokʼaña je pana (Hechos 24:15).

Je Rose nʼio tsakasenkaona. Sasa koantajani kjoamakjainnajin kʼoa to jao sá jetʼaninajin nga kichotʼayaijin je xo̱n xi tsakʼinyanajin. Tsanginníjin ngayeje je kjoajtín xi batío je testigole Jeobá. Je xi nʼio kisasennajin kui jokji tsjoake je xínkjín, nga nda chjota kʼoa nga jtín tjío (Juan 13:34, 35).

Kʼianga nó 1976, kitjoʼndenajin nga kitjasʼainjin ya Australia. Kʼianga jekichuijin, tsakjasjainíjin je testigole Jeobá. Kʼoa je testigole Jeobá xi ya tsʼe nʼio nda kiskoéyanajin. Kʼoa kʼiaa nga nó 1978 nga testigole Jeobá koainjin.

KJOANDA XI TÍSOKÓNA:

Jeni ʼbe ndʼaibi jmeni xi nʼio nkjín nó tsakasje. Kʼoati koansjaina jngo nʼai xi nʼio nda, je Jeobá (Santiago 4:8). Kʼoa jetjínna kjoachoya ndʼaibi nga skoe ijngokʼa je pana ya sonʼndenaxó xi kjoaʼaíkao je Niná (Juan 5:28, 29).

Nga nó 1989, tsangín ijngokʼaijin ya Hungría nga tsangínkʼinyalaijin je xíngijin, je miyonajin kʼoa kao xi kjaʼaí chjota xi tʼatsʼe kjoamakjainnajin. Je kjoanda xi tísokónajin kuinga siento mani je chjota xi tsakʼinyalaijin. Tsʼato jankan kao te xi jetestigole Jeobá ma, kʼoa kʼoati ya tíjnajin je mana.

Xjaʼaonjao nó nga kisijéle Niná nga katatsoyana jmeni xi nʼio kiskonangile yaona. Kʼoa jekanxjaʼaonño nó tjínle nga kitsjoana. Tojo bʼetsʼoale Niná saʼnda ndʼaibi, tonga ndʼaibi i xinle: “Tsjoale kjoanda Nʼai xi tijnai ngʼajmi, nga tsakakonái jmeni xi tsakasje nga sʼa xtia”.