Jótso je Biblia xi tʼatsʼe nga xínkjín fayokao je chjota

Tjínkʼa je chjota xi soa male kʼianga kui fáoyani xi tʼatsʼe nga xínkjín fayokao je chjota. Tonga nga kui nchja̱ni je Biblia xi tʼatsʼe jebi kao kjoaxkóntokon tsoya kʼoa ñaki tsoya kixi jokjoantjínni. Jmeni xi tsoya nʼio basenkaoná. Kuinga basenkaoniná nga̱ Énle Ninání kʼoa nga je Niná kisindaná bení jmeni xi nda sikatíoná. Je Niná kʼoatsoná jósʼiaan nga nda kuiyoaa ngixko̱n kʼoa jméni xi koasenkaoná nga nda kuiyoaa ngantsjai nichxin.

1. Jósʼin tíjna ngixko̱n Jeobá kʼianga xínkjín fayokao je chjota

Jngoo kjoatjao xi tʼatsʼe Jeobá tínroani kʼianga ma fayokao xínkjín xi jechixan. Je Jeobá kui xi mele nga katasítsjoayale xínkjín je xi xʼin kao xi chjoón. Ali tsa tokuijin nga tsakʼainile kjoanda jebi xi jechixan nga xti sʼe̱le, kʼoati kuinga koakongañále xínkjín jokji tsjoake kʼoa nga tsjoa katasatío kon. Kuinga i̱ tsoni je Énle Niná: “Titsjoayakoai je chjoón xi chixankoai saʼnda nga sʼa xti” (Proverbios 5:​18, 19). Je Jeobá kui xi mele kʼianga kixi katamale xínkjín je choʼndale xi jechixan. Kuinga tsín koa̱n sichajngitʼanile xínkjín (tʼexkiai Hebreos 13:4).

2. Jméni xi kjoachajngi ʼmi

Je Biblia kʼoatso nga “nijejin xi chajngi [...] sʼe̱kjoatjaole kjoatéxomale Niná” (1 Corintios 6:​9, 10). Je én griego xi kisichjén je chjota xi kiski je Biblia kʼianga kui kinchja̱ni xi tʼatsʼe kjoachajngi, kui én xi pornéia tso. Én jebi nkjín koya tínchja̱ni. Tínchjani 1) je xi xínkjín fayokao nga kjesa bixanjin,a 2) je xi tixʼin kʼoa tsa tiyánchjín xínkjín fayokaoni, kʼoa 3) je xi cho̱ fayokao. Kʼianga tsín kjoachajngi nojiaan yaoná, fayatsjoañá kon je Jeobá kʼoa kʼoati tsjoa sʼe tokoán (1 Tesalonicenses 4:3).

KATAʼYASAI JME XI TÍNCHJA̱NI

3. Chʼa̱sjengi je kjoachajngi

Jngo chjota xi kixi koan xi José tsakʼin, tsakʼasjengi je kjoachajngi nga̱ kui xi koanmele nga nda kikao yaole. Tʼexkiao Génesis 39:​1-​12 kʼoa cho̱bayaño jebi:

• Ánni kitokani José (chótsenlao versículo 9).

• Jósingái ji, a nda kisʼin je José nga kitoka. Ánni.

VIDEO: Chʼa̱sjengiaa je kjoachajngi (5:06)

Je Jeobá kui xi mele nga tsín kjoachajngi kuinójiaan yaoná. Tʼexkiao 1 Corintios 6:​18 kʼoa cho̱bayaño jebi:

• Jméni xosikao je chjota nga kjoachajngi ska̱jinni.

• Jókoa̱n sʼiain nga tsín kjoachajngi ska̱jin.

4. Tisenxinlai xi chʼaotjín

VIDEO: Kʼoéxkiaa je Biblia ánni nga tsínkui ska̱jinsíñá xi chʼaotjín (3:02)

• Jméni xi kisʼin je ndsʼee kʼianga koanjinle nga tsín nda kuichomani jmeni xi tísʼín.

Saʼnda je chjotale Cristo xi kixi tjíofitʼale je Niná, sakʼoa kʼoati ñʼai male nga nda batío je kjoafaʼaitsjenle. Jméni xi sʼiain nga tsín kjoajndí cha̱niyai jkui. Tʼexkiao Filipenses 4:8 kʼoa cho̱bayaño jebi:

• Jméni xi tjínnele si̱kjaʼaitsjeen.

• Jósingái ji, a koasenkaoná nga tsín kjoajndí jtsaojiaan kʼiatsa kʼoéxkiaa je Biblia kʼoa tsakui xále Niná kʼoasʼiaan. Ánni.

5. Je kjoatéxomale Jeobá basenkaoná

VIDEO: Xi tsín sínkjínle kon kjoa tsaojin (9:31)

• Ánni nga kjoa kiskajinni je ti xi bʼaxki̱ ya texto xi kabʼexkiaa (chótsenlao Proverbios 7:​8, 9).

• Ya Proverbios 7:​23, 26 kʼoatso nga nʼio chʼaosʼin bichómani kʼianga nichajngiaa. Tonga jósʼin kuichomani tsa tsje kjuinkoaa yaoná.

• Kʼiatsa nda koanngínkoaa yaoná, jósʼin koasenkaoná nga sʼe̱ná kjoabijnachon ngantsjai.

Tjínkʼa xi kʼoatso nga tsín tsjoakená Niná, nga̱ bʼéchjoale je chjota nga tixʼin xínkjín kʼoa tsa tiyánchjín xínkjín kjoáyokaoni. Tonga alikui kʼoatjín, je Jeobá nʼio tsjoakená kʼoa kui xi mele nga kuiyoaa ngantsjai nichxin. Kʼoa tsa mená kuiyoaa ngantsjai nichxin tjínnele si̱tjosoán jotso kjoatéxomale. Tʼexkiao 1 Corintios 6:​9-​11 kʼoa cho̱bayaño jebi:

• A tokui xi chʼaosʼin bekon je Niná nga tixʼin xínkjín kʼoa tsa tiyánchjín xínkjín kjoáyokaoni chjota.

Tsa mená nga nda kuiyoaa ngixko̱n Niná, machjén nga si̱kʼantjaiyaa yaoná jñani chasaná. Jmé kjoanda xi so̱koná tsa kʼoasʼiaan. Tʼexkiao Salmo 19:​8, 11 kʼoa cho̱bayaño jebi:

• Jósingái ji, a kixi tjín jmeni xi tso je kjoatéxomale Niná. Ánni.

XI KACHOTʼAYÁ

Jngoo kjoatjao xi tʼatsʼe Jeobá tínroani kʼianga ma fayokao xínkjín xi jechixan, kʼoa je Jeobá kui xi mele nga katasítsjoayale xínkjín xi jechixan.

Jmé xi kamajinli

• Jókji nkjín koya tínchja̱ni je én xi kjoachajngi tso.

• Jmé xi koasenkaoná nga tsín kjoachajngi ska̱jiaan.

• Jósʼin basenkaoná nga kʼoasʼin mangínkoaa yaoná jotso je kjoatéxomale Jeobá.

XI KOASENKAOSALI

Kataʼyai ánni nga menile je Niná nga katabixankao xínkjín je xʼin kʼoa kao je chjoón tsa mele nga koatiokao xínkjín.

“Jótso je Biblia nga tobatiokao xínkjín je chjota nga kjesa bixanjin” (Yaa faʼaitʼa ya Internet ya jw.org)

Nga bʼéchjoa Biblia nga tixʼin xínkjín kʼoa nga tiyánchjín xínkjín fayokaoni chjota alikuijin xi tsonile nga jticha koaan kʼoa nga chʼa̱sjengiaa je xi kʼoasʼín.

“A chʼaotjín tsa tixʼin xínkjín kʼoa tsa tiyánchjín xínkjín koa̱ntsjoakeni je chjota” (Yaa faʼaitʼa ya Internet ya jw.org)

Jósʼin basenkaoná je kjoatéxoma xi faʼaitʼa Biblia tʼatsʼe nga xínkjín fayokao je chjota.

“A jetísíchajngi tsa ʼya xi to tsʼoa sichjén nga siñakon xínkjín” (Yaa faʼaitʼa ya Internet ya jw.org)

Jméni xi tsakasenkao jngo chjota xi tixʼin xínkjín koantsjoakeni tsakai nga kisikʼantjaiya yaole kʼoa nga kui kʼoakisʼin jme xi sasénle Niná. Tʼexkiai jñani tso “Nda tsaʼyatokonna”.

“Je Biblia síkʼantjaiyaa chjota” (La Atalaya, 1 de abril de 2011)