Jezabel, jngo reina xi tsʼen koan

KʼIANGA je kʼien je rey Jeroboán, je xi te ntje̱le Israel chʼao koankjoan je rey xi tsakatéxomale. Xi nʼiosa chʼao koankjoan je rey Acab. A ʼyaní ánni. Totʼatsʼení Jezabel je chjoónle, jngo reina xi nʼio tsʼen koan.

A litsa chjoón israelitajin koan Jezabel. Tsotile koan je rey xi ya tsakatéxoma naxinandá Sidón. Je niná ndiso xi Baal ʼmi tsakʼétsʼoale Jezabel, kʼoa je xokisʼin nga kʼoati Baal tsakʼétsʼoale Acab kʼoa nga nkjín chjota israelita xi kʼoati kisʼin. Je Jezabel jtike koan Jeobá kʼoa nkjín chjota xi kinchjaya tʼatsʼe Jeobá kisikʼien. Tjínkʼa xi ya kikatioʼma ya ngijao tojoni nga tsín kinikʼien. Kʼiatsa jme xi koanmele Jezabel, saʼnda kisikʼien chjota tojoni nga tsʼe koan jme xi mele.

Ñandia kʼianga nʼio ba tjínle je rey Acab. Jezabel kitsole: “Ánni nga ba tjínsínili ndʼaibi”.

Acab kitso: “Kui jmeni xi katsona Nabot. Mena nga koatsele tsakai nangi xka̱totseele. Tonga kʼoakatsona nga tsín koa̱n tsjoána”.

Jezabel kitso: “Chóyalai, an tsjoale”.

Je Jezabel xo̱n kisikasénle chjota títjon xi tjío ya naxinandá jñani tsʼe Nabot, kitsole: “Kʼoatʼin kʼalao chjota xi tsín jme chjíle nga kʼoakatatso kʼianga je Nabot, tínchjaʼaonle Niná kʼoa kao je rey. Kʼoa tichonsjao ya naxinandá kʼoa lajao tikʼienño”.

Tiʼani nga je kisʼejinle Jezabel nga je kʼien Nabot, kitsole Acab: “Tʼin kʼoa chjoai nangi xka̱totseele”. A tsí kjoañʼaini bakinle tsakai Jezabel nga kʼoasikji chʼaokisʼin.

Kuinga kichokasíni nichxin nga jngo chjota xi Jehú ʼmi kisikasén Jeobá nga kisikʼien Jezabel. Kʼianga je kinrʼoé Jezabel nga Jehú kuichó, kisikʼi xko̱n, nga mele nga naskánasʼin koa̱ntsen. Tonga nga je kichó Jehú kʼoa tsabe nga ya tíjnajchxo ventanale, kitsole chjota xi ya tjíokao ya ndʼiale rey: “¡Tichonjenngio!” Kisitjoson chjota jebi, josísʼin matsen sén xi faʼaitʼa ibi. Tsakʼaonjenngi Jezabel, kʼoa kʼien. Kʼoasʼin kinikʼien Jezabel je reina xi nʼio tsʼen koan.