Gedeón kʼoa kao xi jan siento chjota kjoajchánle

ATIʼYANÍ jméni xi kjima ibi. Je chjota xokjoan jéní chjota kjoajchánle naxinandá Israel. Je xi tjíobinyaniasí nandá tjíoʼbi. Ya séjnachrianle je juez Gedeón. Tíkotsenle jósʼín nga ʼbi nandá.

Ndala chótsenlai chjota xokjoan nga litsa tongoson tjíosʼín nga tjíoʼbi nandá. Tjínkʼa xi ñaki tjíomjejin nkjaín. Tonga jngo xi to ntsja tíʼbini nandá, ánni nga tíbesíni jme xi kjima. Nʼio machjén nga kʼoatísʼin, nga je Jeobá kʼoakitsole Gedeón nga toje katakjoejin je xi sikuinda yaole nga skʼuí nandá. Je xi tsín kʼoakisʼin kini ndʼiale. Kataʼyala ánni.

Je chjota israelita nʼio tse kjoa tsakatiojin ijngokʼangáni nga tsín kisitjosonle Jeobá. Je chjota madianita ngisa tse nganʼio kisʼele tikʼoajinni je chjota israelita kʼoa totaon tsabe. Kuinga je Jeobá kisijésínile nganʼio je chjota israelita, kʼoa Jeobá kinrʼoéle nga tsakatéjéetʼale.

Je Jeobá kʼoakitsole Gedeón nga katasíkatíonda je chjota kjoajchán, kantejao jmi koan chjota kjoajchán xi tsakʼéxkó Gedeón. Tonga jngo siento kao kanxjaʼaon jmi mani chjota kjoajchán kontrale. Tonga Jeobá, kitsole Gedeón: “Nʼio nkjín mani chjotali”. Ánni kʼoakitsosínile.

Kuinga tsín kʼoasʼin sikjaʼaitsjen je chjota israelita, tsa jelani kuinjele, nga totsʼe nganʼio kuinjenile, nga tsín machjénle nganʼiole Jeobá. Kuinga i̱ kitsosínile Jeobá je Gedeón: “Kʼoatʼinlai ngatsʼi je xi tsokjon nga katafini ndʼiale”. Kʼianga kʼoakisʼin Gedeón, kanjao jmi koanni xi kini ya ndʼiale. Kʼoa to tesa jmi koanni xi tsakatio xi skaan kao chjota kjoajchán kontrale xi jngo siento kao kanxjaʼaon jmi mani.

Tonga i̱ kitsosale Jeobá: “Nʼio nkjín chjota tjíosali”. Kʼoakitsole Gedeón kʼianga nandá kataʼbi je chjota kjoajchánle ya xongá xokji matsen kʼoa nga katabʼéteni ya ndʼiale ngatsʼi xi kuinyaniajin ya xongá nga skʼuí nandá. Kitsole Jeobá: “Sikinjení kao xi to jan siento chjota xi kasíkuinda yaole nga kaʼbi nandá nga an koasenkaole”.

Kʼianga kichó nichxin nga kiskan, je Gedeón jan ya kisʼin je chjota xi jan siento. Nga jngó jngó chjota, jngo ninda kitsjoale, kʼoa jngó jngó tií kitsjoale jña jngo yá xi lʼí tjíjko tjíoya. Kʼianga jeme basen nitjen, ngatsʼi ya kichokationdai jña tjío chjota kontrale. Kʼoa ñatjen kisikjane nindale ngatsʼi, kisixkoa̱ tií xi yʼa, kʼoa tsakʼéjta ngatsʼi, i̱ kitso: “¡Je kicha espadale Jeobá kʼoa kao tsʼe Gedeón!” Kʼianga je jaʼále je chjota kjoajchán kontrale, likuiti tsabeni jokisʼin kʼoa kitsokjon. Kitoka ngatsʼi, kʼoa jé chjota israelita kinjele.