KJOAʼMIYA 45
Jósʼin tíjna nga tsín i̱ nojiaan yaoná jmeni xi chon sonʼnde
Je Jesús i kitsole je chjotatjenngile: “Jon likui i̱ tsaon” (Juan 15:19). Je Jesús kui xi kitsonile nga tsín i̱ nojiaan yaoná jmeni xi chon sonʼnde, jolani nga tsín kjoa política nojiaan yaoná kʼoa nga tsín kjoajchán mangián. Tonga sakʼoa ñʼai maná nga tsín kʼoanʼia josʼín je chjota nga̱ besinná. Jméni xi koasenkaoná nga tsín i̱ kuinójiaan yaoná jmeni xi chon sonʼnde kʼoa nga kixi koanngíntʼalee je Jeobá.
1. Ñá xi chjotale Cristo maa jósʼin ʼyatokoán je chjotaxá
Ñá xi chjotale Cristo maa ʼyaxkónñá je chjotaxá. Je Jesús i kitso: “Tʼailao César je xi tsʼe César”. Kʼoa kʼoanʼia xi chjotale Cristo maa, nitjosonñá je kjoatéxoma xi tjín naxinandáná jolani nga bʼechjiá tao̱nbasen (Marcos 12:17). Je Biblia kʼoatso nga kuinga tjíoni je chjotaxá nga je Jeobá xi títsjoáʼnde (Romanos 13:1). Kuinga totjenni choa̱le jokji nitjosonlee je chjotaxá, je xi ngisa nitjosonlee jé Niná. Kʼoa ñaki tjínjngoo tokoán nga toje Niná kʼoa kao chjotaxále xi koa̱nle kʼoendajin je kjoa xi tjín i̱ Sonʼnde.
2. Jósʼin bakoá nga tsín i̱ nojiaan yaoná jmeni xi chon sonʼnde
Alikui kjoa política nojiaan yaoná tojo kisʼin je Jesús. Kʼianga tsabe je chjota je kjoaxkón xi tsakatío je Jesús, koanmele nga rey kisikao, tonga je alikui kitsjoaʼnde (Juan 6:15). Tijé Jesús kʼoakitsoni anni nga tsín kitsjoaʼndeni, i kitso: “Je kjoatéxomana likui tsʼe i̱ sonʼndebi” (Juan 18:36). Ñá xi chjotale Cristo maa nkjín koya tjínni josʼin bakoá nga tsín i̱ nojiaan yaoná jmeni xi chon sonʼnde. Tobʼelañá, alikui kjoajchán mangián (tʼexkiai Miqueas 4:3). Ningalani ʼyaxkoán je bandera, tonga alikui kʼoasʼin ʼyaxkoán josʼin ʼyaxkoán je Niná (1 Juan 5:21). Aliʼya chjotaxá kʼoa aliʼya partido mangíntʼalee kʼoa ni kontrajinla biyolee. Nga kʼoanʼia kʼoasʼin bakoñá nga toje Chjotaxále Niná bʼainganʼiolee.
KATAʼYASAI JME XI TÍNCHJA̱NI
Kataʼyala jósʼin chotʼayakao je kjoamakjainná kʼianga tsín i̱ nojiaan yaoná jmeni xi chon sonʼnde kʼoa jméni xi sʼiaan nga kui chjoéjiaan jmeni xi tsjoa kʼoe kon je Jeobá.
3. Ñá xi chjotale Cristo maa alikui i̱ nojiaan yaoná jmeni xi chon sonʼnde
Nda choa̱ tsakʼéjnaná je Jesús kʼoa kao je chjotatjenngile. Tʼexkiao Romanos 13:1, 5-7 kao 1 Pedro 2:13, 14. Xijekoa̱n, chótsenlao VIDEO kʼoa cho̱bayaño jebi:
Ánni nga tjínnenile jchaxkoán je chjotaxá.
Jósʼin bakoá nga nitjosonlee je chjotaxá.
Kʼianga sʼe kjoajchán, tjínkʼa naxinandá xi kʼoatso nga tsín kjoa tsjonjin yaole, totsjoánganʼiole nga jao naxinandá xi tjíokján. A kʼoasʼin tíjna nga tsín kjoa nojiaan yaoná. Tʼexkiao Juan 17:16 kʼoa xijekoa̱n, chótsenlao VIDEO kʼoa cho̱bayaño jebi:
Jósʼin tíjna nga tsín ya nojiaan yaoná jmeni xi chon sonʼnde.
Jónʼia kʼianga kʼoatsoná je chjotaxá nga kui kʼoasʼiaan je xi kontra tíjnale je kjoatéxomale Niná. Tʼexkiao Hechos 5:28, 29. Xijekoa̱n, chótsenlao VIDEO kʼoa cho̱bayaño jebi:
Tsa jngo kjoatéxomale chjotaxá xi kontra tíjnale je kjoatéxomale Niná, ʼyáni xi si̱tjosonlee.
A koaan si̱kʼaxki̱ kʼai kʼiáni nga tsín koa̱n si̱tjosonlee je chjotaxá.
4. Alikui kʼoanʼia josʼín je chjota kʼoa alikui kʼoasʼin nikjaʼaitsjeen
Tʼexkiao 1 Juan 5:21. Xijekoa̱n, chótsenlao VIDEO kʼoa cho̱bayaño jebi:
Ánni nga tsín kjoa política kitsjonjinni yaole je Ayenge kʼoa nga tsín kisʼinni saludar bandera.
Jósingái ji, a nda kisʼin nga kʼoakisʼin.
Jósasʼin chotʼayakao je kjoamakjainná. Chótsenlao VIDEO kʼoa cho̱bayaño jebi:
Jósʼin koakoá nga tsín i̱ nojiaan yaoná jmeni xi chon sonʼnde kʼianga kui chotsenlee nga síská je chjota xi xinxin naxinandále.
Jósʼin koakoá nga tsín i̱ nojiaan yaoná jmeni xi chon sonʼnde kʼianga ñá bʼetʼaná jmeni xi kjoéjin je chjota político kʼoa ninga kui xi koasenkaoná.
Jósʼin bʼetʼaná jmeni xi faʼa ya noticia kʼoa kao jmeni xi tso je chjota.
Kʼiáni nga tsín kʼoati nʼia josʼín je chjota kʼoa nga tsín kʼoasʼin nikjaʼaitsjeen josʼin síkjaʼaitsjen
TJÍNKʼA XI I̱ TSO: “Ánni nga tsín nʼiani saludar bandera kʼoa nga tsín jndani himno nacional”.
Jókʼuínlai tsa ʼya xi kʼoakuitsoli.
XI KACHOTʼAYÁ
Jmeni xi sʼín, jmeni xi tso kʼoa josʼin síkjaʼaitsjen je chjotale Cristo yaa bakóni nga tsín kjoa política tsjonjin yaole.
Jmé xi kamajinli
Jósʼin tjínnele jchatokoán je chjotaxá.
Ánni tsín kjoa política nojinñá yaoná.
Jósʼin chotʼayakao je kjoamakjainná kʼianga tsín i̱ nojiaan yaoná jmeni xi chon sonʼnde.
XI KOASENKAOSALI
Jméni xi sakʼoa tjínnele sʼiaan nga tsín i̱ kuinójiaan yaoná jmeni xi chon sonʼnde.
Jósʼiaan nga tongini kuiyondaa tsa totseni chótʼayakao kjoamakjainná nga tsín ya nojiaan yaoná jmeni xi chon sonʼnde.
Alikui ya kuinójiaan yaoná jmeni xi sʼín je chjota kʼianga ya tiyojinlee (4:25)
Tjínkʼa xi kʼoasʼin síkjaʼaitsjen nga kui xi ngisa nʼio chjíle kʼianga naxinandáná nitoánntjé, tonga a kʼoatjín.
Jósʼin bakoñá nga tsín i̱ nojiaan yaoná jmeni xi chon sonʼnde kʼianga chjoejiaan xá xi nʼia.
“Kʼoailee kuenta Niná nga jngó jngoá” (La Atalaya, 15 de marzo de 2006)